Kweilo̧k eo Eļap: Ej Kōkajoorļok Tōmak im Naan in Kam̧ool
Jen Elder Robert D. Hales
Jen Doulul eo an Jon̄oulruo Rijilōk ro
O, ewi jon̄an ad aikuji kweilo̧k eo eļap! Jān kweilo̧k ko tōmak eo ad ej kajoorļo̧k im naan in kam̧ool ko ad rej mwilal ļo̧k.
Kom̧ool, Būreejtōn Monson, kōn katak im waanjon̄ak in jerbal in jipan̄ āinwōt an Kraist im ijjitōn̄ eo am̧ n̄an aolepādwōj n̄an erom mijenede ro. Kōmij jar kōn kwe.
Ilo tōre in bōd eddo in ad, Rilo̧mo̧o̧r Jisōs Kraist eaar ba kōn juon koba in Rikwojarjar ro āinwōt kweilo̧k eo eļap An make.1
Jekdo̧o̧n ia eo jej pād ie ilo laļ in, mekarta jej bōk kadiwōjļok kein, ij kam̧ool bwe jej kobatok ilo kweilo̧k eo An. Ij barāinwōt kam̧ool bwe jenaaj ron̄jake naan ko An, bwe Eaar ba men̄e ej jān ainikien Make ak jān ainikien ro Rikarejeran, rej juon wōt.2
Aolep iien kweilo̧k ko raar m̧ōttan Kabun̄ eo em̧ool an Jisōs Kraist. Adam eaar aiin bwijjin im kar kanaan kōn men ko renaaj itok. Moses eaar kobaik ro nejin Israel im katakin er kien ko eaar būki. Rilo̧m̧oo̧r eaar katakin jarlepju ko raar kobaļo̧k jim̧or ilo Jerusalem im Amedka. Piter eaar aiin ritōmak ro ilo Jerusalem. Kweilo̧k eo eļap m̧oktata ilo raan kein āliktata eaar kōm̧m̧an ruo allōn̄ ālkin an kar Kabun̄ in kar ejaak im kweilo̧k ko raar wōnm̧aanļo̧k n̄an raan kein.
Aolep iien kweilo̧k kein rej kōm̧m̧an ium̧win tōl im karōk eo an Irooj, kōn tōl in Jetōb eo An. 3 Kōmij jab kālet unin kōnon ko. Ium̧win wiik ko im allōn̄ ko, emakijkij kōn jab kiki ilo bon̄ōn ko, kōmij kōttar Irooj. Kōn jitlo̧k, jar, ekkatak, im kejōkļo̧kjeņ, kōmij jeļā ennaan eo me E ekōņaan letok n̄an kōm.
Jet remaron̄ ba, “Etke im̧we eo ejjab m̧ōkaj im pidodo an itok?” Irooj eaar katakin Oliver Cowdery, “Kwoj aikuj ekkatak im ļōmņak kake m̧okta; inem kwoj aikuj kajitok elane ejimwe.”4 Ennaan ko ilo kweilo̧k eo rej itok n̄an kōj ālkin kōppopo ilo jar, kōn Jetōb Kwojarjar.
Pedped in ej m̧ool n̄an aolep membōr ro an Kabun̄ in ilo ad pojak n̄an bōk kūņad ilo ward, stake, im kweilo̧k ko reļļap. Jej etali ilo kōļmenļo̧kjeņ ko ad ta eo jej aikuji im kōņaan jān JemedIlan̄, im kōm̧ij jar kōn meļeļe im bōk ta eo kōm̧ ar ekkatak. Ilo an iien eo n̄an kweilo̧k eo eļap kōm̧m̧an, jej karmejete m̧akūtkūt ko jet, im likūt aolep men ko an laļ in iturājet im pukot men ko rem̧m̧anļo̧k.5 Innām jej kobaik baam̧le ko ad n̄an ron̄jake naan ko an Anij, āinwōt an kar armej ro an Kiin̄ Benjamin kōm̧m̧ane.6
Ajri ro im jodikdik ro rej bar kōņaan kobatok. Jej kōm̧m̧ane juon bōd eļap eļan̄n̄e jej kōtmene bwe kweilo̧k in ej juon men reban meļeļe ilo kōļmenļo̧kjeņ ak jetōb. N̄an jodikdik membōr ro an Kabun̄ in, ij kallim̧ur bwe eļan̄n̄e kom̧ naaj ron̄jake, kom̧ naaj en̄jake Jetōb eo ekajoor ilo kom̧. Irooj enaaj jiron̄ kom̧ ta eo Ekōņaan bwe kom̧in kōm̧m̧ane.
