Kajoor an juon Make kōn Pinmuur eo an Jisōs Kraist

Jen Elder Richard G. Scott

Jen Doulul eo an Jon̄oulruo Rijilōk ro

Kōn Pinmuur eo an Jisōs Kraist, kajjojo iaad emaron̄ in erom erreeo im bwe eddo in jum̧ae eo enaaj jako.

Jem̧aanļo̧k, iaar jeram̧m̧an n̄an ioon juon doulul in jodikdik ekabwilōn̄lōn̄ ro jān state eo an Idaho. Juon jiron̄ eo ewānōk eaar kajjitōk ippa ta men eo eaorōk tata ij en̄jake rej aikuj kōm̧m̧ane ilo mour ko aer kiiō. Iaar ba ren katak n̄an kile kajoor in Pinmuur eo an Jisōs Kraist ilo mour ko aer. Rainin inaaj kōmeļeļe juon m̧ōttan ilo kajoor jab in, eo ej kajoor an juon make jemaron̄ bōke kōn Pinmuur eo an Jisōs Kraist.

Ilo Bok in Mormon jej riit kōn Ammōn im ļōm̧aro jein im jatū raar katakin ko̧jpeļ eo an Jisōs Kraist n̄an juon kumi in armej ro raar “rawiia im kijn̄en̄e im kain armej rot en re lej.”¹ Elōn̄ iaan armej ro raar oktak im kālet n̄an ukōt m̧wil m̧wil jerawiwi ko aer. Joñan ļap in oktak eo aer raar kalbwini kein tariņe ko aer im kallim̧ur ippān Irooj bwe rejamin naaj bar kōjerbali.²

Tok ālik, elōn̄ iaan ro jeier im jatier me raar jab oktak raar itok ņae er im jino m̧an er. Kiiō armej ro retiljek kar kālet n̄an mej kōn jāje ko ijello̧kin aer kakkure mour in jetōb ko aer kōn bar bōk kein tariņae ko. Waanjon̄ak eo aer ejim̧we kar jipan̄ em̧ool elōn̄ļo̧k armej n̄an oktak im door kein tariņae in jum̧ae ko aer.³

Kōn Ammōn, Irooj eaar tōl er n̄an jokwe ilubwiljin Rinipai ro, im raar jino kūr er āinwōt armej ro an Ammōn.⁴ Rinipai ro kar kōjparok er ium̧win elōn̄ iiō ko, ak ilo m̧ool jarin tariņae eo an Rinipai raar jino in iietlo̧k, im jipan̄ eo eaar juon menin aikuj.⁵

Armej ro an Ammōn raar pād ilo juon iien eo eaorōk ilo mour in jetōb ko aer. Raar m̧ool n̄an bujen ko aer n̄an jamin bar kōto̧o̧rļo̧k bōtōktōk. Ak raar meļeļe bwe ro jemeer raar eddo n̄an leļo̧k kōjparok n̄an baam̧le ko aer.⁶ Bwe aikuj in eaar lukkuun ļap n̄an kaorōk ļōmņak eo n̄an rubwe bujen eo aer.⁷

Ritōl in pristhood eo aer emeletlet, Hilamōn, eaar jeļā bwe rupe juon bujen ippān Irooj ejjab jim̧we. Eaar leļo̧k juon kālet eo eim̧we. Eaar kakememej er bwe ļaddik ro nejier kar jab wor ņotaer kōn ejja jerawiwi ko im kōn menin ejjab menin aikuj n̄an kōm̧m̧ane ejja bujen in.⁸ Ak ļaddik ro raar lukkuuk inono, raar kajoor ilo ānbwiin im, lukkuun aorōk, raar wānōk im kwojarjar. Ļaddik ro kar kōkajoor er kōn tōmak ko an jineer.⁹ Ium̧win tōl eo an rikanaan-ritōl eo aer, likao rein raar bōk jikin jemeer n̄an kōjparok baam̧le ko aer im kabijukinen ko aer.¹⁰

