Digitaka na Rarama

Mai vei Elder Vern P. Stanfill

Ena Vitusagavulu

Sa dodonu meda digitaka me tauri matua na ivakasala vakaparofita, vakila ka cakacakataka na veivakauqeti vakayalo, talairawarawa sara ki na ivunau ni Kalou, ka vaqara na ivakatakila.

Sega ni balavu sara, au a navuca kei na watiqu ni sa dodonu me keirau vakila mada vakalevu na totoka ni dua na vanua volekata na neitou itikotiko ena ra ni vualiku kei Montana. Keirau sa navuca ni kauta na neirau basikeli ki na Tua o Hiawatha, e dua na sala ni sitima veisau ka takosova voli na Rocky Mountains ena maliwa i Montana kei Idaho. Keirau a namaka e dua na siga marautaki kei ira na itokani vinaka, ena rekitaki ni ivakaraitaki totoka ni vanua.

Keirau kila na vodoki yani ni tua 15 na maile (24 na km) vakasakiti oqo ena oka kina na wavu ni sitimanivanua ka dodo yawa tu ki na icurucuru veivatu kei na qara balavu e curu basikata na veiulunivanua sukusukura. Sa keirau vakarautaki keirau ena cobari ni cina ki na neirau isala kei na basikeli.

Era vakaroti keirau o ira na gole eliu ni sa butobuto na veiqara ka keirau na gadreva na cina kaukauwa sara. Ni keirau tu ena mata ni vatu vakaitamera na Taft Tunnel, a vakamacalataka na dauniveiqaravi na ka rerevaki eso me baleta na tua, oka kina na veikeli titobu ena iyalayala, lalaga voravora, kei na butobuto loa. Keirau a toso ki liu vakusakusa ki na loma ni qara. Oti neirau vodo walega me vica na miniti, a ovici keirau na butobuto ka yalataki. A sega ni yaga na cina au kauta voli, ka sa mai tababokoci na cina ena butobuto. Vakasauri, au sa tekivu nuiqawaqawa, veilecayaki, ka tavariri.

Au a madua ni tusanaka na noqu nuiqawaqawa kivei ira na noqu itokani kei na matavuvale. Dina ga ni’u sa dua ka dau matai ena vodo basikeli, ia oqo e vaka meu a se sega ni bau vodo basikeli vakadua. Au saga dredre me’u toka donu ni tosocake na noqu veilecayaki. Kena itinitini, ni oti ga noqu vakaraitaka na noqu lomaleqa kivei ira na wavoliti au, au sa rawata ni toro voleka ki na rarama kaukauwa cake sara ni dua na itokani. Dina sara, na nodra sa tekivu soqoni vata ena dua na iwirini qaqaco wavoliti koya o ira kece. Mai na nona tiko volekati kei na nuitaki voli ni nona rarama ena gauna oya kei na rarama vakasokomuni ni ilawalawa, keimami a tomana ni curuma yani na buto e na loma ni qara.

Ni oti e vica na aua, au a raica e dua na idusi lailai sara ni rarama. Via gauna vata oya, au sa tekivu vakila vakaidina ni na daumaka na ka taucoko. Au tomana na toso ki liu, ka vakanuinui voli ena nodra cina na noqu itokani kei na tubu tiko ni idusi ni rarama. A lesu tale mai vakamalua na noqu yalodei ni sa tubu cake na rarama kei na kena serau. Ni se yawa na yacovi yani ni icavacava ni qara, sa sega tale ni’u qai gadreva na veitokoni ni noqu itokani. A yali taucoko na nuiqawaqawa ni keimami vodo totolo yani ki na rarama. Au a yalomalua ka tudei tu ni se bera madaga ni keimami vodo yani ki na rarama ni mataka e sinai tu ena katakata kei na ivakaraitaki vakasakiti.

Eda bula ena dua na vuravura eda na sotava kina na bolebole eso ni noda vakabauta. Eda na rairai yalodei beka ni da sa vakarau tu meda sotava na veibolebole oqo—ka qai dikeva emuri ni sega soti ni veirauti na noda vakavakarau. Ka vaka ga na nona a vakaroti au na noqu itokani me baleta na butobuto, eda sa vakaroti edaidai. Sa ra vakauqeti keda na domo vakaiapositolo meda vakarautaki keda ena rarama qaqa ni kaukauwa vakayalo.

