« ពីការជំពុបដួលទៅជាជោគជ័យ » ដើម្បីកម្លាំងនៃយុវជន ខែ កក្កដា ឆ្នាំ ២០២៤ ។
ពីការជំពុបដួល ទៅជាជោគជ័យ
ប្អូនមិនគួរបោះបង់ចោលឡើយ សូម្បីតែនៅពេលប្អូនដួលក៏ដោយ ។ ជឿខ្ញុំទៅ ។
រូបថតពីការប្រកួតពានរង្វាន់ជើងឯក Toyota USATF Outdoor ឆ្នាំ ២០២៣ នៅ ថ្ងៃទី ៨ ខែ កក្កដា ឆ្នាំ ២០២៣ មកពី USATF
នៅឆ្នាំ ២០២២ ខ្ញុំបានរត់ប្រណាំង meter steeplechase ដែលមានចម្ងាយ ៣០០០ ម៉ែត្រ នៅក្នុងការប្រកួតជើងឯកជាតិ សហរដ្ឋអាមេរិក ។ ការប្រកួតនេះមានប្រហែលប្រាំពីរជុំកន្លះនៅជុំវិញផ្លូវសម្រាប់រត់ ហើយមានរបាំងឈើចំនួនប្រាំក្នុងមួយជុំៗ ដែលអ្នករត់ត្រូវលោតរំលង រួមទាំងរបាំងមួយទៀតនៅមុនរណ្តៅទឹក ។
ខ្ញុំរត់បានពីរជុំក្នុងការប្រកួតនៅពេលដែលបុរសនៅមុខខ្ញុំបានជំពប់ដួល ហើយខ្ញុំស្ទើរតែរត់ជាន់លើគាត់ ។ គាត់បានលោតផុតរបាំង តែខ្ញុំមិនបានលោតផុតទេ—ខ្ញុំបានដួល ។
ខ្ញុំបានក្រោកឡើងយឺតៗដោយសារខ្ញុំមានអារម្មណ៍ស្រងាកចិត្ត ។ ខ្ញុំបានគិតថា « តើខ្ញុំបញ្ឈប់ការរត់ ហើយគ្រាន់តែដើរចេញពីផ្លូវរត់នោះឬ ? ប៉ុន្តែខ្ញុំបានត្រៀមខ្លួនសម្រាប់ការប្រកួតនេះ ។ ខ្ញុំបានសម្រេចចិត្តជាមុនមកថា ខ្ញុំនឹងបន្តប្រសិនបើខ្ញុំដួល ដូច្នេះខ្ញុំបានចាប់ផ្តើមរត់ម្តងទៀត ។ ខ្ញុំនៅតែចង់ធ្វើឲ្យអស់ពីសមត្ថភាពដែលខ្ញុំមាន ទោះបីជាខ្ញុំមិនបានឈ្នះក៏ដោយ ។
ខ្ញុំចំណាយពេលពីរជុំទំរាំខ្ញុំតាមទាន់បុរសដែលនៅខាងក្រោយនៃក្រុមរត់ខាងមុខ ។ មិនយូរប៉ុន្មាននៅសល់បីជុំទៀត ហើយបន្ទាប់មកពីរជុំទៀត ។ ខ្ញុំបានចាប់ផ្ដើមគិតថាខ្ញុំអាចជាប់ក្នុងចំណាត់ថ្នាក់បីនាក់កំពូលបាន ។ ប៉ុន្តែខ្ញុំនឿយហត់ខ្លាំងណាស់ ហើយមានបុរសពីរបីនាក់បានរត់ហួសខ្ញុំនៅពេលសល់ពាក់កណ្តាលជុំទៀត ។ ខ្ញុំស្ថិតនៅលំដាប់ទីបួន ប៉ុន្តែបន្ទាប់មកខ្ញុំបានលោតទឹកចុងក្រោយបានល្អ ។ ហើយខ្ញុំបានគិតថា « អូ៎ ខ្ញុំអាចឈ្នះការប្រណាំងនេះបាន » ។
