Ukweļo̧k: Juon Kālōt eo Ekamōņōņō
Ukweļo̧k ejjab pidodo wōt ak ekam̧ōņōņō barāinwōt kōn ad Rilo̧mo̧o̧r.
Ro jeiū im jatū, ke iaar 12 iiō retta, baam̧le eo aō eaar jokwe ilo Göteborg, juon jikin turilikin Sweden. Ilo kilaan kautiej, ej lāmoreņ eo an eo ejitenbōro Elder Per G. Malm,1 eo eaar mej ilo jōm̧ar eo kiiō. Jej o̧o̧n̄ kake. Jej m̧ōņōņō kōn em̧m̧an ko an im jerbal eo an em̧m̧an im waanjon̄ok eo an baam̧le eo an aibo̧o̧jo̧j. Im jej lukkuun jar bwe kōjeram̧m̧an ko an Anij en aer.
Lemen̄oul iiō remo̧o̧tļok, kōm̧ eaar jar ilo juon em̧ ekilep ej kab m̧ōj kōkāāle. Juon Jabōt, eo m̧ōtta Steffan,2 tikōn eo ej make wōt ilo branch eo, eaar karuwaineneik eō ilo m̧ōnjar eo ilo an m̧ōņōņō. Komro eaar etal n̄an ruum eo juon ilo m̧ōnjar eo, im eaar letok juon kein kabbokbok im jet mājet. Ilo juon limotak in jodikdik, Iaar bōk kein kabbokbok eo im tile. Iaar kajjieon̄ in kune m̧okta jen an bokkoļo̧k. Ak ke ij kajjieon̄ in kune eaar bwil peiū, im iaar joļo̧k kein kabbokbok eo. Kom̧ro Steffan eaar lale an kein kabbokbok eo bwil ilo amro mijak.
Kein kabbokbok eo eaar bokkoļo̧k, im baat eo eaar jebooļe aolepān m̧ōnjar eo. Komro eaar m̧ōkaj im aeni aolepān tipdikdikin kein kabbokbok eo im kōpeļļo̧k wūntō ko bwe en diwōj bwiin baat eo, im kar kōtmene bwe ejjeļo̧k en eaar jeļā kake. Jeraam̧m̧an eo, ejjeļo̧k en eaar jorrāān im ejjeļo̧k men en eaar jorrāān.
Ke membōr ro rej itok n̄an kweilo̧k eo, raar eet bwiin baat. Ekar pen aer jab jeļā ta eo. Bwiin baat eo eaar kakkure iien jar eo aorok. Kōnke eaar wōr wōt jejjo̧ tikōn im ta wōt eo imaron̄ in ba ilo ļōmņak kake, Iaar leto-letak kwojkwoj eo, im aaet iaar jab en̄jaake aō erreeo n̄an bōk m̧ōttan. Ke tōōre in kwojkwoj eo ej itok bwe in bōke, iaar m̧akoko in bōk dān eo ak pilawe eo. Eaar nana aō mour. Iaar jook, im iaar jeļā bwe men eo iaar kōm̧m̧ane eaar jab kam̧ōņōņōik Anij.
Ālkin jar eo, branch būreejtōn eo, Frank Lindberg, juon ļōļļap eo eowan bōran, eaar ba bwe in etal n̄an opiij eo an. Ālikin aō jijōt, eaar kalimjōk meja kōn jouj im eaar ba bwe eaar lo aō jab bōk m̧ōttan kwojkwoj eo. Eaar kajjitōk etke. Iaar ļōmņak eaar jeļā etke. Iaar jeļā ke aolep raar jeļā ta eo iaar kōm̧m̧ane. Ālkin aō ba n̄an e, eaar kajjitōk ta en̄jake eo aō. Kōn dānin kōmjaļaaļ, eaar pen aō ba ke iaar bōd im iaar jeļā bwe iaar jab kam̧ōņōņō Anij.
