របៀប ៧ យ៉ាងដើម្បី មើលទៅព្រះគ្រីស្ទ

ដោយ អ៊ីរិក ឌី ស្នាយឌឺ

ទស្សនាវដ្ដីសាសនាចក្រ

សូមសាកល្បងទម្លាប់ទាំងនេះដើម្បីតម្រង់ចក្ខុវិស័យរបស់អ្នកទៅលើព្រះអង្គសង្គ្រោះ ។

ការអនុវត្តបាវចនាយុវវ័យឆ្នាំនេះ—« មើលទៅព្រះគ្រីស្ទ »—បង្ហាញពីឧបសគ្គបន្តិចផងដែរ ។ តើយើងមើលទៅឯនរណាម្នាក់ដែលមិនមានវត្តមានខាងរាងកាយដោយផ្ទាល់តាមរបៀបណា ? ចាប់ផ្តើមពីទម្លាប់ទាំងប្រាំពីរនេះ ។

១. ចាំថាទ្រង់មិនលាក់ព្រះកាយទេ

មែនហើយ ប្អូនៗត្រូវតែរកមើលទ្រង់ ។ ប៉ុន្តែ ទ្រង់មានព្រះទ័យចង់ឲ្យយើងរកឃើញទ្រង់ ។ វាមិនមែនជាល្បែងបិទពួនទេ ។ ព្រះអម្ចាស់មានព្រះទ័យអន្ទះសាប្រទានពរដល់ប្អូនៗ—តាមពិត វាធ្វើឲ្យទ្រង់មានព្រះទ័យរីករាយ ( សូមមើល គោលលទ្ធិ និងសេចក្ដីសញ្ញា ៤១:១ ) ។ ទ្រង់មិនស្វែងរកហេតុផលដើម្បីដកហូតភាពស័ក្តិសមរបស់ប្អូនៗឡើយ ។ ផ្ទុយទៅវិញ ៖ ទ្រង់តែងតែព្យាយាមប្រទានពរដល់ប្អូនៗជានិច្ច ។ ដូចដែលអែលឌើរ ផាទ្រីក ខៀរ៉ុន ក្នុងកូរ៉ុមនៃពួកសាវកទាំងដប់ពីរនាក់បានបង្រៀនថា « ទេ [ ព្រះអង្គសង្គ្រោះ ] មិនដាក់របាំងផ្លូវទេ ប៉ុន្តែទ្រង់នឹងដកយកវាចេញវិញ ។ ទ្រង់មិនបណ្ដេញបងប្អូនចេញឡើយ ប៉ុន្តែទ្រង់ស្វាគមន៍បងប្អូនឲ្យចូលមកវិញ ។ ការងារបម្រើទាំងស្រុងរបស់ទ្រង់គឺជាការប្រកាសដ៏រស់រវើកមួយអំពីព្រះរាជបំណងនេះ » ។

២. ទទួលស្គាល់ឥទ្ធិពលរបស់ទ្រង់ក្នុងជីវិតរបស់ប្អូនៗ

ព្រះអម្ចាស់ពេញព្រះទ័យពេលយើង « ទទួលស្គាល់ព្រះហស្តរបស់ទ្រង់ក្នុងគ្រប់ទាំងអស់ » ( គោលលទ្ធិ និងសេចក្ដីសញ្ញា ៥៩:២១ ) ។ ដូច្នេះ សូមប្រាកដថាប្អូនៗទទួលស្គាល់ឥទ្ធិពលរបស់ទ្រង់ក្នុងជីវិតរបស់ប្អូនៗ ! សូមអរគុណទ្រង់ ពេលអ្វីៗដំណើរការល្អសម្រាប់ប្អូនៗ ហើយស្វែងរកសេចក្ដីសុខសាន្ត និងការយល់ដឹង នៅពេលដែលអ្វីៗមិនដំណើរការល្អ ។

៣. មានអំណរគុណចំពោះអ្វីដែលប្អូនៗមាន

ទន្ទឹមនឹងការទទួលស្គាល់ឥទ្ធិពលរបស់ព្រះអម្ចាស់នៅក្នុងជីវិតរបស់ប្អូនៗ វាក៏សំខាន់ផងដែរក្នុងការមានអារម្មណ៍—និងបង្ហាញ—ការដឹងគុណ ។ ប្អូនៗប្រហែលជាមិនបាន « ឃើញ » ព្រះអង្គសង្គ្រោះនឹងភ្នែកផ្ទាល់ទេ តែប្អូនៗអាចមើលឃើញពរជ័យរបស់ទ្រង់ក្នុងជីវិតរបស់ប្អូនៗ ! អែលឌើរ ហ្គែរី ប៊ី សាប៊ីន នៃពួកចិតសិបនាក់ បានមានប្រសាសន៍ថា « យើងនឹងគ្មានអំណរទេ បើយើងមិនចេះដឹងគុណនោះ » ។ សូមអរព្រះគុណព្រះអម្ចាស់រាល់ថ្ងៃសម្រាប់ពរជ័យរបស់ប្អូនៗ ។ ពេលប្អូនៗមានអារម្មណ៍ធ្លាក់ចុះ សូមធ្វើតាមដំបូន្មានក្នុងទំនុកតម្កើងចាស់ ៖ « ចូររាប់ព្រះពរទ្រង់ផ្តល់រាប់មួយម្តងមួយម្តង នោះនឹងនឹកអរឡើងដោយឃើញព្រះគុណព្រះអង្គ » ។