នៅពេលដែលខ្ញុំរត់ ៥០ ម៉ែត្រចុងក្រោយ នោះខ្ញុំបានដឹងថាខ្ញុំនឹងឈ្នះ ។ វាជាថ្ងៃដ៏ពិសេសណាស់ ។ ខ្ញុំបានគិតថា « អស្ចារ្យណាស់ តើខ្ញុំពិតជាឈ្នះការប្រកួតនេះនៅពេលនេះមែនទេ ? » ហើយខ្ញុំបានឈ្នះមែន ។ ខ្ញុំបានឈ្នះការប្រកួតបន្ទាប់ពីការដួល ។
ក្រោយមក ខ្ញុំបានដឹងថាមានមេរៀនមួយចំនួនដែលយើងអាចរៀន ពីអ្វីដែលបានកើតឡើង ។
១. ចូរអត់ធ្មត់នឹងខ្លួនឯង
ពេលខ្ញុំដួល ខ្ញុំចង់រត់តាមឲ្យទាន់ឲ្យបានឆាប់តាមដែលអាចធ្វើទៅបាន ។ ប៉ុន្តែខ្ញុំត្រូវតែគ្រប់គ្រងល្បឿនខ្លួនឯង ដើម្បីខ្ញុំមិនបាក់កម្លាំង ។ មានព្រះគម្ពីរមួយដែលនិយាយថា « ហើយត្រូវរត់ក្នុងទីប្រណាំង ដែលនៅមុខយើង ដោយអំណត់ » ( ហេព្រើរ ១២:១ ) ។ នៅក្នុងជីវិត ប្អូនមិនចាំបាច់ទទួលបានជោគជ័យភ្លាមឡើយ ។ ពេលខ្លះវាត្រូវចំណាយពេលមួយរយៈ ។
២. បន្តទៅមុខ
វាជារឿងធម្មតាដែលមានអារម្មណ៍ថាប្អូនចង់បោះបង់ចោលពេលខ្លះ ។ នៅពេលខ្ញុំដួល ខ្ញុំគិតថាខ្ញុំមិនអាចឈ្នះបានទេ ប៉ុន្តែខ្ញុំបានសម្រេចចិត្តបន្តប្រកួតតទៅទៀត ។ មានសង្ឃឹមជានិច្ចនៅពេលដែលប្អូនដួលចុះ—ប្អូនគ្រាន់តែត្រូវក្រោកឡើងហើយព្យាយាមម្តងទៀត ។ ព្រះអង្គសង្គ្រោះនឹងជួយប្អូនតាមរយៈឧបសគ្គនានាដែលប្អូនមាន ។ សូមតោងឲ្យជាប់ទៅនឹងអ្វីដែលប្អូនដឹងថាពិត ហើយឈោងទៅ និងសុំជំនួយពីអ្នកដទៃ ។ នៅទីបំផុតអ្វីៗនឹងកាន់តែប្រសើរឡើង ។
៣. ពឹងផ្អែកទៅលើព្រះយេស៊ូវគ្រីស្ទ
ខ្ញុំមិនបានធានាថានឹងឈ្នះការប្រកួតទេបន្ទាប់ពីខ្ញុំបានដួលនោះទេ ។ ប៉ុន្ដែពេលយើងដួលនៅក្នុងដំណឹងល្អ នៅពេលយើងធ្វើកំហុស ឬអំពើបាប នោះយើងអាចមករកព្រះគ្រីស្ទជានិច្ច ដោយប្រែចិត្តដោយស្មោះ ហើយបានអភ័យទោស ។ ទ្រង់នឹងជួយយើងឲ្យក្រោកឡើងវិញ ។ យើងមានសក្តានុពលដ៏អស្ចារ្យ—សក្តានុពលដើម្បីប្រែកា្លយឲ្យប្រសើរជាងនេះដើម្បីធ្វើឲ្យប្រសើរឡើង ។ ទោះបីជាយើងធ្លាក់ចុះម្តងហើយម្តងទៀតក៏ដោយ ប្រសិនបើយើងបន្តប្រែចិត្ត ហើយព្យាយាមធ្វើតាមព្រះសង្រ្គោះ នោះទ្រង់ សន្យាថា យើងអាចឈ្នះការប្រកួតនៃជីវិតបាន ។