Na Dina Rawarawa ka Bibi

Mai vei Elder Gary E. Stevenson

Ena Kuoramu ni iApositolo Le Tinikarua

Na Tamada Vakalomalagi sa vakaisosomitaka na gauna ni veivakararawataki meda sa na bula tiko ena taucoko ni gauna.

Taciqu kei na ganequ, sa balavu sara mai na gauna e vakayacori kina na koniferedi me ratou dabe tu e cake o Peresitedi Boyd K. Packer, kei rau o Elder L. Tom Perry kei Eldeer Richard G. Scott ka ratou na vosa ena dua vei ira na na soqoni ni koniferedi. Makare vinaka tu na noda vakananumi iratou kau na cavuta na noqu vakavinavinaka vei iratou ena duidui ka dei vinaka tu ni nodratou kila kei na ivakadinadina kei Jisu Karisito kei na Nona Veisorovaki.

Meu tomana, o au, me vakai kemuni, sa da vaqaqacotaki ena noda tokoni Peresitedi Thomas S. Monson me parofita, daurairai, ka dauvakatakila, kau raica cake na nona yalodina vakaiapositolo ka sa rauta mai oqo ni 50 na yabaki.

Sa vakakina ena mataka ni siga Tusiti ena macawa oqo ni oti toka vakalailai na 9 na kaloko ni qai vakarau bose tiko na Matabisopi Veiliutaki kei iratou na Mataveiliutaki ni iWasewase e Esia, ni ratou lako mai kina koniferedi raraba oqo, kau qai kacivi mai meu laki sota vata kei Peresitedi Monson kei rau na nona daunivakasala. Dua na gauna lekaleka oya niu sa curu yani kina rumu ni bose veibasai kei na nona valenivolavola, kau rairai vaka au taqaya ena noqu dabe veibasai toka mai vei iratou ka qai vosa mai me vakayalodeitaki au. E a kaya, ni kila noqu yabaki, niu sa rairai gone sara ga mai na noqu yabaki.

Vakalailai ga, sa tukuna sara mai o Peresitedi Monson ni nona sa mai gusuna tiko na Turaga sa mai vakadewataka tiko na veikacivi kina Kouramu ni Le Tinikarua vei au. E a tarogi au se’u na vakadonuya na veikacivi, ka muria yani e dua na tama ni dalaga ni kidrowa vakaitamera kau mai vakadonuya yani na veikacivi. Ni bera niu qai tuvana yani na levu ni noqu kidrowa, ka levu ga na vakilai niu sega ni yacova na ivakatagedegede o ya. Sa qai kaya cake mai o Peresitedi Monson ena nona vakamacalataka na gauna e a kacivi kina ena vica na yabaki sa oti mai vei Peresitedi David O. McKay me iApositolo, ka vakila talega kina o koya na nona sega ni veiraurau. A kaya ga mai ena domo malumu, “Bisopi Stevenson, na Turaga ena vakaiyaragitaki ira e kaciva mera veiqaravi.” Na veivosa rogo malumu oqori ni dua na Parofita sa itakataka ni yalovakacegu, na ruru ena gauna ni cava kei na dua na gauna ni vakadeitaki ni yalo mai na gauna o ya me yacova mai nikua.

Au laki talaucaka vei watiqu o Lesa na ka au se qai wasea ga oqo vei kemuni ena siga tikoga o ya ni keirau sa laki dabe vata toka ena dua na tutu vakanomodi ni Lomanibai ni Valetabu ka sarava tu yani na valetabu kei na vale kilai na Tabernacle ni duri tu mai e matai keirau. Ni keirau vakananuma lesu na veika e yaco ena siga o ya, keirau raica ni keirau dei toka ena neirau vakabauti Jisu Karisito kei na veika keirau kila baleta na yavu ni bulamarau. Oqo sa veimuataki sara ga yani kina titobu ni noqu lomani Lesa. O koya na rarama ni matanisiga ena noqu veisiga ka dua na luvena yalewa nuitaki na Kalou. Sa dua na dauveiqaravi gugumatua ka sa dauloloma sara ga kina tamata kecega. Au na tovolea meu bula ka ciqoma na veivakalougataki ena neirau me tawamudu.

Au vakaraitaka na noqu lomani iratou na luvei keirau tagane e lewe va kei na nodratou matavuvale; e tolu vei iratou eratou tiko oqo eke vata kei na watidratou, na tinadra na ono na makubui keirau; na kena ikava, e kaulotu tiko, ka sa ciqoma na veivakadonui me sarava na koniferedi oqo ena satelaiti ka ni sa oti oqo na gauna ni nodra yadra na daukaulotu ka rau sa sarava toka oqo kei nona peresitedi ni kaulotu kei na watina ena nodratou itikotiko mai Taiwan. Au lomani iratou kece kei na nodratou lomana na iVakabula kei na kosipeli.

