ការសាងសង់ ផ្ទះ និងទីបន្ទាល់
អាជីវកម្មសំណង់របស់សារ៉ាកំពុងរីកចម្រើន ប៉ុន្តែនាងត្រូវធ្វើការសម្រេចចិត្តមួយ ។
រូបថតដោយ គ្រីស្ទីណា ស្ម៊ីធ លើកលែងតែបានកត់សម្គាល់
សម្រាប់ណូអេ វាគឺជាទូកធំ ។ ស្តេចបេនយ៉ាមីនបានសម្រេចព្រះទ័យសង់ប៉ម ។ បងប្រុសរបស់យ៉ារេឌបានសម្រេចចិត្តសង់ភេត្រា ។ ចុះសម្រាប់ សារ៉ា គ្រីស្ទិនសិន មកពីរដ្ឋម៉ុនថាណា សហរដ្ឋអាមេរិកវិញនោះ ? មែនហើយ នាងបានសម្រេចចិត្តថាចង់សាងសង់ផ្ទះ ។
ហឺម៉ាណា គ្រីស្ទិនសិន ដែលបច្ចុប្បន្នជាអ្នកផ្សព្វផ្សាយសាសនាពេញម៉ោងម្នាក់ដែលកំពុងបម្រើក្នុងបេសកកម្ម មីនីសូតា មីនីណាប៉ូលីស ធ្លាប់មានការខឹងសម្បាបន្តិច ដែលបេសកកម្មមករារាំងគោលដៅសាងសង់របស់នាង—សូម្បីតែវាមិនមែនជាបេសកកម្មផ្ទាល់ខ្លួនរបស់នាងផង !
មកស្ដាប់ពីដំណើរដើមទងនៃរឿងនេះ !
នាងនិយាយថា « ខ្ញុំបានជួយប៉ាខ្ញុំសង់អ្វីៗពេញមួយជីវិតខ្ញុំ » ។ « ខ្ញុំយល់ដឹងពីឧបករណ៍អគ្គិសនី និងការសាងសង់ ហើយយូរៗទៅខ្ញុំចូលចិត្តវាខ្លាំងឡើងៗ ។ ដូច្នេះហើយ ពេលខ្ញុំមានអាយុ ១៦ ឆ្នាំ ខ្ញុំបានសម្រេចចិត្តថា ខ្ញុំចង់ចាប់ផ្ដើមអាជីវកម្មសំណង់ផ្ទាល់ខ្លួនរបស់ខ្ញុំ » ។
សារ៉ានិយាយថា « ប៉ាខ្ញុំបានបង្រៀនខ្ញុំឲ្យផ្គុំរបស់របរ ចាប់ផ្ដើមពីក្តារពីរបន្ទះរហូតក្លាយទៅជាផ្ទះទាំងមូល » ។
ការបង្កើតអាជីវកម្ម
ពីដំបូង សារ៉ាបានជួសជុលផ្ទះមួយនារដូវក្តៅនៅក្នុងឆ្នាំមួយ ។ នាងចូលចិត្តវាខ្លាំងណាស់ ដែលធ្វើឲ្យនាងបានទទួលគម្រោងជួសជុលផ្ទះមួយទៀតនៅឆ្នាំបន្ទាប់ ។ ទីបំផុត នាងបានសម្រេចចិត្តទទួលគម្រោងធំជាងនោះទៀត—គឺផ្ទះ « spec » ឬផ្ទះមួយដែលនាង និងក្រុមអ្នកម៉ៅការបន្តរបស់នាងនឹងសាងសង់ពីគ្រឹះរហូតដល់បញ្ចប់ ដោយសង្ឃឹមថានឹងលក់បានប្រាក់ចំណេញ ។
ថ្ងៃនៃការវាយកម្ទេចចោលអគារសំណង់ ! សារ៉ាយកញញួរទៅបន្ទប់ទឹកក្នុងគម្រោងមួយរបស់នាង ។
ការចាប់ផ្ដើមអាជីវកម្មមិនមែនជាគម្រោងងាយស្រួលទេ ជាពិសេសដោយព្រោះសារ៉ានៅរវល់នឹងថ្នាក់វិទ្យាល័យ និងកីឡារត់ប្រណាំងនៅឡើយ ។
សារ៉ាបានចាប់ផ្តើមក្រុមហ៊ុនសំណង់ផ្ទាល់ខ្លួនរបស់នាងនៅពេលនាងមានអាយុ ១៦ ឆ្នាំ ។
នាងនិយាយថា « ខ្ញុំបានរៀនច្រើនណាស់ » ។ « ខ្ញុំត្រូវប្រើសៀវភៅសែក ដើម្បីបង់ថ្លៃផ្សេងៗ ដែលខ្ញុំមិនធ្លាប់ធ្វើពីមុនមកទេ ។ ខ្ញុំត្រូវទម្លាប់ក្នុងការនិយាយជាមួយមនុស្សចម្លែកដែលជាអ្នកម៉ៅការបន្តរបស់ខ្ញុំ ។ ខ្ញុំក៏បានរៀនពីរបៀបដោះស្រាយភាពតានតឹងនៃការគ្រប់គ្រងក្រុមហ៊ុនមួយផងដែរ ដែលមិនតែងតែសប្បាយរីករាយនោះទេ ។ វាតែងតែមានការព្រួយបារម្ភថា ខ្ញុំនឹងលក់ផ្ទះមិនបានរួចដើម » ។
