ពោលពាក្យសរសើរដល់អ្នកទាំងឡាយដែលការពារ
ដោយ ប្រធាន ឌៀថើរ អេស្វ អុជដូហ្វ
ទីប្រឹក្សាទីពីរក្នុងគណៈប្រធានទីមួយ
នៅពេលយើងព្យាយាមចង់បានក្ដីស្រឡាញ់របស់ព្រះសង្គ្រោះ នោះទ្រង់ប្រាកដជានឹងប្រទានពរ ហើយចម្រើនដល់កិច្ចខិតខំដ៏សុចរិតរបស់យើងក្នុងការពារអាពាហ៍ពិពាហ៍ ព្រមទាំងពង្រឹងគ្រួសាររបស់យើង ។
ច្រើនឆ្នាំកន្លងទៅ ខ្ញុំបាននៅក្នុងព្រះវិហារបរិសុទ្ធ ហ្វ្រែងហ្វើត អាល្លឺម៉ង់ ជាពេល ដែលខ្ញុំបានឃើញស្វាមីភរិយាចំណាស់មួយគូកាន់ដៃគា្ន ។ ភាពទន់ភ្លន់ និង ក្ដីស្រឡាញ់នៃការមើលថែដែលពួកគាត់បង្ហាញដល់គ្នាទៅវិញទៅមក ធ្វើឲ្យខ្ញុំរំជួលចិត្ត ។
ខ្ញុំមិនប្រាកដទេថាហេតុអ្វីបានជារូបភាពមានឥទ្ធិពលយ៉ាងជ្រាលជ្រៅចំពោះខ្ញុំយ៉ាងនេះ ។ ប្រហែលជាភាពផ្អែមល្ហែមនៃក្ដីស្រឡាញ់ដែលបុគ្គលពីររូបនេះមានចំពោះគ្នា—គឺជានិមិត្តរូបដ៏មានអានុភាពនៃការតស៊ូ និង ការតាំងចិត្ត ។ ច្បាស់ណាស់ថា គូស្វាមីភរិយានេះបានរស់នៅជាមួយគ្នាយូរមកហើយ រីឯក្ដីស្រឡាញ់របស់ពួកគាត់ចំពោះគ្នានៅតែមានភាពរស់រវើក ហើយរឹងមាំ ។
សង្គមនៃការប្រើហើយបោះចោល
ខ្ញុំគិតថាមូលហេតុមួយទៀតដែលរូបភាពដ៏ទន់ភ្លន់នេះដក់ជាប់ក្នុងចិត្តខ្ញុំនោះ គឺជាភាពផ្ទុយគ្នាដែលបង្ហាញដល់ផ្នត់គំនិតមួយចំនួននាបច្ចុប្បន្ននេះ ។ ក្នុងសង្គមភាគច្រើនជុំវិញពិភពលោក អ្វីគ្រប់យ៉ាងហាក់ដូចជាប្រើហើយបោះចោល ។ ពេលអ្វីមួយចាប់ផ្ដើមខូច ឬ មិនអាចប្រើការបាន—ឬយើងធុញទ្រាន់នឹងប្រើវា—នោះយើងបោះវាចោល ហើយប្រើរបស់ថ្មីជំនួសវិញជារបស់ថ្មីជាង ឬ ចែងចាំងជាង ។
យើងធ្វើដូចនេះជាមួយនឹងទូរសព្ទដៃ សម្លៀកបំពាក់ រថយន្ត—សូម្បីតែជាមួយនឹងទំនាក់ទំនង ។
ខណៈដែលអាចនឹងមានតម្លៃដែលទាញជីវិតយើងចេញពីសម្ភារនានាដែលយើងមិនត្រូវការ កាលវាក្លាយជារឿងនៃសារៈសំខាន់ដ៏អស់កល្ប—ដែលជាអាពាហ៍ពិពាហ៍ ក្រុមគ្រួសារ និង តម្លៃរបស់យើង—នោះផ្នត់គំនិតនៃការដាក់របស់ទំនើបជំនួសឲ្យរបស់ចាស់ អាចនាំឲ្យមានវិប្បដិសារីដ៏ធ្ងន់ធ្ងរ ។
