7 ka Ten-edyer Kinsa Nakahimo og Kausaban sa Kalibotan

Ni Priscilla Biehl Motta ug Jessica Zoey Strong

Mga Magasin sa Simbahan

Unsay gidasig niini nga kabatan-onan nga inyong buhaton?

Lucy B.

Edad 14. Taga-Tennessee, USA. Ganahan og teyatro sa musika ug sa pagdula og soccer.

Sa dihang otso anyos pa ko, mihangyo ko ni mama nga tudloan ko unsaon pagtahi og usa ka habol. Misugod ko sa paghimo og mga habol isip mga regalo alang sa tanan nakong mga higala.

Dayon ang akong mama nakahukom nga manghatag og habol gamit ang Instagram. Nakakuha kami og 16 ka nominasyon. Dili ko makapili og usa lang ka tawo, busa nagpadala kami sa tagsa-tagsa nila. Ug unya ang nominasyon padayong nangabot, ug nagapadayon kami sa paghimo og mga habol. Sa kataposang lima ka tuig, nakahimo kami og 1,121 ka habol ug gipadala kini ngadto sa 29 ka nasod.

Kadaghanan sa mga habol nahatag ngadto sa mga bata nga masakiton. Ang labing lisod nga bahin alang nako mao ang higayon sa dihang ang usa ka bata namatay sa wala pa moabot ang habol ngadto nila. Usahay mobasol ko sa akong kaugalingon ug mobati nga sad-an ug nagmahay. Apan sa higayon nga mobati ko og ingon niini, mag-ampo ko, ug akong bation ang kalinaw.

Nakita nako ang ubang mga bata nga nag-antos sa hilabihan gayod nga kalisod. Nahimamat nako ang usa ka batan-ong babaye nga bag-o lang nakagawas gikan sa operasyon sa utok, apan siya adunay malipayon kaayo nga espiritu bisan pa sa tanan. Nakadasig kini nako nga magmapasalamaton sa tanan nga anaa nako.

Usahay ang mga tawo mangutana nako, “Nganong gihimo man nimo kini?” Naghunahuna ko nga kon si Jesukristo ania pa dinhi, moserbisyo Siya sa uban. Siya moseguro nga ang tanan mobati nga gihigugma. Busa mahimo ko nga Iyang mga kamot. Makatabang ko sa paghimo sa Iyang buhat.

“Mahimo ko nga Iyang mga kamot.”

Nate W.

Edad 14. Taga Hawaii, USA. Ganahan magdula og basketball ug soccer, magbasa, ug moadto sa dagat kuyog sa mga higala.

Duha ka tuig ang milabay, ulan kaayo kadto sa akong gipuy-an, ug ang usa ka bahin sa among lungsod gibaha gayod kaayo. Ang ubang tawo gani kinahanglang mosalom aron makagawas sa ilang mga panimalay ug moadto sa ilang mga sakyanan.

Ang among ward nag-organisar og usa ka proyekto sa pagserbisyo sa pagpaningkamot sa pagtabang nila, apan nianang buntaga naghunahuna ko nganong motabang ko. Ganahan ko nga magdula sa parke, diin ang mga tawo magsakay padailos sa basa, dangog nga bungtod gamit ang mga boogie board.

Mipili ko nga mokuyog sa ward, ug nanglimpyo kami sa basura ug miseguro nga OK ra ang tanan. Mitabang ko sa paghapnig sa mga butang sa mga tawo ug miseguro nga nahibalo kami kon kang kinsa kadto nga mga butang.

Adunay usa ka inahan nga ang balay nabahaan. Nagbarog siya sa iyang balkon uban sa iyang mga anak nga nagtan-aw sa tanan nga nagtrabaho. Misugod siya sa paghilak tungod sa pasalamat. Nalipay kaayo siya nga ang mga tawo mitabang niya.

Mibati ko nga morag gihimo nako ang hustong butang pinaagi sa pagtabang. Mibati ko og kainit ug kanindot sa kaugalingon. Maanindot gayod kaayo kadto.

“Maanindot gayod kaayo kadto.”

Grant E.

Edad 17. Taga-Texas, USA. Ganahan magdula og tennis ug basketball, lumba sa dagan, ug maminaw sa musika.

Bag-ohay lang, nag-organisar ko og kalihokan sa pagpangolekta og mga sinina uban sa pipila sa kabatan-onan sa akong stake ug sa hayskul. Nangolekta kami og mga kinahon sa wala kaayo magamit nga mga sinina aron ipadala ngadto sa mga kabinet sa mga sinina diha sa lugar aron matabangan ang mga pamilya nga nanginahanglan ug ang mga bata nga adunay espesyal nga mga panginahanglan o mga kakulangan. Ang akong manghod nga lalaki adunay autoimmune nga sakit, mao nga adunay espesyal nga luna sa akong kasingkasing alang sa mga bata nga adunay susama nga mga hagit.

