Te tuha’a ’ahuru : ’Īriti i te mau ha’amāramarama o te ra’i
Hu’a parau
Tā tātou mau mea ato’a ’e tātou iho nei, nō ’ō mai ïa i te Atua. ’Ei pipi nā te Mesia, ’ua ineine tātou i te hōro’a nō te feiā ’ati a’e ia tātou.
I te mau mea ato’a tā te Fatu e hōro’a mai, ’ua ani mai ’oia ’ia fa’aho’i iāna ’e i tōna bāsileia i ni’a i te fenua nei, i te 10ra’a o tā tātou ’āpī. ’Ua parau fafau mai ’oia ē, ’ia ha’avare ’ore tātou i roto i tā tātou tufa’a ’ahuru, e « [’īriti ’oia] i te mau ha’amāramarama o te ra’i ra ’a nīni’i atu ai i te tao’a rahi ’ei maita’i nō ’outou » [Malaki 3:10]. ’Ua parau fafau mai ’oia e pāruru ’oia ia tātou i te ’ino […]
E rave rahi rāve’a e ’īriti ai te mau ha’amāramarama o te ra’i. Tē vai ra i te pae mātēria, e rave rahi rā i te pae vārua. Tē vai ra e mea iti ’e te ’ōhie i te mata ’ia ’ore e ’ite. ’A ti’aturi i te taime a te Fatu ; e tae mai iho ā te mau ha’amaita’ira’a […]
Tē parau nei tō te ao i te tuha’a ’ahuru ’ei ’ohipa pae moni, terā rā te pae rahi o teie ture mo’a nō tātou, ’o te fa’aro’o ïa. Te ha’avare-’ore-ra’a i roto i tā tātou tuha’a ’ahuru, e rāve’a ïa nō te fa’a’ite i tō tātou ineine ’ia tu’u nā mua i te Fatu i roto i tō tātou orara’a, nā ni’a roa i tā tātou mau ha’ape’ape’ara’a ’e te hia’ai. Tē parau fafau nei au ē, ’ia ti’aturi ’outou i te Fatu, e tae mai te mau ha’amaita’ira’a o te ra’i […]
Maoti te ’āpī hau a te Fatu i noa’a nā roto i tā ’outou tuha’a ’ahuru rima here, i ha’apa’arihia ai te ha’aputura’a a te ’Ēkālesia, i fāna’ohia ai te mau rāve’a nō te fa’ahaere i te ’ohipa a te Fatu i’ō atu i te mau mea ato’a tei orahia e tātou. ’Ua ’ite te Fatu i te tā’āto’ara’a, ’e i tōna tau mau, e ’ite tātou i tāna mau ’ōpuara’a mo’a i te tupu mai.