ខ្ញុំមានអំណរគុណព្រោះខ្ញុំជាសមាជិកក្នុងសាសនាចក្រ ដែលឲ្យតម្លៃលើអាពាហ៍ពិពាហ៍ និង ក្រុមគ្រួសារ ។ សមាជិកក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ត្រូវគេស្គាល់ទូទាំងពិភពលោកថាជាអ្នកមានអាពាហ៍ពិពាហ៍ និង ក្រុមគ្រួសារដ៏សុខដុម ។ ខ្ញុំជឿថាការណ៍នេះត្រឹមត្រូវជាផ្នែកនៃសេចក្ដីពិតដ៏អស្ចារ្យ ដែលបានស្ដារឡើងវិញតាមរយៈព្យាការី យ៉ូសែប ស៊្មីធ ថាអាពាហ៍ពិពាហ៍ និងក្រុមគ្រួសារត្រូវតែនៅអស់កល្បជានិច្ច ។ ក្រុមគ្រួសារមិនគ្រាន់តែជាមធ្យោបាយដើម្បីធ្វើឲ្យអ្វីៗដំណើការទៅដោយរលូនលើផែនដីនេះ និងមិនត្រូវបានបណ្ដេញចេញពីស្ថានសួគ៌ប៉ុណ្ណោះទេ ។ ផ្ទុយទៅវិញ វាគឺជា របៀប នៃស្ថានសួគ៌ ។ វាគឺជានិមិត្តរូបមួយនៃលំនាំសេឡេស្ទាល ឲ្យបានដូចគ្រួសារអស់កល្បជានិច្ចរបស់ព្រះ ។
ប៉ុន្តែទំនាក់ទំនងដ៏រឹងមាំនៃអាពាហ៍ពិពាហ៍ និង ក្រុមគ្រួសារ ពុំកើតឡើងដោយព្រោះយើងជាសមាជិកនៃសាសនាចក្រនោះទេ ។ ទំនាក់ទំនងនេះតម្រូវឲ្យមានកិច្ចខិតខំឥតឈប់ឈរ និង មានឆន្ទៈ ។ គោលលទ្ធិនៃក្រុមគ្រួសារដ៏អស់កល្បជានិច្ច ត្រូវតែបំផុសយើងឲ្យខិតខំការពារ ហើយចម្រើនដល់ចំណងអាពាហ៍ពិពាហ៍ និងក្រុមគ្រួសាររបស់យើង ។ ខ្ញុំសូមសរសើរ ហើយអបអរដល់អ្នកដែលបានការពារ ហើយចិញ្ចឹមបីបាច់ទំនាក់ទំនងដ៏ចាំបាច់ និងអស់កល្បជានិច្ចទាំងនេះ ។
ថ្ងៃនេះ ខ្ញុំសូមពោលពាក្យសរសើរដល់អ្នកទាំងឡាយដែលការពារ ។
ការការពារចំណងអាពាហ៍ពិពាហ៍របស់យើង
អស់ពេលជាច្រើនឆ្នាំ ខ្ញុំបានធ្វើពិធីបរិសុទ្ធផ្សារភ្ជាប់សម្រាប់ស្វាមីភរិយាជាច្រើនគូដែលពេញដោយក្ដីសង្ឃឹម និងក្ដីស្រឡាញ់ ។ ខ្ញុំមិនដែលជួបគូស្វាមីភរិយាដែលគិតថា ពួកគេនឹងត្រូវបែកគ្នា ឬមានដួងចិត្តខ្ទេចខ្ទាំ នៅពេលពួកគេសម្លឹងមើលមុខគ្នានៅឯអាសនាឡើយ ។
ជាអកុសល មានដៃគូខ្លះបានបែកគ្នា ។
កាលវេលាកន្លងផុតទៅ ទំនាក់ទំនងដ៏ផ្អែមផ្លែមធ្លាប់មានបានផ្លាស់ប្តូរ មានគូស្វាមីភរិយាមួយចំនួនឈប់គិតអំពីសុភមង្គលរបស់គ្នា ហើយចាប់ផ្ដើមរកចាប់កំហុសរឿងតូចតាច ។ ក្នុងស្ថានភាពបែបនេះ មនុស្សមួយចំនួនត្រូវបានល្បួងឲ្យគិតថាស្វាមី ឬភរិយារបស់ខ្លួនមិនឆ្លាតមិនគួរឲ្យស្រឡាញ់ ឬ មិននៅក្មេង ។ ហើយចំណុចនេះ ធ្វើឲ្យពួកគេចាប់ផ្ដើមមានគំនិតរកមើលទំនាក់ទំនងថ្មីមួយទៀត ។
