Na iVakatakila ki na Lotu, Na iVakatakila ki na Noda Bula
Mai vei Peresitedi Russell M. Nelson
Ia ena veisiga ka lako mai, ena sega ni rawa na bula tiko vakayalo ke sega na cakacaka veituberi, veidusimaki, ka veivakacegui ni Yalo Tabu.
Sa dua na madigi rekitaka na meu marautaka vata kei kemuni na Siganimate ena Sigatabu oqo ni koniferedi raraba! E sega ni dua na ka levu cake e ganita na vakananumi ni ka bibi duadua e yaco i vuravura ka meda masuta na tamata bibi duadua ka se bau lakova na vuravura. Ena Lotu i Jisu Karisito ni Yalododonu Edaidai, eda masuti Koya ka a tekivutaka Nona Veisorovaki tawayalani ena Were ko Kecisemani. Sa yalorawarawa o Koya me rarawa ena vuku yadudua ni noda ivalavala ca kei na malumalumu, koya sa yaco kina Vua me “sa titiri kina na dra mai na qara kecega ni yagoqu.”1 E a vakoti o Koya ena kauveilatai e Kalivari2 ka duri mai ena ikatolu ni siga me imatai ni yago tucaketale vei ira na luvena na Tamada Vakalomalagi. Au lomani Koya ka vakadinadinataka ni bula tiko o Koya! Sai Koya e liutaka ka dusimaka Nona Lotu.
Ke sega na Veisorovaki tawayalani ni noda Dauniveisereki, e sega ni dua vei keda ena rawa ni nuitaka me lesu vua na Tamada Vakalomalagi. Ke sega Nona Tucake tale, sa na icavacava na mate. Na Veisorovaki ni noda iVakabula sa yaco kina me rawa na bula tawamudu kei na bula tawavuca me rawa vei keda kece.
Me baleta Nona ilesilesi cecere kei na vakacegu e solia o Koya vei ira na dauvakamuri Koya, keirau a vakila kina kei Wendy, na watiqu na vakacegu ena i ka 2 ni Janueri, 2018, ni keirau a vakayadrati ena dua na qiri ka tukuni kina vei keirau ni ko Peresitedi Monson e sa kalawa takoso ki na tai ni ilati.
Isa na neirau mositi Peresitedi Monson! Eda doka nona bula kei na nona isolisoli. E dua na tuwawa vakayalo, e biuta tu mai na imawe taqusi dredre ki vei ira kece na kilai koya kei na Lotu e lomana.
Ena Sigatabu, ni 14 ni Janueri, 2018, ena tabavale ecake ena Valetabu e Salt Lake, e a tuvai vou kina na Mataveiliutaki Taumada ena ivalavala rawarawa ka tabu, e a tauyavu mai vua na Turaga. Ia ena soqoni tabu e nanoa, era lave liga kina na lewenilotu e vuravura taucoko me ra tokona na cakacaka era cakava taumada na iApositolo. Au yalomalumu ka vakavinavinakataka nomuni veitokoni veivakaqaqataki.
Au vakavinavinaka talega vei ira au duri tu e tabadra. Sa ka dokai vei au na veiqaravi ena 34 na yabaki ena Kuoramu ni iApositolo Le Tinikarua ka veikilai kei ira e 10 vei ira na 16 na Peresitedi ni Lotu sa sivi. Au vuli vakalevu mai vei ira yadua.
Au dinau talega vakalevu vei ira na tubuqu. O ira waluwalu na tubuqu vakarua era a saumaki mai ki na Lotu mai Iurope. O ira na yalo qaqa yadua oqori era sorovaka na nodra ka kece me ra lako rawa mai ki Saioini. Na itabatamata mai muri, era sega ni yalodina kece na itabatamata e muri. Kena itinitini, niu a sega ni susugi ena vuvale yavutaki ena kosipeli.
Au lomani rau na noqu itubutubu. Erau ka kece vei au ka rau vakatavulici au ena veilesoni bibi. Au na sega ni rawa ni vakavinavinakataki rau vakaoti ena marau ni bula e vale ka rau bulia vei au kei na noqu veitacini. Ia, niu se gonetagane ga, au sa kila ni dua na ka e yali tiko. E dua na siga au vodoka e dua na qiqi na sala kau lako ki na dua na sitoa ni ivola ni YDE meu vaqara e dua na ivola baleta na Lotu. Au taleitaka meu vulica na kosipeli.
Niu sa qai kila vinaka mai na Vosa ni Vuku, au vinakati rau na noqu itubutubu me rau bulataka na lawa oya. Ia, ka dua na siga niu a se gone, au a lako ki na neitou tabavale e ra kau vorolaka kece buturara simede na tavaya yaqona ni valagi! Au namaka me totogitaki au ko tamaqu, ia e sega mada ga ni tukuna e dua na ka.
