Kūr Jān E n̄an Kwaļo̧k Naan eo An
Jen Elder Randy D. Funk
Jen Jiljilimjuonoul
Eļan̄n̄e kwoj ettā im pokake im eo̧ron̄ ainikien Jetōb eo, kwonaaj loe eļap m̧ōņōņō ilo jerbal eo am āinwōt juon mijenede.
Ke ikar rejtak āinwōt juon Ritōl Eutiej Eprōl eo ļo̧k, ikar jerbal āinwōt juon mijen būreejtōn ilo India. Lo tōrein jerbal eo aō ikar etale ippa make ta eo bar juon mijen būreejtōn m̧okta eaar jirōn eō: ‟Mijenede ro an Kabun̄ in rekabwilōn̄lōn̄”1
Juon iaan mijenede ro em̧m̧an m̧wilin eo Sister Funk im n̄a kar jerbal ippān ekar Elder Pokhrel jen Nepal. Ālkin an kar erom membōr in Kabun̄ in ium̧win wōt ruo iiō, kar kūri bwe en tin jerbal ilo India Bangalore Mission, juon mijen kōnono kajin Pālle. Emaron̄ jiron̄ eok bwe ejjan̄in pojak. Kar meļeļe kake. Ejjan̄in kar ellolo mijenede m̧ae iien eo ekar erom juon. Ejjab em̧m̧an an riit kajin pālle n̄an meļeļe kōn kōmeļeļe ko ekoba kūr eo an n̄an mijen. Ke eaar etal n̄an missionary training center eo, ijjeļo̧kin an bōktok juuj, jōōt mouj, im tae ko rem̧m̧an, ekar bōktok ippān tok, ilo naan ko an, “ļaļem pea in aitok nee talim, jet jiln̄iij, im bwijin kein ekkapit bar.”2
Men̄e ekar bōktok nuknuk ko rekkar, ekar ba bwe eaar en̄jake jōbwābwe aolep raan ilo wiik ko jet im̧aan. Ekar kwaļo̧k kadkadin iien mijen eo an: ‟Ejjab wōt pen kōnono kajin Pālle, ak jerbal eo ejab bwe an idajon̄jon̄. … Ilōn̄in men kein ikar kwoļe, mōk, im on̄. … Men̄e jekjek ko raar eppen, iaar kate eō. Iaar en̄jake m̧ōjņo̧ im jōbwāwbwe. Iaar jar kōn iien ko n̄an Jemedwōj Ilan̄ n̄an jipan̄ eō. Kōn jab likjab, aolep iien ij jar, Ij maron̄ en̄jake aenōm̧m̧an.”3
Mekarta jerbal in mijenede ekar kāāl im idajon̄jon̄ n̄an Elder Pokhrel, ekar jerbal kōn eļap tōmak im wujlepļo̧k, kappukōt n̄an meļeļe im ļoor ta eo ekar ekkatak jen jeje ko rekwojarjar, Preach My Gospel,ippān ritōl ro an lo mijen. Eaar erom juon rikaki ekajoor an ko̧jpeļ―ilo kōjerbal Kajin Pālle―im juon ritōl em̧m̧an. Ālkin mijen eo an im jet iien ilo Nepal, ekar jepļaak n̄an India n̄an wōnm̧aanļo̧k kōn jeļāļo̧kjeņ eo an. Jen Jānwōde eo eaar jerbal āinwōt juon branch būreejtōn ilo New Delhi. Kōn lukkuun eddōkļo̧k eo ekar en̄jake āinwōt juon mijenede, ekar wōnm̧aanļo̧k n̄an kōm̧m̧ane ijo kuņaan n̄an m̧ool in eddōkļo̧k eo an Kabun̄ in ilo India.
Ekōjkan an juon likao em̧m̧an ded eo ejjan̄in kar ellolo mijenede erom juon kōn kain kajoor an jetōb? Ekōjkan am naaj bōk kajoor an jetōb āinwōt juon mijenede n̄an kōppeļļo̧k kōjem ko, ilo bo̧o̧k ko, im būruōn ro ilo mijen ijo kwonaaj jerbal ie? Iminene kake, uwaak ko loi ilo jeje ko rekwojarjar im naan ko an rikanaan ro remour im rijilōk ro.