មិនដែលនៅម្នាក់ឯងឡើយ
ប៉ុន្តែទោះបីជាមានការព្រួយបារម្ភ និងភាពតានតឹងដែលកើតឡើងជាមួយនឹងដំណើរការអាជីវកម្មក៏ដោយ សារ៉ាមិនដែលត្រូវប្រឈមមុខនឹងក្តីសុបិនដ៏ធំរបស់នាងតែម្នាក់ឯងនោះទេ ។
នាងនិយាយថា « វាតែងតែដោះស្រាយចេញ ហើយខ្ញុំដឹងថា គឺដោយសារតែព្រះអម្ចាស់ » ។ « រឿងអាជីវកម្មនេះមិនអាចទៅរួចទេ បើគ្មានទ្រង់ ។ ទ្រង់បានជួយខ្ញុំឲ្យឆ្លងកាត់ថ្ងៃអាក្រក់ ការងារលំបាក អ្វីៗគ្រប់យ៉ាង » ។
ទំនាក់ទំនងដ៏ជិតស្និទ្ធរបស់សារ៉ា មានជាមួយគ្រួសាររបស់នាងមកពីការធ្វើការជាមួយគ្នា ។
គ្រួសាររបស់សារ៉ាក៏បានគាំទ្រនាងនៅគ្រប់ដំណាក់កាលផងដែរ—ដែលនាំយើងត្រឡប់ទៅបេសកកម្មនោះវិញ ដែលកំពុងជ្រៀតជ្រែកផែនការរបស់នាង ។
បងប្រុសរបស់នាង ថាយល័រ បានគ្រោងនឹងជួយសារ៉ាសាងសង់ផ្ទះមួយនៅពេលដែលគាត់ត្រឡប់មកផ្ទះវិញពីបេសកកម្មរបស់គាត់ ។ ប៉ុន្តែថ្ងៃមួយ គាត់បានទូរសព្ទទៅនាងប្រាប់ដំណឹងថាគាត់ត្រូវបានសុំឲ្យបន្តការបម្រើជាអ្នកផ្សព្វផ្សាយសាសនារបស់គាត់បន្តិចទៀត ។
នាងសារភាពថា « ខ្ញុំខឹងនឹងគាត់ខ្លាំងណាស់ » ។ « ខ្ញុំបាននិយាយថា ‹ ថាយល័រ បងមិនអាចទទួលយកសំណើនោះបានទេ ។ ខ្ញុំបានរៀបផែនការនេះរួចហើយ › ។ ហើយគាត់បាននិយាយថា ‹ កិច្ចការរបស់ព្រះអម្ចាស់គឺសំខាន់ជាងកិច្ចការរបស់ឯង › ។ ពាក្យនោះចាក់ដោតយ៉ាងខ្លាំងមកលើខ្ញុំ ។ ខ្ញុំបានដឹងថា គាត់និយាយត្រូវ ហើយថាខ្ញុំត្រូវទុកចិត្តលើផែនការរបស់ព្រះ » ។
គ្រួសាររបស់សារ៉ាបានស្វាគមន៍បងប្រុសនាង ថាយល័រ មកផ្ទះវិញ បន្ទាប់ពីគាត់បានពន្យារបន្តបេសកកម្មរបស់គាត់ ។
រូបថតដែលបានទទួលការអនុញ្ញាតពី សារ៉ា គ្រីស្ទិនសិន
មិនថានាងទទួលបានជំនួយពីឪពុកនាង ឬជំនួយពីព្រះវរបិតាសួគ៌ សារ៉ាដឹងថានាងមិននៅម្នាក់ឯងឡើយ ។
បេសកកម្មរបស់នាងផ្ទាល់
គំរូរបស់ ថាយល័រ បានបំផុសគំនិតសារ៉ា ឲ្យចាប់ផ្តើមគិតអំពីការបម្រើបេសកកម្មរបស់នាងផ្ទាល់ ។ ហឺម៉ាណា គ្រីស្ទិនសិន និយាយថា « ខ្ញុំបានដឹងថាមានមនុស្សប៉ុន្មាននាក់ដែលបងប្រុសរបស់ខ្ញុំបានជួយឲ្យមកឯព្រះគ្រីស្ទ ហើយខ្ញុំក៏បានឃើញផងដែរថា គាត់បានមកឯព្រះគ្រីស្ទខ្លាំងប៉ុនណាដោយខ្លួនគាត់ផ្ទាល់ ។ ខ្ញុំចង់មានបទពិសោធន៍ស្រដៀងគ្នានេះដែរ » ។ « ខ្ញុំបានចាប់ផ្ដើមសិក្សាដំណឹងល្អយ៉ាងហ្មត់ចត់ ហើយបានឃើញថា ពេលដែលទីបន្ទាល់ និងទំនាក់ទំនងរបស់ខ្ញុំជាមួយព្រះអង្គសង្គ្រោះកាន់តែលូតលាស់ឡើង នោះខ្ញុំកាន់តែចង់ចែកចាយនូវអ្វីដែលខ្ញុំមានច្រើនប៉ុណ្ណោះដែរ » ។