Niu sa tubu cake ka tekivu kila na talei ni ituvatuva nei Tamada Vakalomalagi, au dau tukuna wasoma vakai au, “Au sega ni vinakata e dua tale na iloloma ni Kirisimasi! Au vinakata ga meu vauci vei rau noqu itubutubu.” Na ka dau divi vakabalavu tu mai ka sega ni yaco me yacova sara ni rau sa sivia na yabaki 80 na noqu itubutubu, ia sa yaco ga. Au sega ni vakamacalataka rawa na reki au vakila ena siga oya,3 kei na veisiga au vakila kina na reki ni nodrau sa mai vauci vata kei na noqu sa mai vauci vei rau.
Ena 1945, niu a tiko ena koronivuli ni vuniwai, au a vakamautaki Dantzel White ena Valetabu e Salt Lake. Keirau a vakalougatataki ena ciwa na goneyalewa totoka kei na dua na gonetagane taleitaki. Nikua na neirau vuvale sa tubu levu tiko e dua na reki levu duadua ena noqu bula.
Ena 2005, ni oti e 60 na yabaki ni neirau vakamau, na noqu daulomani ko Dantzel a mai kacivi tawanamaki ki vale. Ena dua na gauna, na noqu lolosi e voleka niu tawa lako rawa. Ia na itukutuku ni Siganimate kei na yalayala ni tucaketale e tokoni au.
E a qai kauti Wendy Watson mai ki yasaqu na Turaga. Keirau a vauci ena Valetabu e Salt Lake enai ka 6 ni Epereli, 2006. Sa ka levu na noqu lomani koya! E marama vakasakiti o koya—e veivakalougatataki levu vei au, kei na noqu vuvale, kei na Lotu raraba.
Na veivakalougatataki yadua oqori era yaco mai me isau ni vakasaqarai ka muri na veivakayarayarataki ni Yalo Tabu. E a tukuna o Peresitedi Lorenzo Snow, “Oqo na madigi vakaturaga ni Yalododonu Edaidai yadudua … ni noda dodonu oqo sa ivakaraitaki ni Yalotabu ena veisiga kece ni noda bula.”4
E dua vei ira na ka e sa dau vakavotuya wasoma ki na noqu vakasama na Yalotabu mai na gauna ni noqu kacivi vou me Peresitedi ni Lotu na yalorawarawa ni Turaga me vakatakila na Nona vakasama kei na lewa. Na madigi mo ciqoma na ivakatakila sa dua na isolisoli cecere duadua ni Kalou vei ira na Luvena.
Mai na veivakararamataki ni Yalo Tabu, ena vukei keda na Turaga ena veika dodonu kece eda vakasaqara. Ena dua na rumu ni veisele, au a duri tikiva e dua na tauvimate—kau lomatarotaro tu ena dua na ivalavala ka sega ni caka e liu—kau sota kei na Yalo Tabu ni toqa na cakacaka e noqu vakasama.5
Me vaqaqacotaka noqu vosaki Wendy, au a tukuna vua, “Au kila na ivakatakila ka mo ciqoma vakacava.” Mai nona yasana—ka, au vulica baleti koya, ka nona itovo—e sa vakasaqara oti ka ciqoma na nona ivakatakila vakai koya baleti keirau, ka solia vua na yalodei me vakaio.
Niu lewena na Kuoramu ni iApositolo Lewe Tinikarua, au dau masu e veisiga baleta na ivakatakila kau vakavinavinaka vua na Turaga ena veigauna kece e dau vosa kina ki lomaqu kei na noqu vakasama.
Nanuma na kena mana! Se cava ga na noda ilesilesi ena Lotu, e rawa ni da masu vei Tamada Vakalomalagi ka ciqoma na veituberi kei na idusidusi, ka da vakaroti mai na rerevaki kei na veisiwati, ka me vakaukauwataki me rawata na ka e sega ni rawata vakai keda. Kevaka eda rawata vakaidina na Yalo Tabu ka vulica na lialiaci kei na kila dina Nona veivakayarayarataki, eda na tuberi ena ka lelevu ka lalai.
Ni a mataqu wale ga oqo ki na itavi dredre meu digia e rua na daunivakasala, au vakanananu se meu digitaka vakacava e rua mai na tinikarua kau lomana ka rokova.
Baleta niu kila ni vakayarayarataki vinaka e yavutaki mai na vinaka ni itukutuku, ena yalomasumasu au a sotavi iratou yadua na iApositolo.6 Au a qai vakatikitiki ki na dua na rumu tu galala ena valetabu ka vakasaqara na lewa ni Turaga. Au vakadinadinataka ni vakasalataki au na Turaga meu digitaki Peresitedi Dallin H. Oaks kei Peresitedi Henry B. Eyring me rau daunivakasala ena Mataveiliutaki Taumada.
