« កញ្ចប់សុខភាពផ្លូវចិត្ត » ដើម្បីកម្លាំងនៃយុវជន ខែ កក្កដា ឆ្នាំ ២០២៤ ។
ជួយដល់ជីវិត
កញ្ចប់សុខភាពផ្លូវចិត្ត
នេះជាគន្លឹះខ្លះៗដើម្បីរក្សាខ្លួនរបស់ប្អូនឲ្យមានសុខភាពផ្លូវចិត្តល្អ ។
ប្អូនប្រហែលជាអាចគិតអំពីវិធីជាច្រើន ដើម្បីរក្សារូបកាយរបស់ប្អូនឲ្យមានសុខភាពល្អនៅពេលប្អូនធំឡើង ។ ប្អូនដឹងទេថាព្រះវរបិតាសួគ៌ និងព្រះយេស៊ូវគ្រីស្ទស្រឡាញ់ប្អូន ហើយចង់ឲ្យប្អូនថែរក្សារូបកាយរបស់ប្អូន ។ ហើយ « ការថែរក្សារូបកាយរបស់ប្អូនរួមមាន ការថែទាំសុខភាពផ្លូវចិត្ត និងផ្លូវសតិអារម្មណ៍របស់ប្អូន » ( ដើម្បីកម្លាំងនៃយុវជន ៖ សេចក្តីណែនាំសម្រាប់ធ្វើការជ្រើសរើស [ ឆ្នាំ ២០២២ ], ទំព័រ ២៩ ) ។ នេះជាកិច្ចការខ្លះៗដែលប្អូនអាចធ្វើ ដើម្បីជួយខ្លួនឯងឲ្យមានសុខភាពល្អខាងផ្លូវចិត្តផងដែរ !
-
រូបភាពទូរសព្ទដៃ
រចនារូបភាពដោយ អិមមីលី អ៊ី ចូនស៍
ភ្ជាប់ទំនាក់ទំនងជាមួយនឹងអ្នកដទៃ ។ ជាពិសេសនៅពេលដែលប្អូនមានអារម្មណ៍សោកសៅ ប្អូនប្រហែលជាចង់នៅម្នាក់ឯង ។ វាមិនអីទេសម្រាប់ពេលខ្លះ ប៉ុន្តែវាក៏សំខាន់ក្នុងការចំណាយពេលជាមួយមនុស្សដែលលើកទឹកចិត្តផងដែរ ។ ការនៅដាច់ដោយឡែកតែឯងតែងតែធ្វើឲ្យឧបសគ្គកាន់តែលំបាកឡើង ។
-
រូបភាពពពុះបញ្ចេញមតិ
បង្ហាញអារម្មណ៍របស់ប្អូន ។ អនុវត្តការនិយាយដោយស្មោះត្រង់អំពីអារម្មណ៍របស់ប្អូន ។ និយាយអំពីអារម្មណ៍របស់ប្អូនតាមវិធីជាក់លាក់មួយ ។ ហើយពិតណាស់ វាមិនអីទេក្នុងការយំ ! សូមគិតអំពីគ្រាមួយដែលព្រះយេស៊ូវទ្រង់ព្រះកន្សែង ( សូមមើល យ៉ូហាន ១១:៣២-៣៥ ) ។
-
រូបភាពខួរក្បាល
ទទួលស្គាល់ថាអារម្មណ៍គឺជាព័ត៌មាន ។ ទោះបីជាអារម្មណ៍ទាំងនោះអាចមិនស្រណុកចិត្តក៏ដោយ ក៏ការមានអារម្មណ៍នៅក្នុង និងអំពីខ្លួនឯងនោះមិនអាចធ្វើឲ្យប្អូនឈឺចាប់បានទេ ។ សូមព្យាយាមកំណត់អត្តសញ្ញាណអារម្មណ៍របស់ប្អូន ហើយទទួលស្គាល់នូវអ្វីដែលអារម្មណ៍ទាំងនោះកំពុងប្រាប់ដល់ប្អូន ។
-
