Kajoor in M̧wil Jim̧we an Kōrā ro
Jen Elder D. Todd Christofferson
Jen Doulul eo an Jon̄oulruo Rijilōk ro
Mejmejkaruo eo ami ej n̄an kōm̧m̧an em̧m̧an im n̄an erom em̧m̧an, im ilo ami ļoor Jetōb Kwojarjar eo, maron̄ eo an mour in ami im kareel eo enaaj eddōkļo̧k.
M̧okta jān an aolep maron̄ kememeje, jukjukinpād ko rōkōn atartar wōt ioon jon̄ok in m̧wil ekajoor an kōrā. Ilo an kar jab ļap wōt kilaan em̧m̧an ko aer ilo jukjukinpād, pedped in jon̄ok in m̧wil an kōra ro ealikar an jeno̧ļo̧k kōn tōprak eo em̧m̧an ilo aolep jukjukinpād. Bōlen, kōnke eaar aorōk, jipan̄ an kōrā ro emakijkij jab kūle. Ikōņaan kwaļo̧k kam̧oolol kōn kareel an kōrā ro rem̧m̧an, rej kili jet iaan katak ko im wāween mour ko rej kaamjak kajoor an kōrā ro im rej jutak, im ainikien juon akweļap n̄an kōrā ro n̄an ejaake jon̄ok in m̧wil eo ekajoor ilo er.
Kōrā ro rej lo̧tak tok ñan laļ in kōn kwojarjar, juon menin letok eo ekwojarjar bwe ren peran ilo jekjek kein āinwōt tōmak, peran, meanwōr, im em̧m̧anļo̧k ilo jem̧jerā ko im ilo m̧anit ko. N̄an nōbar “tōmak eo em̧ool” eaar loe ilo Timote, Paul eaar kememej bwe tōmak in eaar “pād mokta ippān jibūm̧ Lois, kab ippān jinōm̧ Eunis.”1
Jet iiō ko remootļo̧k, ke ikar jokwe ilo Mexico, iaar lo ta meļeļ in an Paul kar ba. Ij kememej eļaptata juon m̧am̧a eo edik, juon iaan elōn̄ kōrā ro ilo Kabun̄ in ilo Mexico me tōmak eo an ilo jouj ko an Anij ilo mour ko aer ekanooj alikkar me eaar wōr jidik wōt aer jeļā kake. Kōrā in em̧m̧an eaar romaakļo̧k kōn mālin an mour in, ļotak kōn em̧m̧an, kareel eo aolep ro ipeļaakin kōn em̧m̧an. Ippān ļeo pāleen, eaar karmejete juon oran kalimomo ko im m̧weiuk ko n̄an jibadbad ko aer reutiejļo̧k, āinwōt ilo ejjeļo̧k ļōmņak kaki jidik. Maron̄ eo an n̄an kōm̧m̧ani ekkotak, jillo̧k, im kōjeppan wōt juon ippān ajri ro nejin eaar jej uwaan. Kajjitōk ko kōn e raar ellōn̄ im jerbal ko an emakijkij aer āliji im kōm̧m̧an aolep iien, aaet itulaļ in aolep eaar juon aenōm̧m̧an eaiboojoj, juon ļamļam kōn jerbal eo an Anij. Āinwōt ippān Rilo̧mo̧o̧r eo, liin eaar inōknōk n̄an kōjeram̧m̧an ro jet kōn jerbal in jipan̄ im karmejete. Liin eaar iakwe.
Eļap aō jeram̧m̧an kōn jon̄ok in m̧wil eo ekajoor an kōrā ro, eļaptata ippān jinō im kōrā eo ippa. Ilubwiljin kōrā ro me Ij ļōmņak e ilo kam̧oolol ej Anna Daines. Anna im ļeo pāleen, Henry, im ajri ro emen nejier raar pioneer ro an Kabun̄ in ilo New Jersey, ilo United States. Ilo 1930, ke Henry eaar juon doctoral rijikuul ilo Rutgers University, e im Anna raar kije ilo jikin jerbal im ilo jikin jikuuļ im doulul ko ilo Metuchen, ijo raar jokwe ie, n̄an anjo̧ ioon jum̧ae eo eļap kōn Mormon ro im kōm̧m̧an bwe jukjukinpād eo en juon jikin ebolemen n̄an aolep ro jinen im jemen n̄an kōkajiririik ajri ro nejier.
