Jej Jamin Etetal Make Iaad
Jen Būreejtōn Thomas S. Monson
Kwonaaj juon raan jutak turājet im kalimjōk iien ko am reppen, im kwonaaj kile bwe E aolep iien ej pād ijeņ iturājetim.
Sister ro Aō rejitōnbōro, jetōb eo jej en̄jake jotenin ej kwaļo̧k kajoor eo ami, ami wujlepļo̧k im ami em̧m̧an. N̄an kout i Maajta eo: “Kom̧ jo̧o̧l in laļ. … Kom̧ meram in laļ.”1
Ke iaar kejōkļo̧kjeņ kōn iien in em̧m̧an n̄an kōnono n̄an kom̧, iaar maron̄ keememej kōn iakwe eo an kōrā eo pāleeō, Frances, n̄an Doulul eo an Kōrā. Ilo mour eo an eaar jerbal ilo elōn̄ eddo ko ilo Doulul eo an Kōrā. Ke e im n̄a kar jim̧or 31 iiō rūtto, iaar kūr n̄an erom būreejtōn eo an Canadian Mission. Ilo iiō ko jilu in jerbal in, Frances eaar tōl aolep Doulul ko an Kōrā ilo eria in, ekoba jikin ko ilo Ontario im Quebec. Jet iaan jem̧jerā ko an repaake e kar itok āinwōt juon tōbrak in jerbal in, barāinwōt jān elōn̄ kūr ko eaar tokālik būki ilo Doulul eo an Kōrā ilo ward eo am. Eaar juon leddik etiljek nejin Jemedwōj Ilan̄, kampānien eo aō, im m̧ōtta ejitōn̄ bōro. Ij ajļo̧k kake eļapļo̧k jen naan ko maron̄ ba.
Ij barāinwōt iakwe Doulul eo an Kōrā. Ij kam̧ool n̄an kom̧ bwe eaar ejaak jen im̧we im ej juon m̧ōttan eaorōk ilo Kabun̄ eo an Irooj ioon laļ in. Enaaj pen n̄an bwine aolep em̧m̧an ko raar itok jān doulul in im aolep mour ko raar maron̄ jeram̧m̧an jene.
Doulul eo an kōrā ej ejaak in elōn̄ kōrā ro. Ewōr iami ejjeļo̧k pāleer—bōlen elōn̄ rej jikuuļ, bōlen elōn̄ rej jerbal—elōn̄ emōj kadede aer ejaake juon mour em̧m̧an im ejubōro. Jet iaami rej m̧am̧a ro reboub kōn ajri ro rej rūttoļo̧k. Ej wōr wot jet iami raar luuji ļōm̧aro pāleer kōnke jepel ak mej im rej kakkōt n̄an karūttoļo̧k ajri ro nejier ilo an ejjeļo̧k jipan̄ an juon ļeo pālele im baba. Jet iami raar karūttoļo̧k ajri ro nejimi ak kar kile bwe aikuj ko aer rej wōnm̧aanļo̧k wōt. Elōn̄ iami ro rej jinemi im jememi rej ro rerūtto ro rej aikuji iakwe eo kwe wōt maron̄ leļo̧k.
Jabdewōt jikin jej mour ie, ewōr iien ko n̄e kōj aolep ewōr aer apan̄ ko im en̄taan ko. Mekarta rej oktak jen doon, eiier wōt juōn n̄an aolep.
Elōn̄ iaan apan̄ ko jej loe rej waļo̧k kōnke jej mour ilo mour wabanban in, eobrak kōn aolep kain mwilin armej. Ilo iien ko jej kajjitōk ilo būrom̧ōj. “Elmen aō maron̄ dāpij kōttōpar eo epen ilo laļ an celestial iien in ij mour ilo laļ an telestial?”
Enaaj wōr iien ko n̄e kwonaaj etetal ilo juon iaļ en̄jake elōn̄ mālijjon̄ ko im en̄taan ko. Ewōr iien ko n̄e kwoj en̄jake ajimakeke—bōlen make iam—jān Riletok eo an aolep menin letok ko rem̧m̧an. Kwoj inepata bwe kwoj etetal make iaam. Mijak ej bōk jikin tōmak.