៤. អធិស្ឋានជារៀងរាល់ថ្ងៃ

ប្អូនៗនឹងអាច « ឃើញ » ព្រះអង្គសង្គ្រោះកាន់តែច្បាស់ពេញមួយថ្ងៃ ប្រសិនបើប្អូនៗចាប់ផ្តើមដោយការនិយាយជាមួយព្រះវរបិតាសួគ៌ ។ ទូលសូមទ្រង់ជួយប្អូនៗឲ្យចងចាំព្រះអង្គសង្គ្រោះ ហើយកត់សម្គាល់អំពីឥទ្ធិពលរបស់ទ្រង់ក្នុងជីវិតរបស់ប្អូនៗ ។ ប្អូនៗអាចអធិស្ឋានឲ្យបានញឹកញាប់តាមដែលប្អូនៗចង់អធិស្ឋានអំឡុងពេលថ្ងៃ ។ ហើយមុនពេលចូលដំណេក សូមអធិស្ឋានម្តងទៀតដើម្បីទូលប្រាប់ព្រះវរបិតាសួគ៌ថាអ្វីៗបានដំណើរការទៅយ៉ាងណា ។ ទ្រង់មិនដែលធុញទ្រាន់ក្នុងការឮពីប្អូនៗទេ !

៥. ទន្ទេញបទគម្ពីរ និងទំនុកតម្កើង

វិធីមួយដើម្បីរក្សាគំនិតរបស់ប្អូនៗឲ្យផ្តោតទៅលើព្រះយេស៊ូវគ្រីស្ទ គឺចាំពាក្យនៃបទគម្ពីរ ឬទំនុកបទនៃចម្រៀងលើកស្ទួយមួយដែលប្អូនៗចូលចិត្ត ។ សូមហាត់ចងចាំវា ពេលប្អូនៗមានអារម្មណ៍ថាគំនិតអវិជ្ជមានកំពុងជ្រាបចូលក្នុងខួរក្បាលរបស់ប្អូនៗ ។ ជាញឹកញាប់គ្រាន់តែការនឹកឃើញ ( និងច្រៀងដោយស្ងៀមស្ងាត់ ) នូវចំណងជើងនៃទំនុកតម្កើងមួយ ប្រហែលជាគ្រប់គ្រាន់ដើម្បីបង្វែរគំនិតរបស់ប្អូនៗ ៖ « ខ្ញុំជាកូនរបស់ព្រះ » ។ « ខ្ញុំត្រូវការទ្រង់ជានិច្ច » ។ « សូមទុកចិត្តទ្រង់ » ។

៦. មើលរូបភាពរបស់ព្រះអង្គសង្គ្រោះ

សូមស្វែងរករូបគំនូរសិល្បៈមួយចំនួនរបស់ព្រះអង្គសង្គ្រោះ ដែលប្អូនៗចូលចិត្ត បន្ទាប់មកដាក់វានៅកន្លែងដែលប្អូនៗនឹងឃើញវាជាញឹកញាប់ ។ កន្លែងមួយចំនួនអាចរួមមានជញ្ជាំងបន្ទប់គេង កញ្ចក់បន្ទប់ទឹក ទូនៅសាលារបស់ប្អូនៗ ឬដាក់វាជាផ្ទៃខាងក្រោយនៅលើកុំព្យូទ័រ ឬអេក្រង់ដើមនៃទូរសព្ទរបស់ប្អូនៗជាដើម ។

៧. មើលពិភពលោកជុំវិញប្អូនៗ

វាស្រស់ស្អាត ! ហើយព្រះអង្គសង្គ្រោះបានបង្កើតវាសម្រាប់ប្អូនៗ ( សូមមើល គោលលទ្ធិ និងសេចក្ដីសញ្ញា ១៤:៩ ) ! យើងមិនដឹងពីមូលហេតុដែលផែនដី ត្រូវតែ ស្រស់ស្អាតនោះទេ ។ ប្រហែលជាយើងអាចប្រើជីវិតរមែងស្លាប់នៅក្នុងពិភពមួយដែលរាបស្មើ រាងការ៉េ និងមានពណ៌ប្រផេះ ។ ផ្ទុយទៅវិញ ព្រះអង្គសង្គ្រោះបានបង្កើតពិភពលោកមួយ « សម្រាប់ផលប្រយោជន៍ និងការប្រើប្រាស់របស់មនុស្ស ទាំងដើម្បីផ្គាប់ភ្នែក និងដើម្បីធ្វើឲ្យចិត្តអរសប្បាយផង » ( គោលលទ្ធិ និងសេចក្តីសញ្ញា ៥៩:១៨ ) ។ និយាយម្យ៉ាងទៀត គឺផែនដីស្រស់ស្អាតណាស់ព្រោះអ្វីដែលស្រស់ស្អាតធ្វើឲ្យយើងមានអារម្មណ៍ល្អ ។ ប្រសិនបើប្អូនៗចង់ចងចាំព្រះអង្គសង្គ្រោះ នោះគ្រាន់តែមើលជុំវិញខ្លួនប៉ុណ្ណោះ ។