“I Jamin Likjab jān Eok ak Ilo̧k jān Eok”
Jen Būreejtōn Thomas S. Monson
Jemedwōj Ilan̄ … ejeļā bwe jej katak im eddōkļo̧k im kajoorļo̧k ilo ad jelm̧ae im joor jān kapo ko jej aikuj eļļā jāni.
Ilo jōnōl eo aō bon̄in, inaaj je, “ekar juon iaan m̧wen̄an ko relukkuun im̧we an jabdewōt kweilo̧k eļap iaar pād ie. Men otemjej raar lukkuun em̧m̧an im ejetōbtōb.”
Ro jeiū im jatū, jiljino allōn̄ ko rem̧ootļo̧k jen ke jaar koba ippān doon ilo kweilo̧k eo eļap ad, kōrā eo pāleeō, Frances, kar babu ilo aujipitōl, kar en̄taan kōn juon wōtlo̧k eo eļap an jorrāān jejjo raan m̧oktaļo̧k. Ilo Māe, ālkin wiik in an peran kakkōt n̄an eļļā ioon jorrāān ko ippān, eaar em̧m̧akūtļo̧k n̄an indeeo. An jako kar lukkuun oon̄ kake. E im n̄a kar m̧are ilo Salt Lake Temple ilo Oktoba 7, 1948. Ilju enaaj kar kein 65 iiō ko n̄an kakeememej raan in m̧are eo am. Eaar riakwe eo an mour eo aō, im m̧ōttā eo lōke, im jera epaake eō. N̄an ba bwe ij oon̄ kōn e ejjab jino in n̄an kwaļo̧k m̧wilaļ in en̄jake eo aō.
Kweilo̧k in ej kajjejet 50 iiō ko jen ke iaar kūr n̄an Doulul eo an Jon̄oulruo Rijilōk ro jen Būreejtōn David O. McKay: Ium̧win aolepān iiō kein, iaar jab maron̄ en̄jake jabdewōt men, ijjelo̧kin wōt jipan̄ eo elikio im dedeļo̧k jen kōmpānion eo aō em̧m̧an. En̄taan ko eaar kōm̧m̧ani ban bwini bwe in maron̄ kakūrm̧ool kūr eo aō. Ij jan̄in kar ron̄ juon naan in aetwerōk jān e āinwōt ekar menin aikuj elōn̄ raan ko im jet wiik ko ij ettoļo̧k jen e im jān ajri ro nejim̧. Eaar juon enjeļ, jouj.
Ikōņaan kwaļo̧k aō kam̧oolol, barāinwōt n̄an ro otemjej jen baam̧le eo, kōn iakwe eo ejejuwaan eo eaar itok n̄an kōm jen jako eo an Francis. Būkwi kaat ko im leta ko kar jilkintok jān peļaakin laļ in kwaļo̧k kautiej n̄an e im naan in būrom̧ōj ko n̄an baam̧le eo am. Kōm̧ ar bōk elōn̄ karōkan wūt ko raiboojoj. Kōm̧ij kam̧oolol kōn elōn̄ jipan̄ ko kar maron̄ liļo̧k ilo etan n̄an General Missionary Fund eo an Kabun̄ in. Ilo etam wōj aolep ro eaar em̧m̧akūt jen er, ij kwaļo̧k kam̧oolol em̧wilaļ kōn juon im en̄jake ko rettā.
Jipan̄ in kaenōm̧m̧an eo eļaptata n̄an n̄a ilo iien jepelļo̧k in epen eaar aō naan in kam̧ool kōn ko̧jpeļ eo an Jisōs Kraist im jeļāļo̧kjeņ eo ippa n̄an aō jitōnbōro Frances eo ej mour wōt. Ijeļā bwe jepelļo̧k in ekadu peļo̧k in. Kōm̧ ar liāp ilo m̧weo imōn Anij jen juon ewōr mālim ippān n̄an liāp ioon laļ im ilo lan̄. Ijeļā bwe kōm̧ naaj bar koba ippān doon juon raan im jāmin bar maron̄ jepel. En̄in ej jeļāļo̧kjeņ eo ij rejtake.
Ro jeiū im jatū, emaron̄ em̧m̧anļo̧k kile bwe ejjeļo̧k armej eaar mour anemkwoj jen en̄taan im būrom̧ōj, barāinwōt ejjeļo̧k juon iien ilo bwebwenato in armej bwe eaar ejjeļo̧k iien kwaļo̧k tarpok im ajjimakeke.
