“Ang negatibong mga impluwensya anaa bisan asa sa media. Unsaon nako sa pagpugong niini aron dili makaimpluwensya kanako?,” Alang sa Kalig-on sa mga Kabatan-onan, Dis. 2023.
Mga Pangutana ug Mga Tubag
“Ang negatibong mga impluwensya anaa bisan asa sa media. Unsaon nako sa pagpugong niini aron dili makaimpluwensya kanako?”
Hinumdomi Unsay Wala Mahibaloi sa Internet
“Dili kamo makalikay sa negatibo nga mga impluwensya. Hinoon, makahimo kamo og mga sumbanan. Ang media adunay daghang paagi sa paggamit og pangatarongan aron madani kamo nga ipaubos ang inyong mga sumbanan. Apan hinumdomi nga ang media wala mahibalo sa tanan. Ang Dios nahibalo. Siya ang kinataposan nga kapanguhaan. Paminaw Kaniya, ug kamo maprotektahan gikan sa kadaotan sa media.”
Reilly K., Arizona, USA
Ipakigbahin ang Ebanghelyo
“Naghimo ko og Instagram nga profile diin naghimo ko og mga tumong sa pagtabang sa kabatan-onan sa tibuok Brazil nga molambo ug mas mahisama kang Kristo. Sa akong personal nga profile, adunay mga litrato usab sa mga templo, litrato nako nga anaa sa chapel o institute, ug sa wala madugay, litrato nako sa akong misyon. Akong gipakigbahin ang ebanghelyo diha sa social media.”
Cyndell M., 19, Brazil
Mogamit sa Personal nga Pagpadayag
“Sa unang higayon nga migamit ko sa internet, ang akong mga ginikanan mitambag nako sa pagkat-on bahin sa mga kapeligro. Sa pagdumala niini, kinahanglan kong mag-ampo una sa Langitnong Amahan aron Siya makatambag nako. Ug nakadawat ko og personal nga pagpadayag nga i-block ang tanang media nga makapahisalaag nako.”
Eden K., 18, French Polynesia
Magmakanunayon sa mga Sumbanan
“Ang dili pag-apil sa butang nga inyong nahibaloan nga sukwahi sa mga sumbanan makatabang usab ninyo nga mas mapaduol ngadto sa Dios ug makalikay sa negatibo nga mga impluwensya. Kon maghimo kamo og mga desisyon bahin sa mga sumbanan, kamo naningkamot nga mahimong mas maayo, ug mao kana ang gusto sa Dios nga inyong buhaton.”
Hazel J., 13, Idaho, USA
Mangita og Makadasig nga Kalingawan
“Ang pagbaton og kalingawan nakatabang nako nga dili kaayo mabalda sa internet. Ang pagbuhat og mga pasundayag sa magic nakatabang nako sa pagpalambo sa akong mga talento ug paglipay sa uban. Makatutok kita sa atong mga kalig-on aron malikayan nga maimpluwensyahan sa sayop nga dalan.”
Sebastian S., 16, Germany
Maminaw sa Espiritu
“Ang kaaway walay hunong sa pagpaningkamot sa pagbira nato nga makakita sa mga butang ug makabasa sa mga butang nga mopabati nato og kasuko, kahadlok, kasina, ubp. Naningkamot ko nga dili moadto sa mga media platform nga dili makadapit sa Espiritu Santo sa higayon nga gusto ko og mga tubag o kalingawan. Pinaagi sa pagpaminaw sa Espiritu, dili kaayo kita maapektohan sa negatibo nga mga impluwensya sa media.”
Sierra H., 15, Idaho, USA
Hunahunaa Kini
“Sa dili pa kamo motuo sa usa ka butang, hunahunaa kini ug tan-awa kon kini makatabang ba kaninyo nga mas mapaduol sa Dios o makapalayo kaninyo sa Dios. Kon kini makapalayo kaninyo sa Dios, ayaw kini tugoti nga moimpluwensya kaninyo.”
Parker W., 11, Utah, USA