N̄an Ajri ro Jibū
Jen Būreejtōn Henry B. Eyring
Rikakipilōklōk eo Kein Kajuon ilo Būreejtōnji eo Kein Kajuon
Ewōr juon kien me enaaj jipan̄ kōj n̄an dipuki apan̄ ko im jipan̄ kōj ejaake juon baam̧le eo elem̧ōņōņō.
Ilo iiō in leddik ro rerūttotata jibum̧ renaaj m̧are. Ilowan wōt jejjo iiō elōn̄ 10 ro rilikier renaaj deļo̧n̄e tōre eo ilo mour ko aer n̄e renaaj barāinwōt ejaake baam̧le ko aer make, eo ej juon men em̧m̧an.
Ekōm̧m̧an bwe en ļapļo̧k aō m̧ōņōņō n̄e rej kajjitōkin eō kōn eļapļo̧k kapilōk (ikijen ejaake baam̧le ko). Ilo m̧ool raar ba, “Ta kālet ko imaron̄ kōm̧m̧ani me enaaj tōl ļo̧k eō n̄an m̧ōņōņō?” Im kajjitōk eo juon, “Ta kālet ko remaron̄ tōl ļo̧k eō n̄an jab loe m̧ōņōņō?”
Jemedwōj Ilan̄ eaar kōjeņoļo̧k kōjwōj jen doon. Ruo armej reban en̄jake ejja en̄jake ko wōt. Eban ruo baam̧le eier ļo̧k wōt juon. Im ejjab menin bwilōn̄ bwe kapilōk in kōn ewi wāween kālet m̧ōņōņō ilo mour an baam̧le epen n̄an pukote. Aaet Jemedwōj Ilan̄ eo eiakwe eaar ejaake ejja bun̄tōn in wōt n̄an bōk m̧ōņōņō n̄an aolep ajri ro Nejin. Jekdo̧o̧n m̧wil rot ko ad make ak jekdo̧o̧n en̄jake rot ko jenaaj buki, ewōr juon wōt karōk in m̧ōņōņō eļap. Karōk in ej n̄an ļoor aolep kien ko an Anij.
N̄an kajjojo iaad, ekoba ajri ro jibu me rej ļōmņak in m̧areik juon, ewōr juon kien me enaaj jipan̄ kōj n̄an dipuki apan̄ ko im jipan̄ kōj ejaake juon baam̧le eo elem̧ōņōņō. Ej iokļo̧k aolep jem̧jerā ko jekdo̧o̧n jekjek rot. Ej ālij in men ilo aolepen jeje ko rekwojarjar im ilo aolep katak ko an rikanaan ro ilo tōre in ad. En̄in ej Baibōļ eo naan in kapilōk an Irooj n̄an ro ro rej kōņaan mour ippān doon ilo iakwe eo elem̧ōņōņō.
“Im juon iaer, eo ri kien ej mālejjon̄ E im kajjitōk Ippān im ba,
“Ri Kaki ewi kien eo eļap ilo kien ko?
“Jisōs e ba n̄an e, “Kwōn yokwe Irooj am̧ Anij kōn aolepen būruom̧ im kōn aolepen am̧, im kōn am̧ ļōmņak otemjej.
“En̄in kein eo eļap im m̧okta.
“Im eo kein ka ruo āinwōt in, Kwōn yokwe ri turum̧ im āinwōt kwe..
“Kien otemjej im ri kanaan rej ekkejel ilo kien kein ruo.”1
Jān enaan kein retinkwadik ejjab pād n̄an kemeļeļeiki aolepān ta eo iaar ekkatak kōn ta kālet ko retōl ļo̧k n̄an m̧ōņōņō ilo baam̧le ko. Ij jino kōn kajjitōk in. “Ta kālet ko raar tōl m̧aanļo̧k eō n̄an iakwe Irooj kōn aolepen būruwō im aō im aō ļōmņak?” N̄an eō uwaak eo n̄an kajjitōk in ej bwe kālet ko me raar kōbōjrak eō n̄an en̄jake lan̄lōn̄ me rej itok jān jeorļo̧k bōd kōn Pinmuur eo an Irooj.
