Kraes: Laet Ia we I Stap Saen long Tudak
Sapos yu filim se laet blong testemoni blong yu i nomo strong mo tudak i stap kam kavremap yu, gat strong paoa long tingting. Kipim ol promes we yu mekem long God.
Ofis blong mi long Rilif Sosaeti bilding, i gat gudfala lukluk i go long Sol Lek Tempol. Evri naet, folem taem blong klok, ol laet aotsaed long tempol oli on olgetawan taem naet i stap kam. Tempol i wan laet we i no muv, we i putum pis, we i stastap jes aotsaed long windo blong mi.
Wan naet, long las Febwari, ofis blong mi i tudak nomo i stap afta we san i draon. Taem mi lukluk i go aotsaed long windo, tempol i tudak i stap. Ol laet oli no on. Wantaem, mi no fil gud. Mi no save luk ol spia blong tempol we mi bin stap lukluk evri naet blong plante yia.
Blong luk tudak long ples we mi ting blong luk laet, i rimaenem mi se wan long ol stamba nid we yumi gat blong save gro, i blong joen i stap wetem stamba blong laet blong yu—Jisas Kraes. Hem i stamba blong paoa, Hem i Laet mo Laef blong Wol. Sapos yumi no joen long Hem, yumi stat blong ded long saed blong spirit. From yumi save hemia, Setan i traem blong yusum ol fos blong wol we yumi evriwan i stap fesem. Hem i wok blong mekem laet blong yumi i nomo saen gud, i mekem waea i taj, i katemaot paoa, i livim yumi stap yumiwan long tudak. Ol fos ia, oli ol nomol samting insaed long laef ia. Be Setan i wok had blong pulum yumi wan saed, mo i stap talem se yumiwan nomo i stap gotru hemia.
Sam long Yumi, I Paralaes wetem Harem Nogud long Hat.
Taem ol bigfala trabol oli tekova long yumi, taem laef i soa tumas we yumi nomo save pulum win, mo yumi karekil olsem man ia long rod i go long Jeriko mo oli lego yumi stap we man i ting yumi ded, nao Jisas i kam, i putum oel long ol kil blong yumi, sloslo i leftemap yumi, i tekem yumi go long wan hotel, mo i lukaotgud long yumi. Long yumi we i stap harem nogud long hat, Hem i se: “bae mi mekem ol hevi samting long solda … i nomo hevi, mekem se bae yufala i no save filim long bak blong yufala, … blong mekem se yufala i save gud se mi, Lod God, mi visitim ol pipol blong mi long hadtaem blong olgeta” Kraes i hilim ol kil.
Sam long Yumi I Jes Taed Tumas.
Elda Holland i talem: “God i no wantem se yu ron i bitim paoa blong yu. … Be nomata hemia, mi save se plante long yufala i ron, we i ron spid, mo paoa mo saplae blong filing blong yufala, i kam kasem kolosap siro samtaem. Taem ol samting we man i wet se bae yumi mekem i kam tumas, yumi save stop smol, mo askem Papa long Heven wijwan nao blong lego. Pat blong eksperiens blong laef blong yumi, i blong lanem wanem blong no mekem. Be iven long hemia, samtaem laef i hevi tumas. Jisas i talem kwaet toktok ia: “Yufala evriwan we … i stap hadwok tumas, [mo] stap karem ol hevi samting, yufala i kam long mi, nao bambae mi … mekem we yufala i spel gud.”
Kraes i glad blong joenem yumi blong holem yok ia, mo pul wetem yumi blong mekem ol samting oli no hevi. Kraes, Hem i givim spel.
Sam long Yumi I Filim se Yumi No Fit long Nomol Standet.
From sam risen, yumi no fil se yumi naf o man i akseptem yumi. Niu Testeman i soem ol bigfala hadwok we Jisas i mekem blong go long evri kaen pipol: ol man wetem leprosi, ol takis man, ol pikinini, ol Man Galili, ol woman blong rod, ol woman, Ol Farisi, ol man blong sin, Ol Man Sameria, ol wido, Ol Man Rom, ol soldia, ol man blong adaltri, olgeta we oli no stap klin oltaem. Kolosap long evri stori, Hem i go luk wan we oli no stap akseptem hem long sosaeti.