Būreejtōn Lindbergh eaar kōpeļo̧k tok bok in Katak im Bujen eo an em̧ōr im eaar ba bwe in riiti eoon ko em̧ōj kōkkaļļeki. Iaar kōļaaj aō riiti:
“Lo, e eo em̧ōj an ukeļo̧k jen jero̧wiwi ko an, ejja in wōt ej bōk jeo̧rļo̧k bōd, im N̄a, Irooj, ij jab bar keememej.
“Jān men in kom̧ maron̄ jeļā eļan̄n̄e juon armej ej ukeļo̧k jān jero̧wiwi ko an–lo, enaaj kwaļo̧k im eļļo̧k jāni.”3
Ijamin meļo̧kļo̧k ettōn̄dikdik eo an Būreejtōn Lindbergh eobrak kōn iakwe ke ej m̧ōj aō riiti eoon eo. Kōn jet en̄jake, eaar jiron̄ eō ke eaar en̄jake ke enaaj em̧m̧an n̄e ibar bōk m̧ōttan kwojkwoj eo. Ke ij etal jen opiij eo an, iaar en̄jake juon m̧ōņōņō epen kōmeļeļeiki.
Kain m̧ōņōņō rot in ej itok jen tōprak in ukweļo̧k. Naan in ukweļo̧k ej meļeļein “juon kile tokālik” in “oktak”4 Ilo kajin Swedish, naan in omvänd, ej meļeļein “oktak.”5 Rijeje eo C. S. Lewis eo ej juon Rikūrjin, eaar je aikuj eo im jekjek eo n̄an oktak. Eaar ba bwe ukweļo̧k ekitbuuj “ro̧o̧l n̄an iaļ eo ejim̧we. Bōd in bōnbōn emaron̄ in bar jim̧we,” eaar ba, “ak eaikuj in bar ro̧o̧l likļo̧k n̄an lo bōd eo im bar jerbale jān jinoin, eban pidodo.”6 Ukōt m̧wiliid im oktak n̄an “iaļ eo ejim̧we” rej m̧ōttan wōt ukweļo̧k, ak jidikin wōt. Mool in ukweļo̧k ej barāinwōt ukōt būruwōd n̄an akilaan Anij im dike jerawiwi.7 Āinwōt kar kōmeļeļeki ilo Ezekiel, bwe ukweļo̧k ej “oktak jān … jero̧wiwi, … im kōm̧m̧an jim̧we im wānōk; … kajepļaak m̧ool eo, … [im] etetal ilo naan in jiron̄ ko rej kemour, im ejjab kōm̧m̧an nana.”8
Aaet men̄e meļeļein ejjab bwe. Ejjab lukkuun kalikar kajoor eo me ej kōm̧m̧an bwe ukweļo̧k en pidodo, kōn en̄taan in pinmuur eo an ad Rilo̧mo̧o̧r. Mool in ukweļo̧k ej aikuj kitbuuj tōmak ilo Irooj Jisōs Kraist, tōmak bwe Emaron̄ ukōt kōj, tōmak bwe Emaron̄ jero̧ļo̧k ad bōd, im tōmak bwe Emaron̄ jipan̄ kōj bōbraik elōn̄ likjab ko. Kain tōmak rot in ekōm̧m̧an bwe Pinmuur eo An en jerbal ilo mour ko ad. Ilo ad “kile tokālik” im “oktak” kōn jipan̄ eo an Rilo̧mo̧o̧r, jej maron̄ en̄jake kōjatdikdik ilo kallim̧ur ko An im m̧ōņōņō eo an jeo̧rļo̧k bōd. N̄e ejjeļo̧k Ripinmuur, ājinkōj in kōjatdikdik im m̧ōņōņō an ukweļo̧k ejej tokjen. Ak n̄an kōjerbal tōmak ilo E, jemaron̄ lukkun oktak ilo maron̄ eo An im kōnaan n̄an jeirļo̧k jerawiwi.