បងប្អូនប្រុសអើយ បើការពិពណ៌នានេះមានក្នុងខ្លួនបងប្អូន ខ្ញុំសូមព្រមានថា បងប្អូនកំពុងដើរលើផ្លូវដែលនាំទៅរកអាពាហ៍ពិពាហ៍ គេហដ្ឋាន និងដួងចិត្តដែលខ្ទេចខ្ទាំហើយ ។ ខ្ញុំសូមអង្វចិត្តបងប្អូនឲ្យឈប់ឥឡូវនេះ ងាកក្រោយ ហើយត្រឡប់ទៅរកមាគ៌ានៃសេចក្ដីថ្លៃថ្នូរ និង សេចក្ដីសញ្ញាដ៏ស្មោះត្រង់វិញ ។ ប្រាកដណាស់ គោលការណ៍ដូចគ្នានេះក៏អនុវត្តចំពោះបងប្អូនស្រីជាទីស្រឡាញ់របស់យើងដែរ ។
ឥឡូវនេះខ្ញុំសូមថ្លែងទៅកាន់បងប្អូននៅលីវដែលធ្វើតាមការបំភាន់ដែលប្រាប់ថា ជាដំបូងពួកគេត្រូវស្វែងរក « នារីគ្រប់លក្ខណ៍ » ពីមុនពួកគេរៀបការ ។
បងប្អូនប្រុសជាទីស្រឡាញ់ ខ្ញុំសូមរំឭកបងប្អូនថា បើមាននារីគ្រប់លក្ខណ៍មែននោះ តើបងប្អូនគិតថា នាងនឹងចាប់អារម្មណ៍លើបងប្អូនដែរទេ ?
ក្នុងផែនការសុភមង្គលរបស់ព្រះ យើងមិនតម្រូវឲ្យស្វែងរកនរណាម្នាក់ដែលគ្រប់លក្ខណ៍ដើម្បីយើងអាចខិតខំរួមគ្នាពេញមួយជីវិតក្នុងការបង្កើតទំនាក់ទំនងស្នេហា ដ៏យូរអង្វែង និងឥតខ្ចោះនោះទេ ។ នោះគឺជាគោលដៅ ។
បងប្អូនប្រុសអស់អ្នកដែលការពារចំណងអាពាហ៍ពិពាហ៍របស់ខ្លួនយល់ថា ការបន្តខ្ជាប់ខ្ជួននេះចំណាយពេលវេលា ការអត់ធ្មត់ មិនតែប៉ុណ្ណោះគឺពរជ័យនៃដង្វាយធួននៃព្រះយេស៊ូវគ្រីស្ទ ។ វាតម្រូវឲ្យបងប្អូនអត់ធ្មត់ ចិត្តល្អ មិនរហ័សខឹង មិនរកប្រយោជន៍ផ្ទាល់ខ្លួន ងាយចុះចូល មិនគិតដល់ការអាក្រក់ អរសប្បាយក្នុងសេចក្ដីពិត ។ និយាយម្យ៉ាងទៀត វាតម្រូវឲ្យមានសេចក្ដីសប្បុរស ដែលជាក្ដីស្រឡាញ់ដ៏សុទ្ធសាធរបស់ព្រះគ្រីស្ទ ។១
រឿងទាំងអស់នឹងមិនកើតឡើងភ្លាមៗនោះទេ ។ អាពាហ៍ពិពាហ៍រុងរឿងកើតឡើងបន្តិចម្ដងៗ ពីមួយថ្ងៃទៅមួយថ្ងៃពេញមួយជីវិត ។
ហើយនោះគឺជាដំណឹងដ៏ល្អ ។