Luk 19 i tokbaot stori blong man blong takis ia long Jeriko we nem blong hem i Sakias. Hem i klaem long wan tri blong save luk Jisas i wokbaot kolosap. Sakias, gavman blong Rom i tekem hem long wok, ol man oli luk hem olsem wan man blong korapsen mo man blong sin. Jisas i luk hem antap long tri, mo i singaotem hem, i talem : “!Sakias! Yu kamdaon kwik, from we tedei bambae mi go stap long haos blong yu.” Mo taem Jisas i luk gud fasin long hat blong Sakias mo ol samting we hem i bin mekem blong ol nara man, Hem i akseptem ofring blong hem, i talem: “Tedei God i sevem ol man blong haos ya, from we man ya tu i wan laen* blong Ebraham, mo hem i gat sem fasin we Ebraham i gat.
Wetem kaen hat, Kraes i talem long Ol Man blong Nifae: “mi bin givim oda se i no gat wan long yufala i mas gowe.” Pita i risivim wan revelesen we i gat paoa, long Ol Wok 10 taem hem i talem: “Be God i soemaot long mi we mi no save luk sam man se oli doti long fes blong hem, no oli rabis.” Hem i wan samting we Ol Kristin disaepol mo ol Lata-dei Sent oli mas gat blong soem tru lav long wanwan long yumi. Jisas i givim semfala kaen invitesen ia long yumi, olsem Hem i bin givim long Sakias: “Yufala i luk. Mi mi stap stanap long doa, mi stap kilkilim doa. Sapos [yu] harem tok blong mi, [yu] openem doa, mi bambae mi kam insaed long haos blong [yu].” Kraes i luk yumi antap long tri blong yumi.
Sam long Yumi, I Fulap long Ol Kwestin.
Sam yia i pas, mi bin filim daon mo no glad long ol kwestin we mi no save faenem ansa blong ol. Eli, long wan Satedei moning, mi gat wan smol drim. Insaed long drim ia, mi save luk wan smol haos long wan garen, mo mi andastanem se mi mas go stanap insaed long hem. Hem i gat faef haf sekol raon long hem, be ol windo, oli mekem wetem ol ston. Mi komplen insaed long drim, mi no wantem go insaed from se i sat tumas. Nao tingting i kam long maen blong mi se brata blong Jared i bin klinim ol ston ia oli kam klia glas. Glas i wan ston we i gotru long wan jenis. Taem we Lod i tajem ol ston blong brata blong Jared, oli bin saen wetem laet insaed long ol sip ia we oli tudak. Kwiktaem mi filim blong go long smol haos ia, bitim blong stap long nara ples. Hem i bin ples ia nao—wan ples ia nomo—blong mi rili save luk. Ol kwestin we oli stap trabolem mi oli stap, be wanem i strong moa long maen blong mi, i kwestin ia afta we mi wekap: “?Hao bae yu gat moa fet, semmak olsem brata blong Jared, blong mekem se ston blong yu oli tanem, oli kam laet?
Bren blong yumi, man, i lukaotem blong andastanem samting mo luk mining long ol smol samting. Mi no save evri risen from wanem vel ova long laef long wol ia, i tik tumas. Hemia i no ples ia, insaed long progres we i no save finis, we bae yumi gat evri ansa. Hemia i ples we, yumi stap developem stret save (o samtaem hop) long ol pruf blong ol samting we yumi no save luk. Stret save, o kwaet long tingting i kam long ol wei we yumi no save andastanem gud, be i gat laet insaed long ol tudak blong yumi. Jisas i talem: “Mi mi laet, mo laef, mo trutok blong wol. Long olgeta we oli stap lukaotem trutok, fastaem, bae yu luk se oli sarem yu insaed long ol windo we oli mekem wetem ston. Be wetem fasin blong wet longtaem mo ol fetful kwestin, Jisas i save jenisim ol windo blong ston oli kam windo blong glas mo laet. Kraes i wan laet blong luk.
Sam long Yumi I Filim se Yumi Neva Gud Inaf.
Red kala blong OlTesteman, i no kala gud nomo, be tu, i wok kwik, i minim se braet kala blong hem i fasgud long wul mo bae kala i no lus i nomata hamas taem yu wasem. Setan i holem toktok ia olsem wan tul blong kilimded man: waet wul we kala i go long hem, i neva save go waet bakegen. Be Jisas i talem: “[ol tingting mo fasin blong mi oli hae, oli antap long hemia blong yufala,” mo merikel blong gladhat blong Hem, i we, taem yumi sakem ol sin blong yumi, red blad blong Hem i mekem yumi kambak klin evriwan. Hemia i no folem samting nomol, be hem i tru.