M̧akūtkūt ko rejelet jokāle in eaorōk ekōmeļeļeik wāween an Pinmuur eo an Jisōs Kraist bōktok kajoor an juon make n̄an mour ko an ajri ro nejin Anij. Kejekļo̧kjeņ kōn en̄jake ko kōn ro jemeer. Ewi jon̄an aer kar en̄jake n̄an jeļā bwe m̧akūtkūt in kōto̧o̧rļo̧k bōtōktōk eo aer m̧okta kar jab kōtļo̧k bwe ren kōjparok kōrā ro ippāer im ajri ro ilo iien aikuj. Jeļā an juon make kōn jekjek eo ekijn̄en̄e an ļaddik ro nejier naaj kiiō idajon̄jon̄ (ilo bōk kuņaer ilo tariņae), remaron̄ kar jan̄. Baba ro, jaab ajri ro, rej kōjparok baam̧le ko aer!¹¹ Būrum̧ōj ko aer raar aikuj in kajoor.

Etke ritōl in priesthood eo aer eim̧we emijak kōn jokālet eo aer n̄an kotak kein tariņae ko aer, “n̄e … renaaj jako jetōb ko aer”?¹² Irooj eaar kwaļo̧k bwe ro rej ukwelo̧k jen jerawiwi ko an naaj jeo̧rļo̧k bōk, im Irooj ejjamin kememej jerawiwi [ko aer]. ¹³ Baba rein retiljek raar ukweļo̧k jān jerawiwi ko aer m̧oktaļo̧k im erom erreeo kōn Pinmuur eo an Jisōs Kraist, kōn menin etke kar kapilōk er n̄an jab jurake baam̧le ko aer?

Ej juon pedped em̧ool me kōn Pinmuur eo an Jisōs Kraist, jemaron̄ in erreeo. Jemaron̄ erom wānōk im erreo. Mekarta, jet iien kālet ko ad rejjab jejjet rej likūt kōj kōn kaje ko ekadu kitier. Juon iaan bun̄tōn ko raorōk n̄an kadedeļo̧k jekjek in ukweļo̧k ko rekadu im raitok kitier ilo jerawiwi ko ad m̧okta. Jokālet ko aer m̧okta raar ejedmetmet ippān ro jemen Riammōn ro kōn ikdelel ko an laļ in me remaron̄ kar bar juon alen kōm̧ōjņo̧ik er make bwe Setan emaron̄ in jerbal.

Setan enaaj kajieon̄ in kōjerbal ememļo̧kjeņ eo ad ilo jabdewōt jekjek n̄an kūr ļo̧k kōj n̄an im̧we eo an. Jej aikuj in aolep iien jojo kōjparoke n̄an jum̧ae kareeļ ko an. Āinwōt kar jekjek ko retiljek ippān ro jemen ri Ammōn ro. Men̄e mour tiljek ālkin iiō ko, eaar lukkuun ekkar n̄an er n̄an kōjparok er make ilo jetōb jān jabdewōt em̧em̧ļo̧kjeņ in jerawiwi ko m̧oktaļo̧k.

Ikōtaan elōn̄ tariņae ko, Kapen Moronai eaar jurake jikin ko rem̧ōjņotata. “Eaar kōm̧m̧an bwe ren kalek juon wōrwōr in wōjke ko ioon ippe eo itulowa in ro̧n̄ eo; im raar jolōn̄ļo̧k bwidej jān ro̧n̄ eo itōrerein wōrwōr in wōjke ko … m̧ae aer kar jepooļe jikin kwelo̧k in … kōn juon wōrwōr ekajoor jān wōjke ko im bwidej ko, n̄an juon uteej eļap.”¹⁴ Kiaptin Moronai eaar meļeļe aorōk eo an eria ko rem̧ōjņo̧ n̄an leļo̧k kajoor.¹⁵

Ro jemen Riammōn raar āinwōt juon. Raar kōņaan jetōb eo ekajoorļo̧k n̄an kōjeno̧ļo̧k mour in tōmak eo aer make im m̧wil ko aer renana m̧oktaļo̧k. Ļaddik ro nejier, raar jeram̧m̧an kōn m̧anit ko aer rem̧m̧an, raar jab pād ilo ejja kapo ko wōt. Raar maron̄ jurake baam̧le ko aer ilo tiljek kōn ejjeļo̧k kōm̧tālik ilo jetōb eo aer.