N̄an waajon̄ok, Anna, eaar bōk kūņaan ilo Metuchen YMCA im eaar wōr tokjān ilo doulul eo. Ilowan wōt juon iiō kar jitōn̄ e bwe en būreejtōn n̄an Doulul eo an M̧am̧a ro innām kar kajjitōk ippān bwe en tōl juon iaan jerbal ko jilu ilo board of director eo an YMCA. Eaar wiin kōn ejjeļo̧k jum̧ae, im kōn menin eaar kobaļo̧k ilo ko̧o̧njeļ eo kōn wōt jejjo iiō ko m̧okta jān kar kōbōjrak an ro Rekwojarjar kweilo̧k ilo im̧weo im̧wer!”2
Baam̧le eo aō eaar em̧m̧akūtļo̧k n̄an New Brunswick Ward eo ke iaar juon jodikdik. Sister Daines eaar kile eō im ekkā an kwaļo̧k an leke kōn maron̄ ko im aorōk eo ilo n̄a, me eaar im̧we eō n̄an tōpar ijo ilōn̄―ilōn̄ ijo ijjab maron̄ kar tōpar e ijelo̧kin wōt an in naan. Juon tōre, kōnkōļmenļo̧kjeņ im jabwe naan in kipeļ jān e, Iaar kōjekdo̧o̧n juon jekjek me en kar lukkuun tōl n̄an tōblaļ. Men̄e ejako ijin, im̧we eo an Anna Daines enaaj pād wōt ilo en̄jake im ememļo̧kjeņ ilo mour ko an ro bwijin ejjeļo̧k jem̧ļo̧k, ekoba n̄a make.
Būbū Adena Warnick Swenson eaar katakin eō n̄an kōjparok jerbal eo ilo priesthood. Eaar rōjan̄ eō n̄an kakilōklōke kōjeram̧m̧an ko ilo kwojkwoj eo ilo pilāwe eo im dān eo, kar kōmeļeļe bwe ilo wāween imaron̄ jeļā kōn juon meļeļe im en̄jake eļap. Lale ekōjkan an jipan̄ jim̧a, juon stake petriak, katakin eō n̄an kautiej men ko rekwojarjar. Bubu Swenson ejako ijin, bōtaab emaron̄ kar katakin ļaddik ro n̄an erom em̧m̧aan in priesthood.
Kareel in m̧wil eo ekajoor an kōrā ejjeļo̧k jikin eļapļo̧k maron̄ en̄jake ak ļapļo̧k an jerbal jen ilo m̧weo. Ebar ejjeļo̧k jikin em̧m̧anļo̧k n̄an kōkajiririk ajri ro ilo diktak in epepen in ijello̧kin baam̧le eo, ijo juon baba im juon m̧am̧a rej jerbal ippān doon n̄an kake, n̄an katakin, im n̄an kōkajiririik ajri ro nejier. Ijo menin ejjab bōk jikin ie, armej rej kajieon̄ in kōm̧m̧an jon̄an wōt aer maron̄ ilo jekjek ko aer.
