Dua na Kerekere Vei Ira na Ganequ Yalewa

Mai vei Peresitedi Russell M. Nelson

Peresitedi ni Kuoramu ni iApositolo Le Tinikarua

Keimami gadreva na nomuni kaukauwa, na nomuni ivakadinadina, na nomuni rawa ni veiliutaki, na nomuni yalomatua kei na domomuni.

Elder Rasband, Elder Stevenson, kei Elder Renlund, oi keitou na Tacimudou, keitou kidavaki kemudou mai kina Kuoramu ni iApositolo Le Tinikarua. Keitou vakavinavinakataka na Kalou ena vuku ni ivakatakila e solia vua na nona parofita o Peresitedi Thomas S. Monson.

Kemuni na taciqu kei na ganequ, ni da a sota ena koniferedi raraba ena ono na vula sa oti, e sega ni dua vei keda e namaka na veisau ena tara na uto ni veiliutaki ni Lotu. E a solia o Elder L. Tom Perry e dua na itukutuku bibi ni kena sega ni rawa me vakaisosomitaki vakarawarawa na itavi e qarava na bula ni veiwatini kei na matavuvale ena loma ni ituvatuva ni Turaga. Eda kurabui ni vica ga na siga tarava eda sa rogoca kina na kenisa, ka na vakavuna na nona mai biuti keda me sa liu yani.

Dina ga ni sa torosobu tiko na bula nei Peresitedi Boyd K. Packer, e a tomana tikoga na “nona itavi” ena cakacaka ni Turaga. Sa vulaci sara ga o koya ena vula o Epereli, ia e vakadeitaka ga ni na wasea kina na nona ivakadinadina kevaka me sa tiko vua na icegu ni bula. Ni oti ga e 34 na siga mai na mate nei Elder Perry, sa mai takosova talega kina na ilati o Peresitedi Packer.

Eda nanumi Elder Richard G. Scott vakalevu ena noda koniferedi raraba sa oti, ia eda na dau nanuma tu ga vakakina na nona ivakadinadina kaukauwa me baleta na iVakabula ena vei koniferedi sa sivi. Ia ena 12 ga na siga sa oti, a mai kacivi yani kina o Elder Scott ka na laki veisotari kei nona daulomani o Jeanene.

A noqu na gauna vinaka meu tiko vata voli kei rau na Taciqu oqo ena iotioti ni vica na siga ni nodrau bula, wili kina na noqu tokavata kei na matavuvale nei Peresitedi Packer kei Elder Scott ni bera ni mai takali na nona bula. Sa bau ka dredre sara ga vei au meu ciqoma ni rau sa mai yali vakasauri e rua na noqu itokani dredre, ka rau italai nuitaki ni Turaga. Au sa dau nanumi rau sara ga kau na sega ni vakamacalataka rawa.

Niu vakananuma voli na veika tawalokuci sa mai yaco oqo, e dua na ka e tara vakalevu sara noqu vakasama na noqu vakasaravi rau toka na dui watidrau rau se bula tiko oqo. Sa kabi dei sara toka ga ena noqu vakasama na kedrau irairai ni vakacegu tu o Sisita Donna Smith Packer kei Sisita Barbara Dayton Perry ni rau dabe toka ena yasa ni nodrau idavodavo na watidrau, ni rau sa vakasinaiti tu ena loloma, na dina kei na vakabauta savasava.

Ni dabe toka o Sisita Packer ena yasa i watina ena iotioti ni vica na auwa, e vakatakarakarataka tu na vakacegu e sega ni na kilai rawarawa.¹ Dina ni sa kila vinaka tu, ni nona daulomani ena rauta ni 70 na yabaki sa oti, sa na vakarau biuti koya, e vakaraitaka ga na irairai ni yalovakacegu ni dua na marama sinai ena vakabauta. E vaka na irairai ni agilosi me vaka na itaba oqo ena kena vakatabui na Valetabu e Brigham City.

Au raica na irairai vata ga o ya ni loloma kei na vakabauta vei Sisita Perry. Na nona dina vua na watina kei na Turaga e laurai votu ka sa tarai au talega.