Iiō ko rem̧ootļok Iaar peptaije juon ļaddik ilo Albuquerque, New Mexico, me kom̧ro mijenede eo m̧ōtta kar katakini. Iaar do̧o̧r laļ e ilo dān eo im bōk lōn̄tak e. Eaar nan̄in aetokin wōt eō kōnke eaar kōnono kajju tok n̄an lo̧jiln̄ū. Kōn dān eo ilo jikin peptaij eo im dānin kōm̧jaļaļ ej wōtļo̧k jen turin mejen im kōn lan̄lōn̄ ilo ainikien, eaar ba, “Irreeo, Irreeo.”
Iaar bar lo ejja kōm̧jaļaļ in m̧ōņōņō ilo mej ko mejen juon eo eaar āliji naan ko an Rijilōk eo an Anij: Eaar ba n̄an kōrā eo, ālkin juon intōrpiu in etale, “Ij jeorļo̧k am bōd ilo etan Irooj. Enaaj jeorļo̧k am bōd ilo tōre eo An make ilo wāween eo An make.” Im Eaar jeorļo̧k an bōd.
Em̧ōj aō loe bwe Irooj emaron̄ ba bwe n̄e jerawiwi ko rej jako, Ejamin bwe kememeji. Kōn kajoor in Pinmuur eo, armej ro ilukkuun jeļā kajier im iakwe er rejino oktak, im jekjek ko an jerawiwi raar jako. M̧ōņōņō ko raar obrak kōn iakwe n̄an aō Rilo̧mo̧o̧r im Jemed eo eiakwe eo eaar jilkintok E.
Kōjeram̧m̧an in eļap eaar itok n̄an rōjan̄ armej ro Ij kea kake n̄an atartar ļo̧k ippān Rilo̧mo̧o̧r n̄an do̧o̧r jān metak, eo ej kōm̧akūtļo̧k me Ej make letok. En̄in ej unin aō libōjerjer ro ij iakwe n̄an bōk im n̄an kakūrm̧ool kajjojo ijjitōn̄ liļo̧k n̄an er ilo Kabun̄ in. Bwe ej juon kālet eaorōk me ej tōl ļo̧k n̄an lem̧ōņōņō an baam̧le.
Idajon̄jon̄ eo jej en̄jake kajjojo iien ilo mour ko ad remaron̄ kapo kōj n̄an m̧akoko ak kowaan kūr ko n̄an jerbal n̄an Rilo̧mo̧o̧r. Bwe emaron̄ likūt kōj ilo jetōbin kauwōtata n̄an kōj make, ro pāleed, im baam̧le ko ad. Jet iaan kūr ko remaron̄ in jaorōk, ak mour eo aō, im baam̧le eo aō, raar oktak kōn em̧m̧anm̧ōn eo ilo aō bōk juon kūr n̄an katakin doulul eo an tikōn ro. Iaar en̄jake iakwe eo an tikōn ro n̄an Rilo̧mo̧o̧r im An iakwe n̄an er.
Em̧ōj aō lo an waļo̧k ilo mour eo an kar juon stake im mijen būreejtōn ilo kūr eo An n̄an āinwōt juon rikakpilōklōk n̄an doulul eo an rūkaki ro. Ijeļā bar juon eo ekar bisop innām ekar juon Eria Jiljilimjuonn̄oul eo kar kōjerbal e jen Irooj n̄an jipan̄ juon ļaddik ilo doulul eo an rūkaki eo eaar ikinejnej ilo juon akjiten. Kabwilōn̄lōn̄ ko jān jerbal in jipan̄ in eaar im̧we elōn̄ mour ko im kar ļapļo̧k iakwe n̄an Rilo̧mo̧o̧r.
