Raica na Tinamu

Mai vei Elder Jeffrey R. Holland

Ena Kuoramu ni iApositolo Le Tinikarua

Sega ni dua na loloma ena vuravura oqo me bau tautauvata ki na loloma uasivi i Jisu Karisito me vakataka na nona lomana vakaidina na luvena e dua na tina yalodina.

Au duavata kei kemuni kece meda kidavaki Elder Ronald A. Rasband, Elder Gary E. Stevenson, kei Elder Dale G. Renlund kei na dui watidratou ki na veimaliwai kamica duadua ratou se qai bau kila.

Ena nona parofisaitaka o Aisea na Veisorovaki ni iVakabula, a vola kina, “Sa colata ko koya na noda rarawa, ka sa colata na rarawa ni lomada.”¹ E dua na raivotu cecere nikua a vakamatatataka ni o “[Jisu] a lako mai ki vuravura … [me] colata na nodra ivalavala ca na kai vuravura.”² E rau vakadinadinataka na ivolanikalou makawa kei na ka vou ni “sa dauvakabulai ira kina ko koya; sa keveti ira ena veisiga kece e liu.”³ E kerei keda kina e dua na sere taleitaki meda rogoca “na Turaga Tui Sau!”⁴

Colata, taura, keveta, vueta. Oqo na veivosa kaukauwa, ka qaqa vakamesaia. Era solia na veivukei kei na inuinui ni veitaqomaki voli ena vanua eda tiko kina ki na kena meda yaco kina—ia e sega ni rawa ke sega na veivuke. O ira na vosa oqo era vakaibalebaletaka talega na icolacola, dredre, oca kei na mosi—na vosa era sa dodonu sara ena kena vakamacalataki na Nona ilesilesi, ena kena isau tawa vakamacalataki rawa, e laveti keda cake ni da sa lutu, kauti keda ki liu ni da sa malumalumu mai, vueti keda bula yani i vale ni da sega ni taqomaki rawa. “A sa talai au mai ko Tamaqu,” a kaya o Koya, “meu mai laveti cake ena kauveilatai; … ia au sa laveti cake … ena laveti ira cake talega … e … mataqu.”⁵

Ia ko ni sa rawa ni rogoca na veivosa oqo e dua tale na sasaga vakatamata eda vakayagataka kina na veivosa vakaoqo colata kei na taura, keveta kei na laveta, cakacaka kei na vueta. A kaya kina o Jisu vei Joni ena gauna sara ga ni Veisorovaki, sa kaya vakakina vei keda kece, “Raici tinamu!”⁶

Au vakaraitaka nikua ena itutu-ni-vunau oqo na veika sa dau tukuni oti eke: ni sega ni dua na loloma ena vuravura oqo me bau tautauvata ki na loloma uasivi i Jisu Karisito me vakataka na nona lomana vakaidina na luvena e dua na tina yalodina. Ena nona vosa vakamesaia o Aisea, a gadreva me tukuna na loloma i Jiova, a vakaraitaka na irairai ni nona yalodina e dua na tina. “E dua li na yalewa me guilecava na luvena sa sucu?” a taroga. E ka vakatani, a kaya, ka dina ni sega ni ka vakatani me vaka ni da nanuma ni na guilecavi keda na Karisito.⁷

Na mataqali loloma qaqa vakaoqo sa “dauvosota vakadede, sa yalovinaka, … sa sega ni qara na ka me nona ga, … ia … sa ubia na ka kecega, sa vakabauta na ka kecega, sa vakanuinuitaka na ka kecega, sa vosota na ka kecega.”⁸ Na kena veivakayaloqaqataki duadua, ni yalodina vakaoqo ena “sega ni mudu.”⁹ “Ni na takali na veiulunivanua ka yavavala na veiulunikoro,” e kaya o Jiova, “ia na noqu yalololoma ena sega ni takali vei iko.”¹⁰ Era kaya vakakina na tinada.

Eda raica, ni sega walega ni ra colati keda, ia era tomana tiko nodra colati keda. E sega walega ni icolacola ni bukete ia na icolacola ni bula taucoko e yaco kina na veiqaravi vakatina me dua na rawa-ka cecere duadua. E dina, e dau yaco eso na veika rarawa, ia e vuqa na tina era kila tu vakavinaka, ka vakaidina ni oqo e dua na veivakabauti tabu cecere sara. Na bibi ni kena kilai oqo vakabibi vei ira na tina gone, e rawa ni veivakayalolailaitaki.

