Mau bāsileia hanahana
Hu’a parau
Tē ha’api’i nei te ha’api’ira’a tumu i heheuhia a te ’Ēkālesia a Iesu Mesia i te Feiā Mo’a i te mau Mahana Hope’a nei ē tei fa’aho’ihia mai, te mau tamari’i ato’a a te Atua, ’eiaha rā te tahi pae iti roa, e’ita e ferurihia i’ō nei—e roa’a i te hope’a te hō’ē o nā bāsileia hanahana e toru, tae noa atu i te mea iti a’e, « ’o tei hau a’e i te ’ite ta’ata nei » [Te Ha’api’ira’a Tumu ’e te mau Fafaura’a 76:89] […]
Te tahi atu ha’api’ira’a tumu ’e te ’ohipa hō’ē roa a te ’Ēkālesia i fa’aho’ihia mai nō ni’a ïa i te mau fa’auera’a ’e te mau fafaura’a i heheuhia mai ’o tē pūpū nei i te mau tamari’i ato’a a te Atua i te rāve’a mo’a ’ia fa’ata’ahia nō te ao teitei roa a’e i roto i te bāsileia tiretiera. Teie tāpaera’a teitei roa a’e—te fa’ateiteira’a i roto i te bāsileia tiretiera—’o te rōtahi ïa a Te ’Ēkālesia a Iesu Mesia i te Feiā Mo’a i te mau Mahana Hope’a nei […]
I roto i te « hanahana tiretiera » tē vai ra e toru fāito, ’e te fāito teitei roa a’e ’o te fa’ateiteira’a ïa i roto i te bāsileia tiretiera […]
Tē tītau nei te fa’anahora’a a te Atua, tei niuhia i ni’a i te parau mau mure ’ore, ē ’ia rae’ahia te fa’ateiteira’a maori rā nā roto ana’e i te ha’apa’o-maita’i-ra’a i te mau fafaura’a ’o te hō’ē fa’aipoipora’a mure ’ore, i rotopū i te hō’ē tāne ’e te hō’ē vahine i roto i te hiero mo’a, fa’aipoipora’a ’o te rae’ahia i te feiā ha’apa’o ato’a […]
E ’ere te Ha’avāraʼa Hopeʼa i te hō’ē noa hi’opo’araʼa nō te tāʼāto’araʼa o te mau ’ohipa maita’i ʼe te ʼino—’o tā tātou i rave. ’Ua fa’atumuhia te reira i ni’a i te ravera’a hope’a o tā tātou mau ’ohipa ’e tō tātou mau mana’o—te mea i riro mai ai tātou. E fa’ata’ahia tātou nō te ora mure ’ore maoti te hō’ē rāve’a o te fa’afāriura’a […]
Maoti Iesu Mesia ’e tāna Tāra’ehara, ’ia hi’a ana’e tātou i roto i teie orara’a, e nehenehe tātou e tātarahapa ’e e ho’i fa’ahou i ni’a i te ’ē’a o te fafaura’a ’o te arata’i atu i te mea tā tō tātou Metua i te ao ra e hina’aro nō tātou.