Ena sala vata ga, au vakadinadinataka ni na Turaga e a vakayarayarataka na kacivi nei Elder Gerrit W. Gong kei Elder Ulisses Soares me rau tabaki me Nona iApositolo. Au kidavaki rau ki na mataveitacini duatani oqo ni veiqaravi.
Ni keimami soqoni vata vaka Matabose ni Mataveiliutaki Taumada kei na Kuoramu ni Le Tinikarua, na veirumu ni bose e veirumu ni vakatakila. Na Yalotabu e vakilai sara ni tiko. Ni keimami veivosakitaka na veika bibi, e basika na ikalawa talei ni ra dui solia ena galala na iApositolo na nodra vakanananu kei na nodra rai. E rawa ni duidui na neimami rai taumada, ia na loloma keimami dui veiwaseitaka e tudei tu. Na neimami duavata e vukei keimami me keimami kila na lewa ni Turaga ki Nona Lotu.
Ena neimami soqoni, na lewe levu e sega ni lewa. Keimami veirogorogoci ena yalo masumasu ka veivosaki vata yadudua me yacova ni sa duavata. Ia ni keimami sa yacova na lomavata taucoko, na yavavala veivakaduavatataki ni Yalo Tabu e vakilai votu. Keimami vakila na ka e kila na Parofita o Josefa Simici ni vakatavulica, “Mai na duavata ni vakila eda ciqoma kina na kaukauwa ni Kalou.”7 E sega ni dua na Mataveiliutaki Taumada se Kuoramu ni Le Tinikarua ena laiva na vakatulewa ni Lotu ni Turaga ki na nona lewa vinaka duadua!
Kemuni na taciqu kei na ganequ, e rawa vakacava vei keda na tagane kei na yalewa—na italai Vakarisito—me yaco me vaka e vinakata vei keda na Turaga? Eda kunea vakacava na isau ni taro ka vakaleqai keda? Kevaka me vakatavulici keda na ka uasivi e a sotava o Josefa Simici ena Veikau Tabu, sa ikoya ni ko lomalagi e sa dola ka sa vosa vei ira na luvena na Kalou.
Na Parofita o Josefa Simici e sa laiva na ituvatuva me da muria me saumi kina noda taro. Ni kuitaki ki na yalayala nei Jemesa ni kevaka e lailai vei keda na vuku me da kerea na Kalou, na gonetagane o Josefa e a kauta vakadodonu nona taro vua na Tamada Vakalomalagi.8 E vakasaqara na ivakatakila vakai koya, ia na nona vakasaqaqara e dolava na iotioti ni itabagauna.
O koya vata, na cava ena dolava na noma vakasaqaqara tiko? Na vuku cava e lailai vei iko? Na cava o vakila ni bibi e gadrevi mo kila ka me macala? Muria na ivakaraitaki ni Parofita ko Josefa. Vaqara e dua na vanua vagagalu ko rawa ni taleva wasoma. Vakamalumalumutaki iko e mata ni Kalou. Talaucaka na lomamu vua na Tamamu Vakalomalagi. Vuki vei Koya ena isau ni vakatataro kei na vakacegu.
Masu ena yaca i Jisu Karisito baleta nomu kauwai, nomu rere, nomu malumalumu—io, na gagano sara ga ni lomamu. Ka qai vakarorogo! Vola na veivakanananu e lako mai vei iko. Vola nomu vakila ka muria ena cakacaka ko vakayarayarataki mo cakava. Ni ko taleva tiko na ikalawa oqo ena siga ki na siga, vula ki na vula, yabaki ki na yabaki, ko na “tubu ki na ivakavuvuli ni vakatakila.”9
E vinakata dina li na Kalou me vosa vei iko? Io! “Raica sa sega ni rawa vua na tamata me dodoka yani na ligana malumalumu me tarova kina na kui sobu ni uciwai na Misuri ena kena sala tudei … ia sa sega tale ga ni rawa vua me tarova vakakina na Kalou Kaukauwa, me kakua ni sovaraka na kilaka mai lomalagi ena uludra na Yalododonu Edaidai.”10
E sega ni dodonu mo vakanananutaka tu vakabalavuna veika dina.11 E sega ni dodonu mo lecava ko cei mo vakabauta dina. Mai na ivakatakila vakai iko, ko rawa ni ciqoma kina nomu ivakadinadina vakataki iko ni Vola i Momani e vosa ni Kalou, o Josefa Simici e dua na parofita, ka ni sai koya oqo na Lotu ni Turaga. Veitalia ga na cava era kaya se cakava na tani, ena sega ni dua e kauta tani rawa na ivakadinadina e kau ki lomamu kei na nomu vakasama baleta na veika dina.