Mai na iotioti ni vica na auwa ni nodrau bula voli na watidrau, me yacova mai nikua, erau sa vakaraitaka sara ga na marama e rua oqo, na kaukauwa kei na yalodina ka sa tu vei ira era bulataka na nodra veiyalayalati.² Ena ka dredre toka na sasagataka me kilai na veika e rawa ni vakayacora na yalewa e vaka o ya na kedra ituvaki, sega walega ena matavuvale, ia sa vaka talega ena Lotu ni Turaga, ena itutu vaka radini vale vaka tina, vaka buinigone, ganei, kei na nei, vaka qasenivuli kei na iliuliu ka vakauasivi ena ivakaraitaki kei na tutaka na vakabauta.³

Oqo sa ka dina sara ena veitabatamata ni kosipeli mai na gauna i Atama kei Ivi. Ia o ira na marama ena itabatamata oqo era duatani sara mai vei ira tale eso, baleta ni itabatamata oqo e duatani ga mai vei ira tale e so.⁴ Na duidui oqo e kauta mai na gauna vinaka kei na itavi.

Ena tolusagavula ka ona na yabaki sa oti, ena 1979, e a parofisai kina o Peresitedi Spencer W. Kimball me baleta na revurevu ni nodra veiqaravi na marama era maroroya na nodra veiyalayalati, ni tara yani na toso ni Lotu ni Turaga ena veisiga ni mataka. E a parofisai ka kaya, “Ena levu sara na tubu ena yaco ena Lotu ena iotioti ni gauna oqo ena yaco mai baleta ni levu na marama vinaka ena vuravura oqo era na lako mai kina Lotu ena iotioti ni gauna. Oqo ena yaco baleta ni o ira na marama ena Lotu era na vakaraitaka na yalododonu kei na digidigi vakavuku ena nodra bula, vakakina ena loma ni Lotu era laurai na marama ni ra duatani ka duidui—era mamarau—mai vei ira na marama e vuravura.”⁵

Kemuni na marama o kemuni ko ni neimami ilawalawa ena gauna sa vakarau mai cava tiko oqo, na siga e kaya o Peresitedi Kimball sa tu sara ga oqo nikua. Oi kemuni na marama e a raica taumada! Na nomuni yalodina, rarama, loloma, kila-ka gugumatua, ivakarau-kilikili, vakabauta, kei na buladodonu ena kauti ira mai na yalewa vinaka mai vuravura kei ira na nodra matavuvale kina loma ni Lotu ena dua na wiliwili levu sara!⁶

Oi keimami na ganemuni, keimami gadreva na nomuni kaukauwa, na nomuni ivakadinadina, na nomuni rawa ni veiliutaki, na nomuni yalomatua kei na domomuni. Na matanitu ni Kalou sega ni taucoko, ka na sega ni rawa ni taucoko kevaka e sega na marama era cakava nodra veiyalayalati ka bulataka, na marama era na rawa ni vosa ena kaukauwa kei na veivakadonui ni Kalou!⁷

O Peresitedi Boyd K. Packer e a kaya:

“Eda gadrevi ira na marama era sa vakataucokotaki ka rawa ni ra veivakataucokotaki. Eda gadreva na marama era vakaivakarau ka tu talega vei ira na kila vakaveiliutaki ka rawa ni ra vakatutu ka liutaka na kena vakayacori ka veiqaravi; na marama e rawa ni ra veivakavulici, na marama e rawa ni ra na vosa. …

“Eda gadreva na marama e tiko vei ira na isolisoli ni kila na ka, ka rawa ni ra raica na toso e vuravura, ka kila na veika ena ka taleitaki, ia ena vakagauna ga, ka na rerevaki sara.”⁸

Nikua, meu na kuria eda gadreva na marama era kila na vakayaco veika bibi ena nodra vakabauta, ka ra sa dau yalodina sara ga ena taqomaki ni tiko savasava kei na matavuvale, ena vuravura sa tauvimate tu ena ivalavala ca. Eda gadrevi ira na marama ka sa yalodina tu ena nodra vakatawani na luve ni Kalou ena sala yalataki ki na bula vakacerecerei; na marama era kila na ciqomi nodra ivakatakila vakataki ira, era kila na kaukauwa kei na yalovakacegu ni edaumeni ni valetabu na marama era kila na kena kacivi na kaukauwa vakalomalagi me maroroya ka vakaukauwataki ira na gone kei na matavuvale, na marama era na veivakavulici vakadodonu.