A vola vaoqo vei au e dua na tina gone totoka: “E rawa me lomana vakalevu vakacava e dua na tamata e dua na gonelailai ena nomu solia vakalevu kina na nomu galala? Ena rawa vakacava me kaukauwa na loloma vakatamata ena nomu soli iko ki na ilesilesi, malumalumu, nuiqawaqawa, kei na mosi ni yalo ka lesu tale tiko mai vakalevu? Na mataqali loloma vakatamata cava o na vakila, ni sa dua na luvemu, ni nomu bula, sa na sega tale vakadua, ni nomu duadua ga? Na loloma vakatina sa dodonu me vakalou. E sega tale ni dua na kena ivakamacala. Na veika era cakava na tina sa gacagaca yaga ki na cakacaka i Karisito. Ni da kila oqo sa rawa ni tukuna vei keda na kaukauwa ni loloma vakaoqo ena tiko ena kena e tawavosoti rawa ka duatani sara, ka na lako tiko ga mai, me yacova ni sa taqomaki ka vakabulai na iotioti ni gone ena vuravura, ka [meda qai] kaya vata kina kei Jisu, ‘[Tamaqu!] [au] sa vakaotia na cakacaka ko ni a solia mai vei au meu kitaka.’”¹¹

Ena noda vakananuma tiko na totoka ni ivola oqo, meu wasea mada e tolu na ka au sotava me baleta na nodra cecere ni veivakauqeti na tina, a yaco ena noqu cakacaka vakalotu ena vica na macawa sa oti:

Na imatai ni noqu itukutuku sa ivakaro, e tukuna tale vei keda ni sega ni sasaga yadua vakatina ena tini vakaivola ni italanoa, ena sega toka mada. Na veivakavotui oqo a dewa mai na dua na veivosaki kei na dua na itokani vinaka ni 50 na yabaki sa mate laivi tiko mai na Lotu oqo e kila tu e yalona ni dina. Se cava sara na levu ni noqu saga meu vakacegui koya, a sega ni rawa meu solia vua na vakacegu. Oti sa qai mua mai. “Jeff” a kaya mai, “se cava sara na rarawa au na sotava niu tu e matani Kalou, ia au sega ni rawa meu tu e matai tinaqu. Sa cecere sara vua na kosipeli kei iratou na luvena. Au kila niu sa voroka na yalona, ka sa voroka talega na yaloqu.”

Au vakadeitaka ni nona sa qai takali, a ciqomi noqu itokani o tinana ena yalololoma sara; na ka era dau cakava na itubutubu. Ia na veivunauci e tiko ena italanoa oqo ni sa rawa vei ira na gone mera voroka na yaloi tinadra. Ia, eda raica talega eke, e dua na veivakatauvatataki vakalou. E sega tale ni gadrevi meu tukuna ni a mate o Jisu ena kavoro ni yalona, ni sa oca ka vakaogai ena colata na ivalavala ca kei vuravura. Ia o koya gona ena veitemaki, meda sa qai “raica na [tinada]” vakakina na noda iVakabula ka kakua ni vakataqara vei rau na rarawa ni noda caka cala.

iKarua, e baleta e dua na cauravou a laki kaulotu ena kilikili ia na nona digidigi ga a lesu koso kina mai vale ena vuku ni veivinakati vakamataqali vata kei na veilecayaki a sotava kina. A se bula kilikili tikoga, ia sa vakaleqai sara tiko na ivakatagedegede ni nona vakabauta, sa lomararawa sara tiko vakalevu, ka sa toso cake tikoga nona rarawa vakayalo. Sa yaco kina me mosi na yalona, veilecayaki, cudru, ka galili.

E levu na gauna nei peresitedi ni kaulotu, peresitedi ni iteki, kei bisopi e ratou vakadeuca ka tagicaka ka masulaki koya kina ena nodratou karoni koya, ia na levu ni nona mavoa e kubuta tu ga ka ratou sega ni tara rawa. Na tama dauloloma ena italanoa oqo a talaucaka taucoko na yalona me vukea na gone oqo, ia ena ituvaki osooso ni nona cakacaka oqo e tukuna tiko ga ni veibogi balavu butobuto ni yalo ni tamata a sotava ga o cauravou oqo kei tinana. Ena siga kei na bogi, taumada ena vica na macawa, oti sa mani vakavula ka yaco me vakayabaki sara, e rau saga voli vata na veivakabulai. Ena veigauna ni rarawa titobu (vakavuqa vei cauravou ka so na gauna vei tinana) kei na rere tawa oti rawa (vakavuqa vei tinana ka so na gauna vei cauravou), a colata o tinana—oqori tale na vosa totoka, ka veivakaogai o ya—a cauraka vei luvena cauravou oqo ni vakadinadinataka na kaukauwa ni Kalou, na Nona Lotu, ia vakabibi Nona loloma vua na cauravou oqo. Ena igu vata ga a vakadinadinataka o tina oqo na nona loloma vei luvena, sega ni vakadirideini, ka sega ni oti rawa. Ni kena semati vata mai e rua na yavu qaqa oqo ni nona bula sara ga—o ya na kosipeli i Jisu Karisto kei na nona matavuvale—a talaucaka na yalona ena masu ena veigauna tawa oti rawa. E lolo ka tagi, tagi ka masu, e vakarorogo ka vakarorogo ni sa tukuna tikoga vua o nona cauravou ni sa kavoro tikoga mai na yalona. Sa mani keveti—koya tale—ia ena gauna oqo sa sega ni ciwa na vula. Ena gauna oqo a vakasamataka o tinana ni nona mosi oqo me vukea na leqa nei luvena ena tawamudu.

