Vula iKatakata Kei Nei Levu Rosi
Mai vei Peresitedi Dieter F. Uchtdorf
Karua ni Daunivakasala ena Mataveiliutaki
Ni ko lakova yani na nomuni salatu ramase ni bula vakatisaipeli, sa noqu masu ni na vaqaqacotaki ena vakabauta na nomuni veikalawa yadua.
Kemuni na ganequ kei na itokani lomani, au marautaka noqu tiko oqo kei kemuni, kau vakavinavinaka meu mai toka tikiva noda parofita lomani, o Peresitedi Thomas S. Monson, Peresitedi, keimami lomani kemuni. Eda rarawataka na nodratou sa mai takali na noda itokani taleitaki ka iApositolo dina ni Turaga. Eda sa nanumi Peresitedi Packer, Elder Perry, kei Elder Scott; eda lomani ratou. Eda masulaki ira kei na nodratou vuvale kei na itokani.
Au dau namaka tiko na soqoni oqo ni koniferedi—na totoka ni sere kei na nodra ivakasala vakauqeti na ganeda e sobuti keda kina vakalevu na Yalotabu. E yaco meu dua na tamata vinaka cake ni oti noda mai veimaliwai.
Niu vakasamataka na veika meu cauraka vei kemuni nikua, e lako na noqu vakanananu ki na sala ni nona veivakavulici na iVakabula. E ka talei na Nona rawa ni vakavulica na veika dina cecere ena italanoa rawarawa sara. E veisureti na Nona italanoa vakaibalebale me ratou ciqoma na Nona tisaipeli na ka dina sega walega ena vakanananu ia e yalodratou ka semata na ivakavuvuli tawamudu ki na nodratou bula ena veisiga.1 E dauniveivakavulici talega o noda Peresitedi Monson lomani mai na veika e sotava ka tara na yaloda.2
Nikua, au na wasea tiko na noqu itukutuku ena veika au nanuma ka vakila ena dua na italanoa. Au veisureti mo ni vakarorogo ena Yalotabu. Ena vukei kemuni na Yalotabu ena itukutuku me nomuni ena italanoa vakaibalebale oqo.
Nei Levu Rosi
Oqo na italanoa ni dua na goneyalewa o Eva. E rua na ka bibi mo ni kila baleti Eva. E dua o ya ni yabaki 11 tiko ena italanoa oqo. Kena ikarua o koya e sega sara vakadua ni gadreva me laki tiko vei Nei Levu Rosi. Sega sara ga. E sega.
Ia e sa gadrevi vei tinai Eva me na laki sele ka na dede na nona vakabulabula tiko. Rau sa qai vakauti Eva na nona itubutubu ena vula ikatakata me laki tiko vei Nei Levu Rosi.
E nanuma kina o Eva, ni udolu sara na vuna e cala kina na lewa oqo. Kena imatai, ni na sega ni tiko vata kei tinana. Sa kena ibalebale talega ni na biuta nona matavuvale kei na itokani. Vakakina, o koya e sega tu ni kilai Nei Levu Rosi. Sa toka vinaka toka o koya, vinaka vakalevu, vanua saraga e toka kina.
Ia se cava sara na kena veibataki se tavuki ni mata ena sega ni veisautaka na lewa. Sa mani tawa na beqi o Eva ka vodo yani vakabalavu kei tamana ki na itikotiko i Nei Levu Rosi.
Ena gauna ga e butu kina ki loma ni vale o Eva, sa cata sara ga.
Sa makawa na ka kecega! Sa tu ga ena veivanua na veiivola makawa, tavaya dui rokaroka, kei na vokete palasitika sinai ena iyaya ni ukuuku, na bukui kei na ibulukau.
E tiko duadua ga e kea o Nei Levu Rosi; ka se sega tu ni vakawati. E itokani duadua ga e kea e dua na pusi dravu ka dau davo toka ga e cake ena rumu kece, ka rai toka mai ra me vaka e dua na taika viakana.