Ilo ad jerbal in jipan̄ n̄an ro jet, jej lukkuun atartar ļo̧k n̄an jem̧jerā eo an Jetōb Kwojarjar. Jerbal n̄an Irooj aolep iien ej kwaļo̧k kabwilōn̄lōn̄ ko ilōn̄ in kajoor ko ad make. Ro jinen im jemen me ajri eo nejier ej jum̧ae rejeļā ke em̧ool, bar āinwōt ilo an rūkaki in loļo̧k m̧oko an kōrā kar ioon juon kōrā me ej pukot aenōm̧m̧an ke ļeo ippān eaar jiron̄ ļo̧k bwe ej jepel. Rikarejeran ro jim̧or raar m̧ōņōņō in jar ilo jibbon̄on eo n̄an Irooj bwe en jilkintok Jetōb Kwojarjar āinwōt juon m̧ōttāer.
Ilo wōt jem̧jerā eo an Jetōb Kwojarjar jemaron̄ kōjatdikdik n̄an jokkun wōt juon ilo pālele ilo juon m̧are eo eaenōmkwoj jān aitewerōk. Em̧ōj aō loe ekōjkan an jem̧jerā in lukkuun aorōk ilo juon m̧are. Kabwilōn̄lōn̄ eo n̄an erom juon wōt eaikuj jipan̄ eo an lan̄, im ebōk iien. Kōttōpar eo ad ej n̄an mour ippān doon n̄an indeeo ilo m̧aan mejen Jemedwō Ilan̄ im ad Rilo̧mo̧o̧r.
Jema im jinō raar lukkuun oktak jen doon. Jinō eaar juon rial im juon ripija. Jema eaar em̧m̧an ippān chemistry. Juon iien ilo iien jiāe kōjan̄jan̄ eo, jinō eaar bwilōn̄ ke jema eaar jutak im jino ilo̧k m̧okta jen an jino jiāe eo. Jinō eaar kajjitōk ippān ej etal n̄an ia. Eaar jab bōd an uwaak: “Ekwe, em̧ōj, ejjab ke?” Kōn wōt im̧we eo an Jetōb Kwojarjar eaar im̧we e n̄an pād ilo jiāe eo ippān, im kar im̧we n̄an im̧we e bwe en etal ippān ļo̧k elōn̄ alen n̄an jiāe eo.
Jinō eaar jokwe ilo New Jersey ium̧win 16 iiō ko bwe jema en maron̄ kabwe an baam̧le eo aikuj n̄an kappukot im katakin kōn chemistry. N̄an e ekar juon idajon̄jon̄ ilo an ettoļo̧k jen jinen eo emej ļep pāleen im sister, eo an rejan̄in m̧are ro raar kea kake ilo baam̧le eo an. Raar jim̧or mej ke m̧am̧a eaar pād ettoļo̧k ilo New Jersey. Eaar tōre eo wōt im iaar lo an jinō jan̄.
Iiō ko tok ālik jema eaar bōk juon jerbal ilo Utah. Eaar kajjitōk ippān jinō, “Mildred, ta eo kwoj ļōmņak e eiakuj kōm̧m̧ane?”
Eaar ba, “Henry, kōm̧m̧an jabdewōt men eo kwoj lo ke em̧m̧antata.”
Eaar kejekdo̧o̧n naan eo. Jibbon̄on eo juon eaar je lo̧k juon leta n̄an e me leta in epād ippa. Ej jino kōn naan in rōjan̄. Kwar kallim̧ur eō iiō ko m̧oktaļo̧k bwe eļan̄n̄e komaron̄, komaron̄ bōk e n̄an baam̧le eo an epaak (ilo Utah). Eaar bwilōn̄ kōn naan ko an. Eaar jab em̧em̧ej kōņaan eo an ilo būruwōn. Eaar m̧ōkaj in jilkinļo̧k juon leta n̄an bōk jerbal eo.
Eara ba, “Mildred, etke kwaar jab jiron̄ eō?”
Jinō eaar ba, kwoj aikuj in kar kememej.”
Aolep iien ej kōnono kōn kālet eo n̄an em̧akūt ļo̧k n̄an Utah āinwōt jikin eo an make, eaar jab kōjekdo̧o̧n jet m̧ōttan ilo jerbal eo an. Raar bōk menin bwilōn̄ eo n̄an erom juon wōt. Eban kar em̧m̧an ļo̧k eļan̄n̄e Jema em̧em̧ej jen Jetōb Kwojarjar kōn kallim̧ur eo eaar kōm̧m̧ane iiō ko m̧oktaļo̧k. Ak eaar kōtļo̧k an Jetōb Kwojarjar kapidodoik būruwōn bwe en kālet oktak in.