Au vakaraitaka na noqu lomani iratou kece na lewe ni noqu matavuvale; vua na marama tinaqu kei tamaqu, ka sa mai yali ena yabaki sa oti, ka sa vakadreta sara ga vei au na ivakadinadina ka sa yaco me kadre e lomaqu mai na gauna au a se gonelailai kina. Au tomana na vakavinavinaka oqo vua na taciqu, iratou na ganequ kei ira na dui watidratou, vakakina na matavuvale nei Lesa ka ra lewe levu sara era tiko oqo eke nikua. Au vakatetea yani na vakavinavinaka oqo vei kemuni kece na lewe voleka vakakina vakayawa ni noqu vuvale, itokani, daukaulotu, iliuliu, kei na qasenivuli ni noqu gauna.

Au sa vakalougatataki vakalevu sara ena noqu sa mai veisemati kei iratou na Mataveiliutaki Taumada, na Le Tinikarua, na le Vitusagavulu kei ira na mataveiliutaki raraba ni veimataisoqosoqo. Au vakaraitaka na noqu vakavinavinaka vei kemuni yadua na marama kei na turaga kau na tovolea meu na semati au voleka tikoga vei kemuni. Na Matabisopi Vakatulewa e taleitaki na isema vakalomalagi e tiko kina. Au sa na calata na noqu veimaliwai e veisiga kei rau o Bisopi Gerald Causse kei Bisopi Dean M. Davies, kei ira na matacakacaka vata.

Au tucake tu oqo e matamuni meu vakadinadinataka na vosa ni Turaga e tiko ena wase dua ni Vunau & Veiyalayalati: “Era na vunautaka yani na uto ni noqu ivakavuvuli dina, ko ira sa malumalumu kei ira na tamata wale, mera vunautaka yani ki vuravura raraba vei ira talega na tui kei na turaga”¹ Na veivosa oqo e muria yani na nona kaya na Turaga ka na vakaraitaka na nona loloma na Tamada vei ira na luvena: “Raica koi au na Turaga au sa kila tu na veika rarawa ena yaco vei ira na kai vuravura, a ka oqo au sa kacivi Josefa Simici kina na noqu tamata ka tukuna vua na noqu ivakaro.”²

Na Tamada Vakalomalagi dauloloma kei na Luvena o Jiova ni tiko veirau na kila ni veika ena yaco ena veigauna mai muri,³ erau sa dolavi lomalagi ka sa basika mai e dua na itabagauna me valuta na gauna ni veivakararawataki e Rau kila ni na yaco mai. Vakamacalataka na iApositolo o Paula ni veidredre ena yaco mai me “gauna ni veivakararawataki.”⁴ Vei au, oqo e vakatututaka ni Tamada Vakalomalagi sa vakaisosomitaka na gauna ni veivakararawataki me da sa na bula tiko ena taucoko ni gauna.

Niu vakananuma ena vutugu na veika au sega ni veiraurau kina ena macawa oqo, au ciqoma e dua na revurevu ni ivakatakila ni vakavulici au ka vakacegui au: meu kakua ni vakananuma na veika au sega ni rawa ni cakava, ia meu vakanamata ga kina veika au rawa ni cakava. Au rawa ni vakadinadinataka na dina rawarawa ka bibi ni kosipeli.

Oqo na veivosa au sa dau wasea vakawasoma vei ira na lewe ni Lotu kei ira era sega ni lewenilotu: “Na Kalou e Tamada Vakalomalagi [dauloloma]. O keda eda luvena. … O Koya e tagi vata kei keda ena gauna eda rarawa kina ka marau ni da cakadodonu. Ena gadreva me dau veitaratara kei keda, ka da na rawa ni veitaratara kei Koya ena masu ni yalodina.

Sa vakarautaka na Tamada Vakalomalagi vei keda na luvena e dua na sala meda … lesu tale ka laki bula vata kei Koya… . Sa tu ena uto ni ituvatuva ni Tamada [Vakalomalagi] na veisorovaki i Jisu Karisito.”⁵

Na Tamada Vakalomalagi e a tala mai ki vuravura na Luvena me mai mate baleta na ivalavala ca ni tamata kecega Au vakadinadinataka na dina rawarawa ka bibi oqo, kau vakayacora o ya ena yaca i Jisu Karisito, emeni.