Ilo kweilo̧k ko jemaron̄ bōk meļeļe in naan eo an Irooj n̄an kōj make. Juon membōr eaar kam̧ool: “Ilo aō ron̄jake naan eo am̧, eaar ļo̧kjeņ aō. … Kōnono eo am̧ eaar juon revelesōn kajju jān Irooj n̄an baam̧le eo aō. Ijjan̄in kar en̄jake kain en̄jake in ekajoor ilo mour e aō ilo tōre eo ke Jetōb Kwojarjar eaar kajju kōnono n̄an eō.”
Juon eaar bar ba, “Ijan̄in kar en̄jake kain kōnono eo ekajoor me eaar itok n̄an eō.”
Menin em̧ool kōnke Jetōb Kwojarjar ej bōk ļo̧k naan eo an Irooj n̄an bōro ko ilo wāween ko jemaron̄ meļeļe.7 N̄e ij jeje ilo kweilo̧k eo, ijjab je aolepān ta eo rikōnono eo ej ba; Ij je im̧we eo an Jetōb letok n̄an eō.
Ta eo kar ba ejjab aorōk in wōt ta eo jej ron̄jake im ta eo jej en̄jake.8 En̄in ej unin ad kōm̧m̧ane juon kijejeto n̄an jeļā kweilo̧k eo ilo juon jekjek ijo jemaron̄ ron̄jake ainikien eo aelikar edik im emera an Jetōb ilo, en̄jake, im ilo meļeļe.
O, ewi jon̄an ad aikuji kweilo̧k eo eļap! Jān kweilo̧k ko tōmak eo ad ej kajoorļo̧k im naan in kam̧ool ko ad rej mwilal ļo̧k. Im n̄e jej oktak, jej kōkajoorļo̧k doon n̄an jutak ņae kapo ko im m̧ade kijeek ko ilo raan kein āliktata.9
Ilo iiō ko jem̧aanļo̧k, Kabun̄ in eaar ioon jet jameļeļe ko renana im jum̧ae ko kar iooni jen Ro Rekwojarjar m̧okta. Eban āindein aolep iien. Em̧ōkajļo̧k im eļapļo̧k jān m̧okta laļ in ej ettoļo̧k jān Irooj. Rikapo eo emōj kōtļo̧ke ioon laļ in. Jej alooje, ron̄jake, riit, ekkatak kake, im kwaļo̧k naan ko an rikanaan ro n̄an maron̄ kakkōl im kōjparok. N̄an waanjon̄ok, “Baam̧le Eo: Juōn Naan In Kean̄ N̄an Laļ In” kar letok m̧oktaļo̧k jān ad ioon apan̄ ko rejelet kiiō baam̧le. “Kraist Eo Emour: NAN IN KAMOL AN DRI JILIŌK RO” kar kōpooje n̄an tōre eo jenaaj aikuji eļaptata.
Jemaron̄ jab jeļā aolep un ko etke rikanaan ro im rikōnono ro ilo kweilo̧k in rej kōnono kōn jet unin kōnono ko ilo kweilo̧k in, ak Irooj ejeļā. Būreejtōn Harold B. Lee eaar ba: “Jokne eo ewōr ippād āinwōt membōr ro ilo Kabun̄ in ej n̄an … dāpij naan ko im kien ko me Irooj enaaj letok kōn rikanaan eo An. … Enaaj wōr jet men ko me ebōk kijenmej im tōmak. Komaron̄ jab kōņaan ta eo ej itok jān rūtiej ro an Kabun̄ in. Emaron̄ in kowaan kōļmenļo̧kjen ko am [make]. Emaron̄ in kowaan iiaio eo am. Emaron̄ dāpij jet iaan itok-limo in mour eo am. Ak eļan̄n̄e kwoj ron̄jake men kein, āinwōt aer itok jen Irooj make, kōn kijenmej im tōmak, kallim̧ur in ej bwe ‘kōjām ko an Hedis re jāmin anjo̧ ioom̧; … im bwe Irooj Anij enaaj kōm̧m̧an bwe kajoor ko an marok ren jako jen eok, im kōm̧m̧an bwe lan̄ ko ren m̧akūtkūn̄ kōn em̧m̧an eo am̧ im etan eaiboojoj (lale D&C 21:6).”10
Ekōjkan an Būreejtōn Lee kar jeļā ta eo jenaaj jelm̧ae ilo tōre in ad? Eaar jeļā kōnke ej juon rikanaan, rilolo, im rikwaļo̧k revelesōn. Im eļan̄n̄e jej ron̄jake im pokake rikanaan ro kiiō, ekoba ro renaaj kōnono ilo kweilo̧k in, jenaaj kajoorļo̧k im pād ilo kōjparok.