Ke ko̧jpeļ eo karkwaļo̧k kake m̧okta ilo England ilo Juļae 1837, Irooj eaar kwaļo̧k [n̄an Rijilōk ro An] bwe jabdewōt eo naaj jilkinļo̧k ilo eta, kōn ainikien em̧m̧aan ro, Jon̄oulruo eo, rejtak im kōmālim jen kom, maron̄ bōk kajoor n̄an kōppeļļo̧k kōjem n̄an aelōn̄ eo aō n̄an jabdewōt laļ ijo naaj jilkinļo̧k er n̄an e.4
Jabdewōt ijo jilkinļo̧k kom n̄an e, n̄an mijen eo kālet kom̧ n̄an e, jeļā bwe ro uwaan Jon̄oulruo eo rej rejtake kūr eo im kom kūr jen rikanaan an Irooj. Kar kūr kom “jen” kanaan, im likūt pā ko ioon bar.”5
Innām Irooj ej litok jekjek ko n̄an kakūrm̧ool kallim̧ur eo. Eaar ba, Jon̄an eo wōt [me meļeļein kalim̧m̧ur eo enaaj kūrm̧ool eļan̄n̄e er [meļeļein mijenede ro kar jilinļo̧k er] [1] aikuj kōttāik er make im̧aan meja, im [2] pād ilo aō inaan, im [3] ron̄jake ainikien jetōb eo aō.6
Kalim̧m̧ur ko an Irooj ralikkar. N̄an bōk kajoor an jetōb n̄an kōppeļļo̧k kōjām im aelōn̄ in kiin̄ eo an Anij n̄an laļ eo jilkinļo̧k kom n̄ane, kom aikuj ettā bōro, pokake, im wōr maron̄ n̄an ron̄jake im ļoor Jetōb eo.
Jon̄ok kein jilu rej lukkuun epaake doon. Eļan̄n̄e kom̧ij ettā bōro, kom̧ naaj kōņaan pokake. Eļan̄n̄e kom̧ij pokake, kom̧ naaj en̄jake Jetōb eo. Jetōb eo eaorōk bwe, āinwōt Būreejtōn Ezra Taft Benson eaar katakin, ‟N̄e ejako Jetōb eo, kom̧ ban tōprak mekarta tōļan im maron̄ eo ami.”7
Āinwōt juon mijen būreejtōn, emmakijkij Aō etale mijenede ro rem̧ōjņo̧ ilo jerbal in kōnke rejjan̄in lukkkuun wānōk. Rej mour itulaļ aorōkin mour in jetōb eo aer. Jekdo̧o̧n ewi jon̄an aer kate er ak ewi jon̄an aer kōm̧m̧an em̧m̧an, rejjab maron̄ en̄jake aenōm̧m̧an im lukkuun lan̄lōn̄ kōn jemjerā eo an Jetōb Kwojarjar m̧ae iien rej kōttāier er make, lukkuun ukweļo̧k, im bar bōk m̧ōttan tūriam̧okake, im lo jouj an Rilo̧mo̧o̧r eo.