Būreejtōn Boyd K. Packer eaar kōmlet kallim̧ur ko an kōn kōjatdikdik eo an ukweļo̧k ilo Eprōļ 2015 ilo kweilo̧k eo eļap an āliktata. Eaar kwaļo̧k kajoor in Pinmuur eo an Rilo̧mo̧o̧r n̄an kemouri ta eo ij ļōmņake n̄an kōmaat ļo̧k jeļāļo̧kjeņ eo n̄an bōke ilo jerbal in rijilōk. Būreejtōn Packer ekar ba: “Pinmuur eo eaar jab likūt lakabokbok ko, im jenok ko. Ta eo ej waļo̧k eaar waļo̧k. … Eaar kemouri, im ta eo eaar kemouri ej mour wōt.”9
Ekar wōnm̧aanļo̧k wōt:
“Pinmuur eo, eo emaron̄ wiaik kōj kajjojo, jen ejjeļo̧k kinej. Meļeļe in jekdo̧o̧n ta jaar kōm̧m̧ane ak ia eo jaar pād ie ak ekōjkan an juon men waļo̧k, eļan̄n̄e jej m̧ool in ukweļo̧k, [Rilo̧mo̧o̧r eo] eaar kallim̧ur bwe E enaaj pinmur. Im ke eaar en̄taan, eaar kadedeļo̧k. …
“… Pinmuur eo … emaron̄ karreeoik aolep māār otemjeļo̧k jekdo̧o̧n ewi penin ak ewi aetokan ak jete alen kar āliji.”10
Jibadbad in Pinmuur eo ekwojarjar an Rilo̧mo̧o̧r ejjeļok jem̧ļo̧kin ilo depakpak in im m̧ūlaļin, n̄an kwe im n̄an n̄a. Ak ejamin jelet kōj. Āinwōt an rikanaan Liai kar ba, ālkin ad “meļeļe ekkar” n̄an “jeļā em̧m̧an jen nana,” 11 jej “anemkwōj ekkar n̄an kāālet anemkwōj im mour indeeo, kōn Rijojomar eo an armej otemjeļo̧k, ak n̄an kāālet kōm̧akoko im mej.”12 Ilo bar jet wāween, ukweļo̧k ej juon kālet.
Jet iien—jemaron̄—kōm̧m̧ani kālet ko roktak. Kain kālet kein remaron̄ jab bōd, ak rekōm̧m̧an bwe jen jab lukkuun kile im kepooj kōj make n̄an m̧ool in ukweļo̧k. N̄an waanjon̄ok, jemaron̄ in kālet n̄an ņa ruwōn ro jet. Āinwōt kar juon eo 12-iiō-drettan ilo Göteborg, Imaron̄ kar ņa ruwōn Steffan. E eo eaar bōktok kein kabbokļo̧k eo im jet mejet n̄an m̧ōnjar eo. N̄an ņa ruwōn ro jet, men̄e emaron̄ m̧ool, ekkōm̧m̧an bwe jen jekpen ņae kōm̧m̧an ko ad. N̄an kōm̧m̧an āindein, jej ukōt eddo eo ad ņae ro jet. N̄e eddo eo ej oktak, jej kapdik maron̄ im aikuj eo ad jim̧or n̄an jerbal. Jej oktak n̄an jorrāān, ijeļo̧kin rijipan̄ ro rewājabdik n̄an jerbal.13
Bar juon kālet me ebōbraik ad ukweļo̧k ej kaiet ļo̧k bōd ko ad. Kōn kabbokļo̧k eo eaar waļo̧k ilo Göteborg, ejjeļo̧k en eaar jorrāān, ejjeļo̧k jorrāān eaar waļo̧k, im kweilo̧k eo eaar wōnm̧aanļo̧k wōt. Emaron̄ kar pidodo ba ejjeļo̧k unin ukweļo̧k. Ak, ilo ad kaietļok bōd ko ad, men̄e ejjeļo̧k kaje ko rej waļo̧k ilo iien en wōt, ekakkure eļmakot eo am n̄an oktak. Ļōmņak in ekōm̧m̧an bwe jen jab lo bōd ko ad im jerawiwi ko me rej bōktok kaje ko n̄an indeeo.