Foto i kam long iStock.com/iinwibisono
“Nating we ol sin blong yufala i mekem yufala i doti gud, bambae mi mekem we yufala i klin we i klin. Naoia, yufala i doti we i doti, be bambae yufala i kam klin olgeta.” Lod i bin talem klia se: “man we i bin sakem ol sin blong hem, mi fogivim hem, mo mi, Lod, mi nomo tingbaot ol sin ia bakegen.” Blong talem klia: Kam, bae yumi toktok tugeta. Yu bin mekem ol mistek; yumi evriwan i mekem. Kam long mi mo sakem sin blong yu. Bae mi nomo tingbaot sin ia. Yu save kam oraet fulwan bakegen. Mi gat wan wok blong yu mekem. Kraes i wul ia we oli tanem i kam waet.
?Be i gat ol stret step blong wokbaot folem? ?Wanem i ki blong joenembak paoa blong Jisas Kraes taem laet blong yumi i no saen gud? Presiden Russell M. Nelson i talem long simpol wei nomo: “Ki, hem i blong mekem mo kipim ol tabu kavenan. … Hem i no wan rod we i fasfas.” Mekem Kraes i senta blong laef blong yu.
Sapos yu filim se laet blong testemoni blong yu i nomo strong mo tudak i stap kam kavremap yu, gat strong paoa long tingting. Kipim ol promes we yu mekem long God. Askem ol kwestin blong yu. Wetem longfala tingting, meltem ston i kam glas. Tanem yu long Jisas Kraes we i lavem yu yet.
Jisas i talem: “Mi mi laet we i saen long tudak, mo tudak ia i no andastanem hemia.” Hemia i minim se i nomata hamas hamas hem i traem, be tudak i no save kilimded laet ia. Neva. Yu save trastem se laet blong Hem bae i stap ia blong yu.
Yumi, o ol pipol we yumi lavem, bae i save go long tudak blong smol taem. Long kes blong Sol Lek Tempol, bilding maneja, Brata Val White, i kasem wan telefon kol kwiktaem. Ol pipol oli bin luk. ?Wanem i rong wetem ol laet blong tempol? Faswan, ol wokman oli go luk long evri lektrik panel insaed long tempol, mo oli onem bak ol laet. Afta, oli riplesem ol batri long otomatik paoa saplae mo oli testem olgeta blong faenemaot wanem i bin rong.
Hem i had blong onem bak laet long yuwan. Yumi nidim ol fren. Yumi nidim wanwan long yumi. Semmak olsem ol wokman blong tempol, yumi save helhelpem yumi taem yumi go kamaot long haos, yumi jajem bak ol spirit batri blong yumi, yumi fiksim wanem i bin go rong.
Maet laet blong yumi wanwan i olsem wan smol laet antap long wan tri. Be yumi saenem smol laet blong yumi, mo yumi evriwan tugeta, olsem olgeta laet ia long Krismes taem, yumi pulum ol milian pipol i kam long haos blong Lod. Moa gud bitim hemia, olsem we Presiden Nelson i leftemap tingting blong yumi, yumi save tekem laet blong Sevya i kam long yumi mo ol pipol we oli impoten long yumi tru long simpol aksen ia blong kipim ol kavenan blong yumi. Long ol defren wei, Lod i givim praes from fetful aksen ia, wetem paoa mo wetem glad.
Mi testifae se Hem i lavem yu. Lod i save hamas yu stap traehad. Yu stap progres. Gohed. Hem i stap luk evri sakrifaes blong yu we oli haed, mo Hem i stap kaontem olgeta blong gud blong yu mo gud blong olgeta we yu lavem. Wok blong yu i no stap go nating. Yu no stap yuwan. Stret nem blong Hem, Imanuel, i minim “God i stap wetem yumi.” Hem i rili stap wetem yu.
Tekem sam moa step long rod blong kavenan, iven sapos i tudak tumas blong luk longwe. Ol laet bae oli on bakegen. Mi testifae long trutok blong ol toktok blong Jisas, mo oli fulap long laet: “Kam kolosap long mi mo bambae mi kam kolosap long yufala; lukaotem mi wetem strong tingting mo bambae yufala i faenem mi; askem mo bambae yufala i kasem; noknok, mo bae i open long yufala.” Long nem blong Jisas Kraes, amen.