Irooj ej katakin ro Karejeran n̄an ettā bōro, kōnke jerbal in kemourour jetōb ej ijjino kōn bōro erup. Lōmņak kōn men eo em̧m̧an me ej itok jen men ko rerup. Bwidej ej rup n̄an ekkat weet. Weet ej rup n̄an kōm̧m̧an pilawe. Pilawe ej rup n̄an erom kōm̧m̧an kōkkaļe. N̄e juon armej ej bōk m̧ōttan kwojkwoj eo kōn bōro erup im juon jetōb ettā, enaaj erom likio.8 Ilo ad ukweļo̧k im erom likio kōn Pinmuur eo an Jisōs Kraist, jej leļo̧k elōn̄ļo̧k n̄an Rilo̧mo̧or eo ilo ad jerbal n̄an E. ‟Aaet, itok n̄an e wujlepeļo̧k aolep jetōb ko ami āinwōt juon katok n̄an e.”9
Eļan̄n̄e kom̧ij eddodo kōn jerawiwi im aikuj ukweļo̧k, jouj m̧ōkaj im kōm̧m̧ane. Ke Rilo̧mo̧o̧r ekar kemour ro rekar liaajlōļ, emmakijkij An kūr n̄an bar jutak. Jeje ko rekwojarjar rej kōmlet bwe ejim̧we im em̧ōkaj aer kōm̧m̧an āindein. 10 N̄an ami maron̄ mour jen jetōbin liaajļōļ ko ami, jouj bōk kūr in An n̄an bar jutak. Jab lem̧aanļo̧k, kōnono ippān Bisop eo am, branch būreejtōn, ak mijen būreejtōn im jino jerbal in ukweļo̧k kiiō.
Kajoor in kemour eo an Pinmuur enaaj bōktok aenōm̧m̧an n̄an jetōb eo am im kōm̧m̧an bwe kwon en̄jake Jetōb Kwojarjar.Wujlepļo̧k eo an Rilo̧mo̧or jab maron̄ bwine jon̄an, ak jerawiwi ko ad, men̄e reļļap im kauwōtata, maron̄ bwini im jeorļo̧ki, kwaļo̧k im meļo̧kļo̧ki. Irooj eaar ba bwe Ej lan̄lōn̄ n̄e juon armej ej ukwelo̧k.11
Kalim̧m̧ur in ilo Doctrine and Covenants elukkuun kajoor: Irooj eaar kōm̧m̧ane juon kallim̧ur ekajoor ke Eaar ba bwe eļan̄n̄e jej jab mōk in kōtļo̧k bwe wānōk ej kainōknōk ļōmņak ko ad, innām kom̧ij mour juon mour ewānōk.12 Ilo ami mour juon mour ewānōk, kwonaaj en̄jake juon aenōm̧m̧an epen ilo am jutak im̧aan mejen Anij im kwonaaj bōk kajoor an Jetōb n̄an ippām.13
Jet ro me rekāāl tata ilo Kabun̄ in ak ro em̧ōj aer bar ro̧o̧ltok im niknik remaron̄ ba, ‟Kiiō iwānōk im wōr juon kōņaan n̄an jerbal, ak ijjab jeļā n̄e ebwe jo ijeļā.” Ilo Eprōļ eo Būreejtōn Thomas S. Monson ar katakin kōj, “Juon jeļāļo̧kjeņ in m̧ool im uwaak ko n̄an kajjitōk ko ad reļļap rej itok n̄an kōj ilo ad pokake kien ko an Anij.”14 Ekōjkan n̄an jeļā bwe kōn ad pokake jej bōk jeļāļo̧kjeņ.
