Karuwainene n̄an Kweilo̧k eo
Jen Būreejtōn Thomas S. Monson
Ej jar eo aō in bwe jen maron̄ obrak kōn Jetōb eo an Irooj ilo ad ron̄jake im ekkatak.
Elukkuun in em̧m̧an, ro jeiū im jatū jitōnbōro, n̄an iioon kom̧ bar juon alen. Emōj an eļļā jen 183 iiō ko jen ke Kabun̄ in eaar ejaak jen Rikanaan Joseph Smith, ium̧win tōl an Irooj. Ilo kweilo̧k eo ilo Eprōļ 6, 1830, eaar wōr jiljino membōr ro an Kabun̄ in raar pād.
Ij m̧ōņōņō in kōjjeļļāik bwe ruo wiik ko rem̧ootļo̧k, membōr in Kabun̄ in eaar tōpar 15 milien. Kabun̄ in ej wōnm̧aanļo̧k wōt lukkuun eddōkļo̧k im ukōt mour ko an elōn̄ im elōn̄ armej ro aolep iiō. Ej ajedeed aolepān laļ in ilo an mijenede ro pukōt ro rej pukōt m̧ool eo.
Emōj an eļļā jidik jen juon iiō jen ke iaar kōjjeļļāik wanlaļļo̧k an iiō in jerbal in mijenede. Jen tōre ņe, oran mijenede ro rej jerbal aolep raan eaar kelōn̄ļo̧k jen 58,500 ilo Oktoba 2012 n̄an 80,333 rainin. Ej juon uwaak eo ekabwilōn̄lōn̄ im im̧we eo jej kam̧oole!
Jeje ko rekwojarjar rej kitbuuj ejjeļo̧k bar kean̄ eļapļo̧k an jelet, ejjeļo̧k bar eddo eļapļo̧k an likwōj, ejjeļo̧k bar kōmeļeļe eļapļo̧k an kajju jen kean̄ in kar letok jen Irooj eo eaar jerkakpeje ke Eaar waļo̧k ilo Galilee n̄an jon̄oul juon rikaļoor ro. Eaar ba, “Innām kom̧win ilo̧k, katakin aolep ri aelōn̄ ko, peptaiji er, ilo etan Jema im Nejin im Jetōb Kwojarjar.”1 Rikanaan Joseph Smith eaar kwaļo̧k, “Ālkin kar ba men kein, eddo eo eļaptata im aorōk tata ej n̄an kwaļo̧k Ko̧jpeļ eo.”2 Jet iaami ijin rainin naaj keememej naan ko an Būreejtōn David O. McKay, eo eaar kwaļo̧k ejja naan in wōt “Aolep membōr ej mijenede!”3
N̄an naan ko aer ij kobaik eo aō. Kiiō ej iien n̄an an membōr ro im mijenede ro itok ippān doon, n̄an jerbal ippān doon, n̄an jerbal ilo jikin kallib an Irooj n̄an bōktok jetōb ko n̄an E. Eaar kōpooj jipan̄ ko n̄an kōj n̄an kwaļo̧k ko̧jpeļ eo ilo juon jarlepju kileplep ilo wāween ko, im Enaaj jipan̄ kōj ilo jerbal ko ad eļan̄n̄e jenaaj jerbal ilo tōmak n̄an kakūrm̧ool jerbal in An.
N̄an jipan̄ kōjerbal kajoor in oran mijenede ro ad, iaar kajjitōk ippān membōr ro ad m̧okta n̄an leļo̧k jipan̄, n̄e remaron̄, n̄an jāān in mijenede eo an ward ko aer ak n̄an Jāān in Mijenede ro n̄an Aolep Mijenede an Kabun̄ in. Uwaak eo n̄an kajjitōk eaar kam̧ōņōņō im kar jipan̄ taujin mijenede ro, ro jekjek ko aer eban kōtlo̧k aer jipan̄ er make. Ij kam̧oolol kom̧ kōn jipan̄ ko am̧i rejouj. Aikuj in n̄an jipan̄ ej wōnm̧aanļo̧k wōt, bwe jen maron̄ wōnm̧aanļo̧k n̄an jipan̄ ro rej ikdelel n̄an jerbal eļap ak ro rej jab, jen er make, ewōr aer jipan̄ ko n̄an kōm̧m̧ani barāinwōt.
Kiiō, ro jeiū im jatū, jaar itok ijin n̄an bōk kōmeļeļe im im̧we. Elōn̄ ennaan ko, rekitbuuj elōn̄ unin kōnono ko jen ko̧jpeļ eo, naaj kōnono kaki ilo raan kein ruo. Em̧m̧aan rein im kōrā rein renaaj kōnono n̄an kom̧ kar pukōt jipan̄ an lan̄ kōn ennaan ko renaaj litok.
Ej aō jar bwe jen maron̄ obrak kōn Jetōb eo an Irooj ilo ad ron̄jake im ekkatak. Ilo etan ad Rilo̧mo̧o̧r, Jisōs Kraist, amen.