Jekdo̧o̧n jekjek rot, juon m̧am̧a emaron̄ lo juon im̧we jen ro jet ak ilo jabdewōt jem̧jerā. Kōn kajoor in waanjon̄ok eo an im ilo katakin, ļaddik ro nejin raar jeļā n̄an kautiej kōrā ro im n̄an pokake im jon̄ak ko rejim̧we lo mour ko aer make. Leddik ro nejin eaar jeļā n̄an mour wānōk im jutak kōn ta eo ejim̧we, bar juon alen, jekdo̧o̧n ejjab bun̄bun̄. Jerbal eo an juon m̧am̧a eo eiakwe ej n̄an tōl ajri ro nejin n̄an bōk eddo ijelo̧kin jekpen ņae jeļāļo̧kjeņ im eddōkļo̧k eo an juon make, im kōm̧m̧ani menin jipan̄ ko kajjojo iien n̄an armej ro ipeļaakier. Elder Neal A. Maxwell eaar ba: “N̄e bwebwenato eo em̧ool an armej ej waļo̧k, en ke kwaļo̧k ainikien bu ak ainikien im̧we? Kien eļap kar ke kōm̧m̧an jen em̧m̧aan ro ilo tariņae ak kōrā ro rej kōm̧m̧an aenōm̧m̧an ilo m̧oko im ippān ro riturid? Ta eo enaaj waļo̧k ilo jikin kōmāt ko n̄an juon im̧we eo ekajoor innām ta eo enaaj waļo̧k ilo kien ko?”3
Eddo eo ekwojarjar an juon kōrā ej kōm̧anm̧an eo an ilo mour in. Jejeļā bwe ānbwiinid ewōr juon ejaak eo ekwojarjar4 im bwe eaikuj wōr juon mour in kanniōk im juon lo̧tak ilo jetōb n̄an tōpar ijo eutiejtata ilo aiboojoj in aļ ippān Anij.5 Kōn menin, kōrā ro rej kwaļo̧k juon jerbal eo (eaorōk jet iien epen ilo mour ko aer make, ilo jerbal eo an Anij) im aiboojoj n̄an bōktok mour jab wabanban im mour indeeo an armej.6 Āinwōt būbū ro, m̧am̧a ro, im rikōm̧m̧an waanjon̄ok ro, kōrā ro rej rikōjparok mour, katakin kajjojo epepen kōn aorōk eo an mour erreeo―erreeo m̧okta jān m̧are im en ejjeļo̧k irļo̧k ilowan m̧are eo. Ilo wāween in, raar bōk juon im̧we eo ilo jukjukin pād eo; raar bōk em̧m̧an in jen em̧m̧aan ro; raar bōk jipan̄ eo ilo jukjukinpād ko ijo n̄an kōkajiririik ajri ro em̧man aer mour.
Sister raņ, ijjab kōņaan lukkuun nōbar kom̧ āinwōt ad kōm̧m̧ane ilo ekōnono ko ilo Mother’Day me rekōm̧m̧an ami laudin̄din̄. Kom̧ij jab aikuj in wāppen;7 Ijjab ba bwe kom̧ij (make ļo̧k iami iturin ro jet ilo tōre in). Ta eo ij kajieon̄ ba ej bwe jekdo̧o̧n ejjeļo̧k pāleem ak kwe ripelele, jekdo̧o̧n kwe m̧am̧a ak jaab, jekdo̧o̧n korūtto ak kodik ak em̧m̧an jon̄an, jim̧we im maron̄ eo am eaorōk im bwe em̧ōj ad jino likjab n̄an kile aorōk eo am im im̧we ko ami. Ilo m̧ool elōn̄ okoktak ko im maron̄ ko ilo jerbal in me rejako im bōlen rekōm̧ōjno̧ik im̧we eo am, n̄an idajon̄jon̄ eo eļap an ro kajjojo, baam̧le ko, im eļaptata jukjukinpād. In kwaļo̧k jilu āinwōt juon mejmejkaruo im juon kakkōl.
Juon ļōmņak eo ekauwōtata me ekōm̧ōjņo̧ik jon̄ok in m̧wil eo ekajoor an kōrā ro ej n̄e m̧are eo ej rub im jelet eddo ko an m̧am̧a im jerbal ko jet ilo m̧weo. Jet kōrā rej lale jerbal ko jet ralikkar ilo m̧weo, akweeļ ej kowaan kōrā ro im bwe ej juon jekjek eo ekowaan aorōk eo n̄an kōkajiririik ajri ro.8 Rej kowaan ta raar ļōmņak e n̄an kōttōprake. Ejjab em̧m̧an im ejjab jim̧we. Jejjab kowaan aorōk eo an kōn ta eo em̧m̧an ippān m̧are eo an m̧am̧a im baba. Ejjeļo̧k juon kōttōpar eo eaorōkļo̧k jān ko jet, im ejjeļo̧k jon̄an jāān, mālim, ak jukjukinpād emaron̄ kile aorōk eo an baam̧le. Jekdo̧o̧n ta eo kōrā ro remaron̄ kōm̧m̧ane, jon̄ok in m̧wil eo ekajoor ej ļapļo̧k jerbal jen ilo baam̧le eo.
