Jirok Likatōttōt Wōt

Jen Elder Kevin S. Hamilton

Jen Jiljilimjuonn̄oul eo

Kōm̧m̧an bwe jen jirok likatōttōt wōt n̄an aen in debdeb eo ej tōl ļo̧k n̄an im̧aan mejān Jemedwōj Ilan̄.

Jema emaron̄ keememej raan eo, barāinwōt awa eo, baam̧le eo an—jemān, jinen, im emān nejin ajri—kar etal jen Kabun̄ in, elōn̄ iiō ko im jāmin bar rool tok ilo mour in. Eaar 13 iiō dettan, juon tikōn, im ilo raan ko baam̧le ko rej pād ilo Jabōt Jikuuļ ilo jibbon̄ im kweilo̧k in kwojkwoj eo ilo ālkin rālep. Ilo juon raan in jibūriin aiboojoj, ālkin rooltok jān kweilo̧k in jar ko Jabōt eo im kar m̧ōn̄ā ilo baam̧le ippān doon, jinen eaar oktakļo̧k n̄an ļeo pāleen im kajjitōk, “Ekwe, jera, kwoj ļōmņak jej aikuj ke etal n̄an kweilo̧k in kwojkwoj eo ālkin rālepen in ak jej aikuj ke bōk baam̧le in n̄an jambo ilo āne eo?”

Ļōmņak eo bwe eaar juon kālet n̄an kweilo̧k in kwojkwoj eo kar jab waļo̧k n̄an jema, ak e im ajri ro jilu nejin raar jutak im lukkuun ron̄jake. Jambo ālkin rālepen Jabōt eo ilo āne eo eaar juon m̧akūtkūt elemōņōņō n̄an baam̧le eo, ak kālet jidikdik eo eaar erom juon iaļ kāāl eo eaar lukkuun tōl baam̧le eo ettoļo̧k jān Kabun̄ eo ilo lo̧mo̧o̧r, kōjparok, im kōjeram̧m̧an ko im n̄an juon iaļ eoktak.

Juon katak n̄an raan ko aō eo emaron̄ erom mālijjon̄ n̄an kālet juon iaļ eoktak, rikanaan an Bok in Mormon Liai eaar kwaļo̧k juon visōn ippān baam̧le eo an ijo eaar “lo kitōltōl in jarlepju ko in armej ro ejjeļo̧k jem̧ļo̧kier, ro im raar iuun doon m̧aanļo̧k, bwe ren maron̄ bōk iaļ eo ej tōļļo̧k n̄an wōjke eo [eaar] jutak ie.

“Im … raar wōnm̧aanļo̧k, im jino etal ilo iaļ eo ej tōlļo̧k n̄an wōjke eo.

“Im … eaar waļo̧ktok juon tab in marok; … aaet, juon tab in marok eo eļap, eo eaar kōm̧m̧an bwe ro raar jino pād ioon iaļ eo ren jab pād ie, bwe raar jebwābweļo̧k jān ijo im jako.”¹

Liai eaar lo juon kurub eo eaar “iuun m̧aanļo̧k doon, im raar wōnman tak im raar jirok ilo jem̧ļo̧kin aen in debdeb eo; im raar iuun m̧aanļo̧k doon ibuļōn tab in marok eo, kabōjrak wōt ilo aen in debdeb eo m̧ae iien raar wōnm̧aantak im m̧ōn̄ā jān leen wōjke eo.” Ilo m̧ool, kar jook” kōnke ro ilo “juon em̧ ekilep” ro “raar pād ilo paotok in kajjirere im jitōn̄ļo̧k ro jet kōn peiir im raar itok … im pād im m̧ōn̄ā leen eo.”Armej rein raar “wōtlo̧k ilo iaļ ko remo im raar jebwābwe.”² Raar jab maron̄, ak bōlen jab m̧ōņōņō, n̄an niknik n̄an jem̧ļo̧kin.

Eaar wōr, kōn menin, juon kurub kein kajilu raar jab tōprak wōt ilo tōparļo̧k wōjke in mour eo; ālkin wōt jab wōtlo̧k. Jen rein, eoon ko rej ba bwe raar “iuun m̧aanļo̧k doon, jirok likatōttōt wōt ilo aen in debdeb eo, m̧ae iien raar tōprak im raar wōtlo̧k im m̧ōn̄ā leen wōjke eo.”³Aen in debdeb in ej bōk jikin kurub in armej in raar lo̧mo̧o̧r wōt im kōjparok raar maron̄ loe, im raar jirok likatōttōt wōt; raar m̧akoko in kōtļo̧k, aaet jidik āinwōt juon ālkin rālepen Jabōt jambo ilo āne eo.