Jemedwōj Ilan̄ ej lo kōj, jeļā kajjojo iaad, im jeļā kōn ilju im jeklaj eo ad. E jeļā ta apan̄ ko jenaaj dipļo̧ki. Eaar jilkintok Nejin n̄an en̄taan bwe En maron̄ jeļā ekkar n̄an apan̄ ko ad aolep.
Jejeļā bwe Jemedwōj Ilan̄ ewōr ajri in jetōb ro ilo laļ in ro me jet iien rej kālet jerawiwi im jab m̧ōņōņō eo eļap. En̄in ej unin An kar jilkintok Nejin M̧oktata bwe en ad Rilo̧mo̧o̧r, jerbal eo eļaptata an iakwe ilo aolep kōm̧am̧an. En̄in ej unin ad maron̄ bōk jipan̄ an Anij im enaaj bōk iien n̄an ad em̧m̧anļo̧k, n̄an kepooj kōn n̄an mour indeeo, n̄an mour ippān Jemed.
Mour ilo baam̧le ko naaj idajon̄jon̄ e kōj. Bwe ewōr juon an Anij un n̄an letok n̄an kōj menin letok eo an mour wabanban―n̄an kōkajoorļo̧k kōj n̄an anjo̧ jen idajon̄jon̄ in. Bwe enaaj m̧ool ilo mour in baam̧le ijo jenaaj lo eļap m̧ōņōņō im eļap būrum̧ōj im apan̄ ko me remaron̄ waļo̧k ilōn̄ in kajoor ko ad n̄an nikniki.
Burejteen George Q. Cannon ear kwalok men in kōn wāween an Anij kōpooj kwe im n̄an im ajri ro Būreejtōn George Q. Cannon eaar ba menin kōn wāween an kar Anij kepooj kwe im n̄a im ajri ro nejid n̄an idajon̄jon̄ in jej jeļm̧ae: “Ejjeļo̧k juon iaadwōt me eaar jab bōk iakwe eo an Anij. Ejjeļo̧k juon iaadwōj me Eaar jab kea kake im nana kōm̧m̧an n̄an e. Ejjeļo̧k juon iaadwōj me Eaar jab kōņaan lo̧mo̧o̧ren kōj, im bwe Eaar jab karōk juon iaļ n̄an lo̧mo̧o̧ren. Eaar leļo̧k eddo ko n̄an enjeļ ro An kōn kōj kajjojo. Jemaron̄ in ļōmņak kōn kōj make jejjab aorōk ke im erreeo kōn kōjdāt, im armej ro jet remaron̄ ļōmņak ejja men in wōt, ak ejjamin m̧ool. Jej ajri ro nejin Anij, im bwe E eaar lukkuun letok enjeļ ro An―im enjeļ ro rekajoor―ro rej eddo in kōj, im rej lale kōj im kōjparok kōj.”2
Ta eo Būreejtōn Cannon ej katakin kōj m̧ool. Kwonaj aikuji kallim̧ur in, āinwōt aō kar aikuji im pedped wōt ioon.
Em̧ōj aō jar ilo tōmak bwe en wōr juon eo ij iakwe me ej pukot im en̄jake kajoor eo an Pinmuur. Em̧ōj aō jar kōn tōmak bwe enjeļ renaaj itok, im raar itok.
Anij eaar karōk juon iaļ n̄an lo̧mo̧o̧ren kajjojo ajri ro Nejin. Bwe elōn̄, ro rebōk jikier ippān juon būratōr ak juon sister ak juon bubu eo eiakwe er, jekdo̧o̧n ta eo rej kōm̧m̧ane.