Eļan̄n̄e iaļ in mour ej oktak im kōmetak kōj, ewōr mālijjon̄ n̄an kajitōk kajjitōk in “Etke n̄a?” Ilo iien ej waļo̧k an ejjeļo̧k meram ilo jem̧ļo̧kin tunnel eo, ejjab tak al ilo jem̧ļo̧kin bon̄ in marok jilōn̄lōn̄ ko. Jej en̄jake ad obrak kōn inepata in kōņaan ko rejjab kūrm̧ool im būrom̧ōj ej kabōjrak kōjatdikdik. Jej koba ippān doon ilo kadedeļo̧k ilo likio akweļap in jen baibōļ, “Ejjeļo̧k wūnto ilo Gilead ke?”1 Jej en̄jake jojoļāār, rub bōro, ajimakeke. Jej ikdelel n̄an lo jerata eo ad make jen ļōmņak ko ejjeļo̧k kōjatdikdik ie. Jej jino jab kijenmej kōn juon un n̄an jorrāān ko ad, meļo̧kļo̧k bwe emakijkij ilo wānōk in kijenmej ekwojarjar ej menin aikuj.
Men ko reppen, ko rej itok n̄an kōj rej kwaļo̧k n̄an kōj mālijjon̄ eo em̧ool n̄e jemaron̄ niknik. Juon kajjitōk eaorōk ej pād wōt n̄an uwaake jen kōj kajjojo: Inaaj ke wōtlo̧k ilo aer loe aer make jab maron̄ jerkak ilōn̄ in apan̄ ko aer. N̄an kamōje ekitbuuj niknik n̄an lukkuun jem̧ļo̧kin mour eo make.
Ilo ad kejōkļo̧kjeņ kōn m̧akūtkūt ko me remaron̄ waļo̧k n̄an kōj aolep, jemaron̄ ba ippān Job eo etto, “Armej ej ļotak n̄an jorrāān.”2 Job eaar juon “e weepān im wānōk.” Armej eaar “mijak Anij, im jeorļo̧k jān nana.”3 Jim̧we ilo an jerbal, jeram̧m̧an ilo an m̧weie, Job eaar jelm̧ae juon mālijjon̄ eo eaar maron̄ kar kakkure jabdewōt. M̧weiūk ko an kar būki, kajjirere kake jen ro jeran, metak jen an en̄taan, liajļoļ jen jako an baam̧le eo an, kar rōjan̄ e n̄an “kaarmejjete Anij, im mej.”4 Eaar jum̧ae kapo im kar kwaļo̧k jān m̧wilaļ in jetōb eo an:
“Lo, aō men in kōnnaan ej ilo lan̄ ko, im eo ej kam̧ool eō E pād ijo utiej.”5
“I jeļā bwe aō ri Lo̧mo̧o̧r ej mour wōt.”6
Job eaar dāpij tōmak eo. Jenaaj ke kōm̧m̧an āinwōt n̄e jej jelm̧ae apan̄ ko, ko renaaj ad?
Jabdewōt iien jej m̧alļaļļo̧k n̄an en̄jake eddodo laļtak eo ippān lan̄ ko an mour, jen keememej bwe ro jet raar eļļā jen ejja wāween in, raar niknik, innām kar eļļā ioon.
Bwebwenato in Kabun̄ in ilo, tarlep in tōre in an iien ko, ej obrak kōn en̄jake ko an ro raar kakkōt im ro raar dim im peran. Un eo? Raar likūt ko̧jpeļ eo an Jisōs Kraist ioļapļap in mour ko aer. En̄jin ej ta eo enaaj kanōk kōj jen jabdewōt men ej itok im̧aan iaļ eo ad. Jenaaj wōt en̄jake apan̄ ko reppen, ak jenaaj maron̄ jelm̧ai, n̄an jelm̧ae er, im n̄an wōnm̧aanļo̧k im anjo.
Jān peet in metak, jān pet etutu, kōn dān in jan̄, jej bōkļo̧k lan̄ļo̧k jen kalim̧m̧ur in ekwojarjar im kalim̧m̧ur in eaiboojoj: “I jamin likjab jen eok, Ak ilo̧k jen eok.”7 Kainōm̧m̧an in ejjeļo̧k wōņāān.