N̄e kwoj loe eok make ilo kain jekjek kein, ij akweļap ippam n̄an keememej im jar. Ij iakwe naan ko an Būreejtōn Ezra Taft Benson kōn jar. Eaar ba:
“Aolepān mour eo aō kapilōk n̄an pedped wōt ioon jar eaar ļap an aorōk iba ilōn̄ in jabdewōt rōjan̄ ko jet iaar … būki. Eaar erom juon m̧ōttan iolaplap in mour e aō—juon emjak, iien otemjej ej unin aō kajoor, im pedped in jeļāļo̧kjeņ eo aō ilo men ko rekwojarjar. …
“… Mekarta jerata ko rej waļo̧k, jemarōn bok kalimuur ilo jar, bwe Anij enaaj kōnono aenōm̧m̧an n̄an jetōb eo. Aenōm̧m̧an eo, bwe jetōb ej kajokne en̄jake, ej kōjeram̧m̧an eo eļaptata.” 2
Rijilōk Paul eaar rōjan̄:
“Kajjitōk ko ami ren waļo̧k n̄an Anij.
“Im aenōm̧m̧an jān Anij, eo ej eļļā jān jeļā otemjej, enaaj kōjparok būruemi im ļōmņak ko ami ilo Kraist Jisōs.”3
Ej juon kalim̧m̧ur eaiboojoj! Aenōm̧m̧an ej ta eo jej pukōte, bwe jej kōņaan.
Jaar jab itok n̄an laļ in n̄an etetal make iaad. Ej juon jipan̄ in kajoor ekabwilōn̄lōn̄, jen kajoor, im jen kainōm̧m̧an epojak n̄an kōj kajjojo. E eo ejeļā ļo̧k kōn kōj jen ad jeļā kōn kōj make. E eo ej loe pija eo ekilep im E eo ejeļā jem̧ļo̧kin jān jinoin kar kalim̧m̧uri kōj bwe Enaaj pād ijeņ n̄an kōj n̄an letok jipan̄ n̄e jej kajjitōk. Kar kalim̧m̧uri kōj bwe n̄e jej jar aolep iien, im tōmak, aolep men renaaj jerbal ippān doon n̄an em̧m̧an eo ad. 4
Ilo an jar ko ad wanlōn̄ļo̧k n̄an lan̄, jen jab meļo̧kļo̧k naan ko katakin kōj kaki jen Rilo̧mo̧o̧r eo. Eaar jelm̧ae eļap metak ilo Gethsemane im dōbwāāl eo, Eaar jar n̄an Jemen, “Kwōn bōkļo̧k kab in jān Eō; a en jab ankil Aō a Am̧ wōt.”5 Pen āinwōt emaron̄ ilo iien ko, im ej n̄an kōj, barāinwōt, n̄an leke Jemedwōj Ilan̄ n̄an jeļā wāween eo em̧m̧antata im n̄āāt im ilo jekjek rot n̄an letok jipan̄ eo jej pukōte.
Ij kaorōk naan ko an rijeje boom̧ eo:
Ijjab jeļā ekōjkan wāween eo ejeja,
Ak ijeļā, bwe Anij ej uwaak jar.
Ijeļā bwe eaar letok Naan eo An.
Ej jiron̄ eō bwe ej ron̄ aolep iien,
Im enaaj uwaak, mokaj ak rumuj.
Innām ij jar im aenōm̧m̧an wōt im kōttar.
Ijjab jeļā n̄e kōjeram̧m̧an ko pukōti
Naaj itok wōt āinwōt iaar ļōmņak;
Ak likūt wōt aō jar Ippān,
Ankilaan wōn emeletlet ļo̧k jen eo aō make,
Kar kalim̧m̧ur bwe Enaaj letok kajjitōk eo aō.
