2015
Veika eso mai nai ka 185 ni Koniferedi Raraba ni Lotu i Jisu Karisito ni Yalododonu Edaidai
Noveba 2015

Veika eso mai nai ka 185 ni Koniferedi Raraba ni Lotu i Jisu Karisito ni Yalododonu Edaidai

“O iko e dua na luvena tagane se luvena yalewa na Tamada Vakalomalagi,” e kaya o Peresitedi Thomas S. Monson ena soqoni ni mataka ni Sigatabu ni koniferedi raraba. “O lako mai na Nona iserau mo mai bula e vuravura ena dua na tabagauna, mo vakaraitaka yani na nona loloma kei na ivakavuvuli na iVakabula ka vakacilava na nomu rarama ena yaloqaqa me ra raica na tamata kecega. Ni sa cava na gauna oya e vuravura, kevaka o sa cakava na nomu itavi, ena nomu na veivakalougatataki lagilagi mo lesu tale ka bula vata kei Koya me tawamudu” (tabana 88).

E vakaraitaki ena koniferedi raraba oqo na nodratou se qai takali o Peresitedi Boyd K. Packer kei rau o Elder L. Tom Perry kei Richard G. Scott ena Kuoramu ni iApositolo Le Tinikarua. Era tokoni iratou na lewe ni kuoramu vou na lewe ni Lotu: O iratou o Elder Ronald A. Rasband, Gary E. Stevenson, kei Dale G. Renlund.

Veika tale eso:

  • Na nodratou vosa o Elder M. Russell Ballard, David A. Bednar, kei D. Todd Christofferson ena Kuoramu ni iApositolo Le Tinikarua e vakamatatataka na vuna e tuva kina na Nona Lotu na Turaga, me kena yavu na parofita kei na iapositolo, me caka kina Nona cakacaka ka solia vei keda na kaukauwa me da lesu tale Vua (raica na tabana 24, 128, kei na 108).

  • Na nodrau vosa o Peresitedi Russell M. Nelson kei Elder Jeffrey R. Holland ena Kuoramu ni iApositolo Le tinikarua e vakamacalataki kina na bibi ni nodra itavi na marama. E tukuna o Peresitedi Nelson: “Na matanitu ni Kalou ena sega ka na sega ni rawa ni taucoko kevaka era sega na marama era dau cakava na veiyalayalati tabu ka qai rokova tiko, na marama ka rawa ni vosa ena mana kei na lewa ni Kalou!” (draunipepa e 96).

  • E vakadeitaka tale o Elder Dallin H. Oaks ena Kuoramu ni iApositolo Le Tinikarua ni sa “sotava ka vakararawataki na noda iVakabula ena taucoko ni veibolebole kecega vakayago. … Ena vuku ni ka oqo, na Nona Veisorovaki sa solia vua na kaukauwa me vakaukauwataki keda—me solia vei keda na igu me da sotava kecega” (tabana 61–62).