E Dua na Veikacivi Lagilagi

Mai vei Joy D. Jones

Peresitedi Raraba ni Lalai

Ni da marama ni vakabauta, e rawa ni da vakayagataka na ivakavuvuli ni dina mai na veika e sotava na Parofita o Josefa ka vakarautaka na rai titobu ni nomuni ciqoma na ivakatakila yadua.

Au marau me vakanamata na noqu vosa nikua kina na nodra itavi na marama ka sa vakacagau tiko ena Veivakalesui mai. E matata ni ena vei tabagauna sa sivi, o ira na marama sa tiko na nodra tikina vakasakiti ena ituvatuva nei Tamada Vakalomalagi. E vakavulica o Peresitedi Nelson,“Ena dredre toka me vakarautaki na veiuqeti ka tiko vei ira marama, sega walega ena matavuvale, ia sa vaka talega ena Lotu ni Turaga, ena itutu vaka radini vale, vaka tina, vaka tubunigone, ganei, kei na nei, vaka qasenivuli kei na iliuliu; ka vakauasivi ena ivakaraitaki uasivi kei na yalodina ni tutaka na kosipeli.” ¹

Ena gauna taumada ni iSoqosoqo ni Veivukei e Nauvu ena 178 na yabaki sa oti, a vakasalataki ira na marama na Parofita o Josefa Simici mera “cakacakataka na [nodra] i tavi.” ² E vakavulici keda nikua na noda ivakaraitaki. Era a duavata me muria na domo ni parofita ka bula ena vakabauta e dei vei Jisu Karisito ena nodra vukea me tarai cake na yavu eda duri tu kina nikua. Sisita, sa noda gauna oqo. Sa noda edua nai lesilesi vakalou maivua na Turaga, kei na noda vakaitavi ena yalodina ka matalia sa yaga vakalevu sara.

E vakamacalataka o Peresitedi Spencer W. Kimball: “Mo dua na marama bula dodonu ena iotioti ni gauna ena vuravura oqo, ni bera na ikarua ni lako mai ni noda iVakabula, sa dua na veikacivi lagilagi. Na kaukauwa kei na veivakayarayarataki ni marama yalododonu nikua e rawa me vakatinitaki na kena kaukauwa me vaka tauvatataki kei na gauna ni tiko vakacegu.” ³

Sa vakamamasu vakakina o Peresitedi Russell M. Nelson: “Ia, nikua au sa vakamasuti kemuni na marama [ena] Lotu moni yavala mai. Taura na nomu itutu dina ena vanua o ni gadrevi kina vakalevu ena nomuni matavuvale, ena nomuni itikotiko, kei na matanitu ni Kalou—me vaka o ni se bera ni bau cakava vakadua.” ⁴

Au a kalougata kei na dua na ilawalawa gone ena Lalai, wale tiko ga oqo, me keimami sota kei Peresitedi Russell M. Nelson ena ivakatakarakara ni nodratou itikotiko na vuvale na Simici e Palmyra, Niu Ioka. Rogoca na nona vakavulici ira na gone ena ka era rawa ni cakava mera toso ki liu.

1:55

Sister Jones: “Au via kila kevaka e tiko na nomuni taro o ni via taroga vei Peresitedi Nelson. O ni sa dabe tiko oqo kei na parofita. E tiko beka na ka o ni a dau via taroga na parofita? Io, Pearl.”

Pearl: “E dredre beka mo ni dua na parofita? O ni sa, osooso saraga?”

Peresitedi Nelson: “Io, e dredre. Na veika kece e baleta na noda vakataka na iVakabula e dredre. Me ivakaraitaki, ena gauna e vinakata kina na Kalou me solia na ivunau e tini vei Mosese, e tukuna vei Mosese me lako ivei? Ena dua na dela ni ulunivanua, ena Ulunivanua ko Sainiai. Sa baleta sara kina e delana sara ni ulunivanua me ciqoma na iVunau e Tini. E rawa ni a kaya na Tamada Vakalomalagi ‘Mosese, mo tekivu mai keri, kau na tekivu yani eke, daru qai sota ena kena veimama.’ E sega, na Turaga e taleitaka na noda sasaga, baleta na sasaga e sala vata kaya mai na kena isau e sega ni rawa ni yaco mai kevaka e sega na sasaga. Me ivakaraitaki, o bau vulica beka na taba piano?”

Gonelalai: “Io.”

Pearl: “Au vulica na violin.”

Peresitedi Nelson: “O dau vakatovotovo beka?”

Gonelalai: “Io.”

