Pagpamasol alang sa Tinuod nga Kahulogan sa Pasko

Ni Elder Jacob Murphy

Akong naamgohan nga ang Pasko mas labaw pa kay sa pagpang-adorno, pagkaon, o gani serbisyo.

Usa ka adorno sa Pasko nga nagbitay sa usa ka tagâ

Dinhi sa akong misyon sa Pilipinas, akong nadiskobrehan nga ang Pasko gisaulog sugod sa Septiyembre hangtod sa Disyembre. Imbis magdala og snow nga maoy akong naandan, ang Disyembre sa Pilipinas padayon nga sige og ulan, dag-omon nga kalangitan. Berde kadto bisan asa ka motan-aw—mga punoan sa saging, mga lukay sa lubi, ubang mga kahoy nga dunay lukay.

Sa among kataposang eskedyul sa Gabii sa Pasko, gibisitahan namo ang usa ka pamilya nga gisugdan pa lang namo og tudlo. Nagbisikleta mi latas sa bagâ nga kakahoyan ngadto sa kawayan nga payag, nga sin ang atop. Sa among pag-abot, akong nakita ang nanay (mama) nga namasol sa suba luyo sa iyang balay gamit ang taas nga kagingking sa kawayan ug gamay nga lambo. Giingnan mi niya nga misulay siya og pamasol og isda aron ilang masud-an (isuwa) aron makakaon sila nianang gabhiona. Nagplano na mi nga moadto sa usa ka salosalo sa Pasko uban sa ubang mga misyonaryo inig ka alas 6:30 sa gabii, apan hinoon mihukom kami nga mogahin og pipila ka oras sa pagpamasol og gagmayng isda samtang nag-ulan aron matabangan kining babaye sa pagpakaon sa iyang pamilya.

Nianang gabhiona, dihang ako ug ang akong kompanyon nagtan-aw sa video mahitungod sa pagkatawo ni Jesukristo, naghunahuna ko kon sa unsang paagi Siya mianhi sa kalibotan nga walay dala ug mibiya nga walay dala. Ang pamilya nga among giserbisyohan usab walay daghang gibatonan. Apan akong naamgohan nga wala ka magkinahanglan og daghan aron malipay. Ang Pasko mas labaw pa kay sa mga adorno, pagkaon, o gani pagserbisyo. Mahitungod kini sa gugma sa Dios (tan-awa sa 1 Nephi 11:13–23). Mahitungod kini sa gugmang putli, ang tiunay nga gugma ni Kristo. Mahitungod kini sa paghigugma sa tanan.

Bisan og kini nga Pasko lahi para kanako, ang akong kasinatian naghatag kanako og ekstra nga kadasig aron padayon nga motrabaho ug padayon nga moserbisyo kay ang ebanghelyo ni Jesukristo makadala sa mga tawo og labihan nga kalipay. Ang ebanghelyo nagtudlo kanato sa unsang paagi kita makatabang pinaagi sa gugma ug sa gugmang putli. Mibati ko og gugmang putli niana nga pamilya.

misyonaryo

Ang tagsulat nagserbisyo sa Philippines Antipolo Mission.