Era Kaya na Gone, “Eda sa Ligana”

Era yalo maqusa mai na gone e veiyasai vuravura ki na dua na sasaga ni veiqaravi a tavoca na mekasini ni Lotu. E veisureti na mekasini vei ira na gone mera raica na sala mera veiqaravi kina, ka droini totomuria na ligadra ena dua na pepa, vola na cakacaka ni veivukei o ya ki na droini ni ligadra, ka vakauta yani ki na Liaona.

A ciqoma na mekasini e sivia ni 30,000 na droini ni liga mai vei ira na gone era dodoliga yani mera wasea nodra lomana na iVakabula, vakalougatataki ira na matavuvale kei na itikotiko raraba e vuravura taucoko.

Na veivakauqeti ni sasaga oqo a tadu mai na vosa ni koniferedi ni Epereli 2010 nei Peresitedi Dieter F. Uchtdorf, iKarua ni Daunivakasala ena Mataveiliutaki Taumada, “Sai Kemudou na Ligaqu.” A talanoataka o Peresitedi Uchtdorf na ivakatakarakara i Jisu Karisito a vakacacani ena iKarua ni Valu Levu. Ni ra sa sega ni rawa mera vakacobara lesu na ligana, era sa qai biuta toka e rukuna na lewe ni taoni e kea na vosa: “Sai kemudou na ligaqu.”

A cecere sara na nodra cakacaka ni veiqaravi na gone me vaka ga na droini ni ligadra era a solia. Me kena ivakaraitaki:

A vakauta e rua na droini ni ligana o Natalie S., yabaki 5, mai Hong Kong. E dua a kaya, “Au a vukei tinaqu ena cakacaka wavoki e vale,” ka dua tale, “Au a vukea e dua meu biliga na nona wilijea.”

E vakamacalataka o Erik S., mai Rusia, “Ena siti au tiko kina, e tiko na kena draki batabata sara.” A toki yani ki nona taoni e dua na matavuvale, ka sega tu na nodratou isulu katakata. “Au a solia rawa noqu kote vei Artur,” e kaya o Erik, “sa noqu itau sara o koya.”

A vola ena droini ni ligana o Gabriela P. yabaki tini mai Venezuela: “E noqu koronivuli, keimami a kalasi tiko ni chess na itokani. Au sa vakasaqara tiko e dua me kequ isa kau raica sara e dua na cauravou e vaka e rarawa. Au a vinakata meu vukea kau sega ni kila na sala. A qai voqa mai e dua na domo ni gadrevi ga meu nona itokani. Au sa qai gole ka laki vosa vua. Ia oqo keirau sa veitau dredre sara.”

Era a qai vakaraitaki na droini ni liga ena itikotiko liu ni Lotu e Salt Lake City, Utah, Amerika, me rua na macawa ena Sepiteba kei na Okotova.