“Ang Wala Kaayo Gitago nga Mensahe diha sa Basahon sa Pinadayag,” Alang sa Kalig-on sa mga Kabatan-onan, Dis. 2023.
Dali, Sunod Kanako
Pagpadayag
Ang Wala Kaayo Gitago nga Mensahe diha sa Basahon sa Pinadayag
Agi og dugang sa mga panagna niini bahin sa Ikaduhang Pag-anhi ni Jesukristo, ang basahon sa Pinadayag naglangkob og gamhanang mensahe sa kalinaw ug kahupayan.
I Stand at the Door and Knock [Nagatindog Ako sa Pultahan ug Nagatuktok], ni J. Kirk Richards
Ang ubang mga tawo nag-ingon nga ang Ikaduhang Pag-anhi ni Jesukristo nakapahadlok nila. Ang gubat, kagutom, sakit—ang mga panagna naglangkob og pipila ka makalilisang nga mga timailhan. Apan naghisgot usab kini bahin sa makapahinam nga mga panghitabo ug balaanong mga saad. Busa agi og dugang sa pagpahibalo nato bahin sa mga timailhan sa Ikaduhang Pag-anhi, ang mga panagna nagtanyag usab og dakong kahupayan.
Tinuod gayod kini diha sa basahon sa Pinadayag, pananglitan, nga gisulat ni Apostol Juan. Naglangkob kini og daghang panagna mahitungod sa Ikaduhang Pag-anhi ug usab adunay pipila sa labing makahupay nga mga tudling sa tanang kasulatan. Ania ang pipila sa mga mensahe sa kahupayan gikan sa basahon sa Pinadayag.
Kamo Makadungog sa Tingog sa Manluluwas ug Makaabli sa Pultahan
Ngadto sa mga Santos sa panahon ni Juan—ug ngari kanato—ang Manluluwas miingon:
“Tan-awa, nagatindog ako sa pultahan, ug nagatuktok: kon may magapatalinghog sa akong tingog, ug moabli sa pultahan, kaniya mosulod ako, ug makigsalo ako sa pagkaon uban kaniya, ug siya uban kanako” (Pinadayag 3:20).
Ang Manluluwas gusto nga magpaduol ninyo (tan-awa sa Doktrina ug mga Pakigsaad 88:63). Siya nagtawag ninyo. Kamo makaabli sa pultahan ug makapasulod Kaniya bisan kanus-a.
Kamo Makakaplag og Proteksyon
Diha sa basahon sa Pinadayag, ang Ginoo nagmando, “Gomowa kamo [sa kalibotan], mga tawo ko, aron dili kamo makaapil sa iyang kasal-anan, aron dili kamo makaambit sa iyang mga hampak” (Pinadayag 18:4). Kini nga mga hampak dili maayo, apan gitagana kini alang niadtong ganahan sa pagkadaotan ug wala mosulay sa pagpalayo niini.
Mopaduol ngadto sa Ginoo ug sa Iyang katawhan. Biyaan ang kalibotanong mga butang. Kamo makakaplag og kalinaw sa hunahuna ug proteksyon diha sa dangpanan sa Zion.
Kamo Makabuntog
Diha sa Pinadayag makakita kamo og nindot nga mga saad gikan sa Ginoo ngadto sa Iyang mga Santos nga makabuntog sa kalibotan (tan-awa, ilabi na, sa Pinadayag 2–3). Kining mahangtoron nga mga panalangin mao ang gitagana niadtong naghimo og mga pakigsaad uban sa Dios ug nagtuman niini. Ang Ginoo misumada niini nga mga panalangin:
“Ang magamadaugon makapanag-iya niining maong panulondon; ug ako mahimong iyang Dios, ug siya mahimong akong anak” (Pinadayag 21:7).
Si Juan nagsulti ninyo dili lamang kon unsa ang mga panalangin apan kon unsaon nga kamo makadawat niini. Madawat kini “pinaagi sa dugo sa Kordero, ug sa pulong sa [inyong] pagpanghimatuod” (Pinadayag 12:11). Sa pagbuntog, makasalig kamo sa grasya ni Jesukristo ug makagamit sa hugot nga pagtuo diha Kaniya. Sama sa gitudlo ni Presidente Russell M. Nelson:
“Ang pagbuntog sa kalibotan wala gyod magpasabot nga mahimong hingpit niini nga kinabuhi, ni kini nagpasabot nga ang inyong mga problema mawala lang—tungod kay kini dili mawala. Ug kini wala magpasabot nga kamo dili na makahimo og mga sayop. Apan ang pagbuntog sa kalibotan nagpasabot nga ang inyong pagpakigbatok sa sala modako. Ang inyong kasingkasing malukmay samtang ang inyong hugot nga pagtuo diha ni Jesukristo modako. Ang pagbuntog sa kalibotan nagpasabot nga molambo sa paghigugma sa Dios ug sa Iyang Hinigugma nga Anak labaw kay sa inyong paghigugma ni bisan kinsa o bisan unsa” (“Buntoga ang Kalibotan ug Pangita og Kapahulayan,” Okt. 2022 nga kinatibuk-ang komperensiya [Liahona, Nob. 2022, 97]).
Kamo Makapangandam
Usa ka klarong mensahe diha sa basahon sa Pinadayag mao nga si Jesukristo moanhi pag-usab—ug kamo makapangandam alang niini pinaagi sa hugot nga pagtuo diha ni Jesukristo, paghinulsol, paghimo ug pagtuman sa mga pakigsaad, ug paglahutay ngadto sa kataposan. Pinaagi niini nga pagpangandam moabot ang kaseguroan nga kamo dili angay nga mahadlok sa Iyang pag-anhi. Kondili, hinumdoman ninyo ang Iyang labing nindot nga kahupayan alang sa Iyang mga Santos:
“Ug iyang pagapahiran ang tanang luha gikan sa ilang mga mata; ug ang kamatayon wala na, ug wala na usab unyay pagminatay, ni paghilak, ni kasakit: kay ang unang mga butang nangagi na” (Pinadayag 21:4).
Pinaagi sa kahupayan ug kaseguroan nga sama niini, inyong bation nga mosulti sa samang butang nga gisulti ni Juan diha sa kataposan niini nga basahon: “Umanhi ka na, Ginoong Jesus” (Pinadayag 22:20).