Aaet bar juon wāween ej lōmņak bwe jerawiwi ko ad ejej tokjier kōnke Anij ej iakwe kōj jekdo̧o̧n ta ko jej kōm̧m̧ani. Ej kōm̧m̧an bwe jen tōmak ta m̧o̧ņ eo an Nehor eaar katakin armej ro ilo Zarahemla: “Bwe aolep armej renaaj bōk lo̧mo̧o̧r ilo raan eo āliktata, im bwe rejjab aikuj mijak ak wūdiddid, … im, ilo jem̧ļo̧kin, aolep armej renaaj bōk mour indeeo.”14 Ak ļōmņak in ebōd. Anij ej iakwe kōj. Ijoke, ta ko jej kōm̧m̧ani elap to̧kjeir n̄an e im kōj.. Eaar letok n̄an kōj jekjek ko ralikar kōn wāweein ad m̧akūtkūt. Jej ņa etaer kien ko. Jibadbad eo An im mour indeeo eo ad ej pedped ioon m̧wiliid, ekoba ad kōnaan ilo ettā n̄an pukot m̧ool in uwekļo̧k.15
Ilo kakkobaba, jejjab tōpar m̧ool in ukweļo̧k n̄e jej kālet n̄an kōjepel Anij jān kien ko An. Ālkin aolep men, eļan̄n̄e kwojkwoj eo en kar jab kwojarjar, en kar ejjeļo̧k tokjen bwiin kabbokļo̧k eo me eaar kakkure kweilo̧k in kwojkwoj eo ilo Göteborg. Jej aikuj lukkuun lale bwe m̧wil nana ko rej kowaan Anij im kien ko An. Mool in ukweļo̧k ej kalikar kile eo ekwojarjar an Rilo̧mo̧o̧r im m̧ool eo kōn jerbal in An āliktata.
Ijeļo̧kin kōm̧m̧ani jekpen ņae ko, jen kālet ukweļo̧k. Kōn ukweļo̧k, jemaron̄ itok kōn kōj make, āinwōt nejin eo ejerwan ilo būrabōļ in, 16 n̄an kalimjōk men ko an indeeo kōn jerbal ko ad. N̄e jemeļeļe elemen an jerawiwi ko ad jelet m̧ōņōņō eo ad indeeo, jeban wōt kile oktak eo ad em̧ool ak jej barāinwōt kajieon̄ in em̧m̧an ļo̧k. N̄e jej jelm̧ae kapo, eaorōkļo̧k bwe jen ba ippād make, ilo naan ko an William Shakespeare:
Ta mejenkajjik eo, eļan̄n̄e ij lo men eo ij pukote?
Ilo ettōņak, ilo kōto, ilo juon m̧ōņōņō in jako ļo̧k.
Wōn enaaj wiakake juon iien ikkure elem̧ōņōņō n̄an juon wiik in metak wōt,
Ak wiakake indeeo eo an n̄an juon kein ikkure?17
Eļan̄n̄e jenaaj jerwaane men eo eaorōk kōn juon men bajjōk, innām jemaron̄ kālet n̄an ukweļo̧k. Kōn Pinmuur eo an Jisōs Kraist, ebar wōr ad iien. Waanjon̄ak, jemaron̄ jeniji men eo ejjeļo̧k tokjeņ im bar bōk juon kōjatdikdik kōn mour indeeo. Ainwōt an Rilo̧mo̧o̧r kar kōm̧eleleiki, “Bwe, lo, Irooj ami Ripinmuur eaar en̄taan kōn mej ilo kannniōk; kōn menin Eaar en̄taan kōn metak an aolep armej, bwe aolep armej ren maron̄ ukeļo̧k im itok n̄an E.”18
Jisōs Kraist emaron̄ jeo̧rļo̧k bōd kōnke Eaar kōļļaik wōnāān jerawiwi ko ad.19
Ad RiPinmuur ej kālet n̄an jeo̧rļo̧k bōd kōnke An tiriam̧o̧ kake im iakwe ebwe.