Ennaan eo ekōlan̄lōn̄ n̄an jabdewōt eo ej ikdelel n̄an jolo̧k kaje ko an kālet ko renana m̧oktaļo̧k ej bwe Irooj ej lo m̧ōjņo̧ ko eoktak jān An lo jum̧ae. Ijo Irooj ej kakkōl ro rejjab ukweļo̧k enaaj bōktok kaje,¹⁶ n̄e Irooj ej kōnono kōn m̧ōjņo̧ ko, ej aolep iien kōn tiram̧o.¹⁷

Ilo m̧ool, ewōr jet tiriam̧o kake ko ippān ro jemen Riammōn kar katakin m̧anit ko rebōd an ro jeneer im jemeer, ak aolep ro nejin Jemedewōj Ilan̄ raar itok n̄an mour wabanban in kōn Meram eo an Kraist. Jekdo̧o̧n ewi jon̄an jerawiwi ko aer jerbal eo eaar n̄an ko̧ļapļo̧k juon jetōb em̧ōjņo̧ me Setan emaron̄ kapoki.

Raar kwaļo̧k ko̧jpeļ eo kōn tiram̧o, ukwelo̧k, im kōn Pinmuur eo an Jisōs Kraist eaar erom kajoor ilo jetōb jen im̧we ko and Setan. Ilo m̧ool raar jab en̄jake kapo n̄an ukōt nana eo aer m̧oktaļo̧k, aaet ilo ļoor ritōl eo aer ilo priesthood, raar jab leļo̧k an Setan iien n̄an “[ko̧o̧te] jetōb ko aer, im [n̄an tōlļo̧k] er ilo tiljek n̄an hell.”¹⁸ Pinmuur eo an Rilo̧mo̧o̧r ejjab wōt karreoiki er jān jerawiwi, ak kōnke pokake eo aer n̄an kapilōk eo an ritōl eo aer ilo priesthood, Rilo̧mo̧o̧r eo ar maron̄ kōjparok er jān m̧ōjņo̧ ko aer im kōkajoor er. Ettā eo aer, mour in wūjļepļo̧k n̄an jeo̧rļo̧k jerawiwi ko aer eaar jab ļap n̄an kōjparok baam̧le ko aer jān jabdewōt men remaron̄ kar kōm̧m̧ane ilo iien tariņae eo. Pepe eo aer eaar jab kinōōrlaļ ļo̧k er kōn kōjeram̧m̧an ko. Ej kōkajoorļo̧k er im kōjeram̧m̧an elōn̄ epeped ko tok ālik.

Jem̧ļo̧kin ļo̧k bwebwenato eo ej kōmeļeļeik wāween an tiriam̧o eo an Irooj kōm̧m̧an “menin m̧ōjņo̧ ko ren erom kajoor n̄an er.”¹⁹ Ro jemeer retiljek raar jilkinļo̧k ļaddik ro nejier n̄an tariņae ium̧win kōjparok eo an Hilamōn. Ilo m̧ool ļaddik ro raar ire ilo tariņae eo ijo raar aolep bōk jidik kinejnej, ejjeļo̧k juon ar jako.²⁰ Ļaddik ro raar erom̧ juon kein kajoor eaorōk n̄an jaritariņae eo an ri Nipai. Raar tiljek im kajoor ilo jetōb ke raar jepļaak n̄an kapijuknen eo aer. Baam̧le ko aer raar bar jeram̧m̧an, jo̧kne, im kajoor.²¹ Ilo tōre in ad, oraņ rikatak ro kōn Bok in Mormon em̧ōj an lōn̄tak kōn waanjon̄ak an ļaddik rein rekwojarjar im rewānōk.

Kajjojo iaad ewōr tōre ko ilo mour ko ad n̄e jenaaj kōm̧m̧an kālet ko rebōd. Jej aolep pād ilo tōre in aikuj kōn kajoor in Pinmuur eo an Jisōs Kraist. Kajjojo iaad eaikuj in uweļo̧k jān jabdewōt nana. Irooj eaar ba bwe Ejjab kalimjōk jerawiwi ilo jabdewōt jekjek.²² Ejjab maron̄ kōnke Ejeļā ta eo ej bōk n̄an erom āinwōt E.