Ro jet remaron̄ en̄jake bwe ejabwe taļōn ko, maron̄ im iminene ko n̄an liļo̧k. Eļan̄n̄e ewōr am baj kajjitōk, keememej en̄jake eo an Elder Pokhrel. Pojak jon̄an wōt am maron̄ im jeļā bwe Jemedwōj Ilan̄ enaaj kōļapļo̧k kijejeto ko am n̄an ettā bōro im pokake. Elder Richard G. Scott eaar kwaļo̧k kapilōk in eperan: ‟Eļan̄n̄e jej pokake kien ko an Irooj im jerbal n̄an ro Nejin ilo jab watōk, jem̧ļok eo ej kajoor eo jen Anij―kajoor n̄an kōm̧m̧an eļapļo̧k jen ad maron̄ kōm̧m̧an kōn kōjmake. Errem̧aanļo̧k ko ad, taļōn ko ad, maron̄ ko ad rej depakpak ļo̧k kōnke jej bōk jim̧we im kajoor jen Irooj.”15
Ilo ami leke Irooj im An em̧m̧an, Anij Ekajoorpata enaaj kōjeram̧m̧an ro Nejin kōn kom̧. 16 Elder Hollings jen Nevada ekar ekkatak kake men in m̧okta ilo mijen eo an. Raan eo ālkin an itaakļo̧k ilo India, eaar itoitak ippān Sister Funk im n̄a n̄an Rajahmundry, eria eo an kein kajuon. Ālkin rālepen eo Elder Hollings im Elder Ganaparam raar ilo̧k n̄an lo̧ļo̧k juon membōr an Kabun̄ in im jinen. Jinen ekar kōņaan katak kōn Kabun̄ in kōnke ekar lo jon̄an an ko̧jpel eo kōjeram̧m̧an mour eo an leddik eo nejin. Sister Funk ekar kobaļo̧k ippāer n̄an kwaļo̧k jemjerā. Kōnke katak eo nej ekkatak kake ilo kajin Pālle im jinen ej kōnono wōt Telugu, juon brother ilo branch eo ekar pād ijo n̄an ukōt ta ko katak kaki.
Jerbal eo an Elder Hollings ilo jerbal in katakin eo an kein kajuon n̄an katakin kōn M̧adenļo̧k eo Kein Kajuon, kōjerbal naan ko an Rikanaan Joseph. Ilo iien in ilo katak eo eaar oktakļo̧k n̄an Sister Funk im kajjitōk, ‟Iaikuj ke ba jejjet in?” kar jeļā bwe maron̄ ukōte.
Eaar uwaak, ‟Ba kalikkare bwe Jetōb en maron̄ kam̧oole ta eo kwoj ba.”
Ke mijenede in ekāāl ekar jino katakin kōn M̧adenļo̧k eo Kein Kajuon, kōjerbal naan ko an Rikanaan eo, reitōk in turin mejen ekar oktak. Dānin kōmjalaal ar waļo̧k. Ilo an Elder Hollings kōjem̧ļo̧k ennaan eo eaiboojoj im m̧okta jen ukōte ta eo eaar ba, ekar kajjitōk kōn dānin kōmjalaal ilo kajin eo an make, ‟Imaron̄ ke peptaij? Im komaron̄ ke katakin ļaddik eņ nejū?”
Ro karejera rem̧m̧an ded, kōjām ko im bōro ko rej peļļo̧k aolep raan n̄an ennaan eo an ko̧jpeļ―juon ennaan me ej bōktok kōjatdikdik im aenōm̧m̧an im lan̄lōn̄ n̄an ro nejin Anij peļaakūn laļ in. Eļan̄n̄e kwoj ettā bōro, pokake, im ron̄jake ainikien Jetōb eo aō, kwonaaj lo eļap lan̄lōn̄ ilo am jerbal āinwōt juon mijenede.17 Ta juon jijen eaiboojoj n̄an erom juon mijenede―juon iien me Irooj ej kōmkajļo̧k An jerbal!
Ij kwaļo̧k kam̧ool kōn ad Rilo̧mo̧or im kōn An “kean̄ ekwojarjar”18 n̄an ilo̧k, ‟im kōm̧m̧an riaelōn̄ ko otemjej bwe ren rikalora.”19 En̄in ej Kabun̄ eo An. Ej tōl e kōn rikanaan im rijilōk ro remour. Ilo awa eo ej pedotok, Būreejtōnji eo Kein Kajuon enaaj katakin kōj. Jemaron̄ ke ‟kwom̧ōkaj n̄an meļeļe,”20 āinwōt kar Mormon, kōn menin n̄e kūr ej itok, jej wānōk n̄an kwaļo̧k kōn kajoor eo an Jetōb: ‟Lo, n̄a ij rikaļoran Jisōs Kraist, eo Nejin Anij. Iaar bōk kūr jān E n̄an kwaļo̧k naan eo An ilubwilijin armej ro An, bwe ren maron̄ bōk mour indeeo.”21 Ilo etan Jisōs Kraist, amen.