Ak jilkintok jet uwaak eļapļo̧k aer kōjeram̧m̧an.6
Aaet, jar ej jab n̄an iien jorrāān wot. Ej elij tōk n̄an kōj ilo jeje ko rekwōjarjar n̄an “jar iien otemjej” 7 im n̄an kōm̧m̧ane juon jar ilo būruwed. 8 Naan ko jen juon al em̧m̧an im ebun̄bun̄ ej kwaļo̧k juon kajjitōk eo kōj kajjojo aikuj kajjitōk ippād make aolep iien: “Kwaar ke keememej im jar?” 9
Ejja mōttan wōt jar n̄an jipan̄ kōj pukōt mejlan laļ in ad ekkā an pen ej ekkatak jeje ko rekwojarjar. Naan ko rem̧ool im im̧we loe ilo jeje ko rekwojarjar rej wōnāān ko ad make n̄an n̄a. Ij jan̄in kar m̧ōk in riiti. Ij kajoorļo̧k ilo jetōb jabdewōt iien ij lin̄ōr jeje ko rekwojarjar. Naan kein rekwojarjar rem̧ool im iakwe rej letok tōl n̄an mour eo aō im jitōn̄ļo̧k iaļ eo n̄an wāppen eo indeeo.
Ilo ad riit im kejōkļo̧kjeņ kōn jeje ko rekwojarjar, jenaaj en̄jake unoojdikdik ko rem̧m̧an an Jetōb eo n̄an buruwōd. Jemaron̄ loe uwaak ko n̄an kajjitōk ko ad. Jej ekkatak jen kōjeram̧m̧an ko rej itok jen kōjparok kien ko an Anij. Jej bōk juon naan in kam̧ool epen kōn Jemedwōj Ilan̄ im Rilo̧mo̧o̧r eo ad, Jisōs Kraist, im Aer iakwe n̄an kōj. N̄e kobaik ippān jar ko ad, jemaron̄ lukkuun jeļā em̧ool bwe ko̧jpeļ eo an Jisōs Kraist ej m̧ool.
Būreejtōn Gordon B. Hinckley eaar ba, “Irooj ej kōjeram̧m̧an kōj kajjojo n̄an m̧ōn̄ā jen [naan ko] An rekwojarjar im n̄an kepaak jān [er] bwe kajoor eo, bwe aenōm̧m̧an eo, im bwe jeļāļo̧kjeņ ‘eo ej eļļālok jān jeļā otemjej’” (Philip. 4:7).”10
Ilo ad keememej im jar im bōk iien n̄an elōkļo̧k jeje ko rekwojarjar, mour ko ad renaaj jeram̧m̧an im eddodo ko ad renaaj mera ļo̧k.
In kwaļo̧k n̄an kom̧ bwebwenato eo kōn wāween an Jemedwōj Ilan̄ kar uwaake jar ko im akweļap ko an juon kōrā im kar leļo̧k n̄an e aenōm̧m̧an im kalim̧m̧ur eo eaar lukkuun pukōte?
Eppen ko an Tiffany kar jino iiō eo ļo̧k ke eaar wōr riloļo̧k ro ilo m̧weo imōn n̄an Thanksgiving innām bar Kūrijmōj. Ļeo pāleen eaar pād ilo medical school im kar kiiō pād ilo ruon iiō in ilo im̧ōn rijikuul. Kōnke awa in jerbal ko an raar aitok, eaar jab maron̄ jipan̄ e āinwōt erro jim̧or kar kōņaan, im eļaptata kōn eo emenin aikuj n̄an kōm̧m̧ane ilo iien holiday in, ilo kakkobaba n̄an kōjparok emān nejier ajri, eaar erom eddo an Tiffany. Eaar jino en̄jake eddodo, innām eaar katak bwe juon eo kar m̧ōttan kar nan̄inmej kōn kānjer. Aikuj iien im inepata kar jino lukkuun kaddoik e, im eaar jino inepata im jab m̧ōņōņō. Eaar pukōt jipan̄ jen taktō, im ejjeļo̧k kar oktak. An ijol mōn̄ā eaar jako, im eaar jino mōļo̧k, an aidik emaron̄ kar pidodo an dolol. Eaar pukōt aenōm̧m̧an jen jeje ko rekwojarjar im kar jar n̄an joļo̧k būrom̧ōj eo eaar joon e. Ke aenōm̧m̧an im jipan̄ kar jimor itok, eaar jino en̄jake an Anij kejekdoon e. Baam̧le eo an im ro jeran raar jar kōn e im kajjieon̄ n̄an jipan̄. Raar bōkļo̧k m̧ōn̄ā ko renno̧ kajjieon̄ kōjparok ājmour an ānbwinin, bōtaab eaar maron̄ bōk jejjo jibuun innām jab maron̄ kan̄ aolepān.