សារ៉ាបានធ្វើការជ្រើសរើសផ្អាកអាជីវកម្មសំណង់របស់នាង ហើយបម្រើព្រះអម្ចាស់ ។ ការសម្រេចចិត្តនេះបានផ្តល់នូវការយល់ដឹងថ្មីដ៏មានឥទ្ធិពលដល់នាង ។
ហឺម៉ាណា គ្រីស្ទិនសិន និយាយថា « រឿងទីមួយដែលបេសកកម្មរបស់ខ្ញុំបានបង្រៀនខ្ញុំគឺថា ដំណឹងល្អផ្លាស់ប្តូរជីវិតទាំងស្រុង » ។ « ការធំឡើងនៅក្នុងសាសនាចក្របានធ្វើឲ្យខ្ញុំពិបាកមើលឃើញថា ដំណឹងល្អមានសារៈសំខាន់ប៉ុនណាក្នុងជីវិតខ្ញុំ ។
« នៅទីនេះក្នុងបេសកកម្មរបស់ខ្ញុំ ខ្ញុំត្រូវបានហ៊ុមព័ទ្ធដោយមនុស្សដែលមិនដឹងអំពីព្រះវរបិតាសួគ៌ និងព្រះយេស៊ូវគ្រីស្ទ ។ នៅពេលដែលពួកគេរៀនថា ពួកគេជាកូនរបស់ព្រះ ហើយថាទ្រង់មានផែនការសម្រាប់ពួកគេ វាផ្លាស់ប្ដូរជីវិតរបស់ពួកគេ ។ វាគឺជារឿងដ៏អស្ចារ្យបំផុតក្នុងការធ្វើជាសាក្សី និងជាផ្នែកមួយនៃការណ៍នេះ ។ ខ្ញុំមានការយល់ដឹងអំពីរឿងនោះមុនបេសកកម្មរបស់ខ្ញុំ ប៉ុន្តែឥឡូវនេះខ្ញុំដឹងថា ដំណឹងល្អរបស់ព្រះយេស៊ូវគ្រីស្ទគឺចាំបាច់ណាស់សម្រាប់សេចក្ដីអំណរនៅក្នុងពិភពលោកនេះ និងនៅក្នុងពិភពខាងមុខ » ។
ហឺម៉ាណា គ្រីស្ទិនសិន ( ស្តាំ ) និងដៃគូរបស់នាង ហឺម៉ាណា ថេល័រ ( ឆ្វេង ) ចូលចិត្តបម្រើតាមវិធីណាក៏ដោយដែលពួកគេអាចធ្វើបាន ។
រូបថតដែលបានទទួលការអនុញ្ញាតពី សារ៉ា គ្រីស្ទិនសិន
សេចក្ដីជំនឿជាជាងការភ័យខ្លាច
ចំពោះយុវវ័យដទៃទៀតដែលកំពុងគិតពីការបម្រើបេសកកម្ម ហឺម៉ាណា គ្រីស្ទិនសិន និយាយថា « ចូរមានសេចក្ដីជំនឿ ហើយកុំភ័យខ្លាចឡើយ ។ បេសកកម្មមិនងាយស្រួលទេ ប៉ុន្តែវាមានតម្លៃណាស់ ។ ព្រះនឹងប្រទានពរដល់បងប្អូនតាមរបៀបដែលមិននឹកស្មានដល់ នៅពេលដែលបងប្អូនធ្វើការសម្រេចចិត្តធ្វើជាអ្នកបម្រើម្នាក់របស់ទ្រង់ » ។
ទោះបីជានាងមិនអាចសាងសង់ផ្ទះពេលដែលនាងបម្រើក៏ដោយ ហឺម៉ាណា គ្រីស្ទិនសិន មិនសោកស្តាយចំពោះជម្រើសរបស់នាងឡើយ ។ នាងនិយាយថា « ពិតណាស់ អាជីវកម្មរបស់ខ្ញុំអាចមានការរីកចម្រើន ខណៈដែលខ្ញុំជាអ្នកផ្សព្វផ្សាយសាសនាពេញម៉ោង » ។ « ប៉ុន្តែខ្ញុំដឹងថា ព្រះអម្ចាស់នឹងប្រទានពរដល់ការលះបង់របស់ខ្ញុំក្នុងការទុកវាចោលបន្តិច ។ អាជីវកម្មរបស់ខ្ញុំអាចរង់ចាំបាន តែកិច្ចការរបស់ព្រះអម្ចាស់មិនអាចទេ ! »