Tō tātou hoa tāmau
Hu’a parau
The Only One [Te hō’ē ana’e], nā Malory Fiso
E hina’aro tātou, ’e e hina’aro ā ’outou i te auhoara’a tāmau a te Vārua Maita’i. I teienei, e hina’aro tātou i te reira, ’ua ’ite rā tātou nā roto i te mau ’ohipa i tupu ē, ’e ’ere i te mea ’ōhie ’ia fa’atupu i te reira. Tātou tāta’itahi tē feruri nei ’e tē parau nei ’e tē rave nei i te mau ’ohipa i roto i tō tātou orara’a i te mau mahana ato’a, ’o tē nehenehe e fa’a’ino’ino i te Vārua.
’Ia tupu ana’e te reira, e tupu mau ihoā te reira, e nehenehe tātou e ’ite i te fa’ari’i-’ore-ra’a o te Fatu. ’E e nehenehe tātou e fa’ahemahia ’ia feruri ē, ’o tātou ana’e […]
Mai te peu tē fifi ra ’outou ’ia putapū i te Vārua Maita’i, e nehenehe ’outou e uiui ia ’outou iho, tē vai ra ānei te hō’ē mea e ti’a ia ’outou ’ia tātarahapa ’e ’ia fa’ari’i i te fa’a’orera’a hapa. E nehenehe ’outou e pure ma te fa’aro’o nō te ’ite e aha te mea e rave ’ia tāmāhia, ’ia ti’a ia tātou ’ia fa’ari’i i te auhoara’a tāmau a te Vārua Maita’i.
Mai te mea e hina’aro ’outou e fa’ari’i i te auhoara’a a te Vārua Maita’i, e ti’a ia ’outou ’ia hina’aro i te reira nō te mau tumu maita’i. E ti’a i tā ’outou fā ’ia riro ’ei a te Fatu. Mai te peu e mea ’ōpipiri tā ’outou mau fa’aitoitora’a, e mea fifi nō ’outou ’ia fa’ari’i ’e ’ia putāpu i te mau muhumuhu a te Vārua.
Te tāviri nō’u ’e nō ’outou ’o te hina’arora’a ïa i te mea tā te Fa’aora e hina’aro. E ti’a i tō tātou mau hina’aro ’ia tura’ihia e te here mau o te Mesia […]
E tonohia te Vārua Maita’i i te mau melo ha’apa’o maita’i o te fafaura’a a te ’Ēkālesia a Iesu Mesia. E riro tō ’outou mau ’itera’a ’ei ’itera’a ta’a ’ē, ’e e arata’i te Vārua ia ’outou mai tei au i tō ’outou fa’aro’o ’e i tō ’outou ti’ara’a ’ia fa’ari’i i te heheura’a nō ’outou ’e nō te feiā tei herehia ’e tei tāvinihia e ’outou. Tē pure nei au ma tō’u ’ā’au ato’a ’ia tupu tō ’outou ti’aturira’a i te rahi.