Ena noqu bula taucoko, au sa dau vakalougatataki mai vei ira na marama vakaoqo. Na watiqu sa mate o Dantzel, e a vaka na marama oqori. Au na vakavinavinaka tu ga ena vuku ni veisau ena noqu bula ka a vakayacora vei au ena tiki kece ni noqu bula, wili kina na noqu sasaga ena qaravi ni veisele uto.

Limasagavulu ka walu na yabaki sa oti, au a kerei meu seleta e dua na goneyalewa lailai ka sa tauvi koya voli mai na mate ni uto. E a sa mate mada o tuakana tagane ena mate vata ga o ya. Erau a kere veivuke na nona itubutubu. Au a sega soti ni yalodei ena ka ena yaco, ia au yalataka niu na sasagataka ena noqu igu taucoko meu na vakabulai koya. Dina ga niu a solia na noqu maqosa taucoko ia e sa dreve ga na inaki ni a mani mate na goneyalewa lailai. Sega ni dede erau a kauta tale mai na itubutubu vata ga o ya e dua tale na luvedrau goneyalewa ka se qai 16 ga na vula na nona yabaki ni bula, ka a sucu vata mai kei na uto sa tauvi mate rawa tu mai. Ena nodrau kerekere ga au vakayacora tale na veisele vua na gone. Ia e mani mate na gone. Nai ka tolu ni gone e yali oqo ena dua ga na matavuvale sa bikai au sara ga vakalevu.

Au a lako ki vale ena yalorarawa. Au a laki davo tu ga ena fuloa ni rumu ni gade ka osivaka ena bogi taucoko. E a dabe toka ga e yasaqu o Dantzel ka vakarogoci au ena noqu sa yalataka vakavica vata niu na sega tale ni cakava e dua na veisele uto. Ni sa laki lima na kaloko ena mataka lailai, sa qai raici au mai o Dantzel ka taroga ena yalo ni loloma, “Sa oti beka na nomu tagi? Tucake ka vakaisulu. Lesu tale kina vale ni veisele. Tomana nomu cakacaka! Ena gadrevi mo vuli vakalevu cake. Kevaka mo sa soro oqo, era na qai vaka saga mosimosi tale e so mera kila na ka o sa kila rawa tu.”

Isa, au sa gadreva sara ga vakalevu na rai, yaloqaqa kei na loloma e dau tu vei watiqu! Au lesu ki cakacaka ka tosoya noqu vuli. Kevaka me a sega na veivakadreti mai vei Dantzel, keu a sega ni tosoya noqu sasaga kina veisele uto kau na sega talega ni a vakarau kina veisele ka a vakabulai Peresitedi Spencer W. Kimball ena yabaki 1972.⁹

Kemuni na ganequ, ko ni sa raica rawa na rabailevu kei na bibi ni nomuni rawa ni veivakabulai ena nomuni na vosataka na veika e basika e yalomuni kei na nomuni vakasama ena veivakauqeti ni Yalotabu? Dua na peresitedi ni iteki e kaya vei au na ka e a yaco ena dua na bose ni matabose ni iteki, ka ratou sasagataka tiko e dua na bolebole dredre sara. Ena dua na gauna ni bose e qai raica ni o Peresitedi ni Lalai e galu toka ga, ka sa mani tarogi koya se bau vakila e dua na ka. “Io, sa dina sara e kaya,” sa qai vakaraitaka na nona vakasama ka veisautaka sara ga na ilakolako ni bose o ya. Tosoya o peresitedi ni iteki ka kaya, “ni sa tekivu vosa, sa vakadeitaka vei au na Yalotabu ni sa gusu ni itukutuku kina ivakatakila ka keitou vaqara tiko ena bose o ya.”

