Na Kuoramu ni iTalatala Qase

Mai vei Elder D.Todd Christofferson

Ena Kuoramu ni iApositolo Le Tinikarua

Ni tiko e dua na kuoramu ni Matabete i Melikiseteki ena dua na tabanalevu ena vakaduavatataki ira sa lewena me vakayacori kece na cakacaka ni veivakabulai.

Ni se qai tauyavutaki oti toka ga na Lotu ena iotioti ni itabagauna oqo, a vakatakila mai kina na Turaga “Ia ena nomudou masu ni vakabauta dou na rawata kina na noqu lawa mo dou kila kina na sala mo dou cicivaka kina na noqu lotu ka vakadodonutaka kina na ka kecega e mataqu.”¹ Na ivakavuvuli oqo sa muria tu mai na Lotu—kei na yalayala o ya e sa rokova tiko mai na Turaga—mai liu sara. Na ivakarau ni tuvai ni matabete kei na veiqaravi sa vakatakilai tiko mai ena veigauna, e tekivu mai vua na Parofita o Josefa Smici ena gauna a tauyavutaki taumada kina na itutu ni matabete kei na kuoramu, ena noda gauna. A vakatakilai mai na kena veivakavoui ka tauyavutaki ena nodratou veiliutaki o Peresitedi Brigham Young, John Taylor, kei Spencer W. Kimball, kei na so tale; me baleta na Kuoramu ni Le Tinikarua, Vitusagavulu, bete levu, kei na ilesilesi tale eso kei na kuoramu ena Matabete i Melikiseteki kei na Matabete i Eroni.² Ia oqo, ena itukutuku vakairogorogo walega oqo, a vakaraitaka kina o Peresitedi Russell M. Nelson e dua na veisau bibi sara.

Kerea meu na tokaruataka na nona itukutuku: “Ena bogi nikua sa mai vakaraitaki kina e dua na ituvatuva vou ni noda kuoramu ni Matabete i Melikiseteki me vakavotukanataki rawa kina na cakacaka ni Turaga. Ena tabanalevu yadua, na bete levu kei na italatala qase sa na cokovata ki na dua ga na kuoramu ni italatala qase … [kei na] ituvatuva ni kuoramu ni [bete levu ena iteki] ena yavutaki tiko ena nodra itutu ni matabete ena gauna oqo.”

A tomana o Peresitedi Nelson:

“Na veisau oqo sa dikevi tiko mai ena vica vata na vula. Keimami sa nanuma ni sa gadrevi sara me torocake na sala meda qaravi ira kina na noda lewenilotu. … Me vinaka cake kina, e dodonu meda vaqaqacotaka na noda kuoramu ni matabete me dusimaki vakavinaka kina na veiqaravi ena loloma kei na veitokoni sa lewa na Turaga vei ira na Nona Yalododonu.

“Na veisau oqo sa veivakauqeti kina na Turaga. Ni da sa cakava oqo, eda na gugumatua cake mai na kena eda a cakava e liu.”³

Ena veidusimaki ni Mataveiliutaki Taumada, keirau na kuria tiko kei Elder Ronald A. Rasband eso na ivakamacala keirau nuitaka ni na sauma na nomuni taro eso.

Kuoramu ni iTalatala qase kei na Bete Levu

iMatai, meu tokaruataka mada, na cava na veisau vei ira na kuoramu ni bete levu kei na italatala qase? Ena tabanalevu, na lewe ni kuoramu ni italatala qase kei na bete levu sa na cokovata ki na dua na kuoramu ni Matabete ni Melikiseteki ka dua na kena mataveiliutaki ni kuoramu. Na kuoramu oqo, ena tubu cake ena iwiliwili kei na duavata, ka na vakatokai me “kuoramu ni italatala qase.” Sa sega tale ni caka na kuoramu ni bete levu.Na kuoramu ni italatala qase ena oka kina na italatala qase kece kei ira sa vakarau tu kei ira na bete levu era sega ni veiqaravi tiko ena matabisopi, ena mataveiliutaki ni iteki, ena matabose e cake ena iteki, se o peteriaki. Na kuoramu ni bete levu ena iteki era na wili kina na bete levu era veiqaravi tiko ena mataveiliutaki ni iteki, matabisopi, ena matabose e cake ena iteki, kei na peteriaki e cakacaka tiko.

Mataveiliutaki ni Kuoramu ni iTalatala Qase

Me na tuvanaki vakacava na mataveiliutaki ni kuoramu ni italatala qase? Na mataveiliutaki ni iteki ena vakacegui ira na iliuliu ni ilawalawa ni bete levu kei na mataveiliutaki ni italatala qase ka kaciva vou e dua na peresitedi ni kuoramu ni italatala qase kei rau na daunivakasala ena tabanalevu yadua. Era na okati ena mataveiliutaki vou ni kuoramu ni italatala qase oya na italatala qase kei na bete levu, ka duidui nodra yabaki ni bula kei na kila, era veiqaravi vata ena dua na mataveiliutaki ni kuoramu. Ena rawa ni veiqaravi vakaperesitedi ni kuoramu e dua na italatala qase se bete levu se daunivakasala ena mataveiliutaki. Oqo e sega ni “vuaviritaki” na kuoramu ni italatala qase mai vei ira na bete levu. Keitou sa nuitaki tiko me ra na cakacaka vata na italatala qase kei na bete levu ena veicokonaki ena mataveiliutaki ni kuoramu kei na veiqaravi ni kuoramu. Na veisau ni kuoramu oqo me tauyavutaki ena kena gauna totolo duadua e rawa.