Vakakina, eda na rairai madua, lomaleqa, se veilecayaki vakayalo ni da sotava e dua na bolebole ki na noda vakabauta. Ia, vakavo ena so na ka lalai, na qaqaco kei na balavu ni gauna ni veivakanananu vakaoqo ena vakatau ki na noda ivalavala era sotavi kina. Kevaka eda sega ni cakava e dua na ka, na vakatitiqa, dokadoka, kei na lutu tani sara, ena rawa ni kauti keda tani mai na rarama.

Au a vulica eso na lesoni bibi ena veika au sotava ena qara. Au na wasea ga e vica vei ira.

Matai, se vakacava sara na levu ni butobuto ni vakatitiqa, eda digitaka na balavu kei na ituvaki cava eda vakatara kina me vakayarayarataki keda. Sa dodonu meda nanuma na levu ni nodrau lomani keda na Tamada Vakalomalagi kei na Luvena. Rau na sega ni vakawaleni keda, se me Rau vakatarai keda meda tobulovuci kevaka eda vakasaqara na Nodrau veivuke. Nanuma na ka a sotava o Pita mai na ua voravora ena Baravi mai Kalili. Ni sa vakila o Pita ni ovici koya na butobuto batabata, a vakila totolo o koya na dredre ni nona vakatulewa ka digitaka ena gauna saraga oya me kaci veivuke kina. A sega ni taroga o koya na kaukauwa ni iVakabula me vakabulai koya; a kacivaka ga yani o koya, “Na Turaga, ni vakabulai au.”¹

Ena noda bula, na liga dodoki ni iVakabula ena rairai vakatakarakarataka na veivuke mai na dua na itokani nuitaki, iliuliu, se itubutubu dauloloma. Ni da sasaga dredre voli ena butobuto, e sega ni cala na vakanuinui vagauna ena nodra rarama o ira ka lomani keda ka ra via vukei keda vakaidina.

Ni da navuca na kena vakasamataki, cava na vuna meda vakarorogo kina ki na domodra tawakilai ka veivakalewai o ira ena vale vakaitamera ni noda gauna ka vakanadakuya na nodra kerekere o ira na lomani keda vakaidina? O ira na dauvakatitiqa tiko oqo era via veivakarusai mai na tosocake ka veivakasewasewani mai na veilaveti. Na nodra vosa ni veivakacacani sa rawa ni kelia sobu na noda bula, vakavuqa mai na veibacani lekaleka sara ka vagauna ni ka vakalivaliva e vakarautaki vakamatau ka nakiti mera vakarusa na noda vakabauta. E ka ni vuku li meda biuta na noda bula vinaka tawamudu ena ligadra na vulagi? E ka vuku beka meda ciqoma na veivakararamataki mai vei ira ka sega na nodra rarama mera solia se o ira ena rairai tiko na nodra nanuma vakaiira ka vunitaki mai vei keda? O ira na dauveivorati vakayalo tawakilai oqo, kevaka era soli vei keda ena kedra ituvaki dina, ena sega ni soli vei ira e dua na noda gauna, ia me vaka ni ra ukucavutaki ira mai ena sala ni vakauitukutuku, ka vunitaki ni vakadikevi, era ciqoma na lewa tawaveiganiti.

Na noda digidigi ni rogoci ira na vakacacana na veika tabu ena tawasei keda mai na rarama veivakabulai ni iVakabula. A vola o Joni: “Sa qai vosa tale vei ira ko Jisu, ka kaya, Oi au na rarama kei vuravura: ko koya sa muri au ena sega ni lako ena butobuto, ena tu ga vei koya na rarama ni bula.”² Nanuma, o ira na lomani keda vakaidina sa rawa ni vukei keda ni taracake na noda vakabauta.

Me vaka ga na noqu a lomaleqa ena qara, eda na rairai lomaleqa talega ni kere veivuke ena noda vakatitiqa. De dua o keda era dau nanamaki veivaqaqacotaki mai kina o ira tale eso, ka da sa gadreva oqo na veivuke. Ni da vakila na rarama kei na veivakacegui e rawa ni solia vei keda na iVakabula e sa rui ka talei me vakawaleni ki na dokadoka, sa rawa ni ra qai veivuke na iliuliu vakauqeti ni Lotu, itubutubu, kei na itokani nuitaki. Era sa tuvakarau ni vukei keda ena rawati ni veivakadeitaki vakayalo ka na vaqaqacotaki keda mai na bolebole ni vakabauta.