Ad Rilo̧mo̧o̧r Ej kōnaan jeo̧rļo̧k bōd kōnke en̄in ej juon iaan jerbal eo An ekwojarjar.
Im, āinwōt Rilale sip eo em̧m̧an, Ej m̧ōņōņō n̄e jej kālet n̄an ukweļo̧k.20
Men̄e jej en̄jake būrom̧ōj kōn jerbal ko ad,21 n̄e jej kālet n̄an ukweļo̧k, em̧ōkaj ad kōdeļōn̄ tok Rilo̧mo̧o̧r n̄an mour ko ad. Āinwōt an kar rikanaan Amulek kwaļo̧k, “Wōnmaantak im jab kapene būruōmi ļo̧k wōt; bwe lo, kiiō ej iien eo im raan in lo̧mo̧o̧r eo ami; im kōn menin, eļan̄n̄e kom̧ naaj ukeļo̧k im jab kapene būruōmi, ejidimkij an naaj karōk in lo̧mo̧o̧r eļap itok n̄an kom̧.”22 Jemaron̄ en̄jake būrom̧ōj kōn jerbal ko ad im ilo ejja iien in wōt maron̄ en̄jake m̧ōņōņō eo kōn jipan̄ eo an Rilo̧mo̧o̧r.
Mool eo in bwe jemaron̄ ukweļo̧k en̄in ej naan eo em̧m̧an an gospel in!23 Bōd emaron̄ “in jako.”24 Jemaron̄ in bar obrak kōn m̧ōņōņō, bōk jeo̧rļo̧kin jerawiwi ko ad, im “bōk aenōm̧m̧an.”25 Jemaron̄ in eļļā jen en̄jake ko an būrom̧ōj im kōm̧akoko an jerawiwi. Jemaron̄ in obrak kōn meram eo ekabwilōn̄lōn̄ an Anij im “jamin bar metak.”26 Ukweļo̧k ejjab pidodo wōt ak ebarāinwōt kōn m̧ōņōņō eo ippān ad Rilo̧mo̧o̧r. Ij keememej wōt en̄jake ko rekar jako jen eō ilo opiij eo an branch būreejtōn eo ālkin an kein kabbokbok eo bokkoļo̧k. Iaar jeļā bwe em̧ōj jeo̧rļo̧k aō bōd. En̄jake in bōd ko aō raar jako, im aō eaar lōn̄jak, im būruwō eaar en̄jake meram.
Ro jeiū im jatū, ilo ad kōjem̧ļo̧k kweilo̧k in, Ij kūr kom̧ n̄an en̄jake eļapļo̧k m̧ōņōņō ilo mour ko ami: m̧ōņōņō ilo jeļāļo̧kjeņ in bwe Pinmuur eo an Jisōs Kraist ej m̧ool; m̧ōņōņō ilo maron̄ eo an Rilo̧mo̧o̧r, kōnaan, im ikideelel n̄an jeo̧rļo̧k bōd; im m̧ōņōņō n̄an kālet ukweļo̧k. Jen ļo̧o̧r katak ko an Rilo̧mo̧o̧r “kōn m̧ōņōņō … itōk dān jān aebōj in lọmọọr.”27 Kōm̧m̧an bwe jen kālet n̄an ukweļo̧k, n̄an jeo̧rļo̧k jerawiwi ko ad, im ukōt būruwōd im ad n̄an ļo̧o̧r ad Rilo̧mo̧o̧r. Ij kam̧ool bwe Ej lukkuun mour. Ij juon rikam̧ool im rikarejeraņ ilo jerbal in An ejej uwaan ilo, tiriam̧o̧ im iakwe. Ij jar bwe kōjeram̧m̧an ko ilo en̄taan in Pinmuur eo An en maron̄ am̧─im bar am im bar am ilo aolepen mour ko an,28 āinwōt ko aō. Ilo etan Jisōs Kraist, amen.