Na vale mada ga e rairai galili. E tu sara e lomanivanua, ka veiyawaki kina na veivale. E sega ni dua vakataki Eva e tu voleka e kea. Sa qai galili ga kina o Eva.
Taumada a sega sara ni kauwaitaki Nei Levu Rosi vakalevu. A nanumi tinana tikoga vakalevu. So na gauna, a yadra tu ena bogi levu, ka masu e yalona taucoko me bula vinaka o tinana. E dina ga ni a sega ni yaco mai vakasauri, a vakila o Eva ni sa wanonovi tinana tiko na Kalou.
Sa qai yaco mai na itukutuku ni sa daumaka na veisele, ia oqo na ka me cakava o Eva o ya me vosota me oti mada na vula ikatakata. Isa, sa cata sara o koya na vosota tiko!
Ni sa mai vakacegu na nona vakasama baleti tinana, sa tekivu me vakanamata vakalailai o Eva vei Nei Levu Rosi. E marama levu toka o koya—e levu na ka kece baleti koya: na domona, na matana dredredre, nona itovo. E dredre vua me veitosoyaki vakalevu, ia e dau lagasere ka dredre ni cakacaka, ka robota na vale na domo ni nona dredre. Ena veibogi ena dabe toka ena idabedabe vavaku, taura nona ivolanikalou, ka wilika e cake. Ni sa wiliwili, e qai dau kaya vakaoqo “Isa, me a kakua ni cakava o ya!” se “Cava meu bureitaka me isau ni noqu rawa ni tiko ekea!” se “E sega beka ni ka totoka duadua me rogoci o ya!” Ena veiyakavi ni rau dau tekiduru ka masu ena loga nei Eva, sa dau totoka vakaoti na masu nei Nei Levu Rosi, ni vakavinavinakataka na Tamada Vakalomalagi na manumanu vuka kei na veivunikau, na dromu ni siga kei na kalokalo, kei na “veivakurabuitaki ni bula.” E nanuma kina o Eva ni kila vinaka tu na Kalou vaka e dua ga na nona itokani o Rosi.
Toso na gauna, a kurabui o Eva ena nona mai kila: Ni o Nei Levu Rosi sa dua dina na tamata mamarau e se qai bau kila vakadua!
Ia e rawa vakacava qo?
Na cava e mamarautaka tiko o koya?
E sega tu ni vakawati, e sega na luvena, e sega e dua me nona itokani vakavo ga o pusi rerevaki o ya, ka dredre vua na veicakacaka lalai vakataka na vesuka na wa ni nona ivava kei na taubale e cake.
Ni gole i taoni, e dau dara, na isala roka ramase lelevu veivakamadualaki. Ia e sega ni dua e dredrevaki koya. Ia, era na tu wavoliti koya mai, mera via vosa vua. A qasenivuli tu e liu o Rosi, ka sa matau tu vei ira nona gonevuli e liu—ka ra sa qase oqo ka ra sa vakaluveni—mera sota ka veitalanoa. Era vakavinavinakataki koya ni veivakauqeti vinaka ki na nodra bula. Era veidredrevaki vakavuqa. Ka so madaga na gauna era tagi.
Ni toso na vula ikatakata, sa vuqa sara na nodrau gauna vata o Eva kei Rosi. Rau dau taubale vakabalavu, ka kila mai kina o Eva na kedrau duidui na siparo kei na viniti. E vakatomi beri ni veikau ka caka jamu mai na moli. A kila talega ni o buna vakarua a biuta mai nona vanua lomani, takosova na wasawasa, ka taubaletaka na veitokaitua me tiko kei ira na Yalododonu.
A kila talega kina oqo o Eva: ni sega walega ni tamata mamarau se bau kila o Nei Levu Rosi, ia a mamarau cake o Eva ena gauna e tiko vata kina kei koya.