Kōjeram̧m̧an ko reļļap an kweilo̧k eo eļap ej itok n̄an kōj ālkin an jem̧ļo̧k kweilo̧k eo. Kememej jon̄ak eo ekkā an waļo̧k ilo jeje ko rekwojarjar: jej kobatok n̄an ron̄jake naan ko an Irooj, im jej ro̧o̧l n̄an m̧ōko im̧ōd n̄an mour kaki.
Ālkin an Kiin̄ Benjamin kar katakin armej ro an, “eaar kōro̧o̧l jarlepju eo, im raar ro̧o̧l, aolep kajjojo, ekkar n̄an baam̧le ko aer, n̄an m̧ōko im̧weer make.”11 Ilo tōre eo an, Kiin̄ Limai eaar bar kōm̧m̧an āindein.12 Ālkin kwaļo̧k im katakin armej ro ilo tam̧peļ eo ilo Bountiful, Rilo̧mo̧o̧r eaar jiron lok armej ro ilo jouj, “kom̧in ilo̧k n̄an m̧ōko im̧ōmi, im kōļmenļo̧kjeņ kōn men kein ko Iaar ba, im kajjitōk ippān Jemān, ilo Eta, bwe kom̧in maron̄ meļeļe, im kōpooj buruōmi n̄an ilju, im Ij bar itok n̄an ippāmi.”13
Jej bōk kūr eo an Rilo̧mo̧o̧r n̄e jej kōļmenļo̧kjeņ im jar n̄an meļeļe ta eo kar katakin im ilo̧k im kōm̧m̧anm̧an ankilaan. Kememej naan ko an Būreejtōn Kimball: “Iaar ukōt kōļmenļo̧kjeņ eo aō bwe n̄e inaaj ro̧o̧l n̄an kapijuknen jān kweilo̧k in [eļap] … ekanooj lōn̄, ilo m̧ōttan mour eo aō me imaron̄ kōkōmanman. Em̧ōj aō lomnak kōn elaajrak ier, im ij lomnak in jeblak im jino jerbal elane ededelok ad kwelok.”14 Jem̧aanļo̧k Būreejtōn Monson eaar ba, “Ij rōjan̄ kom̧ n̄an riiti bar juon alen im kōļmenļo̧kjeņ kōn enaan ko ie. Em̧ōj aō kar loe ilo mour eo aō make bwe Iaar bōk em̧ool eļapļo̧k jen katak ko reim̧we n̄e ij ekkatak jeni ilo m̧wilaļ eļap.”15
Ilo kakobaba n̄an kūr kōj n̄an kōm̧m̧ane ekkatak jeje ko rekwojarjar ad make im baam̧le eo, Jemed Ilan̄ ekōņaan bwe jen ekkatak kajjojo iien im kōjerbal ta eo jaar katak ilo kweilo̧k in. Ij kam̧ool bwe ro me rej likūt aer lōke ilo Irooj im ron̄jake kapilōk in ilo tōmak naaj bōk kajoor eļap n̄an kōjeram̧m̧an er make im baam̧le ko aer make n̄an epepen ko rej itok.
Jemedwōj Ilan̄ eaar letok iaļ eo. Ilo kweilo̧k in, 97 bōjāān in Kabun̄ in remaron̄ ron̄jake ennaan kein ilo kajin ko aer make. Milien membōr ro ilo 197 laļ ko renaaj aloje kweilo̧k in ilo 95 kajin ko. Ilowan wōt ruo ak jilu raan ko ennaan ko renaaj waļo̧k ilo LDS.org ilo English, im ilowan wōt juon wiik renaaj waļo̧k ilo 52 kajin ko. Kiiō jej bōk mākjiin ko an Kabun̄ kar būriini ilowaan jilu wiik ko jān kweilo̧k eo eļap. Ejako ad bar kōttar allōn̄ ko n̄an kōnono ko n̄an aer itok ilo meeļ. Ilo juon kamputōr, talboon, ak kein kapeel ko kōjerbal jarom, jemaron̄ riit, ron̄jake, alooj, im kwaļo̧k katak ko an rikanaan ro. Jabdewōt iien, jabdewōt jikin, jemaron̄ kōļapļo̧k jeļāļo̧kjeņ eo ad, kōkajoorļo̧k tōmak im naan in kam̧ool eo ad, bōbrae baam̧le ko ad, im tōl er ineem̧m̧anļo̧k n̄an kapijuknen.