Au vakauqeti iko mo vadodo yani me sivia na nomu rawa ka vakayalo edai mo ciqoma na ivakatakila vakai iko, ni sa yalataka na Turaga ni “Ia kevaka ko na kerea, ko na ciqoma na ivakatakila ena ivakatakila, na kila ka ena kila ka, me rawa ni dou kila na veika vuni ka veivakacegui—na kena ena kauta mai na reki, na kena ena kauta mai na bula tawamudu.”12
E levu cake sara na ka e vinakata na Tamamu mai Lomalagi mo kila. Me vaka e vakatavulica o Elder Neal A. Maxwell, “Vei kemudou sa vakamatana me rai ka vakadaligana me rogo, e sa matata ni na Tamana kei na Luvena erau sa solia tiko yani na ka vuni kei lomalagi!”13
E sega ni dua na ka e dolavi lomalagi me vaka na sema vatani savasava e sinai, talairawarawa taucoko, vakasaqaqara yalogu, kana e veisiga mai na vosa i Karisito ka tu ena iVola i Momani,14 kei na soli gauna wasoma ki na valetabu kei na tuva kawa.
E dina sara, ni dau tu na gauna ko dau vakila kina ni vaka e sa sogo tu na lomalagi. Ia au yalataka ni ko vakuria na talairawarawa, vakaraitaka tiko na vakavinavinaka ena veivakalougatataki yadudua ka solia vei iko na Turaga, ka doka ena yalo vosota na Nona gauna na Turaga, ena qai soli vei iko na kila ka kei na kila macala ko qara. Na veivakalougatataki kece ka tiko vua na Turaga me nomu—ia na caka mana talega—ena tarava mai. O ya na ka ena cakava vei iko na ivakatakila yadudua.
Au nuinui vinaka baleta na veimataka vou. Ena vakasinaiti ena madigi vinaka vei keda yadua meda tosokiliu, yaga, ka kauta na kosipeli ki na tutu vava kei vuravura. Ia au sega ni lecaika me baleta na veisiga tu e matada. Eda bula ena dua na vuravura vereverea ka yavavala cake tiko ga. Na kena rawa ni yacovi e veigauna na kau itukutuku ni veimaliwai kei na 24 na auwa ni sala ni itukutuku ka kolovi keda tu ga ena itukutuku tawa cegu. Kevaka mena tu na inuinui me rawa ni da vulona na vuqa na domo kei na vuku vakatamata ka valuta tiko na dina, sa dodonu ga meda vulica na ciqoma na ivakatakila.
Na noda iVakabula kei na Dauveivueti, ko Jisu Karisito, ena vakayacora eso na Nona cakacaka cecere duadua ena maliwa ni gauna oqo kei na Nona lesu mai. Eda na raica na veivakatakilakila veivakurabuitaki ni na Kalou na Tamada kei na Nona Gone ni Toko erau vakatulewa tiko e vuravura ena vakaturaga kei na lagilagi. Ia ena veisiga ka lako mai, ena sega ni rawa na bula tiko vakayalo ke sega na cakacaka veituberi, veidusimaki, ka veivakacegui ni Yalo Tabu.
Kemuni na taciqu kei na ganequ lomani, au sa masuti kemuni mo ni vakatubutaka na nomuni rawa ka vakayalo mo ni rawa ivakatakila kina. Ni cakava me Sigatabu ni Siganimate oqo me gauna vakatakilai ena nomuni bula. Digia mo cakava na cakacaka vakayalo ka gadreva mo marautaka kina na isolisoli ni Yalo Tabu ka rogoca na domo ni Yalotabu me wasoma cake ka me makare cake.
Vata kei Moronai, au vakamasuti kemuni ena Siga ni Vakacecegu ni Siganimate oqo mo ni “lako mai vei Karisito, ka taura matua na isolisoli vinaka kecega,”15 me tekivu ena isolisoli ni Yalo Tabu, na isolisoli ka rawata ka na veisautaka nomu bula.
O ikeda eda daumuri Jisu Karisito. Na dina bibi duadua ena bau vakadinadinataka vei iko na Yalo Tabu oya ni ko Jisu na Karisito, na Luve ni Kalou bula. E bula tiko Ko Koya! O Koya na noda Dautataro vei Tamana, na noda iVakaraitaki, ka noda Dauveisereki. Ena Sigatabu ni Siga ni Mate oqo, eda vakananuma kina Nona isoro solibula, Nona Tucaketale vakaidina, kei na Nona itutu vakalou.
Oqo na Nona Lotu, sa vakalesui mai vua na Parofita o Josefa Simici. Au vakadinadinataka, kau vakaraitaka na noqu loloma vei kemuni yadudua, ena yaca tabu i Jisu Karisito, emeni.