«Ես Հիսուս Քրիստոսի աշակերտն եմ», Երիտասարդներին զորացնելու համար, հունվար 2024 թ․։
2024 թ․ Երիտասարդների թեմա
Ես Հիսուս Քրիստոսի աշակերտն եմ
Դուք կարող եք հետևել Փրկչին և տարածել Նրա խոսքը ուրիշներին:
Ձեզ մոտ երբևէ ծագե՞լ է նման հարց, թե մարդկանց բժշկելուց հետո Հիսուսն ինչու ասաց նրանցից մի քանիսին, որ ոչ ոքի չպատմեն այդ մասին (տես Մարկոս 7.36): Պատճառներից մեկը կարող էր կապված լինել այն տեսակի հետևորդների հետ, որոնց կարիքը Նա ուներ: Գուցե դուք մտածեք, որ եթե մարդիկ խոսեին իրենց բժշկությունների մասին, դա հետևորդներ գրավելու լավ միջոց կլիներ Հիսուսի համար: Սակայն Հիսուսը ուղղակի հետևորդների կարիք չուներ: Նա աշակերտների կարիք ուներ։
Հիսուսն ասաց Պետրոսին և Անդրեասին. «Եկեք իմ հետևից» (Մատթեոս 4.19): Այս հատվածի Ջոզեֆ Սմիթի թարգմանությունն ասում է. «Ես նա եմ, ում մասին գրվել է մարգարեների կողմից. հետևեք ինձ» (Ջոզեֆ Սմիթի Թարգմանություն, Մատթեոս 4.18 [Մատթես 4.19-ում, ծանոթագրություն ա]): Հրավերն այն չէր, որ Իր հետ մնային որոշ ժամանակ: Նա կամենում էր, որ նրանք հավերժ Իր աշակերտները լինեին։
Նա չէր ցանկանում, որ նրանք պարզապես դիտեին, թե Ինքն ինչպես է ուսուցանում մարդկանց, սիրում մարդկանց և հրաշքներ գործում: Նա կամենում էր, որ նրանք անեին նույնը։ Նա կամենում էր, որ Իր գործը դառնար նրանց գործը: Քրիստոսին ընտրելը նշանակում էր, որ նրանք կսովորեին ծառայել այնպես, ինչպես Նա էր ծառայում, և մտածել այնպես, ինչպես Նա էր մտածում: Նրանք կվարժվեին ապրել այնպես, ինչպես Նա էր ապրում, իսկ Նա կսովորեցներ նրանց և օգնություն ցույց կտար, որի կարիքն ունեին՝ Իրեն ավելի շատ նմանվելու համար։
Հունարեն աշակերտ բառը mathetes է: Այն նշանակում է ավելին, քան հետևորդն է կամ ուսանողը: Այն հաճախ թարգմանվում է աշակերտ: Քրիստոսի օրերում աշակերտները սովորաբար իրենք էին ընտրում այն վարպետին, որից ցանկանում էին սովորել՝ նպատակ ունենալով, որ իրենք էլ դառնան վարպետներ: Քրիստոսը չհետևեց այդ բնորոշ գործելակերպին: Դրա փոխարեն նա շրջեց այն հակառակ ուղղությամբ և փնտրեց Իր աշակերտներին: Այսօր Քրիստոսը կանչում է մեզ գալ Իր մոտ: Նա կանչում է մեզ լինել Իր աշակերտները և հռչակել Իր խոսքը Իր ժողովրդի մեջ, որպեսզի նրանք ունենան հավիտենական կյանք (տես 3 Նեփի 5.13):
Կարիբյան ավազանի Հաիթիից մի երիտասարդ կին ցույց տվեց Քրիստոսի աշակերտը լինելու իր ցանկությունը՝ հրավիրելով իր ոչ անդամ ընկերուհուն ԵԶՀ համաժողովի։ Սկզբում նրա հայրը չէր կամենում իր դստերը գնալու թույլտվություն տալ: Եկեղեցու ղեկավարները բացատրեցին այն դրական փորձառությունների մասին, որոնք սպասվում էին, և հիանալի երիտասարդ չափահաս խորհրդականների մասին, որոնք հսկելու էին նրան: Հայրը մասնակցելու թույլտվություն տվեց իր դստերը, իսկ նրա կյանքում տեղի ունեցած փոփոխությունը նկատելով, թույլ տվեց նրան նաև հաճախել Եկեղեցու ժողովներին, իսկ վեց ամիս անց նա մկրտվեց:
Հարավային Ամերիկայից Արգենտինայից մի երիտասարդ ցույց տվեց Քրիստոսի աշակերտ լինելու իր ցանկությունը՝ կոնֆետով կիսվելով իր ընկերոջ հետ, երբ նրանք ավտոբուսով գնում էին դպրոց: Երբ նրան սուրճի համով քաղցրավենիք հյուրասիրեցին, նա բացատրեց, որ այդ համի հանդեպ ինքն անտարբեր է, քանի որ իր ընտանիքում ոչ ոք սուրճ չի խմում: Դա հանգեցրեց Եկեղեցու վերաբերյալ զրույցի, ապա ժողովների գալու հրավերի, որն ի վերջո հանգեցրեց նրան, որ նրա ընկերը միացավ Եկեղեցուն և միսիա ծառայեց Չիլիում:
Ոչ բոլորը, ում հետ խոսում եք Եկեղեցու մասին կամ հրավիրում եք Եկեղեցու միջոցառման, կկամենա միանալ: Դա նորմալ է: Ինչպես նաև ոչ բոլորը, ում հետ Քրիստոսը խոսեց Իր երկրային ծառայության ընթացքում, միացան Եկեղեցուն: Այնուամենայնիվ, երբ ընտրում ենք դառնալ Հիսուս Քրիստոսի աշակերտները և հռչակել Նրա խոսքը, Նա կտա մեզ քաջություն և աստվածային օգնություն: Մենք կսովորենք, թե ինչպես ավելի նմանվենք Նրան, և դա այն է, ինչ աշակերտներն անում են: