Li misioneerik: xwotzb’al li wan sa’ laa ch’ool
Yalaq ta b’ar wankat sa’ li ruchich’och’, naab’al li b’e wan re naq taawotz li chaab’il esilal re lix evangelio li Jesukristo.
Sa’ li po xnume’, li Kab’laju chi Apostol xe’b’oqe’ xb’aan li qaprofeet, li Awa’b’ej Russell M. Nelson, chirochb’eeninkil sa’ rosob’tesinkil li santil ochoch sa’ Roma, Italia. Aran, xink’oxla li apostol aj Pablo ut eb’ li b’e kixk’am. Sa’ xkutankil a’an, xk’amb’al li b’e sa’ Jerusalen toj sa’ Roma naraj junaq 40 kutan. Anajwan, sa’ jun li so’sol ch’iich’ li jwal nawulak chiwu, ink’a’ naxket oxib’ hoonal.
Eb’ laj tzolonel re li Santil Hu neke’xpaab’ naq laj Pablo kiwan sa’ Roma naq kixtz’iib’a naab’aleb’ lix hu, li nim xwankil sa’ xkawresinkileb’ laj paab’anel najter jo’ ajwi’ anajwan.
Laj Pablo ut jalaneb’ chik li najter komon re li Iglees, eb’ laj Santil Paab’anil sa’ Xtiklajikeb’ li Kutan ke’xnaw chi us li mayejak. Naab’aleb’ ke’rahob’tesiik, toj reetal ajwi’ li kamk.
Chiru wiib’ cient chihab’, eb’ li komon re lix Iglees li Jesukristo li k’ojob’anb’il wi’chik, eb’ laj Santil Paab’anel sa’ Roso’jikeb’ li Kutan xe’xk’ul ajwi’ k’iila paay chi rahob’tesink. A’b’anan li rahob’tesink a’an ink’a’ xooxram (ut wan naq xooxkawresi), ut Lix Iglees li Jesukristo reheb’ laj Santil Paab’anel sa’ Roso’jikeb’ li Kutan ak xniman sa’ chixjunil li ruchich’och’.
Naab’al li k’anjel wan
A’b’anan, naq maji’ taqayiib’ jun li pastel ut too’ok chi ninq’ehik chirix li nimla chaab’ilal a’in, us raj naq taqak’e reetal b’ar tz’aqal wanko.
Wankeb’ junaq 7 billon chi kristiaan sa’ li ruchich’och’, ut wankeb’ 16 millon chi komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan—yal jun ch’ina ch’uut.
Ut wankeb’ li na’ajej sa’ li ruchich’och’ b’ar wi’ eb’ laj paab’anel re li Kristo yookeb’ chi oso’k.
Sa’ lix Iglees ajwi’ li Qaawa’—us ta yookeb’ chi k’ihank li komon—naab’aleb’ wan li ink’a’ neke’xk’ul li osob’tesink re tz’aqonk sa’ li Iglees rajlal.
Sa’ jalan chik aatin, yalaq ta b’ar wankat sa’ li ruchich’och’, naab’al li b’e wan re naq taawotz li chaab’il esilal re lix evangelio li Jesukristo rik’ineb’ li ani nakak’ul sa’ tzoleb’aal, sa’ ochochnal, sa’ trab’aaj, malaj rik’ineb’ laa wamiiw.
Sa’ li chihab’ li xnume’, xinsaho’ naq xintz’aqon chi us sa’ xk’anjeleb’ li misioneer sa’ chixjunil li ruchich’och’. K’iila sut nink’oxla ut nintijok chirix lix nimla taqlahom li Kolonel choq’ reheb’ lix tzolom—laa’o, li ralal xk’ajol—“Ayuqex b’i’, ut tzolomaqeb’ chixjunil li tenamit. Teekub’siheb’ xha’ sa’ xk’ab’a’ li Yuwa’b’ej, li K’ajolb’ej ut li Santil Musiq’ej.”
Chi kaw xintz’il rix li patz’om “Chan ru naq laa’o, jo’ xtzolom li Kristo, taqab’aanu li taqlahom a’an chi us sa’ qayu’am wulaj wulaj?”
Anajwan nekexinb’oq ajwi’ chixtz’ilb’al rix li patz’om a’an.
Li maatan choq’ re li misioneerik
Eb’ li jolominel sa’ li iglees ak yookeb’ chixyeeb’al naq “misioneereb’ chixjunil li komon!” chiru k’iila chihab’.
Eb’ li komon sa’ lix Iglees li Jesukristo—junxil jo’ ajwi’ anajwan—ak neke’xwotz li evangelio chi sa sa’ xch’ooleb’ rik’ineb’ jalan. Lochlookeb’ li raam sa’ xnawom chirix li Jesukristo, ut neke’raj naq jalaneb’ chik te’xyal ru li sahilal li xe’xtaw sa’ lix evangelio li Kolonel.
Wankeb’ li komon li anchal wan xmaatan choq’ re li k’anjel a’in. Sa neke’ril reetalinkil li evangelio. Chi kaw xch’ooleb’ neke’k’anjelak ut neke’k’amok b’e jo’ aj komon misioneer.
A’b’anan, wanko li timilo chixb’aanunkil. Naq noko’aatinak chirix li misioneerik sa’ Iglees, wankeb’ li neke’xulub’ank ut neke’ilok sa’eb’ li loq’laj hu, anchal yookeb’ chi tzolok, re naq ink’a’ te’rileb’ li komon chixsutam.
K’a’ut? Maare ra qach’ool xb’aan naq ink’a’ naqayal qaq’e sa’ xwotzb’al li evangelio. Maare ink’a’ naqanaw chi us chan ru xb’aanunkil. Malaj ut maare nokoxutaanak.
Laa’in nintaw ru a’an.
A’b’an k’e reetal, li Qaawa’ maajo’q’e naxteneb’ naq seeb’ li qana’leb’ sa’ li misioneerik. A’b’anan, “li Qaawaʼ naxpatzʼ li aamej, ut li kʼaʼuxlej li kʼeekʼo xchʼool.”
Wi ak nakatsaho’ sa’ li misioneerik, toj taab’aanu, ut taak’utb’esi choq’ reheb’ jalan. Li Qaawa’ tatrosob’tesi.
A’b’anan, wi ink’a’ yookat chi saho’k sa’ xwotzb’al resilal li evangelio, ma naru tinye aawe oob’ li na’leb’, li ink’a’ tatxjit, li taaruuq tixb’aanu yalaq ani re taatz’aqonq sa’ lix taqlahom li Kolonel re xch’utub’ankil Israel?
Oob’ li na’leb’
Xb’een, tatnach’oq rik’in li Dios. Li xb’een ut xnimal ru chaq’rab’, a’an xraab’al li Dios. A’an jun rajom li qawanjik sa’ li ruchich’och’ a’in. Patz’, “Ma chi yaal ninpaab’ lin Choxahil Yuwa’?”
“Ma ninra ut ma k’ojk’o inch’ool chirix?”
Naq tatnach’oq rik’in laa Choxahil Yuwa’, lix saqen ut lix sahilal taalemtz’unq aawik’in. Wankeb’ li te’xk’e reetal naq wan k’a’ru chaab’il aawik’in. Te’patz’oq chirix a’an.
Xkab’, nujob’resi laa waam rik’in rahok choq’ reheb’ jalan. A’an xkab’il li xnimal ru chaq’rab’. Yal aaq’e chirilb’al chixjunileb’ li kristiaan jo’ jun ralal xk’ajol li Dios. Chatk’anjelaq chiruheb’—us ta moko tz’iib’anb’ileb’ ta xk’ab’a’ jo’ laa wilom sa’ xhuhil li Iglees.
Chatse’eq rik’ineb’. Chatsaho’q rik’ineb’. Chatyaab’aq rik’ineb’. Chawoxlo’iheb’. Chak’irtesiheb’, chawaklesiheb’, ut chakawresiheb’.
Yal aaq’e chi rahok jo’ narahok li Kristo, ut toqob’a ruheb’ jalan—us ta moko chaab’il ta xch’ooleb’ aawik’in, malaj nakate’reetz’u ut neke’raj aarahob’tesinkil. Charaheb’, ut chawileb’ jo’ laa wech alal sa’ xjunkab’al li qaChoxahil Yuwa’.
Rox, yaal aaq’e jo’ tzolom. Naq naniman laa rahom choq’ re li Dios ut li ralal xk’ajol, jwal taawaj wi’chik xtaaqenkil li Jesukristo.
Taatzol lix na’leb’ rik’in xtzekankil xsahil li raatin, ut rik’in ab’ink chiru lix k’utumeb’ li yo’yookil profeet ut apostol. Nakawresiman laa ch’ool choq’ re xk’amb’al lix b’e naq nakat-aatinak rik’in li qaChoxahil Yuwa’ chi teeto ut chi tuulan aach’ool.
Li b’eek jo’ tzolom naraj xtzolb’al—wulaj wulaj, timil timil, “usilal reeqaj li usilal,” “chi junjunqil li raqal.” Wan naq uub’ej b’ayaq, ut q’ajel-ix b’ayaq.
Li aajel ru, a’an naq ink’a’ taakanab’ xyalb’al; toj taayal qaq’e. Timil timil tat-usaaq, tatsaho’q, ut taanimanq aana’leb’. Maak’a’aq li xutaan chi moko li xiw sa’ aatinak chirix laa paab’aal. Relik chi yaal, taawanq li evangelio sa’ laa yu’am toj reetal naq ch’a’aj raj naq ink’a’ taaye resil reheb’ jalan. Maare ink’a’ tatwanq chi jo’kan chi junpaat—naraj xyalb’al aaq’e chiru chixjunil laa yu’am. A’ut toj tatwanq chi jo’kan.
Xkaa, wotz li wan sa’ laa ch’ool. Ink’a’ yookin chixtz’aamankil naq tatxaqliiq chire li b’e ut taayaab’asi sa’ megafono li aatin sa’ lix Hu laj Mormon. Yookin b’an chixtz’aamankil naq junelik taasik’ chan ru taaye resil laa paab’aal sa’ li aatinak li ak nakab’aanu rajlal—sa’ internet ajwi’. Yookin chixtz’aamankil naq tatxaqliiq “jo’ aj yehol nawom” chirix lix wankilal li evangelio sa’ chixjunil hoonal—ut wi na’ajman, naq taawoksi li aatinak.
Rik’in naq li evangelio, a’an “lix wankilal li Dios choq’ re li kolb’a-ib’,” naru kawaq aach’ool sa’ tuulanil naq yookat chixwotzb’al. Maare taak’oxla naq ink’a’ naru xjunajinkil li kawil ch’oolej rik’in li tuulanil, a’b’anan, naru. Neke’xk’am rib’ rik’in li qab’oqb’al xb’aan li Kolonel naq ink’a’ taamuq li evangelio rub’el jun li chakach, ut naq taak’ut b’an xsaqenkil, re naq laa k’anjel tixnima xloq’al laa Choxahil Yuwa’.
K’iila paay wan re xb’aanunkil a’in chi moko jalan ta laa na’leb’. Maare sa’ xtenq’ankil laa was aawiitz’in, ut maare sa’ xyeeb’al aanawom sa’ YouTube, Facebook, Instagram, malaj Twitter, ut maare ajwi’ sa’ li kok’ aatinak li nakab’aanu sa’ b’e. Sa’ li chihab’ a’in, yooko chi tzolok sa’ li Ak’ Chaq’rab’ sa’ qochochnal ut sa’ li Dominkil Tzoleb’aal. Taaruuq raj taab’oqeb’ laa was aawiitz’in sa’ Iglees ut sa’ laa wochochnal chi tzolok chirix li Kolonel aawik’in. Taawotz’ rik’ineb’ li aplicación Biblioteca del Evangelio, b’ar wi’ naru te’xtaw li hu Kim, Taaqehin. Wi nakanaw ru jun li saaj ut lix junkab’al, k’e reheb’ li ch’ina hu Choq’ re Xkawilaleb’ li Saaj, ut taab’oqeb’ chirilb’al chan ru naq eb’ li saaj sa’ qayanq neke’xyal xq’e chixpaab’ankil li na’leb’ chi sa’.
Wi wan ani li napatz’ok k’a’ru xab’aanu sa’ xraqik li xamaan, naru taaye k’a’ru xab’aanu sa’ li iglees. Ye resileb’ li kok’al li xe’xb’icha jun li b’ich chi anchaleb’ xch’ool re xyeeb’al naq te’raj xtaaqenkil li Jesus. Ye resileb’ li saaj li xe’xnumsi xhoonal sa’ rochocheb’ li tiix re xtenq’ankileb’ chixtz’iib’ankil resilal lix yu’am. Ye resil li ak’ xhoonalil li qach’utam ut chan ru naq a’an naxtenq’a laa junkab’al. Malaj ch’olob’ k’a’ut naq naqaye naq a’in lix Iglees li Jesukristo ut naq laa’o laj Santil Paab’anel sa’ Roso’jikeb’ li Kutan, jo’ chanru naq laj Santil Paab’anel kiyeeman ajwi’ reheb’ li komon re li najter Iglees.
Jo’ chanru nakawil naq us, wotz rik’ineb’ jalan k’a’ut naq aajel ru li Jesukristo ut lix Iglees choq’ aawe. K’e xb’oqb’aleb’ naq ”te’chalq ut toxe’ril.” Waklesiheb’ ajwi’ xch’ool chi chalk ut chi tenq’ank. K’iila paay wan re naq taaruuq te’tenq’anq sa’ li qa-Iglees.
Mat-tijok re naq junes li misioneer te’xtaw li ani sik’b’ileb’ ru. Tijon wulaj wulaj chi anchal aach’ool re naq laa’at taataw li ani te’chalq ut te’iloq, li te’chalq ut te’tenq’anq, ut li te’chalq ut te’kanaaq. Ye reheb’ li misioneer k’a’ru yookat chixb’aanunkil. Chanchaneb’ li anjel, li yo’on wankeb’ chi tenq’ank!
Naq nakawotz li chaab’il esil, lix evangelio li Jesukristo, chab’aanu rik’in rahok ut kuyuk. Wi noko’aatinak rik’ineb’ jalan yal re xyo’oninkil naq te’xpatz’ lix saqi t’ikr ut b’ar wan li ha’ re te’kub’eeq xha’, wan xmajelal li yooko chixb’aanunkil.
Wankeb’ li te’chalq chirilb’al li maajo’q’e te’ok jo’ komon; wankeb’ li te’xb’aanu moqon. Yal reheb’ a’an. A’ut a’an ink’a’ naxjal li qarahom choq’ reheb’. Ut ink’a’ naxjal li qak’anjel naq toj taqab’oqeb’ li kristiaan ut li junkab’al chi chalk ut chirilb’al, chi chalk ut chi teq’ank, ut chi chalk ut chi kanaak.
Ro’, paab’ naq li Qaawa’ tixb’aanu li sachb’a-ch’oolejil k’anjel. Chanaw naq moko aak’anjel ta laa’at xjalb’aleb’ xch’ool jalan. A’an xk’anjel li Santil Musiq’ej. Laa k’anjel laa’at, a’an xwotzb’al li wan sa’ laa ch’ool ut xyu’aminkil laa paab’ahom.
Jo’kan naq miraho’k aach’ool wi wan ani li ink’a’ naxpaab’ li evangelio chi junpaat. Ink’a’ xatpalto’.
Wan a’an junes rik’in li Dios ut li kristiaan a’an.
Wan aawe laa’at lix raab’al li Dios ut laa was aawiitz’in, li ralal xk’ajol a’an.
Paab’an ut k’anjelan.
K’am li b’e a’in, ut li Dios tixb’aanu li sachb’a-ch’oolejil k’anjel aawik’in choq’ re rosob’tesinkil li ralal xk’ajol.
Li oob’ chi na’leb’ a’in tate’xtenq’a chixb’aanunkil li ke’xb’aanu laj paab’anel chalen chaq najter. Lix evangelio ut lix Iglees aajel ru sa’ laa yu’am, sa’ laa na’leb’, ut sa’ li nakab’aanu. Jo’kan ut, b’oqeb’ jalan chi chalk ut chirilb’al, ut chi chalk ut chi tenq’ank, toja’ naq li Dios tixb’aanu lix k’anjel a’an, ut te’chalq ut te’kanaaq.
Maare jwal ch’a’aj
Maare “A’b’anan,” chaqat, “maare tinb’aanu a’in ut li kristiaan ra te’xsume? Maare te’xhob’ li Iglees. Maare tine’xk’e jo’ “no amigo.” ”
Yaal, maare taak’ulmanq a’an. Chalen chaq najter, lix tzolom li Jesukristo neke’rahob’tesiik. Li apostol aj Pedro kixye, “Chexsaho’q … naq yookex chi tz’aqonk sa’ lix rahilal li Kristo.” Li najter paab’anel ke’saho’ naq “k’ulub’ejeb’ xnumsinkil li tz’eqtaanaak sa’ xk’ab’a’ li Kristo.”
Ut toj chanaw naq muqmu xna’leb’ nak’anjelak li Qaawa’. Maare wi taasume li tz’eqtaanaak jo’ chanru li Kristo, taaq’unob’resi jun li kawil ch’oolej.
Jo’ jun lix apostol li Qaawa’ Jesukristo, nekexwosob’tesi rik’in li nawok re naq teek’utb’esi lix na’leb’ li evangelio, rik’in kawil ch’oolej re naq taanawe’q eeru jo’ komon sa’ Lix Iglees li Jesukristo reheb’ laj Santil Paab’anel sa’ Roso’jikeb’ li Kutan, ut rik’in tuulanil re naq textenq’anq sa’ lix k’anjel jo’ jun xk’utb’esinkil lee rahom choq’ re li Dios ut li ralal xk’ajol.
Ex was wiitz’in, texsaho’q sa’ xnawb’al naq yookex chi tz’aqonk sa’ xch’utub’ankil Israel li yeeb’il chaq resil chalen chaq najter, re xkawresinkil xk’ulunik li Kristo sa’ “wankilal ut nimla loq’alil; rochb’eenaqeb’ chixjunil li santil anjel.”
Li qaChoxahil Yuwa’ naxnaw eeru. Li Qaawa’ nekexxra. Li Dios texrosob’tesi. K’ojob’anb’il li k’anjel a’in xb’aan a’an. Naru teeb’aanu. Naru naqab’aanu chiqajunil!
Ninch’olob’ xyaalal a’an sa’ xk’ab’a’ li Jesukristo, amen.