Sa oti sara tiko vakatotolo na vula ikatakata. Ena sega walega ni bera, sa kaya mai o Nei Levu Rosi ni sa kena gauna me sa lesu i nodratou o Eva. Dina ga ni a diva makawa tu mai o Eva na siga oqori ni a se qai yaco mai, sa sega toka ni macala oqo na ka ena yacovi koya. Sa kila o koya ni sa na dau lai nanuma vakalevu tu mai na vale makawa duatani oqo kei na pusi dauwanono kei nona Nei Levu Rosi.
Ni vo e dua na siga me sa mai kauti koya o tamana, a taroga kina o Eva na ka a vakasamataka voli toka mai e veimacawa: “Nei Rosi, na cava o mamarau tu ga kina?”
A raici koya vakavinaka o Nei Rosi ka dusia vua e dua na droini e lili toka ena rumu e liu. Oqo a solia vakailoloma mai e dua na itokani voleka ka vuku sara.
“Na cava o raica e keri?” a taroga.
Sa dau raica tu iliu o Eva na droini oqo, ia a sega sara ni raica vakavoleka. A ladedali tiko e dua na goneyalewa lailai ena nona vinivo ni painia ena sala karakarawa ramase. Era drokadroka bulabula na co kei na veivunikau. A kaya o Eva, “E droini ni dua na goneyalewa lailai. E vaka me ladedali tiko.”
“Io, e dua na goneyalewa lailai painia e ladedali mamarau tiko,” a kaya o Nei Rosi. “Au kila ni vuqa sara na nodra veisiga butobuto ka rerevaki na painia. A dredre sara na nodra bula—eda sega ni vakasamataka rawa. Ia ena droini oqo, e ramase ka nuitaki na ka kece. Na goneyalewa oqo e marautaka na nona veikalawa, ka toso tiko yani i liu ka lako cake.”
E galu toka ga o Eva, ka tomana tale o Nei Levu Rosi, “E vuqa na ka e sega ni lako vinaka ena bula, sa rawa kina vua e dua me sotava ka solegi ena nuinuikara kei na lomaocaoca levu. Ia au kila eso na tamata, ni sega ni vinaka na bula, era rai matua ki na veivakurabuitaki kei na mana ni bula oqo. Oqo o ira era tamata mamarau sara au bau kila.”
“Ia,” a kaya o Eva, “o na sega ni rawa mo tabaka na suwiji mo rarawa tu ga sa laki marau sara,” a kaya o Eva.
“Sega, e sega beka,” a dredre vakamalua o Nei Rosi, “ia a sega ni tuva na Kalou meda mai rarawa. A buli keda meda bula reki!3 Kevaka meda nuitaki Koya, ena vukei keda meda raica na ka vinaka, ramase, na veika nuitaki ni bula. Ka vakadeitaki, ena ramase cake o vuravura. Sega, e sega ni yaco mai vakasauri, ia na ka dina, e vica na ka vinaka e rawata? E vaka vei au ni veika vinaka duadua, me vaka na madrai buli e vale se jamu moli, e taura na vosota kei na cakacaka.”
A vakasamataka o Eva ka kaya, “E rairai sega beka ni rawarawa vei ira e sega ni vinaka na veika kece ni nodra bula.”
“Eva daulomani, o nanuma beka ni taucoko tu na noqu bula?” A dabe vata yani kei Eva ena idabedabe vavaku o ya. “A so talega noqu gauna ni veilecayaki, sa sega tale niu via toso tiko.”
“O iko?” a taroga o Eva.
A deguvacu o Nei Rosi. “E levu na ka au a vinakata ena noqu bula.” Ni sa vosa tiko, sa luluvu mai na domona ka se qai rogoca vakadua oqo o Eva. “A sega ni yaco e vuqa na ka. A kavoro veitarataravi na utoqu. Dua na siga au sa vakila ni sa na sega ni yaco rawa me vaka au a nuitaka tu. A siga veilecayaki duadua. Au a sa vakarau soro ka meu sa bula rarawa tu ga yani.”
“A cava o qai cakava?”