Ia ena loloma soliwale ni Kalou, kei na yaloqaqa nei tinana, kei na nodra veivuke e vuqa na iliuliu ni Lotu, itokani, lewe ni matavuvale, kei ira na vuku, sa raica rawa o tinani gone dauvakamamasu oqo ni sa na yacova rawa o nona cauravou na vanua yalataki. E ka ni rarawa ni veivakalougatataki vakaoqo e sega, se bera beka ni yaco, vei ira taucoko na itubutubu era lomaleqataki ira vakabibi na luvedra ena veituvaki duidui e vuqa, ia sa kune eke na inuinui. Ia meu kaya, sa sega ni mana vakasauri na veisau ni gagano vakayago nei cauravou oqo—a sega ni dua a nanuma ni na vakakina. Ia sa veisau sara tiko mai vakalalai na yalona.

Sa tekivu lesu tale ki lotu. Sa lomana ga me kania na sakaramede ena kilikili. Sa taura tale e dua na nona ivolatara ni valetabu ka ciqoma e dua na veikacivi me qasenivuli ni semineri ena mataka lailai, ka gugumatua sara kina o koya. Ia oqo, ni oti e lima na yabaki, sa mai kerekere tale o koya, ena veivuke vakalevu ni Lotu, sa curuma tale na buturara ni kaulotu me vakacavara kina na nona qarava na Turaga. Au a tagicaka na nona yaloqaqa, dodonu, kei na sasaga ni cauravou oqo me vakavinakataka nona bula ka maroroya na nona vakabauta. Sa kila tu o koya ni dinau levu tu ki na vuqa na tamata, ia e kila ni dinau levu sara ki na rua na tamata vakamesaia ena nona bula, e rua a colata ka keveti koya, mosi vata kei koya ka vueti koya—o nona iVakabula, na Turaga o Jisu Karisito, kei marama tinana qaqa, veivueti, ka dau yalololoma dina.

Kena iotioti, oqo mai na kena vakatabui tale na Valetabu e Mexico City ena tolu na macawa sa oti. E kea vata kei Peresitedi Henry B. Eyring au a raica kina na itokani lomani oqo o Lisa Tuttle Pieper ni tucake tu ena soqo veivakauqeti ni veivakatabui oqo. Ia a dredre toka na nona tucake baleta ni a taura cake toka ena dua na ligana na luvena yalewa lomani, o Dora, ia ena ikarua ni ligana a saga tiko me taura cake na ligai Dora matau wadamele me rawa kina vua na luvena goneyalewa talei tawamudu oqo ni Kalou me yalovaka e dua na itavoi vulavula ka, ena godro e kila duadua ga o koya kei ira na agilosi mai lomalagi, me kailavaka yani, “Osana, osana, osana vua na Kalou kei na Lami.”¹²

Kivei kemuni taucoko na tinai keimami ena veivanua kecega, ni veisiga sa oti, nikua, se veisiga ni mataka, au kaya vei kemuni. “Vinaka vakalevu na vakasucumi ira na gone, siviraka na yalo, bulia na itovo, ka vakaraitaka na loloma uasivi i Karisito.” Kivei Tinada o Ivi, kivei Serai, Rapeka, kei Raijieli, kivei Meri mai Nasareci, vakakina vei Tinada mai Lomalagi, au kaya, “Vinaka vakalevu na nomuni ilesilesi bibi sara ena kena vakayacori na inaki ni veigauna tawamudu.” Kivei kemuni na marama tina taucoko ena veituvaki kecega, vakakina vei kemuni na sasaga bula tiko—kivei keda kece—au kaya, “Ni yalovakacegu. Vakabauta na Kalou kei iko. O ni sa qaqa tiko mai na kena o ni nanuma taumada. E dina, ni sai kemuni na dauveivueti ena Ulunivanua o Saioni,¹³ ka vakataka na Vakavuvuli ko ni sa muria tiko, ni nomuni loloma sa ‘sega ni mudu.’”¹⁴ Sa sega tale e dua meu vakacerecerea cake vakalevu. Ena yaca i Jisu Karisito, emeni.