ទោះជាទំនាក់ទំនងរបស់អ្នកគួរឲ្យធុញទ្រាន់ពេលឥឡូវនេះយ៉ាងណាក្ដី បើអ្នកបន្ថែមសន្តានចិត្តល្អ ការអាណិតអាសូរ ការស្ដាប់ ការលះបង់ ការយោគយល់ និង ការមិនគិតពីខ្លួន នៅទីបំផុតភាពចុះសម្រុងគ្នានឹងចាប់ផ្ដើមធំធាត់ឡើង ។
បើមានអារម្មណ៍ថាវាយូរពេក ចូរចងចាំថា អាពាហ៍ពិពាហ៍ដ៏មានសុភមង្គគឺជាមធ្យោបាយដឹកនាំទៅរកសុភមង្គលជា និរន្តរ៍ ! ដូច្នេះ « ចូរកុំណាយចិត្តនឹងធ្វើការល្អឡើយ ដ្បិតអ្នករាល់គ្នាកំពុងតែដាក់គ្រឹះនៃ [ អាពាហ៍ពិពាហ៍ ] ដ៏រុងរឿង ។ ហើយចេញពីការណ៍ដ៏តូចតាច នោះបណ្ដាលឲ្យមានការណ៍ដ៏ធំធេងឡើង » ។២
វាអាចជាកិច្ចការរីកចម្រើនយ៉ាងយឺត ប៉ុន្តែវាមិនចាំបាច់ត្រូវជាកិច្ចការគួរធុញទ្រាន់នោះទេ ។ តាមពិត ក្នុងភាពប្រថុយប្រថាននៃការថ្លែងជាក់លាក់ តើការលែងលះគ្នាងាយនឹងកើតឡើងដែរទេ នៅពេលស្វាមី និង ភរិយារីករាយជាមួយគ្នានោះ ។
ដូច្នេះ ចូររីករាយឡើង !
ហើយបងប្អូនប្រុស ចូរធ្វើឲ្យភរិយាបងប្អូនភ្ញាក់ផ្អើលដោយធ្វើអ្វីមួយឲ្យនាងសប្បាយចិត្ត ។
អ្នកទាំងឡាយដែលការពារចំណងអាពាហ៍ពិពាហ៍ជ្រើសរើសយកសុភមង្គល ។ ទោះវាជាការពិតដែលថាភាពតានតឹងរ៉ាំរ៉ៃត្រូវការការព្យាបាលដ៏ជំនាញយ៉ាងណាក៏ដោយ ក៏ខ្ញុំចូលចិត្តគំនិតវាងវៃមួយដោយ អ័ប្រាហាំ លីនខុនថា ៖ « មនុស្សភាគច្រើនរីករាយនៅពេលពួកគេធ្វើឲ្យខ្លួនពួកគេរីករាយ » ។ វាត្រូវគ្នាយ៉ាងខ្លាំងជាមួយនឹងបទគម្ពីរថា ៖ « ចូររក នោះតែងនឹងឃើញ » ។៣
បើយើងរកមើលភាពខ្វះចន្លោះរបស់ស្វាមីភរិយា ឬ ភាពមួហ្មងក្នុងចំណងអាពាហ៍ពិពាហ៍របស់យើងនោះយើងប្រាកដជានឹងរកវាឃើញ ព្រោះមនុស្សគ្រប់រូបមានវាមួយចំនួន ។ ផ្ទុយទៅវិញ បើយើងរកមើលភាពល្អ នោះយើងនឹងរកឃើញវា ព្រោះមនុស្សគ្រប់រូបក៏មានគុណសម្បត្តិល្អជាច្រើនដែរ ។
អ្នកទាំងឡាយដែលការពារចំណងអាពាហ៍ពិពាហ៍ ប្រឈមមុខនឹងគុណវិបត្តិ ហើយស្វែងរកភាពល្អក្នុងស្វាមីភរិយាខ្លួន ។ ពួកគេអបអរដោយទង្វើនៃអណរគុណចំពោះការស្រឡាញ់ដ៏បំផុសនៃសេចក្ដីសប្បុរស ។ អ្នកទាំងឡាយដែលការពារចំណងអាពាហ៍ពិពាហ៍ ក៏ការពារជំនាន់អនាគត ។
បងប្អូនប្រុសចូរចងចាំអំពីមូលហេតុដែលបងប្អូនបានធ្លាក់ក្នុងអន្លង់ស្នេហ៍ ។