M̧wil ko ņae m̧ōm̧ an kanniōk ekakkure mālim an mour in an kōrā ro ilo jet jekjek. M̧an lo̧je kōn kōņaan ak kabun̄ bōro an juon make ej kakkure jon̄ok im mālim im kajoor ko rekwojarjar an juon kōrā make. Im barāinwōt m̧ool eo kōn m̧ōm̧ an kanniōk im kwaļo̧k riab ņae nuknuk ko rejekkar kōn aorōk eo aer.
Ejjeļo̧k juon m̧anit in jon̄ak kōtmāne bwe kōrā ro ren jab kattoļo̧k mōm an kanniōk ilo an em̧m̧aan eo ejjeļo̧k ruwōn jab m̧ool. Menin ejjab juon men ejim̧we ilo jon̄ak, im kar kōjekdo̧o̧n e. Ilo no̧taan in, juon emaron̄ in kōtmene bwe m̧aan ro remaron̄ in utiejļo̧k, jon̄ak in m̧are eo ejim̧we, ak jum̧ae in eaar bōk jikin―kōrā ro im leddik ro kar rōjan̄ er kiiō n̄an jurake “jon̄ak” eo epād ippān em̧m̧aan ro. M̧oktaļo̧k kōrā ro raar wūjļepļo̧k utiej ko aer im eddo ko jān em̧m̧aan ro, jej kiiō pād ilo jem̧jerā eo ejejjet, baam̧le ko ejjeļo̧k jemāer, im rej kōļapļo̧k jeram̧ōļ. Jerbal ippān doon ekōjparok ad m̧o̧ņe kōrā eo kōn im̧we eo aer ejim̧we im ikitōltōl ko ilo aolep jukjukinpād.9 Ilo kōļaajrak in ilo ejjeļo̧k aōrok in, em̧m̧aan ro rej “n̄ilaļlaļ” im kōrā ro im ajri ro rej en̄taan.
Eria in n̄ūrbōktak eo kein kajilu ej itok jān ro me rej, ilo etan ro joñeer wot juōn, kōņaan julo̧k aolep oktak ko kōtaan m̧aan im kōrā. Menin ekkā an waļo̧k bwe kōrā ro rej ukōt m̧ōrāer―kijin̄en̄eļo̧k, dipen, im dim. Kiiō ej waļo̧k ilo pija ko im video game ko n̄an lo kōrā ro rej kōm̧m̧ani jorrāān ko reļļap, likūt ānbwiin ko remej im tarbok ilo jeļā eo aer. Ekabwilōn̄lōn̄ n̄an lo kain em̧m̧aan rot in im ejjeļo̧k tokjeņ n̄e kōrā ro rej jorrāān im en̄taan kōn metak.
Būreejtōn eo eutiej kar an Doulul eo an Jiron̄ ro Margaret D. Nadauld eaar kwaļo̧k: “Laļ in ebwe kōrā ro me redipen; jej aikuj kōrā ro me rejouj. Ebwe kōrā ro me remiin; jej aikuj kōrā ro me rejouj. Ebwe kōrā ro me relej; jej aikuj kōrā ro me rem̧m̧an. Ebwe ippād kōrā ro rebun̄bun̄ im m̧weie; jej aikuj elōn̄ļo̧k kōrā in tōmak. Ebwe ippād utiej bōro; jej aikuj elōn̄ļo̧k em̧m̧an. Ebwe ippād doka; jej aikuj elōn̄ļo̧k wānōk. Ebwe ippād bun̄bun̄; jej aikuj eļapļo̧k erreo.”10 Ilo oktak in kōrā im oktak ko in em̧m̧aan, jej jerwane jeno̧lo̧k eo, jepaan wōt juon eo an menin letok ko an kōrā im em̧m̧aan ro me kobaik ippān doon ej kwaļo̧k juon men edipio em̧m̧anļo̧k.