Ilo aō kar ito itak ettoļo̧k im mijel ipeļaakin laļ in kakūrm̧ool eddo ko an kūr eo aō, iaar maron̄ jeļā elōn̄ men ko—rektibuuj m̧ool in bwe aolep rej en̄jake būrom̧ōj im en̄taan. Ij jab maron̄ jino jon̄e aolep metak bar im būrom̧ōj iaar kam̧ooli ke iaar loļo̧k ippān elōn̄ ro raar jelm̧ae liajļoļ, en̄jake nan̄inmej, jelm̧ae jepel, kakkōt kōn juon nejin ļaddik ak leddik eo ebōt, ak en̄taan kōn bōd ko an jerawiwi. Laajrak in emaron̄ etal wōt im etal wōt, bwe ewōr jorrāān ko ban bwini remaron̄ waļo̧k n̄an kōj. N̄an kōmakeļo̧k iaan juon waanjon̄ok epen, im jabdewōt iien ij ļōmņak kōn apan̄ ko, ļōmņak ko aō rej oktakļo̧k n̄an Brother Brems, juon iaan rūkaki in Jabōt Jikuuļ eo ke iaad dik. Eaar juon membōr etiljek ilo Kabun̄ in, juon em̧m̧aan eļap iakwe ippān. E im kōrā eo pāleen, Sadie, ewōr nejier ralitōk ajri, elōn̄ iaer raar dettan wōt ro ilo baam̧le eo aō.
Ālkin an Frances im n̄an n̄a kar m̧are im em̧m̧akūt jān ward eo, kōm̧ ar loe Brother im sister Brems im membōr in baam̧le eo aer ilo m̧are im kallib ko, barāinwōt ilo iiaio ko an ward.
Ilo 1968, kar jako kōrā eo pāleen Brother Brems, Sadie. Ruo iaan ajri ro nejin ralitōk kar barāinwōt jako ke iiō ko rej eļļā ļo̧k.
Juon raan turinļo̧k 13 iiō emootļo̧k, rūttotata eo jibun̄ Brother Brems eaar ko̧o̧l e n̄a. Eaar kōmeļeļeik bwe jim̧aan eaar tōpar 105 an raan in ļotak. Eaar ba, Ej jokwe ilo juon mōn kōjparok ak ej koba ippān aolepān baam̧le eo an kajjojo Jabōt, ijo emaron̄ letok juon katak in ko̧jpeļ.” Eaar wōnm̧aanļo̧k wōt, “Jabōt eo ļo̧k Jim̧m̧a eaar kōjjeļļāik kōm̧, ‘Ro rejitōnbōro, inaaj mej wiik in. Kom̧ jouj im ko̧o̧ļ e Tommy Monson. Enaaj jeļā ta n̄an kōm̧m̧ane.’”
Iaar loļo̧k Brother Brems jotaan eo juon. Iaar jab loe e ium̧win juon iien aetok. Iaar jab maron̄ kōnono n̄an e, bwe eaar jab ron̄ļo̧kjeņ. Iaar jab maron̄ jeje juon ennaan n̄an e n̄an riit, kōnke eaar jab maron̄ loļo̧kjeņ. Kar jiron̄ eō bwe baam̧le eo ej kōnono ippān jen aer jibwe adiin tuanbwij maron̄ in pein im likūt ioon pein anmiin̄ etan armej eo ej lotok. Jabdewōt ennaan kar kwaļo̧k ilo ejja wāween in. Iaar ļoor wāween eo jen jibwe adiin pein im jipeeļe T-O-M-M-Y M-O-N-S-O-N, et eo me eaar aolep iien jeļā eta. Brother Brems eaar m̧ōņōņō im, bōk peiū, likūt ioon bōran. Iaar jeļā bwe kōņaan eo an ekar n̄an bōk juon kōjeram̧m̧an an priesthood. Rittōr eo eaar ektak eō n̄an m̧ōn kōjparok eo eaar kobatok ippa ke kōm̧ ar likūt peium̧ ioon bōran Brother Brems im leļo̧k kōjeram̧m̧an eo ekōņaan. Ālkin wōt, dān in kōmjaalal eaar wōtlo̧k jān mejān. Eaar dāpij peiūm̧ ilo kam̧oolol. Men̄e eaar jab ron̄ ainikien kōjeram̧m̧an eo kōm ar leļo̧k n̄ane, kar lukkuun en̄jake Jetōb eo, im ij tōmak eaar im̧we n̄an jeļā bwe kōm ar leļo̧k kōjeram̧m̧an eo ej aikuji. Em̧m̧aan in em̧m̧an eaar jab maron̄ loļo̧kjeņ. Eaar jab maron̄ ron̄ļo̧kjeņ. Kar kōjparok e bon̄ im raan ilo juon ruum̧ jidikdik ilo juon m̧ōn kōjparok. Im ettōn̄ eo an imejān im naan ko eaar kōnono kar un̄ūr buruō. “Kom̧ool,” eaar ba. “Jemedwōj Ilan̄ eaar lukkuun em̧m̧an n̄an n̄a.”
Ilowaan wōt juon wiik, āinwōt Brother Brems eaar anto̧o̧ne, eaar jako. Ej jan̄in kar pād ilo ta eo eaar ejjeļo̧k ippān; mekarta, eaar aolep iien kam̧oolol kōn kōjeram̧m̧an ko an rellōn̄.