Ennaan ko ilo kweilo̧k in renaaj barāinwōt doori ilo online youth curriculum eo. Ro jinen im jemen, kom̧ maron̄ in tōpar katak ko an jodikdik ro kōn kom̧ make ilo LDS.org. Lale ta eo ajri ro nejimi rej katak, im kōm̧m̧an unin ekkatak eo ami make, kōnono ko an baam̧le, nokon in jota ko an baam̧le, ko̧o̧njeļ ko an baam̧le, im intōrpiu ko an juon make ippān ajri ro nejimi kōn ta eo rej aikuj in katakin er kajjojo make.
Ij rōjan̄ kom̧ aolep membōr ro n̄an kōjerbal kein katak ko ilo website ko an Kabun̄ in im mobile app ko. Rej iien otemjej kōkōm̧anm̧aniļo̧k bwe ren pidodoļo̧k ami kōjerbali im en em̧m̧anļo̧k ilo mour ko ami. Ilo LDS.org kom̧ maron̄ lo kein katak ko n̄an jipan̄ kom̧ ekkatak kōn ko̧jpeļ eo, kōkajoorļo̧k baam̧le eo m̧weo im baam̧le eo ami, im jerbal ilo kūr eo ami. Kom̧ maron̄ barāinwōt lo rūtto ro ami me rej aikuj kain̄i ko an ko̧jpeļ eo im kein jipan̄ ko n̄an rejtake kom̧ ilo jerbal in lo̧mo̧o̧r eo, ekoba kwaļo̧k ko̧jpeļ eo. Ro jinen im jemen remaron̄ bōk tōl ilo kōpooj ajri ro nejier n̄an peptaij, n̄an priesthood eo, n̄an mijen ko redipio, im n̄an tampeļ eo. Remaron̄ jipan̄ kōj etetal ilo iaļ eo eaidin̄ im aidik an kain̄i ko im bujen ko an tampeļ im kakōrbōb n̄an kōjeram̧m̧an eo an mour indeeo.
Ilo Eprōļ eo ļo̧k in kweilo̧k eo eļap, ilo kweilo̧k eo eļap an priesthood, kar jiron̄ eō kōn jema eo eaar jin̄aik juon pija in juon ritariņae ilo nuknk in tariņae eo an n̄an katakin eō kōn kōņak aolep kein tariņae an Anij im kōjparok ilo jetōb ej bōktok.
Ālkin an m̧wen̄an eo kar jem̧ļo̧k, juon baba eaar ba n̄an baam̧le eo an ta eo eaar katak. Kar im̧we, ļaddik eo nejier edik Jason eaar pukōt LDS.org n̄an ron̄jake ennaan eo n̄an e make. Jet raan tok ālik eaar waļo̧kļo̧k ilo nokon in jota an baam̧ļe n̄an kwaļo̧k katak eo ippān laddik im leddik ro jein im jatin. En̄in ej ej.
Juon naan in kweilo̧k eo epidodo, im̧we jān Irooj, kar bōk jān juon ajri, kar katakin juon baam̧le juon wāween an make im ekajoor. Em̧m̧an ippa benjen oob eo an ilo wānōk eo an. Em̧m̧an ippa kein kattōrak in tōmak eo n̄an kakkure lippān kijeek ko an rikapo eo. Men kein rej kōjeram̧m̧an ko an kweilo̧k.
Ro jeiū im jatu, Ij kwaļo̧k aō naan in kam̧ool bwe Irooj Jisōs Kraist emour im jeban Kabun̄ in. En̄in ej kweilo̧k eo eļap An. Ij kallim̧uri kom̧ ilo Etan bwe eļan̄n̄e kom̧ij jar kōn m̧ool in ikdelel n̄an ron̄jake ainikien Jemāmi Ilan̄ ilo ennaan ko ilo kweilo̧k in, kom̧ naaj lo bwe Eaar kōnono n̄an kom̧ n̄an jipan̄ kom̧, n̄an kōkajoorļo̧k kom̧, im tōl kom̧ n̄an kapijuknen eo im̧aan Mejān. Ilo etan Jisōs Kraist, amen.