“Ang Pasko Usa ka Paglaom, Kalinaw, ug Gugma,” Alang sa Kalig-on sa mga Kabatan-onan, Peb. 2024.
Ang Pasko Usa ka Paglaom, Kalinaw, ug Gugma
Sa panahon sa Pasko, magtutok kita sa paglaom, sa kalinaw, ug sa gugma nga gitanyag ni Jesukristo sa kalibotan.
Heaven’s Gift [Gasa sa Langit], ni Dan Wilson
Ang gisaad nga pagkatawo ni Jesukristo nagdala og “dakong kahayag” (Isaias 9:2) ug “maayong balita sa dakong kalipay” (Lucas 2:10) nganhi sa kalibotan. Ang panahon sa Pasko mao ang tukmang kahigayonan nga itutok ang atong mga kasingkasing ug mga hunahuna diha sa Bata nga si Kristo nga natawo dugay nang panahon ug sa paglaom, sa kalinaw, ug sa gugma nga gidala sa mensahe sa Iyang ebanghelyo ngari sa atong mga kasingkasing samtang kita andam nga mosunod Kaniya.
Lead, Kindly Light [Giyahi Maloloy-on nga Kahayag], ni Simon Dewey
Paglaom diha sa Manluluwas
Pipila ka tuig ang milabay, usa ka 19 ka bulan nga batang babaye, si Hope Gentile, na-diagnose nga adunay tumor sa ubos sa iyang likod. “Atol sa sunod nga lima ka bulan sa mga surgery ug chemotherapy,” ang amahan ni Hope, si Nicholas, miingon, “ang pakigbisog ni Hope aron mabuhi naghatag og daghang lainlain nga mga kasinatian.”
Usa ka gabii atol sa ikaduhang lima ka adlaw nga pabalikbalik nga chemotherapy ni Hope, si Brother Gentile nakabantay unsa ka daghan na sa buhok ang nawala niya. Ang nahibilin niyang kolor strawberry nga blonde nga nipis nga buhok sakit nga mipahinumdom niya sa iyang mortalidad. Bisan pa man, nakakaplag siya og kahupayan diha sa saad sa Ginoo nga “ang buhok sa iyang ulo dili mahulog sa yuta nga dili mahibaloan.” (Doktrina ug mga Pakigsaad 84:116).
“Gibati nako nga si Jesukristo nasayod gayod sa panaw ni Hope—ug sa among kasakit,” si Brother Gentile miingon. “Siya ‘wala mobiya [namo] nga daw mga ilong tuwapos’” (Juan 14:18).
Atol sa tingkatulog usa ka gabii niana samtang gibasahan niya og libro si Hope, si Brother Gentile nangutana sa kinomedya nga tingog, “Unsay sulti sa owl?” Nag-agik-ik, si Hope mitubag og, “Hoo, hoo!” Unya nangutana siya, “Unsay sulti sa baka?” Si Hope mapagarbohong mitubag, “Moo, moo!”
Nianang higayona, ang usa ka hulagway sa Manluluwas nga anaa sa lawak ni Hope ang mikuha sa pagtagad ni Brother Gentile. Ang Espiritu miaghat niya nga mangutana, “Hope, ug unsay sulti ni Jesus?”
Si Hope misip-ig sa iyang abaga, mibuka sa iyang asul nga mga mata, ug mihunghong, “‘Mogunit nimo.’ Si Jesus nag-ingon, ‘Mogunit nimo.’”
Si Brother Gentile hinay nga migakos sa gamayng lawas ni Hope ug midanguyngoy. Samtang mibalos sa paggakos si Hope, siya mihunghong, “Mahal ka nako, Dada.”
Ang pagsulay ni Hope ug ang kawalay kaseguroan sa umaabot mas nakapasuod ni Brother Gentile, sa iyang asawa, si Christina, ug sa ilang pamilya—ngadto sa usag usa ug ngadto sa Manluluwas. “Si Jesus naggakos sa among pamilya diha sa Iyang mahigugmaong mga bukton,” si Brother Gentile miingon. “Akong gipamalandongan ang malumo nga kamatuoran nga gitudlo sa Dios nako pinaagi sa mga pulong sa akong anak nga babaye: Si Jesus mogunit ug mopanalangin nato atol sa atong mga pagsulay kon kita motugot Kaniya.”1
Si Hope Gentile, upat ka adlaw sa wala pa ang iyang unang chemotherapy nga pagtambal niadtong Marso 2015.
Kalinaw diha ni Kristo
Ako malipayong mopahibalo nga ang hugot nga pagtuo ug ang mga pag-ampo sa pamilya Gentile gitubag. Karon, si Hope usa ka himsog, malipayon nga 10 anyos.