រូបភាពប៊ិច ខ្មៅដៃ ជក់
អនុវត្តជំនាញនៃការដោះស្រាយ ។ នៅពេលដែលប្អូនសោកសៅ ឬអាក់អន់ចិត្ត សូមរៀនគ្រប់គ្រងអារម្មណ៍ទាំងនោះតាមវិធីដែលមានសុខភាពល្អ ។ ឧទាហរណ៍ មនុស្សជាច្រើនរកឃើញថាវាមានប្រយោជន៍ក្នុងការចេញទៅដើរលេងខាងក្រៅ ស្តាប់តន្ត្រី គូររូប អធិស្ឋាន ឬសរសេរក្នុងទិនានុប្បវត្តិ ។
-
រូបភាពពពក
អារម្មណ៍ពិបាកចិត្តមានជាធម្មតា ហើយក៏បាត់ទៅវិញ ។ ដកដង្ហើមវែងៗ ហើយស្រមៃឃើញពពករសាត់ពាសពេញផ្ទៃមេឃ ឬទឹកហូរចុះតាមទន្លេ ។ សូមទទួលស្គាល់គំនិត និងអារម្មណ៍របស់ប្អូន ហើយព្យាយាមឲ្យអារម្មណ៍ទាំងនោះរសាត់ចេញ ។
-
រូបភាពព្រះគម្ពីរ
បន្តចិញ្ចឹមបីបាច់វិញ្ញាណរបស់ប្អូន ។ ព្រះគម្ពីរ ទំនុកតម្កើង ការអធិស្ឋាន ព្រះវិហារ—ទាំងអស់នេះជួយពង្រឹងស្មារតីរបស់ប្អូនបាន ដែលនឹងជួយខ្លួនប្រាណប្អូនទាំងមូលឲ្យមានសុខភាពល្អ ។
-
រូបភាពដបទឹក និងស្បែកជើង
ព្យាយាមរក្សាសុខភាពរាងកាយឲ្យល្អ ។ សុខភាពផ្លូវចិត្ត និងសុខភាពរាងកាយរបស់យើងគឺទាក់ទងគ្នា ។ ការបរិភោគអាហារបំប៉ន ការគេងឲ្យបានគ្រប់គ្រាន់ និងការបង្កើតទម្លាប់ហាត់ប្រាណនឹងជួយប្អូនឲ្យមានសុខភាពល្អផ្លូវចិត្តកាន់តែល្អប្រសើឡើងនៅពេលដែលប្អូនរីកចម្រើនឡើង ។
-
រូបភាពកូនប្រុស និងម្ដាយ
ស្វែងរកជំនួយនៅពេលប្អូនត្រូវការវា ! ពេលខ្លះរូបកាយរបស់យើងត្រូវការជំនួយដែលមានវិជ្ជាជីវៈ ដើម្បីមានសុខភាពល្អប្រសើរឡើងវិញ ។ ធនធានទាំងនេះគឺជាពរជ័យមួយមកពីព្រះវរបិតាសួគ៌ដែលចង់ជួយដល់យើង ។ តាមរបៀបស្រដៀងគ្នានេះ យើងអាចត្រូវការជំនួយមកពីវេជ្ជបណ្ឌិត និងអ្នកប្រឹក្សាយោបល់ ដើម្បីមានសុខភាពផ្លូវចិត្តល្អនៅពេលខ្លះ ។ ប្រសិនបើប្អូនមានអារម្មណ៍ថាប្អូនសោកសៅក្នុងរយៈពេលវែង ឬប្រសិនបើប្អូនមានគំនិតចង់ធ្វើបាបខ្លួនឯងឲ្យឈឺចាប់ សូមសុំជំនួយពីមនុស្សពេញវ័យ ។ ប្អូនមិនចាំបាច់ឆ្លងកាត់រឿងនេះតែម្នាក់ឯងនោះទេ ! សូមស្វែងយល់អំពីពរជ័យទាំងអស់ដែលព្រះវរបិតាសួគ៌បានប្រទានដល់ប្អូន ។