Iiō ko lo̧k juon m̧ōtta eaar kōnono kōn jibūn. Eaar aitok an mour, iien otemjej ej tōmak ilo Irooj im Kabun̄ in An. Ak juon iian ļaddik ro jibun raar kālet n̄an mour in uror. Āliktata eaar pād ilo kalbuuj. Eo m̧ōtta eaar kememej bwe jibū, ke ej loļo̧k n̄an loļo̧k ļaddik eo jibū, eaar dānin ko̧m̧jaļaļ ilo mej ko mejen ke eaar jar kōn jipan̄, Iaar kajieon̄ kōm̧m̧an em̧m̧an ilo mour.
Uwaak eo eaar itok ilo ļōmņak eo an ilo naan kein: “Iaar leļo̧k n̄an eok kōnke Ijeļā komaron̄ im kwoj iakwe e jekdo̧o̧n ta eaar kōm̧m̧ane.”
Ewōr juon katak em̧m̧an n̄an kōj aolep. Wāween eo n̄an iakwe ro jined im jemed im ro jibūd im jim̧aad im aolep ro ri karejeran Anij eban pidodo ilo juon laļ. Jejjab maron̄ kipel ajri ro nejij Anij n̄an kālet iaļ eo n̄an m̧ōņōņō. Anij eban kōm̧m̧ane kōnke anemkwoj Eaar letok n̄an kōj.
Jemedwoj Ilan̄ im Nejin Ejitenbōro rej iakwe aolep ajiri ro nejin Anij jekdo̧o̧n ta rej kālet e n̄an kōm̧m̧an ak erom. Rilo̧mo̧o̧r eaar kōļļāik wōņāān aolep jerawiwi ko, jekdo̧o̧n ewi ļap in. Men̄e ewōr kien, bwe tiriam̧o ejjamin kar jejjet kitien n̄e jab naaj rurube jerbal an jim̧we.
Alma eaar kwaļo̧k kōjatdikdik in n̄an ļeo nejin Koriantōn: “Kōn menin, ekkar n̄an jim̧we, karōk in lo̧mo̧r maron̄ kar jab kūrm̧ool, ak ioon wōt men ko an ukweļo̧k in armej ilo iien melijon̄ in, aaet, iien melijon̄ in; bwe eļan̄n̄e ear jab men kein, tiriam̧o ejjamin kar jejjet kitien n̄e jab naaj rurube jerbal an jim̧we. Kiō jerbal in jim̧we ejjamin rub; eļan̄n̄e āindein, Anij en kar jab Anij.”3
Ennaan eo aō kiiō n̄an ajri ro jibū, im n̄an aoleped wōj ro rej kajieon̄ in kariab baam̧le ko indeeo, bwe ewōr lan̄lōn̄ n̄an ro rej tōmak. Jān laļ eo m̧okta, juon Jemed ilo Lan̄ eo eiakwe im Nejin Make Jitōnbōro im kar jerbal ippān ro Rejeļā rej tōmak. Anij enaaj iakwe er n̄an indeeo.
Ewōr ippāmi jeram̧m̧an eo n̄an jeļā bwe raar ekkatak kōn karōk in lo̧mo̧o̧r eo jān katak ko kwar būki ilo laļ eo an jetōb. Er im kom̧ kar ro retiljek n̄an kōtļo̧k n̄an itok n̄an laļ in bwe elōn̄ ro jet raar jab.
Kōn jipan̄ eo an Jetōb Kwojarjar, aolep m̧ool ko naaj būk tok n̄an em̧em̧ļo̧kjeņ eo ad. Jejjab maron̄ kariab ko jet, ak jemaron̄ kōm̧m̧an bwe ren waļo̧k ilo mour ko ad. Jemaron̄ aolep iien bōk peran jān jipan̄ eo me jemaron̄ aolep en̄jake kōn lan̄lōn̄ eo an ippān doon āinwōt juon membōr in baam̧le eo eiakwe an Jemedwōj Ilan̄. Kōn jipan̄ an Anij jemaron̄ aolep en̄jake kōjatdikdik im lan̄lōn̄ bar juon alen. Ij jar bwe jen kōm̧m̧an āindein ilo etan Jisōs Kraist, amen.