E mau taea’e ’e e mau tuahine i roto i te Mesia
Hu’a parau
Tē ha’api’i nei te ’evanelia a Iesu Mesia ē, e mau tamāroa ’e e mau tamāhine vārua fānauhia tātou pā’āto’a nā te mau metua i te ao ra tei here mau ia tātou ’e i ora na ho’i tātou ’ei ’utuāfare i mua i te Atua hou ’a fānauhia mai ai tātou i ni’a i teie fenua. Tē ha’api’i ato’a nei te ’evanelia ē, ’ua hāmanihia tātou pā’āto’a ’ia au i te hōho’a ’e i te huru o te Atua. Nō reira, e mea ’aifaito tātou i mua iāna […]
’Ei pipi nā te Mesia, tē anihia mai nei ia tātou ’ia fa’arahi i tō tātou fa’aro’o ’e tō tātou here nō tō tātou mau taea’e ’e mau tuahine vārua, nā roto i te ’āmui-pāpū-ra’a i tō tātou ’ā’au i roto i te tāhō’ē ’e te here, noa atu te huru o tō tātou mau ta’a-’ē-ra’a, nā roto ho’i i te reira e tupu ai i te rahi tō tātou ’aravihi ’ia fa’atupu i te fa’atura i te tura o te mau tamaiti ’e te mau tamāhine ato’a a te Atua […]
’Aita e pārahira’a nō te mau mana’o ha’avā ’aore rā nō te mau ’ohipa ’ino i roto i te autahira’a o te Feiā Mo’a […]
E ti’a ānei ia tātou ’ia fa’a’āfaro i tō tātou ’ā’au ’e tō tātou vārua i ni’a i te ’itera’a ’e i te fa’a’itera’a ē, e mea ’aifāito tātou pā’āto’a i mua i te Atua, ’e ’ua fāri’i tātou pā’āto’a i te hō’ē ā pūai ’e te hō’ē ā faufa’a ’āi’a mure ’ore. E ti’a ānei ia tātou ’ia fāna’o hau atu i te aura’a fēti’i pae vārua e vai nei i rotopū ia tātou ’e ’ia ha’afaufa’a i te mau huru ta’a ’ē ’e te mau hōro’a rau tā tātou pā’āto’a e mau nei […]
Tē fa’a’ite pāpū atu nei au ia ’outou ē, mai te mea e tāmau noa tātou i te pe’e i te reira haere’a i roto i tō tātou orara’a tāhuti nei, e ha’amata mai te hō’ē mahana ’āpī ’e te hō’ē māramarama ’āpī ’o tē tūrama i tō tātou orara’a ’e e tūrama ho’i i te mau rāve’a nehenehe nō te ha’afaufa’a hau atu ’e ’ia ha’amaita’i-rahi-hia atu ā nā te raura’a tei poietehia e te Atua i rotopū i tāna mau tamari’i. E mea pāpū ē, e riro mai tātou ’ei mauha’a i roto i tōna rima nō te fa’atupu i te fa’atura ’e i te tura i rotopū i te tā’āto’ara’a o tāna mau tamaiti ’e mau tamāhine.