ចូរខិតខំរាល់ថ្ងៃដើម្បីធ្វើឲ្យចំណងអាពាហ៍ពិពាហ៍របស់អ្នកកាន់តែរឹងមាំ ហើយមានសុភមង្គល ។
មិត្តជាទីស្រឡាញ់របស់ខ្ញុំអើយ ចូរយើងធ្វើឲ្យអស់ពីសមត្ថភាពដើម្បីបានរាប់បញ្ចូលក្នុងចំណោមព្រលឹងទាំងឡាយដ៏បរិសុទ្ធ និងរីករាយដែលជាអ្នកការពារចំណងអាពាហ៍ពិពាហ៍របស់ខ្លួន ។
ការកាពារក្រុមគ្រួសាររបស់យើង
នៅថ្ងៃនេះ ខ្ញុំក៏សូមសរសើរដល់បងប្អូនទាំងឡាយ ដែលការពារទំនាក់ទំនងក្នុងគ្រួសាររបស់ខ្លួនដែរ ។ គ្រប់គ្រួសារត្រូវការការការពារ ។
ជារឿងអស្ចារ្យដែលសាសនាចក្រត្រូវគេស្គាល់ថារឹងមាំខាងក្រុមគ្រួសារ យើងអាចមានអារម្មណ៍ថាការណ៍នេះត្រូវអនុវត្តចំពោះគ្រប់ក្រុមគ្រួសារពួកបរិសុទ្ធថ្ងៃចុងក្រោយ ។ ប៉ុន្តែភាពពិតគឺគ្មានក្រុមគ្រួសារណាល្អឥតខ្ចោះនោះទេ ។
គ្រប់ក្រុមគ្រួសារតែងមានគ្រាមិនសប្បាយចិត្ត ។
ឧទាហរណ៍នៅពេលឪពុកម្ដាយអ្នកសុំឲ្យអ្នកថតរូប « selfie » ពួកគេ ឬ ពេលម្ដាយមីងដ៏ចចេសរបស់អ្នកទទូចថាអ្នកនៅលីវដោយសារអ្នករើសពេក ឬពេលបងថ្លៃដ៏រឹងរូសរបស់អ្នកគិតថាទស្សននយោបាយរបស់គាត់គឺជាទស្សនត្រឹមត្រូវ ឬពេលឪពុកអ្នករៀបចំរូបគំនូរគ្រួសារដោយឲ្យមនុស្សគ្រប់គ្នាតែងខ្លួនដូចតួអង្គក្នុងភាពយន្តដែលគាត់ចូលចិត្ត ។
ហើយអ្នកត្រូវបង្ខំឲ្យតែងខ្លួនដូច ឈូបាកា ( តួអង្គរោមច្រើនក្នុងរឿង ស្តារវ៉ ) ។
ក្រុមគ្រួសារគឺដូចនោះឯង ។
យើងអាចមាន ឌី.អិន.អេ ដូចគ្នា ប៉ុន្តែយើងមិនមែនជាមនុស្សដូចគ្នាឡើយ ។ យើងមានវិញ្ញាណមួយផ្សេងពីគ្នា ។ យើងទទួលឥទ្ធិពលតាមរបៀបខុសៗគ្នាដោយបទពិសោធន៍របស់យើង ។ យើងម្នាក់ៗទទួលលទ្ធផលចុងក្រោយខុសៗគ្នា ។
ប្រសើរជាងការប៉ុនប៉ងបង្ខំនរណាម្នាក់ឲ្យធ្វើជាមនុស្សដែលយើងចង់បាន យើងអាចជ្រើសរើសត្រេកអរនឹងភាពខុសប្លែកទាំងនេះ ហើយអរគុណពួកគេដែលបន្ថែមភាពបរិបូរ និង ការភ្ញាក់ផ្អើលឥតឈប់ឈរទៅក្នុងជីវិតរបស់ពួកយើង ។
ប៉ុន្តែពេលខ្លះសមាជិកក្នុងគ្រួសារយើងធ្វើការជ្រើសរើស ឬធ្វើរឿងដែលមិនបានគិតនាំឲ្យមានការឈឺចាប់ ឬរឿងអសីលធម៌ ។ តើយើងគួរធ្វើអ្វីខ្លះក្នុងករណីនេះ ?
