Ni’a i te ’ē’a au i tā rātou ’ohipa
Hu’a parau
E mirioni te melo o te ’Ēkālesia tā’u i māuruuru, ’o tē haere mai nei i te Fa’aora ’e ’o tē haere ti’a nei i mua i ni’a i te ’ē’a nō te fafaura’a […] Tō ’outou fa’aro’o pūai i te Metua i te ao ra ’e i te Fatu Iesu Mesia, nā reira ato’a tō ’outou orara’a peu ’ore ’e te pūpū rahi, e mea fa’auru mau ïa nō’u nō te riro ’ei ta’ata maita’i a’e ’e ’ei pipi maita’i a’e.
’Ua here au ia ’outou. ’Ua fa’ahiahia vau ia ’outou. Tē ha’amāuruuru nei au ia ’outou. ’E tē ’ārue nei au ia ’outou.
E parau i roto i te Buka a Moromona nā Samuela te ’āti Lamana ’o tē pū’ohu maita’i i tō’u mana’o nō ’outou.
« ’Oia ho’i i te pae rahi ’o tē haere ra nā ni’a i te ’ē’a au i tā rātou ’ohipa […] ’e tē tūtava nei rātou ma te tu’utu’u ’ore ’e te itoito ’ia fa’a’ite i te parau mau i te toe’a o tō rātou mau taea’e » [Helamana 15:5–6 ; tu’uhia te ha’apāpūra’a] […]
Tē here nei ’outou ’e te tāvini nei, tē fa’aro’o nei ’e te ha’api’i mai nei, tē aupuru nei ’e te tāmarū nei ’e te ha’api’i atu nei ’e te parau pāpū atu nei nā roto i te mana o te Vārua Maita’i. Tē ha’apae pinepine nei ’e tē pure pinepine nei ’outou, tē rahi noa atu ra tō ’outou ha’eha’e ’e tē pāpū noa atu ra tō ’outou fa’aro’o i te Mesia, « ē tae noa atu ’ua ’ī tō [’outou] vairua i te ’oa’oa ’e te hau, ’oia ïa, ē tae noa atu ’ua mā roa ’e ’ua mo’a tō [’outou] ’ā’au, ’e ’ua noa’a mai taua mo’ara’a ra nō te mea ’ua hōro’a [’outou] i tō [’outou] ’ā’au i te Atua » [Helamana 3:35].
[…] ’Outou e haere ti’a atu nei i mua i ni’a i te ’ē’a au i tā ’outou ’ohipa, ’o ’outou te pūai nō te ’Ēkālesia a te Fa’aora i fa’aho’ihia mai. Mai tā te Fatu i parau fafau, « e heheuhia mai te mau terōno ’e te mau hau ari’i, te mau bāsileia ’e te mau mana, ’e e tu’uhia atu ho’i i ni’a iho ia rātou ato’a ’o tei tāmau itoito i roto i te ’evanelia a Iesu Mesia » [Te Ha’api’ira’a Tumu ’e te mau Fafaura’a 121:29].