“Ang Dalan gikan sa Betlehem,” Alang sa Kalig-on sa mga Kabatan-onan, Dis. 2023.
Ang Dalan gikan sa Betlehem
Si Jesukristo, ang Gamayng Bata sa Betlehem, nagdala kanato ngadto sa pakigsaad nga mogiya paingon sa templo ug balik ngadto sa presensya sa Langitnong Amahan.
Paghulagway pinaagi ni Corey Egbert
Sa miaging Disyembre ang akong asawa ug ako mibisita sa Betlehem. Samtang naglantaw ko sa lungsod ug naglakaw sa mga kadalanan niini, gikanta nako ang “Gamay nga Lungsod sa Bethlehem” (Mga Himno, nu. 126). Ang akong hunahuna mibalik ngadto sa sobra sa 2,000 ka tuig, sa dihang si Maria ug si Jose miadto aron magbayad og buhis. Naghunahuna ko ni Maria, nga mibiyahe samtang mabdos ug nanganak diha sa usa ka kwadra.
Mibisita kami sa batoon nga bukid sa Palestinian nga nasod sa duol, lakip na sa dapit diin ang mga magbalantay sa karnero nagbantay sa ilang mga panon. Naghunahuna ko sa anghel nga mipakita nila ug mipahayag sa “maayong balita nga makalipay kaayo sa tanang katawhan” (Lucas 2:10) ug misulti nila sa pagpangita sa bata diha sa pasungan. Among nakita ang morag kuweba nga mga kwadra nga sama niadtong diin si Jesus gipanganak ug mga pasungan nga hinimo sa bato sama niadtong diin Siya gipahigda.
Sa ubang dapit nakita namo kon asa si Jesus naglakaw, nagtudlo, nag-antos, namatay, ug nabanhaw. Ang Jerusalem, ang Templo sa Bukid, ang Bukid sa mga Oliba, ang Tanaman sa Getsemani, Golgota, ug Tanaman nga Lubnganan. Nakita namo ang dalan sa kinabuhi ni Jesus gikan sa mga panagna mahitungod Kaniya hangtod sa Iyang kamatayon ug Pagkabanhaw.
Nindot kaayo nga makabisita niini nga mga dapit, apan dili kinahanglan nga kamo moadto didto aron makasabot ug tinuoray nga mobati sa koneksiyon ngadto sa Gamayng Bata sa Betlehem ug sa Manluluwas sa Kalbaryo. Ako nasayod—ug kamo mahimong masayod—pinaagi sa Espiritu Santo nga si Jesukristo mao ang Anak sa Dios ug Manluluwas sa kalibotan.
Ug pinaagi niini nga pagsaksi, kamo tingali maghunahuna mahitungod sa pagkatawo sa Manluluwas ug sa Iyang dalan nga gisubay sa kinabuhi ug maghunahuna: Unsa man ang akong dalan? Unsaon nako nga makasunod sa Iyang mga lakang?
Unsaon Pagduol ngadto sa Manluluwas Karon
Sa pagduol ngadto sa Manluluwas, kamo dili kinahanglan nga molakaw kon asa si Jesus naglakaw; kamo kinahanglang maningkamot nga molakaw sama sa Iyang paglakaw, magsunod sa Iyang ehemplo.
Karon, dili kita moadto sa Betlehem aron mangita sa Manluluwas. Moadto kita sa mga kasulatan ug sa mga lider sa Simbahan. Kadtong dili kauban sa atong tinuohan moadto sa mga misyonaryo ug mga higala nga mga miyembro sa Simbahan. Moadto kita sa mga dapit bunyaganan ug sa mga tulumanon sa sakramento. Moadto kita sa mga templo. Sa laing pagkasulti, kita mohimo ug motuman sa sagrado nga mga pakigsaad.
Ang Gamayng Bata sa Betlehem mao ang rason nga kita moambit sa sakramento. Siya mao ang rason nga kita moadto sa mga templo. Siya ang rason nganong kita anaa ug nagpabilin sa dalan sa pakigsaad, nga mogiya paingon sa templo ug sa kataposan pabalik ngadto sa presensya sa atong Langitnong Amahan. Siya ang rason nga kita nagtinguha sa paghimo sa buhat sa kaluwasan ug kahimayaan.
Unsaon Pagsaulog Niini nga Pasko
Kining “Balaan nga Anak, si Jesus” (Moroni 8:3) mao usab ang rason nga kita nagsaulog sa Pasko. Ang iyang kalinaw, nga dili iya sa kalibotan, mao ang rason kon ngano nga kita moapil sa uban sa tibuok kalibotan sa pagpangandoy og “sa yuta panagdait sa mga tawo nga iyang gikahimut-an” (tan-awa sa Lucas 2:14)—ngadto sa tanang pamilya sa katawhan.
Ang giladmon sa kahulogan sa Pasko alang ninyo ug nako isip mga sumusunod ni Jesus diha sa Ang Simbahan ni Jesukristo sa mga Santos sa Ulahing mga Adlaw naggikan sa koneksiyon sa atong pakigsaad ngadto sa Manluluwas ug sa Langitnong Amahan. Naggikan kini sa pagsabot sa tahas ni Jesukristo sa atong kinabuhi.
Niini nga Pasko, paggahin og panahon sa pagpamalandong sa katingalahan nga senaryo didto sa kwadra sa Betlehem sa tanan niadtong katuigan nga nanglabay. Ug paminaw sa Espiritu nga nagsaksi ninyo nga ang Gamayng Bata diha sa pasungan mao ang Usa kinsa miula alang ninyo, nako, ug sa tanang katawhan. Dayon hinumdomi kon unsay Iyang gidapit nato nga buhaton ug kon unsay Iyang gisaad nato. Atong hinumdoman ang atong mga pakigsaad.
Himoa nga ang tanan nga inyong buhaton niini nga panahon mopalambo sa inyong hugot nga pagtuo diha ni Jesukristo ug sa inyong pagsalig Kaniya. Paningkamot nga mobuhat sa unsay Iyang gibuhat. Motabang sa uban inubanan sa gugma. Magmahimong ehemplo, ug ipunting ang mga tawo ngadto sa mahangtorong kahayag nga nagdan-ag diha sa ngitngit nga kadalanan sa gamayng lungsod sa Betlehem.