មិនមែនមានតែដំណោះស្រាយមួយប៉ុណ្ណោះក្នុងគ្រប់ស្ថានភាពនោះទេ ។ អ្នកទាំងឡាយដែលការពារក្រុមគ្រួសាររបស់ខ្លួនមានភាពជោគជ័យ ព្រោះពួកគេប្រឹក្សាជាមួយស្វាមីភរិយា និងគ្រួសារខ្លួន ព្យាយាមស្គាល់ព្រះបំណងរបស់ព្រះអម្ចាស់ ហើយស្ដាប់តាមការបំផុសគំនិតពីព្រះវិញ្ញាណបរិសុទ្ធ ។ ពួកគេដឹងថាអ្វីដែលត្រូវសម្រាប់គ្រួសារមួយ អាចនឹងមិនត្រឹមត្រូវសម្រាប់គ្រួសារមួយទៀត ។
យ៉ាងណាក៏ដោយ មានអ្វីមួយដែលត្រឹមត្រូវក្នុងគ្រប់ករណីទាំងអស់ ។
នៅក្នុងព្រះគម្ពីរមរមនយើងរៀនអំពីមនុស្ស ដែលបានរកឃើញគន្លឹះនាំទៅរកសុភមង្គល ។ អស់ពេលជាច្រើនជំនាន់ « គ្មានការទាស់ទែងគ្នា. … ពិតជាគ្មានប្រជាជនណា ដែលរីករាយសប្បាយជាងប្រជាជនដែលបានត្រូវបង្កើតដោយព្រះហស្តនៃព្រះឡើយ » ។ តើពួកគេធ្វើបានតាមរបៀបណា ? « ដោយព្រោះមកពីសេចក្ដីស្រឡាញ់នៃព្រះ ដែលបានស្ថិតនៅក្នុងចិត្តរបស់មនុស្ស » ។៤
ទោះជាបញ្ហណាក៏ដោយដែលគ្រួសារអ្នកជួបប្រទះ ទោះជាអ្វីក៏ដោយដែលអ្នកត្រូវធ្វើដើម្បីដោះស្រាយ នោះការចាប់ផ្ដើម និងទីបញ្ចប់នៃដំណោះស្រាយនេះគឺសេចក្ដីសប្បុរស ដែលជាសេចក្ដីស្រឡាញ់ដ៏សុទ្ធសាធរបស់ព្រះគ្រីស្ទ ។ បើគ្មានក្ដីស្រឡាញ់នេះទេ ទោះជាគ្រួសារល្អឥតខ្ចោះក៏ដោយក៏នៅតែមានបញ្ហា ។ តែបើមានក្ដីស្រឡាញ់នេះវិញ ទោះជាគ្រួសារជួបឧបសគ្គធំយ៉ាងណាក៏ដោយក៏នឹងទទួលជោគជ័យដែរ ។
« សេចក្ដីសប្បុរសពុំបាត់បង់ទៅឡើយ » ។៥
វាជាការពិតចំពោះការការពារចំណងអាពាហ៍ពិពាហ៍ ! វាជាការពិតចំពោះការការពារក្រុមគ្រួសារ !