Vakailesilesi ni Matabete ena Kuoramu ni iTalatala Qase

Na veisau oqo ena ituvatuva ni kuoramu ena veisautaka beka na nodra ilesilesi na lewe ni kuoramu? E sega, na veisau oqo e sega ni yali kina e dua na ilesilesi ni matabete sa tabaki oti tu kina e dua na lewe ni kuoramu. Me vaka ko ni sa kila tiko, ni na tabaki e dua na tagane ki na veiilesilesi duidui ni matabete ena gauna ni nona bula, ka na sega ni vakayalia se kau laivi e dua na veitabaki e liu ena gauna e tabaki vou tale kina. Ena so na gauna ena vica tiko na nona ilesilesi e dua na lewe ni matabete ena dua ga na gauna, me vaka e dua na bete levu ena veiqaravi me peteriaki se me bisopi, e levu na gauna ena sega ni cakacakataka na ilesilesi taucoko oqori ena dua ga na gauna. Me vakataki ira na bisopi kei na Vitusagavulu, era sega ni veiqaravi ena ilesilesi oqori ni ra sa vakacegui se me emeritesi. Ia, se ilesilesi cava tale ni matabete se itutu e taura tu e dua na tagane, ni sa lewena tiko na kuoramu ni italatala qase, sa veiqaravi tiko me italatala qase.

Ena vica na yabaki sa oti, a kaya o Peresitedi Boyd K. Packer ni “matabete sa cecere cake mai na kena ilesilesi kece. … Na matabete e sega ni wasei. Na italatala qase e tautauvata nona matabete kei na iApositolo. (Raica na V&V 20:38.) Ni dua na tagane [sa vakatikori vua na matabete], sa na ciqoma sara vakataucoko. Ia, era tiko na ilesilesi ena loma ni matabete—na iwasewase ni lewa kei na itavi. … Eso na gauna e dau cavuti e dua na ilesilesi me ‘cecere cake’ se ‘lailai sobu’ mai na dua tale na ilesilesi. E sega ni ‘cecere’ se ‘lailai,’ mai na ilesilesi ena Matabete i Melikiseteki e matataka na duidui ni wasewase ni veiqaravi.”⁴ Kemuni na taciqu, au sa nuitaka vakaidina ni da na sega tale ni cavuta me “toso cake” ki na dua tale na ilesilesi ena Matabete i Melikiseteki.

Na italatala qase era na tabaki tikoga yani me ra bete levu ni ra sa kacivi ki na mataveiliutaki ni iteki, matabose e cake, se matabisopi—se so tale na gauna sa vakadeitaka o peresitedi ni iteki ena yalo masumasu kei na veivakauqeti. Ni sa cava na nodra gauna ni veiqaravi ena mataveiliutaki ni iteki, matabose e cake, se matabisopi, ena lesu tale o bete levu ki na kuoramu ni italatala qase ena nona tabanlevu.

Veidusimaki vei Peresitedi ni Kuoramu ni iTalatala Qase

O cei ena dusimaka na cakacaka nei peresitedi ni kuoramu ni italatala qase? Ena vakatulewa o peresitedi ni iteki kivei ira na Matabete i Melikiseteki ena nona iteki. Ia, o peresitedi ni kuoramu ni italatala qase ena vakarorogo vei peresitedi ni iteki, ni na vakarautaka na veituberi kei na veidusimaki mai na mataveiliutaki ni iteki mai na matabose e cake. Me vaka ni bete levu vakatulewa tiko o bisopi, ena tabanalevu, ena bose vakawasoma talega kei peresitedi ni kuoramu ni italatala qase. Ena veitalanoa o bisopi kei koya, ka dusimaka na sala vinaka duadua me ra qaravi ka vakalougatataki kina na lewenilotu, cakacaka lomavata kei ira na veimataisoqosoqo kece ena tabanalevu.⁵

Na iNaki ni Veisau Oqo

Na cava na inaki ni veisau oqo ki na kuoramu ni Matabete i Melikiseteki? Ni tiko na kuoramu ni Matabete i Melikiseteki ena tabanalevu era na duavata kina na lewe ni matabete me ra cakava na gacagaca kece ni cakacaka ni veivakabulai, oka kina na valetabu kei na cakacaka ni tuva kawa era a veiliutaki kina e liu na ilawalawa ni bete levu. Ena mana vei ira na lewe ni kuoramu qase se gone kei na kila na nodra nanuma kei na kila vakai ira kei ira sa duidui nodra itagede ni bula. Sa vakarautaka talega na ikuri ni madigi vei ira na lewe ni matabete matua mera tubera eso, oka kina na italatala qase namaki, lewenilotu vou, itabagone qase cake, kei ira sa lesu mai ki Lotu. Au sega ni tukuna rawa na noqu marau levu niu mai vakasamataka oqo na kena na tubu na bibi ni itavi ni kuoramu ni italatala qase ena veisiga ni mataka. Na vuku, kila, gugumatua, kei na kaukauwa ena kune ena kuoramu oqo sa na yaco kina e dua na siga vou kei na vakatagedegede vou ni veiqaravi ni matabete ena Lotu raraba.