“Sega ni dua na ka. Au sa cudru tu ga. A dredre me dua e tiko vata kei au.” E dredre sara vakalailai o koya, ia a sega ni vaka na nona dau dredre rogo levu, ka dau robota na rumu. Ena noqu vakasama au sa qai dau lagata tu “‘e sega ni dodonu’. Ia sa qai yaco meu raica e dua na ka a veisautaka vakadua na noqu bula.”
“Na cava o ya?”
“Vakabauta,” a dredre o Nei Rosi. “Au sa kunea na vakabauta. A qai veimuataki na vakabauta ki na inuinui. A solia vei au na vakabauta kei na inuinui meu yalonuidei ni na yaco na siga me vakaibalebale na veika kece, ena vuku ni iVakabula, ena vakatudonutaki na veika cala. Ni oti o ya, au raica ni salatu e mataqu sa sega ni dredre ka duka me vaka noqu nanuma. Au sa tekivu raica na karakarawa ramase, na drokadroka ramase, kei na damudamu kata, ka meu sa digitaka—meu sa yalorarawa ka lomabibi voli ena sala kuvu ni vakalomalomani au, se meu sa na tekivu vakabauta, daramaka na isulu ramase, dara noqu ivava ni danisi, ka ladedali yani ki na salatu ni bula, ka lagasere yani.” Ia oqo sa lade voli na domona me vaka na goneyalewa ena droini.
A tatara yani o Nei Rosi ki na nona teveli ka taura mai e yasana na nona ivolanikalou makawa. “Au sega ni vakabauta ni a leqa dina noqu vakasama—au sega ni vakabauta ni o rawa ni lako tani mai kina. Ia au a vakabauta dina niu sa rarawa sara! Io, a so dina na noqu siga butobuto, ia na noqu yalolailai kei na lomaleqa ena sega ni veisautaka o ya—e vakacacana ga vakalevu. Na vakabauta na iVakabula a vakavulica meu kila se cava sara a yaco ena veigauna sa oti, ena vakaicavacava ena reki na kequ italanoa.”
“O kila vakacava qo?” a taro o Eva.
A qai cega o Rosi e dua na tiki ni nona iVola Tabu ka kaya, “E tukuni toka oqo:
“‘Ni Kalou … ena tiko vata kei ira ko koya, ia era na nona tamata, ia ko koya na Kalou ena tiko vata kei ira, me nodra Kalou.
“‘Ia na Kalou ena tavoya tani kecega na wai ni mata mai na matadra, ia ena sega tale na ciba, se na rarawa, se na tagi, ka na sega tale na vutugu: ni sa takali tani na ka makawa.’”4
A raici Eva o Nei Levu Rosi. A vosa malua ena dredre matamarau, ka vaka me luluvu na domona, “E sega beka ni oqo na ka totoka duadua o sa bau rogoca?”
E nanuma o Eva, ni rogo totoka dina.
A cega tale o Nei Rosi e vica na drauna ka dusia e dua na tikina me wilika o Eva: “Sa sega na mata sa kunea, se na daliga sa rogoca, ka sa sega ni curu ki na loma ni tamata, na veika sa vakarautaka na Kalou me nodra era sa lomani koya.”5
“Ena veisiga ni mataka lagilagi vaqo,” a kaya o Nei Rosi, “cava na vuna meda dromuci tu kina ena veika makawa se veika nikua era sega ni yaco mai me vaka eda a tuvanaka?”
A deguvacu o Eva. “Wawa mada vakalailai,” a kaya. “O kaya tiko beka ni marau o ya meda namaka tikoga na marau ena siga ni mataka? Sa tu beka ena bula tawamudu na marau taucoko? E rawa beka ni so me yaco nikua?”
“Io, e dina e rawa ni yaco!” E kaya mai o Nei Rosi. “Luvequ lomani, nikua e tiki ni bula tawamudu. E sega ni laki tekivu walega ni da sa mate! Na vakabauta kei na inuinui ena dolava na matamu ki na marau sa tu e liu ena gauna oqo.