Peresitedi Nelson: “Na cava ena yaco kevaka o sega ni vakatovotovo?”

Pearl: “O guilecava.”

Peresitedi Nelson: “Io, o sega ni rawa ni toso vakalevu nomu kila? Sa isaunitaro na io, Pearl. E taura vakalevu na cakacaka vakaukauwa, na vuli vakalevu, ka sega ni mudu. Sa vinaka sara! Sa vinaka sara oqori, baleta ni da toso tikoga ki liu. Ena bula sara madaga ka tarava eda na toso tikoga ki liu.”

Na veisotavi nei Peresitedi Nelson vei ira na gone vakamareqeti oqo sa vakatetei vei keda yadua. E taleitaka na Turaga na dausasaga, kei na dausasaga e tiko na kena icocovi. Eda tomana tiko ga na noda cakacaka. Eda na tubu tiko ga kevaka eda na sasaga tiko meda muria na Turaga. ⁵ E sega ni namaka o koya na taucoko nikua. Eda sasaga tiko ga meda rawa na veika dredre sa tu e matada. Me vaka na veigauna sa oti, na noda ilakolako sa, dina sara, ni taura na sasaga, cakacaka vagumatua, kei na vuli, ia na noda soli keda taucoko kina toso kiliu sa kauta mai na icocovi tawamudu. ⁶

Na cava tale eda vulica mai na vua na parofita o Josefa Simici kei na Matai ni Raivotu me baleta na sasaga, cakacaka vagumatua, kei na vuli? E solia vei keda na iMatai ni Raivotu na veidusimaki ki na noda itavi yadudua. Ni da marama ni vakabauta, e rawa ni da vakayagataka na ivakavuvuli ni dina mai na veika e sotava na Parofita o Josefa ka vakarautaka na rai titobu ni nomuni ciqoma na ivakatakila yadua. Me ivakaraitaki:

Eda oca ni sotavi na veika dredre.
Eda vakasaqaqara ena ivolanikalou me rawati kina na veidusimaki ni ka me vakayacori.
Eda matanataka na noda vakabauta kei na vakararavi vua na Kalou.
Eda solia na noda kaukauwa ka vakatakekere vua na Kalou me vukei keda meda vakamalumalumutaka na veivakayarayarataki ni vu ni ca.
Eda cabora cake na gagadre ni yaloda vua na Kalou.
Eda vakanamata ki na Nona rarama ka dau dusimaka na noda veidigidigi ni bula, ka dau mai tiko kei keda nida rai vua.
Eda kila Ni kila vakayadua na yacada ka solia vei keda na itavi meda qarava. ⁷

Me kena ikuri, o Josefa Simici a vakalesuya mai na kila-ka ni sa rawa vei keda meda vaka na Kalou kei na keda yaga tawamudu. Ena vuku ni veiwekani oqo kei na Tamada Vakalomalagi, au vakabauta ni namaka o Koya vei keda meda ciqoma na ivakatakila mai Vua.

Na Turaga a vakasalataki Ema Simici me “ciqoma na Yalo Tabu,” vuli vakalevu, “mo kakua ni domona na iyau vakavuravura, vakasaqara na iyau e vinaka cake,” ka “dei tikoga ki na [nona] veiyalayalati” kei na Kalou. ⁸ Na vuli e tiki yaga sara ni noda tubu vakabibi ni veitokani ni Yalo Tabu e veigauna, e vakavulica vei keda yadua na veika me biu vakatikitiki—kena i balebale na ka e golei keda tani se vakabera na noda tubu.

E kaya o Peresitedi Nelson: “Au masuti kemuni mo ni vakatubutaka na nomuni rawa ka vakayalo mo ni rawa ivakatakila kina.” ⁹ Na nona vosa na noda parofita sa dau tiko kei au niu dau vakananumi ira na marama kei na nodra rawa ni toso ki liu. Sa vakamasuti keda, oya vei au e dusimaka na ka me vakaliuci. E vakavulica tiko vei keda na sala ni noda rawa ni sasagataka meda bula vakayalo ena vuravura ka sa luvuci tu ena i valavala ca, ena noda ciqoma ka cakava na ivakatakila. ¹⁰ Ni da cakava vakakina, ena rokovi kei na bulataki ni ivakaro ni Turaga, sa yalataki veikeda, me vaka vei Ema Simici, “ai sala ni yalododonu” ¹¹ E vakavulica na Parofita o Josefa na bibi ni kilai na salatu eda cakacakataka tiko ena bula oqo me vakadonuya na Kalou. Ni sega vei keda na kila oqori, e na “vakacau oca na [noda] vakasama ka malumalumu.” ¹²