Ruasagavulu na yabaki sa oti ena koniferedi raraba, au a talanoataka kina na ka a tukuna taumada o Elder Vaughn J. Feartherstone ena Vitusagavulu kau vakabauta mena tokaruataki eke.

Ena 1918 a dauteitei tu kina o George Goates ena nona teivaka na kumala lalai e Lehi, Utah. A yaco totolo mai na batabata ena yabaki o ya ka ra cevata kina e vuqa na nona kumala lalai era tei tu. A berabera ka dredre sara vei George kei nona cauravou lailai o Francis, na tatamusuki. Ena gauna o ya, sa takalevu tiko mai e dua na mate dewa. Na mate rerevaki oqo a qai leqa kina na luvei George o Charles kei na tolu na luvei Charles lalai—rua na yalewa kei na dua na tagane lailai. Ena loma ga ni ono na siga, ena yalololosi a gole kina vakatolu o George Goates ki Ogden, Utah, me laki kauta mai na yagodratou me mai bulu. Ni sa oti na veivakataotaki ca oqo, rau a vodoka yani o George kei Francis na nodrau qiqi ka lesu ki na iteitei ni kumala.

“[Ni rau sa lako tiko] rau a sivita yani vakaveitarataravi na qiqi eso ni kumala lalai sa usa yani ki na iqaqi era draivataka tiko na dauteitei e kea. Ni rau sa lako tiko, era yaloyalo yadua mai na draiva: ‘Bula, Momo George,’ ‘Isa ni vosota, George,’ ‘E dredre dina, George,’ ‘E levu nomu itokani, George.’

“Ena otioti ni qiqi a toka kina o … na mata tavatonotono o Jasper Rolfe. A yaloyalo mamarau mai ka kaya: ‘Sai ira kece o ya, Momo George.’

“A vuki o [Brother Goates] vei Francis ka kaya: ‘Au diva me a nodaru kece.’

“Ni rau yaco yani ki na matamata ni iteitei, a rika o Francis mai na qiqi damudamu levu ni usa kumala lalai ka dolava na matamata ka draiva yani [o tamana] ki na iteitei. A kele o [George], tarova na timi, … ka vakadikeva na iteitei. … Sa sega tale ni dua na kumala lalai e tu ena iteitei. Sa qai nanuma rawa na ibalebale ni vosa nei Jasper Rolfe ni a kailavaka mai: ‘Sai ira kece o ya, Momo George.’

“A siro mai na qiqi o [George] tomika e dua na iqulu qele bulabula, damudamu e taleitaka vakalevu, kei na dua … na itei ni kumala lalai, ka wanonova matua na ivakatakilakila oqo ni nona cakacaka, ka vaka me sega ni vakabauta na ka sa raica.

“A dabe sobu [o koya] ena binibini ni itei ni kumala lalai—na turaga ka kauti iratou mai ki vale na nona daulomani me buluta ena loma ga ni ono na siga; cakava na kisinimate, kelia na ibulubulu, ka veivuke talega ena isulu ni veibulu—na turaga oqo a sega ni yalolailai, se vakadrukai, se vukitani ena gauna taucoko ni nona rarawa mosimosi—a dabe sobu ena so na itei ka tagi me vaka e dua na gonelailai.

“A qai tucake, qusia na matana, … rai cake i lomalagi, ka kaya: ‘Vinaka, Tamaqu, na nodra bula na italatala qase ni neitou tabanalevu.’”⁶

Io, meda vakavinavinaka vua na Kalou baleti ira na tagane ni matabete kei na veiqaravi era na qarava tiko ki na tamata yadua kei na matavuvale ni tauyavutaki o Saioni.

Na Mataveiliutaki Taumada, na Kuoramu ni iApositolo Le Tinikarua, kei na Mataveiliutaki ni Vitusagavulu era sa raica tiko mai na veisau oqo ena dua na gauna balavu. Ena vuqa na masumasu, dikevi matua na yavu vakaivolanikalou ni kuoramu ni matabete, kei na veivakadeitaki ni oqo na lewa ni Turaga, eda sa toso ki liu ena duabau ka sa kena dina ni oqo sa kalawa ki liu ni cereki na Vakalesuimai. Sa vakatakilai mai na veidusimaki ni Turaga, kau reki kina, niu sa mai vakadinadinataki Koya, Nona matabete, kei na nomuni tabaki ki na matabete o ya, ena yaca i Jisu Karisito, emeni.