“E dua na serekali e kaya, ‘Na tawamudu—e oka kina o Nikua.’6 Au sega ni vinakata me oka ena noqu tawamudu na veika butobuto ka rerevaki ‘Nikua.’ Kau sega ni vinakata meu bulataka ena galili butobuto, bula katakata, matabuto, ka rarawa ki na kena itinitini. Na inuinui e a solia vei au na vakabauta au gadreva meu bula reki nikua!”
“Cava o sa qai cakava?” a taro o Eva.
“Au sa qai vakabauta na yalayala ni Kalou ena noqu bulataka na veika e vakaibalebale cake. Au a laki vuli. Rawata noqu vuli. Kau rawata sara na noqu cakacaka au a taleitaka.”
A vakasamataka na ka oqo o Eva ka kaya, “Ia na bula vakacakacaka a sega ni vakavuna na nomu marau. E vuqa na daucakacaka era sega ni bula marau.”
“E rawa vakacava mo vuku ni ko se gone sara?” A taro o Nei Rosi. “O dina sara. Ni vuqa sara vei ira na daucakacaka, sega ni marau oqo era sa guilecava e dua na ka e ka bibi sara ki vuravura taucoko—o ya na ka a kaya o Jisu ni sa uto ni Nona kosipeli.”
“Na cava o ya?” a taro o Eva.
“Sai koya na loloma—na loloma uasivi i Karisito,” a kaya o Rosi. “Mo kila, ni veika kece ena kosipeli—na dodonu kei na veika me caka kei na mo kakua ni cakava —e veimuataki ki na loloma. Ni da sa lomana na Kalou, eda na gadreva meda qaravi Koya. Eda na vinakata meda vakataki Koya. Ni da sa lomani ira na noda neiba, eda na sega ni vakasamataka vakalevu na noda leqa ka vukea eso mera walia na nodra leqa.”7
“Oqori na ka eda na marau kina?” a taro o Eva.
A deguvacu ka dredre o Nei Levu Rosi, ka tonawanawa na matana. “Io, daulomani. Oqori na ka eda na marau kina.”
Sa Veisau Vakadua
Ena siga e tarava sa mokoti nona Nei Levu Rosi o Eva ka vakavinavinakataka na veika kece sa cakava. A lesu o Eva ki nodratou vuvale kei na itokani kei na nona vale kei na itikotiko raraba.
Ia sa sega tale ni vaka e liu o koya.
Ni sa qase cake mai o Eva, e dau nanuma lesu na vosa nei nona nei levu Rosi. A qai vakamau o Eva, susugi gone, ka bula balavu totoka.
Ena dua na siga, ni a tu e loma ni nona vale, ni raica tiko na droini ni goneyalewa e sulu vakapainia ka ladedali tiko ena salatu karakarawa ramase, sa vakila ni sa mai yacova o koya na yabaki ni bula vata kei nona nei levu Rosi ena vulaikatakata totoka o ya.
Ni raica qo o koya, a vakila e lomana e dua na masu talei. Sa vakavinavinakataka kina o Eva na nona bula, nona matavuvale, na kosipeli vakalesuimai i Jisu Karisito, kei na vula ikatakata makawa o ya ni a vakavulici koya kina o Nei Levu Rosi8 ena vakabauta, inuinui, kei na loloma.9
Na Veivakalougatataki
Kemuni na ganequ lomani, noqu itokani vinaka kei Karisito, au nuitaka ka masulaka me na tara na lomamuni e dua na ka ena italanoa oqo ka vakauqeta na yalomuni. Au kila ni bula tiko na Kalou ka lomani kemuni yadua o Koya.
Ni ko lakova yani na nomuni salatu ramase ni bula vakatisaipeli, sa noqu masu ni na vaqaqacotaki ena vakabauta na nomuni veikalawa yadua; ka na dolava na matamu ena inuinui ki na lagilagi nei Tamada Vakalomalagi me solia vei kemuni; kei na loloma vua na Kalou kei ira na Luvena me vakasinaita tu na yalomuni. Niu dua na iApositolo ni Turaga, au sa biuta oqo me noqu ivakadinadina kei na veivakalougatataki, ena yaca i Jisu Karisito, emeni.