Te mana tā’ati
Hu’a parau
E mana’o pinepine tātou ē, te mana nō te tā’ati, nō te tahi noa ïa mau ’ōro’a o te hiero, terā rā e mea faufa’a te reira mana ’ia ti’a i te mau ’ōro’a ato’a ’ia haamanahia ’e ’ia tā’atihia i ni’a i te fenua nei ’e i te ra’i ra […]
Te ti’a-mau-ra’a tā te mana nō te tā’ati e hōro’a i te mau ’ōro’a o te autahu’ara’a, tei roto ato’a ïa te mau ’ōro’a mono e ravehia nā te feiā ora nō te feiā pohe i roto i te vāhi i fa’ata’ahia e te Fatu—tōna hiero […] Teie mana nō te tā’ati e fa’a’itera’a ti’a mau ïa nō te parauti’a, te aroha, ’e te here o te Atua.
Nō te roa’ara’a ia tātou te mana nō te tā’ati, e fāriu ’ōhie atu ïa tō tātou ’ā’au i te feiā nā mua atu ia tātou. Te tomo nei te ’amuitahira’a o te mau mahana hope’a nei nā roto i te pāruru […]
Te fa’a’itera’a teitei a’e ’e te mo’a a’e o te mana nō te tā’ati tei roto ïa i te tā’atira’a mure ’ore o te hō’ē tāne ’e te hō’ē vahine i roto i te fa’aipoipora’a ’e i roto i te tā’amura’a i rotopū i te huita’ata nei i roto i tō rātou mau u’i ato’a […]
E nehenehe tātou ’e ’ite ē, nō te aha « ’ua ha’amauhia te fa’aipoipora’a i rotopu i te tāne ’e i te vahine e te Atua ’e ’ua riro te ’utuāfare ’ei tumu nō te ’ōpuara’a a Tei Hāmani nō te hope’a mure ’ore ’o tāna mau tamari’i » [« Te ’Utuāfare : E Poro’i i tō te Ao nei », Vaira’a buka ’Evanelia]. I te reira ato’a taime, e ’ite tātou ē, i roto i teie tau ti’a ’ore, e ’ere teie i te ti’ara’a mau, e ’ere ato’a i te hō’ē ’ohipa e tupu mau ā nō vetahi. Terā rā tē ti’aturi nei tātou i te Mesia […]
Tē fa’a’ite pāpū nei au ē, tē vai mau nei te pūai ’e te mana nō te tā’atira’a tei fa’aho’ihia mai i te fenua nei nā roto ia Iosepha Semita, ’e te mea e tā’atihia i te fenua nei, e tā’ati-mau-hia ïa i te ra’i.