Kōn kurub in armej rein, Elder David A. Bednar eaar katakin: “Naan eo eaorōk ilo eoon in ej ‘jirok likatōttōt wōt’ n̄an aen in debdeb eo. … Bōlen kurub in armej ro kein kajilurej aolep iien riit im katak im lin̄ūr naan ko an Kraist. … Kurub in kwe im n̄a aikuj in kajjieon̄ in koba ippāer.”⁴

Kōj ro rej membor in Kabun̄ eo an Anij rainin emōj ad kōm̧m̧an ad bujen n̄an loor Jisōs Kraist im n̄an pokake kien ko an Anij. Ilo ad kar peptaij jaar jutak āinwōt juon rikam̧ool an Rilo̧mo̧o̧r eo,⁵ n̄an jipan̄ ro remōjņo̧ im riakuj,⁶ āinwōt an kar rijilok Paul katakin, “Otemjej rar jerawiwi, im [wotlok] likjab jen aibojooj an Anij.”⁷

Kajjojo wiik ewōr ad iien em̧m̧an n̄an pād ilo juon kweilo̧k in kwojkwoj, ijo jemaron̄ kōkāāl bujen kein jen bōk m̧ōttan bilawe im dān an kain̄i in kwojkwoj eo. Jerbal in eļam waan ej kōtļo̧k ad bar juon alen kalim̧m̧ur n̄an ļoor Jisōs Kraist im n̄an ukweļo̧k n̄e jej kōm̧m̧an likjab. Anij ej kalim̧m̧uri kōj ilo ukōt bōkā n̄an kōj Jetōb eo An āinwōt juon ritōl im rikōjparok.

Jān Preach My Gospel, mijenede ro ad rej katakin bwe revelesōn im naan in kam̧ool rej itok n̄e jej pād ilo Kweilo̧k ko an Kabun̄ ko ad ilo Jabōt: “Ilo ad pād ilo kweilo̧k ko an Kabun̄ im kabun̄jar ippān doon, jej kōkajoorļo̧k doon. Jej kōkāāl iiaio eo ad ippān ro jerad im baam̧le. Tōmak eo ad ej kōkajoorļo̧k ilo ad katak jeje ko rekwojarjar im ekkatak eļapļo̧k kōn ko̧jpeļ eo emōj an jepļaaktok.”⁸

Juon emaron̄ kajjitōk, etke jilu kweilo̧k ko rejenolo̧k ilo Jabōt im etke emenin aikuj n̄an kajjojo ? Jen jidik lale kweilo̧k kein:

Kweilo̧k in kwojkwoj eo ej bōktok iien em̧m̧an n̄an bōk koņaam̧ ilo kain̄i eo an kwojkwoj eo. Jej kōkāāl bujen ko ad, bōk juon eddōkļo̧k in Jetōb, im bōk bar kōjeram̧m̧an eo jen kōm̧eļeļe im kalōk doon jen Jetōb Kwojarjar.
Jabōt Jikuuļ ej kōtļo̧k ad katakin doon katak ko an aelōn̄ in kiin̄ eo⁹ bwe aolep ren maron̄ kalōk doon im m̧ōņōņō ippān doon. ¹⁰ Kajoor eo eļap im aenōm̧m̧an an juon make ej itok n̄e jej meļeļe katak ko an ko̧jpeļ eo emōj an jepļaaktok.
Kweilo̧k ko an priesthood rej iien ko n̄an em̧m̧aan im likao ro n̄an bōk kōmeļeļe im wāppenļo̧k ¹¹ im n̄an katak eddo ko aer, ¹² im kweilo̧k ko an Doulul eo an Kōrā ej bōktok iien em̧m̧an n̄an kōrā ro an Kabun̄ in “kōļapļo̧k aer tōmak …, kōkajoorļo̧k baam̧le ko [aer] im im̧ōko, im jipan̄ ro rej pād ilo aikuj.”¹³

Āinļo̧k wōt, jiron̄ ro nejid im ajri ro ewōr aer make kweilo̧k im kūlaaj ko ijo rej katak ko̧jpeļ eo ilo aer kōppopo n̄an eddo ko raorōk renaaj itok n̄an er. Ilo kajjojo men kein rejenolo̧k bōtaab rej kweilo̧k ko rej ekkejel, jej katak katak ko, en̄jake Jetōb eo, im jerbal n̄an doon. Ilo iien in bōlen emaron̄ oktak jen jon̄e ettoļo̧k eo, onāān ito itak, ak ājmour, jej aikuj kajjieon̄ n̄an pād ilo aolep kweilo̧k in Jabōt ko ad. Ij kalim̧m̧ur bwe kōjeram̧m̧an ko kōn lan̄lōn̄ eļap im aenōm̧m̧an eo enaaj itok jān kabun̄ ilo awa ko jilu in jikejuuiļ in kweilo̧k eo ilo Jabōt.

Baam̧le eo am eaar kalim̧m̧ur n̄an aolep iien pād ilo aolep kweilo̧k in Jabōt ko am. Kōm̧ ar loe menin ej kōkajoorļo̧k tōmak eo am im kadbakbadļo̧k am̧ meļeļe kōn ko̧jpeļ eo. Kōm̧ ar katak bwe jej en̄jake em̧m̧an kōn kālet eo ad n̄an pād ilo kweilo̧k in Jabōt ko ad, eļaptata n̄e jej ro̧o̧l n̄an m̧weo im wōnm̧aanļo̧k n̄an kōjparok raan in Jabōt. Jej barāinwōt pād ilo aolep kweilo̧k in Jabōt ko ad n̄e jej pād ilo kakkije ak ito itak. Juon iaan leddik ro nejim̧ eaar jejetok im ba bwe eaar pād ilo mōnjar eo ilo juon jikin eaar ito itak im eaar ba, “Aaet, baba, iaar pād ilo aolep jilu kweilo̧k ko an Jabōt.” Kōm̧ jeļā bwe eaar jeram̧m̧an kōn kālet in ejim̧we.