Ilo juon baj raan, juon m̧ōttan eaar kajjieon̄ ilo ejjeļo̧k tōprak n̄an kareel e kōn m̧ōn̄ā ko renno̧ ippān. Ke ejjeļo̧k en eaar jerbal, eo m̧ōttan eaar ba, “Ej aikuj wōr juon men enej em̧m̧an n̄an kwe.”
Tiffany eaar ļōmņak jidik iien im ba, “Men eo imaron̄ ļōmņak enej em̧m̧an ej pilawe en jej make iieke.”
Bōtaab eaar ejjeļo̧k .
Ālkin rālep in eo beel in kōjam̧ eo an Tiffany eaar jan̄. Ļeo ippān eaar itok n̄an m̧weo im uwaak e. Ke eaar ro̧o̧ltok, eaar bōktok juon loob in homemade pilawe. Tiffany eaar ļo̧kjenan ke eaar jiron̄ļo̧k e bwe eaar itok jān juon kōrā etan Sherrie eo raar jeļā kajjeen. Eaar m̧ōttan sister eo an Tiffany Nicole, eo eaar jokwe ilo Denver, Colorado. Sherrie eaar kwaļo̧k kadkad in n̄an Tiffany im ļeo pāleen jejjo allōn̄ ko rem̧ootļo̧k ke Nicole im baam̧le eo an raar pād ippān Tiffany n̄an Thanksgiving. Sherrie, eo eaar jokwe ilo Omaha, eaar itok n̄an m̧weo im̧ōn Tiffany n̄an lotok Nicole.
Kiiō, jejjo allōn̄ ālkin Tiffany eaar iioon Sherrie, kōn pilawe in enno̧ ilo pein, Tiffany eaar kūr sister eo an Nicole n̄an kam̧oolol e kōn an jilikintok Sherrie ilo juon ijjitōn̄ in tūriam̧o. Ijjelo̧kin, eaar jela bwe Nicole eaar jab kōjeļāik Sherrie n̄an loļo̧k Tiffany im ejjeļo̧k an jeļā kake.
Rājet in bwebwenato in eaar waļo̧k ke Nicole eaar etale ippān Sherrie n̄an lale ta eo eaar im̧we e n̄an bōkļo̧k loob in pilawe eo. Ta eo eaar katak eaar juon im̧we n̄an e, n̄an Tiffany, n̄an Sherrie—im ej juon im̧we n̄an n̄a.
Ilo jibbon̄ eo kar bōkļo̧k pilawe eo, Sherrie eaar im̧we n̄an kōm̧m̧ane ruo ļoob in pilawe ijjelo̧kin wōt juon eaar karōk n̄an kōm̧m̧ane. Eaar ba eaar en̄jake im̧we n̄an bōke pilawe eo kein karuo ippān ilo wa eo waan raan eo, mekarta eaar jab jeļā etke. Ālkin m̧ōn̄ā in rālep ippān eo m̧ōttan jen m̧weo, leddik eo nejin juon an iiō eaar jino jan̄ im kar aikuj kōro̧o̧le bwe en kiki. Sherrie eaar m̧akoko ke en̄jake in eaar itok n̄an e bwe ej aikuj bōkļo̧k bar juon ļoob in pilawe n̄an sister eo an Nicole Tiffany, eo eaar 30 minit ettoļo̧k jen turājet in bukwon eo juon im eo ej kab jeļā kajjeen. Eaar kajjieon̄ kōjekdoon im̧we eo, kōņaan in kōro̧o̧l leddik eo nejin emōk n̄an m̧weo im kar en̄jake jiddik jook kōn an bōkļo̧k juon ļoob in pilawe n̄an armej ro enan̄in jaje kajeen. Kōn menin, im̧we eo n̄an etal n̄an m̧weo imōn Tiffany eaar kajoor, kōn menin eaar eo̧ron̄ im̧we eo.