Kemuni na ganequ, se cava ga na nomuni veikacivi, se cava beka na kemu ituvaki ni bula, keimami gadreva nomuni ivakatakila, nomuni rai kei na nomuni veivakauqeti. Keimami gadrevi kemuni mo ni vosa mai ena bose ni tabanalevu kei na iteki. Keimami gadreva na marama vakawati yadua mera vosa ni ra “sa vakaio ka vakaitavi kei watidra”¹⁰ ni ko sa veitokani kei watimu ena tuberi cake ni nomu matavuvale. Vakawati se dawai, e tiko vei kemuni na marama na kila kei na kaukauwa kei na yalo ni rawa- ka ko ni sa ciqoma na isolisoli mai vua na Kalou. Ena sega ni rawa vei keimami na turaga me keimami na tokaruataka na nomuni rawa-ka na marama.

Eda kila ni a iotioti ni ka me buli sa ikoya na yalewa!¹¹ Keimami gadreva na nomuni kaukauwa!

Na valuti tiko ni Lotu, na kena ivakavuvuli kei na ivakarau ni noda bula ena tubucake sara. Ena kena yaco tiko na ka oqo eda gadreva kina na marama ka tiko vua na kila na ivakavuvuli i Karisito ka ra na vakayagataka na ka era sa kila mera veivakavulici vei ira na itabatamata dau saqata na veitemaki ni ivalavala ca.¹² Eda gadreva na marama era na kidava na veilawakitaki e dau vakayacori. Eda gadreva na marama e dodonu na nodra curuma yani na kaukauwa e solia na Kalou vei ira era bulataka nodra veiyalayalati ka ra vakaraitaka nodra vakabauta ena yalodei kei na yalololoma. Eda gadreva na marama e tiko vei ira na kaukauwa kei na rai e a tu vei Tinada o Ivi.

Kemuni na ganequ e sega tale ni dua na ka e bibi cake mai na nomuni na laki bula tawamudu kei na nomuni saumaki mai. O ira na marama era sa saumaki ka maroroya na veiyalayalati ka na caudre mai na nodra buladodonu era na rawa ni lako curuma na vuravura sa kakaseresere oqo, ka ra na laurai ni ra na duatani ka duidui ena bula e mamarau.

Ia, nikua au sa vakamasuti kemuni na marama ena Lotu i Jisu Karisito ni Yalododonu Edaidai mo ni toso ki liu! Taura cake na nomu itutu kei na vanua o ni gadrevi kina vakalevu ena nomuni matavuvale, ena nomuni itikotiko, kei na matanitu ni Kalou—me vaka e se bera vakadua ni bau caka. Au sa kerei kemuni mo ni vakavotukanataka na parofisai nei Peresitedi Kimball. Kau sa yalataka vei kemuni ena yaca i Jisu Karisito ke ni sa cakava vaka o ya, ena vakalevutaka na Yalotabu na nomuni sasaga ena sala se sega mada ni se bau kilai!

Au vakadinadinataka ni bula dina tiko na Turaga o Jisu Karisito kei na nona kaukauwa ni veivueti, veisorovaki, kei na veivakasavasavataki. Me vaka niu dua na nona iApositolo, au vakavinavinaka vei kemuni na marama ka vakalougatataki kemuni mo ni rawa ka ena kena ivakatagedegede e cake sara, ka vakataucokotaka na inaki ni nomuni a buli, ni da lakova vata tu na cakacaka tabu oqo. Me da duavata ena vakarautaki ni vuravura me baleta na Lesu tale mai ni Turaga. Oqo na veika au vakadinadinataka niu dua na tacimuni, ena yaca i Jisu Karisito, emeni.

iDusidusi

1. Raica na Filipai 4:7.

2. Oqo e okati kina na wainimata—ena maroroi ni ivunau meda tagicaki ira eda lomana ni ra sa toki tani ena bula oqo (raica na Vunau & Veiyalayalati 42:45).