Samtang ang resulta niining proyekto sa pagserbisyo importante nako, kalabot usab kini sa paghiusa sa mga tawo ug pag-ugmad og pagbati nga nahisakop ug adunay katuyoan. Pinaagi sa pagtinabangay, nakaugmad kami og bag-ong mga higala ug mga koneksiyon. Mibati ko og kalamposan sa pagbuhat og maayo nga butang alang sa uban.

Kini nga kasinatian mipahinumdom nako kon unsa ka importante ang paghigugma sa Dios pinaagi sa pagserbisyo sa uban. Sayon ra nga motutok lang sa atong kaugalingong kinabuhi ug mga problema, apan kon unahon nato ang uban ug mosunod sa mga pag-aghat sa Espiritu nga moserbisyo, kita makadala og kalipay ug gugma dinhi sa kalibotan.

“Kita makadala og kalipay ug gugma dinhi sa kalibotan.”

Milagros H.

Edad 16. Taga-Santa Ana, Argentina. Ganahan magbasa, maminaw sa musika, ug magsulat og mga balak.

Bag-o lang, misugod ko sa pagbisita sa akong lokal nga librarya ug nakamatikod nga dili maayo ang kahimtang niini. Ang librarian tigulang nga babaye, ug ang mga tawo sa kanunay wala moamping og maayo sa mga libro nga ilang gihulaman.

Pesidente ko sa klase sa Young Women sa akong branch, ug pipila sa young women ug ako miadto sa librarya usa ka Sabado aron ihan-ay ang usa sa mga butanganan sa mga libro. Among gibutang ang mga libro nga taud-taod nang wala hulami sa mga tawo diha sa mga kahon aron idonar. Dayon among gihan-ay ang uban pang mga libro sa alpabetong paagi.

Ang librarian mapasalamaton kaayo sa among tabang. Gani gipalitan niya kami og lamian nga mga pastry nga gitawag og criollitos. Sa akong hunahuna ang among pagserbisyo nakatabang nga mapalambo ang iyang panglantaw sa Simbahan.

Daghan pang mga butanganan sa libro ang kinahanglang ihan-ay, mao nga nakadesisyon ko nga isumiter ang akong proyekto ngadto sa JustServe. Karon ang mga tawo sa among siyudad makakita sa proyekto diha sa JustServe ug moboluntaryo nga motabang.

Ang mga kasulatan nag-ingon nga si Jesukristo miadto sa paghimo og maayong butang (tan-awa sa Mga Buhat 10:38). Tingali ang akong proyekto walay dakong epekto sa kalibotan, apan alang sa librarian ug sa mga tawo nga moadto sa librarya, nakahimo kini og kalainan.

Ang JustServe usa ka website ug app nga gidumala sa Simbahan diin ang mga tawo makakita og mga oportunidad sa pagserbisyo diha sa duol nila. Tan-awa kon aduna bay mga proyekto sa inyong dapit diha sa JustServe.org o sa JustServe nga app, o isumiter ang inyong proyekto sama sa gihimo ni Milagros!

“Alang sa librarian ug sa mga tawo nga moadto sa librarya, nakahimo kini og kalainan.”

Telia L.

Edad 17. Taga-Saskatchewan, Canada. Ganahan mokanta, taekwondo, boksing, ug motugtog og ukulele, gitara, ug piano.

Ang akong mama modala sa akong mga igsoon ug nako aron mokanta ug mosayaw ngadto sa mga pinuy-anan sa mga tigulang sukad niadtong sayis anyos pa ko. Morag mao kini ang among paagi sa pagpakigbahin sa ebanghelyo. Bag-ohay lang gikanta namo ang “Mas Magpaduol Ko Dios Kanimo,” ug ang babaye sa luyo misugod sa paghilak. Usa kana sa akong paborito nga mga awit nga kantahon.

Sa laing higayon, mibati ko nga kinahanglang kantahon namo ang “You Are My Sunshine.” Gikanta namo kini, ug ang tanang tawo misugod sa pagpanganta uban namo. Pipila kanila mihilak. Morag usa kadto ka makapausab sa kinabuhi nga kasinatian alang nako. Nalipay kaayo ko nga naminaw sa mga pag-aghat nga kantahon kana nga awit.

Gawas sa pagkanta sa mga pinuy-anan sa mga tigulang, aduna usab koy gihimo nga mga proyekto sa pagserbisyo diha sa akong kaugalingong lungsod, sama sa pagdala og pagkaon ngadto sa mga walay pinuy-anan. Nagboluntaryo usab ko alang sa duha ka organisasyon isip mentor sa mga bata nga gustong magplano sa ilang kaugalingong mga proyekto sa pagserbisyo.

Tingali sa kinatibuk-an akong nasayran nga daghang tawo sa kalibotan ang nakigbisog. Dili nato kini makita kanunay, apan ang yanong mga buhat sa pagserbisyo, sama sa pagkanta og pipila ka awit o paghimo og pipila ka sayaw, makapapahiyom sa mga tawo.