Ke eaar itaakļo̧k, ļeo pāleen Tiffany eaar uwaake kōjem̧ eo. Sherrie eaar kakeememej e bwe eaar jeran Nicole eo eaar iioone ilo Thanksgiving eo, kar leļo̧k n̄an e ļoob in pilawe eo, im etal.
Innām eaar waļo̧k bwe Irooj eaar jilkinļo̧k juon rūwamaijet n̄an bukwōn eo n̄an bōkļo̧k jab wōt homemade pilawe eo kar kōņaan ak barāinwōt juon ennaan in iakwe n̄an Tiffany. Ta eo eaar waļo̧k n̄an e jab maron̄ kōmeļeļeik ilo wāween ko jet. Eaar juon menin aikuj lukkuun aikuji n̄an en̄jake bwe eaar jab make iaan—Anij eaar jeļā kōn e im eaar jab kajojoļāār e. Pilawe eo—elukkuun ijōļļe —kar bōkļo̧k n̄an e jen juon eo ejjab lukkuun jeļā kajjeen, juon eo ewōr jeļāļo̧kjeņ ippān kōn aikuj eo an, ak eo eaar ron̄jake im̧we eo an Jetōb eo im ļoor im̧we eo. Eaar erom juon kōkkaļļe n̄an Tiffany bwe Jemedwōj Ilan̄ eaar ļōmņak kōn aikuj ko an im iakwe e ebwe eaar jilkinļo̧k jipan̄. Eaar uwaak n̄an jan̄ ko an kōn kōmour.
Sister ro aō jitōn bōro, Jemedwōj Ilan̄ ej iakwe kom̧—kom̧ kajjojo. Iakwe in ejjamin oktak. Ej jab kareel jen paotok eo ami, jab jen m̧weiuk ko ami, barāinwōt jab jen jon̄an jāān eo ippām ilo akkaun eo ami ilo bank. Ejjab oktak jen tōļan ko im maron̄ ko. Ej pād ijeņ. Ej pād ijeņ n̄e kwoj būrom̧ōj ak m̧ōņōņō, ebbweer ak kōjatdikdik. Iakwe an Anij ej pād ijeņ n̄an kom̧ men̄e kom̧ jab aikuj iakwe. Ej pād ijeņ iien otemjej.
Ilo ad pukōt Jemedwōj Ilan̄ jen lukkuun, m̧ool in jar im ilo m̧ool, niknik ekkatak jeje ko rekwojarjar, naan in kam̧ool ko ad renaaj kajoorļo̧k im m̧wilaļ okarier. Jenaaj jeļā iakwe an Anij n̄an kōj. Jenaaj meļeļe bwe jej jab etetal make iaad. Ij kalim̧m̧uri kom̧ bwe kom̧ naaj juon raan jutak ļo̧k iami im lale ļo̧k iien ko ami reppen, im kom̧ naaj kile bwe E eaar aolep iien pād turājetimi. Ijeļā menin bwe em̧ool ilo jako eo an eo m̧ōtta indeeo—Frances Beverly Johnson Monson.
Ij likūt ippāmi aō iakwe. Ij likūt ippāmi aō kōjeram̧m̧an. Ij likūt ippāmi aō kam̧oolol kōn aolep men ko rem̧m̧an kom̧ij kōm̧m̧an im kōn mour ko kom̧ij tōli. Bwe kom̧in maron̄ jeram̧m̧an ippān aolep menin letok rem̧m̧an ej aō jar ilo etan ad Rilo̧mo̧o̧r im Ripinmuur, em̧ool Jisōs Kraist Irooj, amen.