3. Raica na veivakayarayarataki nei Repeka vei Aisake vakakina vei Jekope na luvedrau ena Ai Vakatekivu 27:46; 28:1–4.

4. Raica na Joseph Fielding Smith, Answers to Gospel Questions, comp. Joseph Fielding Smith Jr., 5 vols. (1957–66), 4:166. Kerei mo raica oqo: O ira kece na itabatamata sa oti era vakalalaitaki ga ena dua na iwase lalai ni vuravura ka ra sa vakawabokotaki ena vuku ni vukitani, kena veibasai ni itabatamata oqo ena sega ni vakaiyalayala na kena vanua se gauna. Ena vakasinaita na vuravura ka na semati yani kina iKarua ni Lesumai ni Turaga.

5. Nodra iVakavuvuli na Peresitedi ni Lotu: Spencer W. Kimball (2006), 252–53.

6. Niu a sucu e rauta tiko ni 600,000 na lewe ni Lotu. Nikua sa rauta tiko ni 15 na milioni. Ena tosocake tikoga na iwiliwilwi oya.

7. Tukuna o Peresitedi Joseph Fielding Smith vei ira na marama ni iSoqosoqo ni Veivukei, “Sa rawa ni ko ni vosa ena lewa, baleta ni Turga sa solia vei kemuni na lewa o ya.” Mo ni vakayacora e levu cake na ka. Na cakacaka era cakava e caka ena veilesi vakalou” (“Relief Society—An Aid to the Priesthood,” Relief Society Magazine, Jan. 1959, 4, 5). Na taro kece oqo era a torogi tale mai vei Elder Dallin H. Oaks ena dua na soqoni ni koniferedi, “Na iDola kei na Lewa ni Matabete” Liaona, Me 2014, 51.

8. Boyd K. Packer, “Na iSoqosoqo ni Veivukei,” Ensign, Nove. 1978, 8; raica talega na M. Russell Ballard, Veivakasalataki kei na Noda Matabose: Vulica na Veiqaravi Vata ena Lotu kei na Matavuvale (1997), 93.

9. Raica na Spencer J. Condie, Russell M. Nelson: Parofita, Dauveisele, iApositolo (2003), 153–56. Me Kilai: Ena 1964 o Peresitedi Kimball e a tabaki au meu dua na peresitedi ni iteki ka vakalougatataki au ni balavu ni bula ena lekaleka ena gauna ni noqu painiataka na qaravi ni veisele-uto. Sega sara ga ni dua veikeirau a kila ni walu na yabaki yani muri au na mai qarava na veisele vei Peresitedi Kimball ka wili kina na kena vakaisosomitaki na icegucegu ni nona uto.

10. “Ni da vosa tiko ena vakamau me dua na vakaisa, meda sa na vosa ena ka e baleta na vakawati ni, taucoko na vakaisa. Eda sega ni vinakata noda yalewa ni YDE mera vagagalu ka doudou ni vosa se vakalalai na vakaitavi ena itavi tawamudu o ya! Yalovinaka mo vakaitavi ka dinata na nomu sa dua na isa” (Spencer W. Kimball, “Privileges and Responsibilities of Sisters,” Ensign, Nove. 1978, 106).

11. “Na inaki kece e vuravura kei na veika kece sa tu e vuravura ena sega ni yaga kevaka me sega na yalewa—sa dua na inuinui ena ituvatuva ni veibuli ni matabete” (Russell M. Nelson, “Lesoni mai vei Ivi,” Ensign, Nove. 1987, 87). “O Ivi e iotioti ni ibulibuli ni Kalou, na iusutu kece ni veibuli ka sa qaravi oti” (Gordon B. Hinckley, “Na Yalewa ena Noda Bula,” Liaona, Nove. 2004, 83).

12. Raica na Russell M. Nelson, “Gonelalai ni Veiyalayalati,” Ensign, Me 1995, 33.