រីណាតា ប៊ី

អាយុ ១២ ឆ្នាំ មកពីឡាប៉េ ប្រទេសបូលីវី

នៅសាលារៀន ខ្ញុំត្រូវបានគេសម្លុតធ្វើបាប និងត្រូវគេគំរាមតាមអ៊ីនធឺណិត ។ ខ្ញុំបានប្រាប់ឪពុកម្ដាយរបស់ខ្ញុំអំពីអ្វីដែលបានកើតឡើង ហើយពួកគាត់បានជួយខ្ញុំ ។ ហើយជារៀងរាល់ថ្ងៃខ្ញុំបានអធិស្ឋានទៅកាន់ព្រះវរបិតាសួគ៌ ដើម្បីមានទំនាក់ទំនងល្អប្រសើរជាមួយនឹងមិត្តភក្តិរបស់ខ្ញុំ ហើយថាខ្ញុំនឹងមានភាពរឹងមាំដើម្បីប្រឈមមុខទៅនឹងអ្វីដែលខ្ញុំកំពុងឆ្លងកាត់ ។ ខ្ញុំមានអារម្មណ៍សុខសាន្ត ហើយឥឡូវនេះអ្វីៗកាន់តែប្រសើរឡើង ។ ខ្ញុំកំពុងរៀនអភ័យទោសដល់អ្នកដែលសម្លុតខ្ញុំ ហើយមិនមានការខឹងសម្បារ ។

ខ្ញុំមានបទពិសោធន៍ផ្សេងទៀតដែលព្រះបានជួយខ្ញុំ ។ ខ្ញុំតែងតែពោលពាក្យអធិស្ឋាននៅពេលខ្ញុំមានការសម្តែងរបាំបាឡេ ដោយសារខ្ញុំភ័យខ្លាំងណាស់ ។ វាតែងតែធ្វើឲ្យខ្ញុំកាន់តែមានអារម្មណ៍ស្ងប់ក្នុងការគិតអំពីព្រះវរបិតាសួគ៌ ។ ខ្ញុំក៏បានហាត់ព្យាណូរហូតដល់ខ្ញុំអាចលេងនៅព្រះវិហារបានផងដែរ ។ ទោះបីជាខ្ញុំមិនបានលេងវាយ៉ាងល្អឥតខ្ចោះក៏ដោយ ក៏ខ្ញុំបានខិតខំយ៉ាងអស់ពីសមត្ថភាព ហើយបានឃើញពរមកពីព្រះអម្ចាស់ ។