Jemedwōj Ilan̄, eo ej letok eļap n̄an lan̄lōn̄ kaki, Ej barāinwōt jeļā bwe jej katak im eddōkļo̧k im kajoorļo̧k ilo ad jelm̧ae im jo̧o̧r jān kapo ko jen ko jej aikuj eļļā jāni. Jej jeļā bwe ewōr iien ko n̄e jenaaj en̄jake būrom̧ōj jen bōro erub, n̄e jenaaj liājļaļ, im n̄e jemaron̄ mālijjon̄i jon̄ok ko ad. Kōn menin, men kein reppen rej kōtļo̧k ad oktak n̄an em̧m̧anļo̧k, n̄an bar kalōk mour ko ad ilo wāween eo Jemedwōj Ilan̄ ej katakin kōj, im n̄an erom jet rioktak jān kar m̧okta—em̧m̧anļo̧k jen kar m̧okta, meļeļeļo̧k jen kar m̧okta, kajoorļo̧k jen kar m̧okta, naan in kam̧ool ko rekajoor jen kar m̧okta.
Menin ej aikuj ad kōttōpar—n̄an kōjparoke im niknik, aaet, ak barāinwōt erom eļapļo̧k karreeo ilo jetōb ilo ad kōm̧m̧an iaļid jen meram in al im būromōj. N̄e en kar jab kōn apan̄ ko n̄an eļļā ioon im jorrāān ko n̄an ņamejļāer, jenaaj kar pād wōt, kōn jidik ak ejjeļo̧k eddōkļo̧k n̄an kōttōpar eo ad n̄an mour indeeo. Rijeje boem̧ eo eaar kwaļo̧k ejja ļōmņak in ilo naan kein:
Alal eo em̧m̧an ejjab eddōk ilo em̧m̧an,
Ilo an kajoorļo̧k kōto eo, ej kajoorļo̧k wōjke ko.
An ettoļo̧k kōdo, ej kajoorļo̧k kōtaan eo.
An lōn̄ļo̧k lan̄ ko, ej ļapļo̧k kajoor eo.
Jen al im m̧ōļo̧, jen wōt im snow,
Ilo wōjke ko im armej, alal ko rem̧m̧an rej eddōk.8
Rilo̧mo̧o̧r eo wōt ejeļā m̧wilaļ in kapo ko ad, metak ko ad, im en̄taan ko ad. Eaar make letok n̄an kōj aenōm̧m̧an ejjeļo̧k jem̧ļo̧kin ilo iien būrom̧ōj. E wōt ej ūn̄ūr jetōb ko ad rejorrāān kōn naan in kaenōm̧m̧an ko An:
“Kom̧win itok n̄an Ippa, Kom̧ otemjej rej jerbal in ban, im Inaaj kakkijeik kom̧.
“Kom̧in bōk Aō ine im likūte iaerami, im katak Ippa, bwe Ij ineem̧m̧an im ettā būruō, im kom̧ naaj lo ami kakkije.
“Bwe Aō ine ej em̧m̧an, im men eo Ij ineke e m̧ōrā.”9
Mekarta ej iien ko rem̧m̧antata im nana tata, Ej pād ippād. Eaar kalim̧m̧ur bwe menin ej jamin oktak.
Ro jeiū im jatū, kōm̧m̧an bwe en wōr juon ad kalim̧m̧ur n̄an Jemedwōj Ilan̄ bwe ejjab oktak eļļā jen iien ak ekkar n̄an kauwōtata ko ilo mour ko ad. Jej jamin aikuj n̄an en̄jake men ko reppen n̄an kōj n̄an keememej E, im jej jamin diwōjļo̧k n̄an ettā m̧okta jej leļo̧k n̄an E tōmak eo ad im lōke.
Kōm̧m̧an bwe jen kajjieon̄ epaake lok Jemedwōj Ilan̄. N̄an kōm̧mane menin, jej aikuj jar n̄an E im ron̄jake E aolep raan. Jej lukkuun aikuji E aolep awa, men̄e remaron̄ awa ko rej ilo iien meram ak jen wōt. Kōm̧m̧an bwe kalim̧m̧ur eo An en aolep iien ad naan: “I jamin likjab jen eok, Ak ilo̧k jen eok.”10
Kōn aolep aō kajoor, ij kam̧ool bwe Anij ej mour im iakwe kōj, bwe Nejin Emake Wōt eaar mour im mej kōn kōj, im bwe ko̧jpeļ eo an Jisōs Kraist ej deblo̧ke meram eo ej romaak jen maroklep in mour ko ad. Kōm̧m̧an bwe en āindein, ij jar ilo etan ekwojarjar Jisōs Kraist, amen.