Tingali kinahanglan nga kitang tanan moapil sa pagserbisyo—sa atong komunidad o gani sa atong kaugalingong mga pamilya. Ang pagserbisyo nagdala og kalipay ngadto sa mga tawo nga inyong gitabangan ug nganha ninyo. Kon kamo moserbisyo sa uban, kamo nagserbisyo sa Dios ug kamo nagtabang sa Iyang mga anak, nga Iyang gihigugma pag-ayo. (Tan-awa sa Mosiah 2:17.)

“Ang pagserbisyo magdala og kalipay ngadto sa mga tawo nga inyong tabangan ug nganha kaninyo.”

Luca M.

Edad 16. Taga-Alberta, Canada. Ganahan mokatawa, magkat-on, ug magluto og perpektong hamburger.

Samtang nagtubo, ang akong mga ginikanan aktibo kaayo sa Simbahan. Bation nako kanunay nga morag gipugos ko sa pag-adto sa mga proyekto sa pagserbisyo. Samtang mas nagdako ug mipadayon sa pag-apil sa pagserbisyo, akong nakita nga kini nakapausab nako alang sa mas maayo. Samtang wala kaayo ko nagtutok sa akong kaugalingon, mas malipayon ko.

Kausa, ako adunay oportunidad nga moadto sa siyudad kuyog sa pipila sa kabatan-onan aron motabang sa mga walay pinuy-anan. Usa ka tawo nga taga-El Salvador misulti nako kon nganong mibiya siya sa iyang nasod tungod sa kasamok ug miabot sa kadalanan sa Canada. Nahimamat usab nako ang usa ka tawo nga mipahinumdom nako nga magpadayon sa pag-eskwela ug dili ibaliwala ang akong mga oportunidad.

Ang pagpaminaw sa ilang mga istorya ug pagtan-aw sa ilang kamapadayonon ug kamapaubsanon adunay dakong epekto nako. Sayon ra ang pagbaliwala sa mga walay pinuy-anan ug ang paghunahuna nga sila ra ang hinungdan nga naingon niana ang ilang kahimtang. Apan si Isaias naghisgot kon giunsa ni Jesukristo pag-antos sa atong mga kasakit ug gisalikway sa katawhan (tan-awa sa Isaias 53:3). Ako nagtuo nga isip mga disipulo ni Jesukristo, kita kinahanglang dili mobaliwala niadtong gisalikway sama Kaniya.

Bisan kon dili nako masulbad ang ilang tanang problema, nasayod ko nga bisan ang kinagamyan nga mga buhat sa pagserbisyo makahimo og dakong kalainan sa kinabuhi sa usa ka tawo.

“Bisan ang kinagamyan nga mga buhat sa pagserbisyo makahimo og dakong kalainan.”

Limna C.

Edad 16. Taga-Mexico City, Mexico. Ganahan motugtog og gitara, mokanta, magbasa, magbisikleta, ug ganahan sa iyang iro nga ginganlan og Loki.

Atol sa pandemya, nakita nako ang pagdapit gikan sa Kinatibuk-ang Kapangulohan sa Young Women nga ipakigbahin ang ebanghelyo pinaagi sa pagserbisyo. Naghunahuna ko kon giunsa sa mga doktor ug sa mga medical worker pagsakripisyo sa ilang oras ug pagbutang sa peligro sa ilang kinabuhi aron motabang nato. Naghunahuna ko nga tingali mosakripisyo ko og gamayng panahon og kwarta aron motabang nila.

Ako adunay trabaho nga maghimo ug mamaligya og cookies ug mga dessert. Nakadesisyon ko nga gamiton ang uban nakong mga tinigom aron ipalit og pagkaon aron maghimo og pinutos nga mga paniudto alang sa mga medical worker. Ang akong mga ginikanan ug mga apohan mitabang nako sa pag-andam sa mga paniudto, nga naglakip sa sandwich, apple, granola bar, ug tubig. Dayon gisulatan nako og salamat [gracias] ang matag bag. Adunay 150 ka bag, mao nga gilaylay og maayo ang akong kamot!

Ang akong presidente sa stake mitabang nako sa pagpananghid nga ipakigbahin ang pagkaon diha sa ospital. Dili ko makadala sa pagkaon didto sa sulod, apan gipakita ko nila og mga litrato sa mga tawo nga midawat sa pagkaon. Nalipay kaayo ko nga nagtan-aw sa ilang mapahiyomon nga mga nawong.

Usahay masagmuyo ko sa mga tawo ug makalimot sa pagtratar nila sama sa buhaton sa Ginoo. Ang Manluluwas mabination sa tanan, bisan kon sila nasuko o dili mabination Kaniya. Kon kita maningkamot sa pagtan-aw sa uban inubanan sa gugma sa Manluluwas, makahimo kita og kalainan sa kinabuhi sa mga tawo. Kita mahimong kahayag sa kalibotan nga puno sa mga pagduhaduha. Usahay tingali bation nato nga morag kita walay nahimong kalainan, apan kon kita naningkamot, igo na kana.

“Maningkamot sa pagtan-aw sa uban inubanan sa gugma sa Manluluwas.”