ទុកភាពឆ្មើងឆ្មៃចោល
សត្រូវស្លាប់រស់នៃសេចក្ដីសប្បុរសគឺភាពឆ្មើងឆ្មៃ ។ ភាពឆ្មើងឆ្មៃគឺជាមូលហេតុចម្បងដែលធ្វើឲ្យចំណងអាពាហ៍ពិពាហ៍ និងក្រុមគ្រួសារមានបញ្ហា ។ ភាពឆ្មើងឆ្មៃគឺការរហ័សខឹង ចិត្តអាក្រក់ និង ការច្រណែន ។ ភាពឆ្មើងឆ្មៃលើកបំប៉ោងខ្លួនឯង ហើយច្រានចោលគុណធម៌ពីមនុស្សដទៃ ។ ភាពឆ្មើងឆ្មៃគឺអាត្មានិយម ហើយងាយបង្កហេតុ ។ ភាពឆ្មើងឆ្មៃបង្កើតឲ្យមានចេតនាអាក្រក់នៅកន្លែងដែលគ្មានចេតនាអាក្រក់ ហើយលាក់ភាពទន់ខ្សោយខ្លួនក្នុងការដោះសារដ៏ឆ្លាតវៃ ។ ភាពឆ្មើងឆ្មៃមើលឃើញតែរឿងអាក្រក់ ទុទិដ្ឋិនិយម ហើយគ្មានការអត់ធ្មត់ ។ ប្រាកដណាស់ បើគ្មានសេចក្ដីសប្បុរសដែលជាសេចក្ដីស្រឡាញ់ដ៏សុទ្ធសាធរបស់ព្រះគ្រីស្ទទេ នោះភាពឆ្មើងឆ្មៃជាលក្ខណៈសម្បត្តិរបស់សាតាំង ។
ភាពឆ្មើងឆ្មៃអាចជាបរាជ័យទូទៅរបស់មនុស្ស ។ ប៉ុន្តែវាមិនមែនជាផ្នែកនៃមរដកខាងវិញ្ញាណយើងឡើយ ហើយក៏គ្មានកន្លែងនៅក្នុងចំណោមអ្នកកាន់បព្វជិតភាពនៃព្រះដែរ ។
បងប្អូនប្រុសអើយ ជីវិតគឺខ្លីណាស់ ។ វិប្បដិសារៈអាចគង់វង្សយូរអង្វែង—ដែលលទ្ធផលរបស់វាខ្លះអាចប៉ះពាល់យើងពេញមួយភាពអស់កល្ប ។
របៀបដែលបងប្អូនប្រព្រឹត្តចំពោះភរិយា ឬកូនៗ ឬឪពុកម្ដាយ ឬសាច់ញាតិអាចជះឥទ្ធិពលដល់ជំនាន់ជាច្រើន ។ តើអ្នកចង់បន្សល់ទុកកេរដំណែលអ្វីខ្លះដល់ពូជពង្សរបស់អ្នក ? ជាភាពគ្រោតគ្រាត ការសងសឹក កំហឹង ភាពភ័យខ្លាច ឬភាពឯកោ ? ឬជាក្ដីស្រឡាញ់ ភាពរាបសា ការអត់ទោស ការអាណិតអាសូរ និង ភាពរីកចម្រើនខាងវិញ្ញាណ និងសាមគ្គីភាព ?
យើងទាំងអស់គ្នាត្រូវចងចាំថា « ការប្រព្រឹត្តដោយឥតមេត្តា នោះនឹងត្រូវទោសឥតមេត្តាដែរ » ។៦
ចូរមានក្ដីមេត្តាករុណាសម្រាប់ទំនាក់ទំនងអ្នក សម្រាប់ព្រលឹងអ្នក ដើម្បី « សេចក្តីមេត្តា នោះរមែងឈ្នះសេចក្តីជំនុំជំរះវិញ » ។៧
ទុកភាពឆ្មើងឆ្មៃចោល
ការនិយាយសុំទោសដ៏ស្មោះទៅកាន់កូនៗ ភរិយា ក្រុមគ្រួសារ ឬ មិត្តភក្ដិរបស់អ្នក ពុំមែនជាទីសម្គាល់នៃភាពទន់ខ្សោយទេ តែជាភាពខ្លាំងវិញ ។ តើការឈ្នះចាញ់សំខាន់ជាងការបង្កើតបរិយាកាសនៃការចិញ្ចឹមបីបាច់ ការព្យាបាល និងក្ដីស្រឡាញ់ឬ ?