Kōj kajjojo ebo̧o̧ļ ad kālet ko n̄an kōm̧m̧an āinwōt n̄an wāween ad kōjparok raan in Jabōt. Enaaj aolep iien wōr m̧akūtkūt eo “em̧m̧an” eo maron̄ im aikuj kaarmejete kōn kālet eo em̧m̧an n̄an pād ilo kweilo̧k an Kabun̄. En̄in ilo m̧ool ej juon iaan wāween ko me rikapo eo “enaaj moņe jetōb ko aer, im tōlļo̧k er ilo tiljek.”¹⁴ kōjerbal m̧akūtkūt ko “rem̧m̧an” āinwōt n̄an “em̧m̧anļo̧k” ak aaet m̧akūtkūt ko “rem̧m̧antata.”¹⁵

Jirok likatōttōt wōt n̄an aen in debdeb eo meļeļein bwe jej pād ilo aolep kweilo̧k ko an Jabōt ko ad: kweilo̧k in kwojkwoj eo, Jabōt Jikuuļ, im priesthood ak kweilo̧k ko an Doulul eo an Kōrā. Ajri ro nejid im jodikdik ro rej pād ilo kweilo̧k ko aer ilo Būraimere, Doulul eo an Likao ro, im Doulul eo an Jiron̄ ro. Jej jamin bōk ak kālet ewi kweilo̧k eo jej pād ie. Jen baj jirok likatōttōt n̄an naan ko an Anij jen kabun̄jar im pād ilo aolep kweilo̧k ilo Jabōt ko litoki.

Jirok likatōttōt wōt n̄an aen in debdeb eo ej meļeļein jej kajjieon̄ kōjparok aolep kien ko an Anij, n̄an kōm̧m̧an jar ko ad make im an baam̧le, im n̄an katak jeje ko rekwojarjar aolep iien.

Jirok likatōttōk wōt ej m̧ōttan katak ko an Kraist āinwōt katakin ilo Bok in Mormon eo. Jej kōjerbal tōmak ilo Jisōs Kraist, ukweļo̧k jen jerawiwi ko ad, im ukōt būruwōd, innām ļoor E laļļo̧k ilo dān in peptaij im bōk kapen eo an menin letok eo an Jetōb Kwojarjar, eo ej jerbal āinwōt ritōl im rikaenōm̧m̧an. Innām, āinwōt an Nipai katakin, jej “bun̄ m̧aanļo̧k, kwojkwoj ioon naan an Kraist” m̧ae jem̧ļo̧kin mour ko ad. ¹⁶

Ro jeiū im jatū, jej juon armej in bujen. Jej m̧ōņōņō in kōm̧m̧an im kōjparok bujen ko, im kōjeram̧man eo kalim̧m̧ur kake ej bwe jenaaj bōk aolep men ko an Jemed.¹⁷ Ilo ad jirok likatōttōt wōt n̄an aen in debdeb eo jen kōjparok bujen ko ad, jenaaj bōk kōkajoorļo̧k n̄an jum̧ae kapo ko im kauwōtata jen laļ in. Jenaaj maron̄ kōjbwebweik mour in kōn aolep apan̄ ko an m̧ae jej lukkuun tōpar wōjke eo ippān leen ko “elukkun aorōk im kaijoļoļtata jān aolep leen otemjej.”¹⁸

Jema eaar bōk n̄an m̧areik juon kōrā em̧m̧an eo eaar rōjan̄ e n̄an rooltok n̄an kabun̄ in tōre eo ej jodikdik im bar jino n̄an eddōkļo̧k ilo iaļ in ļo̧k. Tiljek in mour ko aer raar kōjeram̧m̧an aolep ajri ro nejier, epepen eo juon an ro jibuer, im kiiō ro jibuer jibuer.

Baj āinwōt kālet eo eļam waan n̄an pād ak jab pād ilo juon iaan kweilo̧k in kabun̄jar ko aer ilo Jabōt eaar kōm̧m̧ane juon oktak eļap ilo mour ko an jibun im jim̧aan baam̧le eo aō, kālet ko ad aolep raan renaaj jelet mour ko ad ilo wāween ko reļļap. Juon kālet edik āinwōt men̄e ak jab pād ilo juon kweilo̧k in kwojkwoj maron̄ lukkuun aorōk, aaet indeeo, bōd ko.

Jen kālet n̄an tiljek im bōk kōjeram̧m̧an ko reļļāp im kōjparok men eo ej itok jān kuk ippān im kōjparok bujen ko. Jen maron jirok likatōttōt wōt n̄an aen in debdeb eo ej tōļļo̧k n̄an im̧aan mejān Jemedwōj Ilan̄ ej aō jar ilo etan ekwojarjar Jisōs Kraist, amen.