Apan unsa kaha niadtong mga panahona nga ang tubag sa Dios dili mao ang unsay atong gilaoman? Moabot ba ang kalinaw diha taliwala sa personal nga kasakit?
Oo! Ang kalinaw makaplagan kanunay kon kita modangop ngadto sa Manluluwas, kansang pagkatawo didto sa Betlehem atong gisaulog niining panahona. Sa panahon sa Pasko, ang atong personal nga mga pagsulay, kasubo, ug sakit kasagaran bation nga morag sukwahi sa atong mga pagsaulog sa Pasko. Apan ang atong pagpamatuod sa pagkatawo, pagkamatay, ug pagkabanhaw sa Manluluwas naghatag og kalinaw ug kalipay.
Ang atong minahal nga propeta, si Presidente Russell M. Nelson, mitudlo nato:
“Sama nga ang Manluluwas mitanyag og kalinaw nga ‘lapaw sa tanang pagpanabot’ [Mga Taga-Filipos 4:7], Siya usab mitanyag og gikusgon, giladmon, ug gilapdon sa kalipay nga lapas sa tawhanong pangatarongan o mortal nga panabot. Sama pananglit, daw dili posible nga mobati og kalipay kon nag-antos ang inyong anak og walay kaayohan nga sakit o kon nawagtangan kamo sa inyong trabaho … Apan mao gayod kana ang kalipay nga gitanyag sa Manluluwas. Ang Iyang kalipay makanunayon, nagsiguro kanato nga ang atong ‘mga kasakitan sulod lamang sa mubo nga higayon’ [Doktrina ug mga Pakigsaad 121:7] ug ipahinungod ngadto sa atong kaayohan [2 Nephi 2:2].”2
Sa higayon nga ang Ginoo mamulong og kahupayan sa atong mga kalag, mahimo kitang moapil sa “dakong panon sa mga anghel sa langit nga nag-awit ug mga pagdayeg sa Dios ug nanag-ingon: Dalaygon ang Dios sa kahitas-an, ug sa yuta panagdait sa mga tawo nga iyang gikahimut-an” (Lucas 2:13–14). Kita mahimong ingnon “dali … mga madaugon”3 ngadto kang Kristo ug bation ang Iyang “kalinaw.”4
Ang Gasa sa Gugma
Ang Amahan hingpit nga nakaila ninyo—sa inyong mga pagsulay ug mga pagkadili hingpit, sa inyong mga pangandoy ug mga kapildihan. Tungod kay Siya nahigugma ninyo, Siya mihatag ninyo sa labing mahinungdanong gasa nga inyong madawat.
“Kay gihigugma pag-ayo sa Dios ang kalibotan ug tungod niini gihatag niya ang iyang bugtong Anak, aron ang tanan nga motuo kaniya dili malaglag kondili makabaton hinuon sa kinabuhing dayon” (Juan 3:16).
Tungod kay ang Anak nahigugma usab ninyo, andam Siya nga mihatag sa Iyang kinabuhi alang ninyo.
Ang gasa sa Bugtong Anak sa Dios nagpasabot sa malungtarong paglaom ug kalinaw nga nahimong posible pinaagi sa Pag-ula ug Pagkabanhaw sa Manluluwas. “Ang nag-unang rason nga kita magsaulog sa Pasko tungod sa Pasko sa Pagkabanhaw,” si Presidente Nelson nagpahinumdom nato. “Tungod ni Jesukristo, kita makahinulsol ug mapasaylo sa atong mga sala. Tungod Kaniya, ang matag usa kanato mabanhaw.”5
Paghulagway ni Dan Burr
Ang pagbasa sa sagrado nga mga asoy sa pagkatawo sa Manluluwas diha sa Bag-ong Tugon mao ang sentro sa daghan natong mga tradisyon sa Pasko, apan dili nato kalimtan nga kita wala untay Pasko kon wala pa ang Iyang Pag-ula ug Pagkabanhaw. Ang Basahon ni Mormon nagpamatuod sa katinuod sa nabanhaw nga Kristo ingon man sa kabuhong ug kalawom sa Iyang doktrina. Kon kamo mogamit sa mga kamatuoran mahitungod ni Kristo nga makita sulod sa mga pahina niini atol sa panahon sa Pasko ug mopakigbahin niini sa uban, kamo nagdugang og kahulogan sa inyong mga pagsaulog sa Pasko.
Ako mopamatuod nga ang gugma ug ang labing mahinungdanong tahas sa Manluluwas diha sa plano sa kaluwasan nagdala og kalinaw (tan-awa sa Juan 14:27) ug “labaw nga maayo nga paglaom” (Ether 12:32)—atol sa panahon sa Pasko ug sa kanunay.