« គ្មាននរណាម្នាក់នៅសាលាមានបទដ្ឋានដូចខ្ញុំទេ ។ តើខ្ញុំរកមិត្តល្អនៅទីនោះដោយរបៀបណា ? » ដើម្បីកម្លាំងនៃយុវជន ខែ កក្កដា ឆ្នាំ ២០២៤ ។
សំណួរ និង ចម្លើយ
« គ្មាននរណាម្នាក់នៅសាលាមានបទដ្ឋានដូចខ្ញុំទេ ។ តើខ្ញុំរកមិត្តល្អនៅទីនោះដោយរបៀបណា ? »
« និយាយអំពីចំណាប់អារម្មណ៍ដែលបានចែកចាយរបស់បងប្អូន ។ បងប្អូនមិនចាំបាច់បាំងពន្លឺរបស់បងប្អូននោះទេ ។ បងប្អូនគ្រាន់តែធ្វើជាក្មេងជំទង់ធម្មតាដែលអាចទាក់ទងទៅនឹងរឿងសប្បាយៗមួយចំនួនដែលក្មេងជំទង់ផ្សេងទៀតចូលចិត្តទៅបានហើយ ។ ធ្វើតាមបទដ្ឋាននៃព្រះយេស៊ូវគ្រីស្ទ ហើយបញ្ជាក់ឲ្យច្បាស់ទៅដល់មិត្តរួមថ្នាក់របស់បងប្អូនអំពីបទដ្ឋានដែលបងប្អូនធ្វើតាម » ។
ជេមី អាន ប៊ី អាយុ ១៨ ឆ្នាំ, នីក្រូស អ័កស៊ីដែនថុល ប្រទេសហ្វីលីពីន
« ស្វែងរកមនុស្សដែលមានកម្រិត ចំណាប់អារម្មណ៍ ទេពកោសល្យ ឬការកម្សាន្ដស្រដៀងគ្នា ។ មានមនុស្សអស្ចារ្យ ដែលមានជំនឿផ្សេងទៀតជាច្រើននាក់ ព្រមទាំងមនុស្សដ៏អស្ចារ្យដែលគ្មានជំនឿទាល់តែសោះផងដែរ ។ ពួកគេទាំងអស់គ្នានៅតែជាបុត្រជាទីស្រឡាញ់របស់ព្រះ ។ នៅពេលដែលបងប្អូនបន្តរក្សានូវបទដ្ឋានរបស់បងប្អូន ទោះបីជាមិត្តរបស់បងប្អូនមិនធ្វើអ្វីក៏ដោយ ក៏គំរូរបស់បងប្អូនអាចលើកទឹកចិត្តអ្នកដទៃឲ្យធ្វើការជ្រើសរើសឲ្យបានប្រសើរជាងមុនផងដែរ » ។
លូស៊ី ប៊ី អាយុ ១៥ ឆ្នាំ ទីក្រុង លីម៉ា ប្រទេសប៉េរូ
« សូមអត់ធ្មត់ និងបើកចិត្តបើកគំនិត ។ មិត្តភាពគឺអំពីគុណភាព មិនមែនបរិមាណនោះទេ ហើយការមានមិត្តពិតមួយចំនួនអាចទទួលបានរង្វាន់ច្រើនជាងការព្យាយាមឲ្យចូលចំណោមជាមួយនឹងហ្វូងមនុស្សដែលមិនត្រូវគ្នានឹងតម្លៃរបស់បងប្អូន » ។
អាដេដូយិន អាលម៉ា អូ, ១៧, អូសាន់ ប្រទេសនីហ្សេរីយ៉ា
« ចែកចាយពីបទដ្ឋានរបស់បងប្អូនជាមួយពួកគេ ។ ប្រសិនបើពួកគេដឹងថាបទដ្ឋានរបស់បងប្អូនជាអ្វី នោះពួកគេនឹងអាចគោរពបទដ្ឋាននោះបាន ។ បងប្អូនក៏អាចអញ្ជើញមិត្តភក្តិរបស់បងប្អូននៅសាលាឲ្យទៅព្រះវិហារ និង/ឬសកម្មភាពសាសនាចក្រនានា ដើម្បីជួយពួកគេឲ្យមើលឃើញបន្ថែមទៀតអំពីអ្វីដែលបងប្អូនជឿផងដែរ » ។
ម៉ាហ្គារ៉េត ភី អាយុ ១៣ ឆ្នាំ រដ្ឋតិចសាស់ ស.រ.អា.
« ខ្ញុំបានរៀនថាអ្នកអាចស្វែងរកមិត្តល្អបានតាមរយៈការបំផុសគំនិត និងគ្រាន់តែធ្វើជាខ្លួនឯងប៉ុណ្ណោះ ។ ពេលខ្លះមនុស្សនឹងមករកបងប្អូន ហើយពេលខ្លះបងប្អូនត្រូវតែរកមើល ប៉ុន្តែនឹងមានមនុស្សដែលនឹងអាចក្លាយជាមិត្តល្អ ឬត្រូវការមិត្តល្អដូចជាបងប្អូន » ។
ខេធី អ័រ អាយុ ១៨ ឆ្នាំ រដ្ឋណេប្រាស្កា ស.រ.អា.