ចូរបង្កើតទំនាក់ទំនង ហើយកុំធ្វើឲ្យវាទន់ខ្សោយឡើយ ។
ទោះជាអ្នកត្រូវក៏ដោយ—អាចជាពិសេសនៅពេលអ្នកគ្មានកំហុសនេះឯង—ចូរឲ្យក្ដីស្រឡាញ់យកឈ្នះលើភាពឆ្មើងឆ្មៃ ។
បើអ្នកធ្វើដូចនេះ ទោះជាមានភាពលំបាកយ៉ាងណាដែលអ្នកប្រឈមមុខក្ដីក៏នឹងរលាយបាត់ទៅដែរ ហើយដោយសារក្ដីស្រឡាញ់នៃព្រះមានក្នុងចិត្តអ្នក នោះវិវាទនឹងបញ្ចប់ទៅ ។ គោលការណ៍នៃការការពារទំនាក់ទំនងនេះអនុវត្តចំពោះយើងទាំងអស់គ្នា ទោះជាយើងបានរៀបការ បានលែងលះ ជាស្ត្រីមេម៉ាយ ឬ នៅលីវក្ដី ។ យើងទាំងអស់គ្នាអាចធ្វើជាអ្នកការពារក្រុមគ្រួសារដ៏រឹងមាំ ។
សេចក្ដីស្រឡាញ់ដ៏ធំធេងបំផុត
បងប្អូនប្រុស ចូរយើងធ្វើតាមគំរូនៃទ្រង់ដែលការពារយើង ដោយខិតខំការពារដល់អាពាហ៍ពិពាហ៍ និងគ្រួសារយើង ដូចរឿងគ្រប់យ៉ាងដែរ ។ ព្រះអង្គសង្គ្រោះបានលោះ « ព្រលឹងយើងដោយស្នេហ៍ » ។៨ ព្រះយេស៊ូវគ្រីស្ទគឺជាចៅហ្វាយរបស់យើង ។ ការងារទ្រង់គឺជាការងារយើង ។ វាជាការងារនៃការសង្គ្រោះ ហើយវាចាប់ផ្ដើមក្នុងគេហដ្ឋានរបស់យើង ។
សេចក្ដីស្រឡាញ់ក្នុងផែនការនៃសេចក្ដីសង្គ្រោះ គឺការមិនគិតពីខ្លួន ហើយស្វែងរកសុខុមាលភាពសម្រាប់មនុស្សដទៃ ។ នោះគឺជាក្ដីស្រឡាញ់ដែលព្រះវរបិតាសួគ៌មានសម្រាប់យើង ។
នៅពេលយើងព្យាយាមចង់បានក្ដីស្រឡាញ់របស់ព្រះសង្គ្រោះ នោះទ្រង់ប្រាកដជានឹងប្រទានពរ ហើយចម្រើនដល់កិច្ចខិតខំដ៏សុចរិតរបស់យើងក្នុងការពារអាពាហ៍ពិពាហ៍ ព្រមទាំងពង្រឹងគ្រួសាររបស់យើង ។
សូមឲ្យព្រះអម្ចាស់ប្រទានពរដល់អ្នកក្នុងកិច្ចខិតខំមិនចេះនឿយហត់ និងសុចរិតរបស់អ្នកដើម្បីបានរាប់ចូលក្នុងចំណោមអ្នកទាំងឡាយដែលការពារ ។ នេះជាការអធិស្ឋានរបស់ខ្ញុំ ក្នុងព្រះនាមព្រះយេស៊ូវគ្រីស្ទ អាម៉ែន ។