Aō akweļap n̄an kōrā ro im leddik ro rainin ej n̄an kōjparok im kōkōm̧anm̧anļo̧k kajoor eo an mour in ilo kom̧. Kōjparok jolet eo ewenōk im menin letok rejej uwaer kom̧j bōktok ippāmi n̄an laļ in. Mejmejkaruo eo ami ej n̄an kōm̧m̧an em̧m̧an im n̄an erom em̧m̧an, im ilo ami ļoor Jetōb Kwojarjar eo, maron̄ an mour in eo ami im kareel eo enaaj eddōkļo̧k. N̄an jiron̄ ro ij ba, jab jerwane kajoor eo an mour in em̧ool m̧okta jān ami bōke ilo tarlep in. Kōjparoke eļaptata kajin eo erreo, ejjab nana; bwe ami nuknuk en kwaļo̧k karbōb, ejjab ļōmņak kōn e make; im bwe m̧wil eo ami en kōļapļo̧k erreo, ejjab kakkure. Kom̧ij jab maron̄ kota ro jet n̄an wānōk ilo rujab eo juon eļan̄n̄e kom̧ij kam̧ōņōņōik nana iturejet eo juon.
Sister ro, ilo aolep jikin ko kom̧ij pād ie, ej kadkad eo ami ippān Anij, Jemāmi Ilan̄, eo unin kajoor eo an mour in eo ami, me kom̧ij aikuj iien otemjej likūt m̧oktata mour eo ami. Kememej bwe maron̄ eo an Jisōs eaar itok kōn wūjļepļo̧k eo An make n̄an ankilaan Jemen. Eaar jab bōjrak jān ta eo eaar kabun̄ būruwōn Jemen.11 Kajieon̄ in kain rikaļoor rōt eo an Jemen im Nejin, im ami kareel ejjamin naaj bweradikļo̧k.
Im jab mijak n̄an kōjerbal kareel eo ilo ejjeļo̧k mijak ak ajļo̧k. “Kom̧in pojak iien otemjej bwe kom̧win uwaak n̄an jabdewōt [m̧aan, kōrā, im ajri] me ej kajjitōk ippemi kōn unin kōjatdikdik eo ej ilowami.”12 “Kwōn kwaļo̧k naan, kwōn kate eok ilo iien em̧m̧an im e nana; kajim̧we, im eņo̧uk, im kauwe kōn meanwōr otemjej im katakin.” 13 Irooj eaar kakien ro jinen im jemen n̄an katakin ajri ro nejier ilo meram im ilo m̧ool.14 Ro jinen im jemen ren katakin [er] n̄an jar im n̄an etetal jim̧we im̧aan Irooj.15
Ilo kauwe kein n̄an kōrā ro, en ejjeļo̧k juon en jab meļeļe. Kōn nōbar im kōketak kajoor an mour in ilo kōrā ro, ijjab ba bwe em̧m̧aan ro im ļaddik ro ren jab kōm̧m̧ane eddo eo aer make n̄an jutak kōn m̧ool eo im kwojarjar, im eddo eo aer n̄an jerbal, wūjļepļo̧k, im jipan̄ ilo jabdewōt jekjek me kōrā ro ak remaron̄ kōm̧m̧ani. Em̧m̧aan ro, jān jipan̄ kōrā ro, ineek eddo ko aer, im kōkōm̧anm̧anļo̧k m̧ōttā eo ad make ilo mālim an mour in.
Sister ro rejitenbōro, kōm̧ij pedped wōt ioon kajoor an mour inkom̧ij bōktok n̄an laļ in, n̄an m̧are, n̄an baam̧le, n̄an Kabun̄ in. Kōm̧ij pedped wōt ioon kōjeram̧m̧an ko kom̧ij bōktok jān lan̄ kōn jar im tōmak ko ami. Kōm̧ij jar kōn kōjparok eo ami, jeram̧m̧an, im mōņōņōņō eo im kōn kilami n̄an an jutak wōt. Ilo etan Jisōs Kraist, amen.