Karua, sa dodonu meda nuitaka na Turaga me rawa ni taraicake kina na noda kaukauwa vakayalo vakaikeda. Eda sega ni rawa ni vakanuinui tikoga ki na nodra rarama tale eso. Au a kila ni na sega ni taucoko na butobuto ena qara kevaka au na vodo tikoga ena yasai noqu itokani kei na loma ni veitaqomaki ni ilawalawa. Ia na noqu nanamaki oya me’u na toso ga vakaiau ni’u sa rawa ni raica na rarama. Sa vakatavulici keda na Turaga, “Dou toro voleka mai vei au ka’u na qai toro voleka yani vei kemudou; dou vakasaqarai au vagumatua dou na qai kunei au; dou kerekere ka na soli vei kemudou; dou tukituki ka na dolavi vei kemudou.”³ Sa dodonu meda cakacaka, ka namaka voli ni na vakataucokotaka na Turaga na Nona yalayala me laveti keda mai na butobuto kevaka eda toro voleka ki Vua. Ia, o Setani, ena tovolea me rawai keda ni da a sega ni vakila na veivakayarayarataki ni Yalotabu ka na via rawarawa cake meda muduka ni tovolea tiko.

E vakadreti keda o Peresitedi Dieter F. Uchtdorf ena “vakatitiqataka na nomu vakatitiqa ni bera ni o vakatitiqataka na nomu vakabauta.”⁴ Ena noqu tabanalevu, a kaya wale tikoga oqo e dua na cauravou, “E tiko eso na ka ka’u sa vakila ni sega ni rawa ni vakamacalataki ena dua tale na sala vakavo ga ni ra sa mai vua na Kalou.” Oqo na ivalavala dodonu vakayalo.

Ni sotavi na vakatitiqa se taro eso, sa dodonu meda nanuma na veivakalougatataki kei na veivakilai vakayalo e sa curuma na lomada kei na bula ena gauna eliu ka vakadeitaka na noda vakabauta vua na Tamada Vakalomalagi kei na Luvena, o Jisu Karisito. Au nanuma lesu na veivakasalataki a soli ena dua na serenilotu kilai levu: “Turaga keitou vakabauta [na] nomuni dau dina tu.”⁵ Me vakawaleni ka sega ni kauwaitaki na veika vakayalo sa sotavi oti ena vakayawaki keda mai vua na Kalou.

Na noda sasaga ki na rarama ena vakabulabulataki mai na noda duavata me vakilai na gauna e cilava kina na noda bula. Na ivolanikalou ena gauna oqo e vakamacalataka na rarama ka solia e dua na yalayala kivei ira na vakadonuya: “Raica sa vu ni rarama na Kalou; ia ko koya sa kunea na rarama ka tudei tiko ga vua na Kalou, ena vakararamataki vakalevu; io ena tubu cake tiko ga na nona rarama me yacova na siga lagilagi ko ya.”⁶ Me vaka ga na neimami vodo vakatautauvata voli ki na rarama, na levu ni neimami vosota, sa yaco kina me rarama cake na Nona veivakayarayarataki ki na neimami bula. Me vakataka na rarama ena icavacava ni qara, na Nona veivakayarayarataki ena kauta mai vei keda na yalodei, yalo ni sasaga, vakacegu, ka—vakabibi sara—na kaukauwa me kilai ni bula o Koya.

Katolu, e sega na butobuto e vavaku sara, e veivakarerei sara, se dredre sara me na sega ni rawa ni ulabaleti ena rarama. A vakatavulica wale tikoga oqo o Elder Neil L. Andersen: “Ni tosocake na cakacala ena vuravura, e sa tiko e dua na veivakaduavatataki kaukauwa vakayalo me baleti ira na yalododonu. Ni tacavu na vuravura mai na kena yavu vakayalo, sa vakarautaka tu na Turaga na sala kivei ira na vakasaqarai Koya, ka solia vei ira na veivakadonui levu cake, na veivakadeitaki levu cake, kei na yalodei levu cake ena mua vakayalo era sa lakova voli. Na isolisoli ni Yalo Tabu sa yaco me dua na rarama serau sara ena idromudromu ni siga.”⁷

Kemuni na taciqu kei na ganequ, eda sa sega ni vakawaleni tu meda vakayarayarataki ena itovo kei na veisau kecega ni ivakarau kei vuravura, ia meda sa digidigi. Me rawa ni rawati na veivakaduavatataki kaukauwa vakayalo oqo, sa dodonu meda digitaka na tauri matua ni ivakasala vakaparofita, vakila ka cakacakataka na veivakauqeti vakayalo, talairawarawa ki na ivunau ni Kalou, ka vakasaqara na nomu ivakatakila. Meda sa digidigi. Meda sa qai digitaka na rarama ni iVakabula. Ena yaca i Jisu Karisito, emeni.