Te haerera’a i roto i te tā’amura’a o te fafaura’a ’e te Mesia
Hu’a parau
E pāhono mai te Fatu ia tātou tāta’itahi i roto i tō tātou mau mahana ’ati, mai te mea e mā’iti tātou ’ia tū’ati atu i tō tātou orara’a i tōna. ’Ua fafau mai ’oia e haere mai nā muri iho ia tātou nā ni’a i te ’ē’a.
Tē pi’i nei tātou i te reira te haerera’a nā ni’a i te ’ē’a o te fafaura’a—hō’ē ’ē’a e ha’amata nā roto i te fafaura’a o te bāpetizora’a ’e e arata’i atu i te mau fafaura’a hōhonu atu ā ’o tā tātou e rave i roto i te hiero […] E ’ere noa te hō’ē fafaura’a i te hō’ē ’ohipa fa’aaura’a, noa atu e mea faufa’a mau te reira. Nō ni’a ra i te hō’ē tā’amura’a […]
E misiōni tāna nō te fa’aha’eha’ara’a. E fārerei mai Iesu Mesia ia tātou i te vāhi tei reira tātou ’e mai te au i tō tātou huru. ’O te tumu ïa o te ’ō, o te tātauro ’e o te mēnema. ’Ua tonohia mai te Fa’aora nō te tauturu ia tātou ’ia upo’oti’a. Terā rā, te fa’aeara’a i te vāhi tei reira tātou, e’ita e hōpoi mai i te fa’aorara’a ’o tā tātou e ’imi nei […] E misiōni ato’a tāna nō te ma’uera’a. E ’ohipa ’oia ’ōroto ia tātou nō te fa’ateitei ia tātou i te vāhi tei reira ’oia ’e, nō te ravera’a i te reira, e fa’ati’a ia tātou ’ia riro mai iāna te huru i teienei. ’Ua haere mai Iesu Mesia nō te fa’ateitei ia tātou. ’Ua hina’aro ’oia e tauturu ia tātou ’ia riro mai. ’O te tumu ïa nō te hiero. E ti’a ia tātou ’ia ha’amana’o : E ’ere nā te haere’a ana’e e fa’ateitei ia tātou ; nā te hoa—tō tātou Fa’aora. ’E teie te tumu o te tā’amura’a o te fafaura’a […]
’A ha’amata i te vāhi tei reira ’outou. ’Eiaha e vaiiho i tō ’outou huru orara’a ’ia ha’ape’ape’a ia ’outou. ’A ha’amana’o ē, te terera’a ’aore rā te vaira’a i ni’a i te ’ē’a e ’ere ïa i te mea faufa’a atu i te haerera’a i mua […]
Maoti a’e ra, tē haere ’āmui nei tātou nā ni’a i teie ’ē’a, ma te tuō i te fa’aitoitora’a i te roara’a o te ’ē’a. Ma te fa’a’itera’a i tō ’outou ’itera’a o te ta’ata iho i te Mesia, e ha’apūai ’outou i tō ’outou iho itoito.