Ena koniferedi oqo, eda na rogoca kina na dina eso ka na uqeti keda meda veisau, vakavinakataka, ka vakasavasataka na noda bula. Ena ivakatakila ki na tamata yadua, sa rawa vei keda meda levea na ka era vakatoka eso me “veiluvuci na koniferedi raraba”—nida biubiu eke ka vadeitaka meda cakava taucoko nikua. O ira na marama e levu nai tavi era qarava, ka sa dredre sara, ka sega ni gadrevi, mera qarava kece ena duavata ga na gauna. Ena vukei keda na Yalotabu meda kila na cakacaka meda vakanamata kina ena siga nikua. ¹³

E rawa meda malele ki na veivakauqeti loloma ni Turaga, ena Yalo Tabu, me vukei keda meda kila na cava e vakaliuca o Koya meda tubu cake kina. Na noda ivakatakila yadua e tuberi keda ki na tubu cakevakayadua. ¹⁴ Eda rogoca ka cakava. ¹⁵ E kaya na Turaga : “Kerea na Tamada ena yacaqu ena vakabauta, kei na vakanuinui ni na soli vei kemudrau, ka na soli vei kemudrau na Yalo Tabu, ka sa vakatakila na veika kecega ka na ganita vei ira na luve ni tamata.” ¹⁶ Na noda itavi me tomani tiko ga na ivakatakila.

Ni toso cake na noda kila ni vakayacora na veika oqo, eda rawa ni ciqoma na kaukawa e levu cake ena noda i tavi yadua meda veiqaravi ka vakayacora na cakacaka ni veivakabulai kei na vakacerecerei—ka rawa vakaidina “mo kakua ni domona nai yau vakavuravura, ia mo vakasaqara nai yau e uasivi cake.” ¹⁷ Ena qai rawa kina vei keda me mana na noda vakauqeti ira na noda tabatamata tubu cake tiko mai nikua me ra cakava vakakina.

Kemuni na Taciqu kei na ganequ, eda vakasaqara kece tiko na kaukauwa ni Kalou ena noda bula. ¹⁸ E tiko e dua na yalo ni cakacaka vata totoka, ena kedrau maliwa na tagane kei na yalewa, ena vakayacori ni cakacaka ni Kalou edaidai. Eda rawata na kaukauwa ni matabete ena veiyalayalati, ka a vayacori taumada ena noda papitaiso ka mai tini e loma ni veivaletabu savasava. ¹⁹ Sa vakavulica vei keda o Presitedi Nelson, “Na yalewa kei na tagane kece sara e veiyalayalati kei na Kalou ka rokova na veiyalayalati oqori, ka vakaitavi kilikili ena veicakacaka vakalotu ni matabete, ena lutuki koya mai vakadodonu na mana ni Kalou.” ²⁰

Na noqu vakatutusa vaka i au nikua, oya niu a dau lecava tu mai liu ni rawa vei aumeu tadolova na kaukauwa ni matabete, dina ga niu marama. ²¹ Kemuni na marama, sa noqu masu ni da na vakila ka vakamareqeta na kaukauwa vaka matabete ni da “dei tikoga ki na [noda] veiyalayalati,” ²² taukena na dina ena ivolanikalou, ka muria nodra vosa na parofita bula.

Meda vakadeitaka sara na noda dina vua na Tamada Vakalomalagi kei na iVakabula, ena “dei ni nomudou vakabauti Koya, ka vakararavi vakatabakidua sara ki na nona vinaka o Koya sa kaukauwa me veivakabulai.” ²³ Meda tomana tikoga na ilakolako oqo i na noda iyacoyaco vakayalo cecere duadua ka vukei ira era tiko wavoliti keda mera yaco talega vakakina ena noda veiliutaki, loloma, veiqaravi, kei na loloma vakarisito.

E vakananumi keda ena yalo malumu o Elder James E. Talmage, “Na nodra jabeni levu ni vuravura na marama kei na i tutu vakamarama sai Jisu na Karisito.” ²⁴ Ena i soqoni ni nodra vakaitavi tiko na marama ena cakacaka ni Veivakalesuimai, ka vei keda kece, nai tavi cava e bibi duadua? Au vakadinadinataka ni sai koya meda rogoci Koya, ²⁵ ka muri Koya, ²⁶ ka vakararavi Vua, ²⁷ ka i dewadewa ni Nona Loloma. ²⁸ Au kila ni bula o Koya. ²⁹ Ena yaca tabu i Jisu Karisito, emeni.