Elōn̄ iaadwōj jekar kōtļo̧k an m̧ōjņo̧ eddōkļo̧k ilo m̧wiliid. Kōn Pinmuur eo an Jisōs Kraist, kōj, āinwōt Riammōn ro, maron̄ kalōk juon wōrwōr in jetōb ko kōtaad make im jabdewōt bōd ko m̧oktaļo̧k me Setan emaron̄ kar kōjerbali. Jetōb in kōjparok eo n̄an kalōk ipeļaakin ro jemen ri Ammōn ro raar jeram̧m̧an im kar kōkajoorļo̧k er make, baam̧le ko aer, laļ eo aer, im diktak in epepen ko. Menin emaron̄ in m̧ool n̄an kōj.

Kōn menin ekōjkan ad kalōk kattōrak ko an indeeo? Bun̄ten eo im̧aan tata aikuj in m̧ool, dipio, im ilo ukweļo̧k ededeļo̧k. Kōn Pinmuur eo an Jisōs Kraist, kajjojo iaad emaron̄ in erom erreeo im bwe eddo in jum̧ae eo en jako. Kememej, ukwelo̧k ejjab kaje. Ej iaļ in kōjatdikdik eo n̄an juon ilju im jekļaj eo eaiboojoj.

Jemed ilo Lan̄ eaar letok n̄an kōj kein jerbal ko me rejipan̄ n̄an kalōk kattōrak ko ikōtaad im tiljek ko ad. Ļōmņak kōn kakobaba kein ilaļ:

Kōm̧m̧ani bujen ko im bōk kain̄i ko n̄an eok make. Innām kōm̧m̧ani jidik kōn jidik im jerbali ilo jejjet n̄an leļo̧k kain̄i ko ilo tampeļ kōn ro jibum̧ im jim̧am̧ make.
Kwaļo̧k ko̧jpeļ eo n̄an ro rejjab membōr ak ro uwaan baam̧le ko rejaniknik ak ro m̧ōttad. Kwaļo̧k m̧ool kein remaron̄ bōktok juon ijjino eo ekāāl ilo mour eo am.
Jerbal tiljek ilo aolep kūr ko ami ilo Kabun̄ in, eļap tata ijjitōn̄ ko an katakin ilo m̧oko im jerbal in loļo̧k an kōrā. Jab baj juon rūkaki in loļo̧k an em̧m̧aan ak rūkaki in loļo̧k an kōrā ro rej joļo̧k 15 mini loļo̧k kajjojo allōn̄. Ak, loļo̧k ro kajjojo ro uwaan baam̧le eo. Jeļā kajjojo iaer. Kwon juon m̧ōttā eo em̧ool. Kōn kōmanwa, kwaļo̧k ewi jon̄an am kea kake er kajjojo.
Men eo eaorōk tata, jipan̄ ro uwaan baam̧le eo am. Kōm̧m̧an bwe jetōb en emourur ippān ro pāleemi im ajri ro en men eo im̧aan tata. Lukkuun joļo̧k am iien kōn men ko komaron̄ kōm̧m̧ani n̄an jipan̄ kajjojo. Leļo̧k ami iien im itok limo.

Kajjojo ļōmņak kein, ewōr juon unin tōl āinwōt juon: kobrak mour eo ami n̄an jerbal n̄an ro jet. Ilo am leļo̧k mour eo am n̄an jerbal in jipan̄ n̄an ajri ro nejin Jemed ilo Lan̄,²³ kapo ko an Setan rekajoor renaaj jako ilo mour eo am.

Kōn Jemed ilo Lan̄ ej iakwe kom̧, Pinmuur eo an Jisōs Kraist ekapidodoik kajoor in. Ejjab ke em̧m̧an? Elōn̄ iami raar en̄jake edodo in kālet ko rebōd, im kajjojo iami remaron̄ en̄jake kajoor in jeo̧rļo̧k bōd eo an Irooj, tiriam̧o, im kajoor. Iaar en̄jake, im Ij kam̧ool bwe ej waļo̧k n̄an n̄an kajjojo iami, ilo etan Jisōs Kraist, amen.