Na Loloma Savasava: Sa Kedra iVakatakilakila Dina na Tisaipeli Dina i Jisu Karisito.
Mai vei Elder Massimo de Feo
Ena Vitusagavulu
Na kosipeli i Jisu Karisito e kena itakele na nodrau loloma na Tamana kei na iVakabula kei na noda loloma vei Rau vakakina vei keda vakataki keda.
Eda lomani Peresitedi Monson ka nanumi koya, ka lomani Peresitedi Russell M. Nelson ka tokoni koya. E dua na tikina digitaki nei Peresitedi Nelson e yaloqu.
Niu se qai dua na tama ni gone lailai, a lesu mai vale ena vuli na luvei keirau tagane lailai, se qai yabaki lima, ka tarogi tinana, “Na mataqali cakacaka vakacava dau cakava o Ta?” Qai vakamacalataka ni ra sa tekivu veitalanoataka nona lewe ni kalasi na nodra cakacaka na tamadra. E dua e kaya ni o tamana na iliuliu ni ovisa ena tauni levu oya, ka dua e tukuna mai ena marau ni o tamana na iliuliu ni dua na kabani levu.
Ni tarogi baleti tamana, a kaya ga o luvequ, “O tamaqu e cakacaka ena dua na valenivolavola ena dua na kompiuta.” Oti, ni raica ni sega ni uqeti ira vakalevu nona itokani lalai vovou nona isaunitaro, a vakuria, “O dua tale na ka, na tamaqu na iliuliu ni vuravura kei lomalagi.”
Au nanuma oya na itinitini ni veitalanoa oya.
Au tukuna vei watiqu, “Sa kena gauna me vakavulici vua eso tale na ka matailalai ni ituvatuva ni veivakabulai kei ocei dina e nona na lewa.”
Ia ni keirau vakavulica vei ira na luvei keirau na ituvatuva ni veivakabulai, e tubu nodra lomana na Tamada Vakalomalagi kei na iVakabula ni ra vulica ni sa ituvatuva ni loloma. Na kosipeli i Jisu Karisito e kena itakele na nodrau loloma na Tamana kei na iVakabula kei na noda loloma vei Rau vakakina vei keda vakataki keda.
E kaya o Jeffrey R. Holland: “Na imatai ni vunaulevu duadua ni veigauna tawamudu o ya meda lomana na Kalou ena yaloda, igu, nanuma, kei na kaukauwa kecega—oqori na imatai ni vunau levu duadua. Ia na imatai ni dina cecere ni veigauna tawamudu o ya ni Kalou e lomani keda ena Lomana, igu, vakasama, kei na kaukauwa taucoko. Na loloma oya sai yavuvatu ni veigauna tawamudu, ka dodonu me yavuvatu ni noda bula ena veisiga.”1
Ni yavuvatu ni noda bula e veisiga, na loloma savasava e gadrevi vei ira kece na tisaipeli dina i Jisu Karisito.
E vakavuvulitaka na parofita o Momani, “Oi kemudou na wekaqu lomani, mo dou masuta na Tamada ena yalomudou taucoko me vakasinaiti kemudou ena loloma oqo ia na loloma sa solia vei ira era sa muria na Luvena o Jisu Karisito.”2
Na loloma sa kedra ivakatakilakila dina na tisaipeli dina i Jisu Karisito.
O ira na tisaipeli dina era dau taleitaka na veiqaravi. Era kila ni veiqaravi e dua na ivakaraitaki ni loloma dina ka dua na veiyalayalati era a cakava ena papitaiso.3 Se cava ga nodra veikacivi ena Lotu se nodra itavi ena itikotiko, era vakila na gagadre levu me ra lomana ka qarava na Turaga vakakina vei ira vakataki ira.
O ira na tisaipeli dina era dau taleitaka me ra veivosoti. Era kila ni nona Veisorovaki na iVakabula e ubia na noda dui ivalavala ca kei na cala yadua. Era kila ni kena isau a sauma o Koya e “sa baleta na ka taucoko.” Sa ubia taucoko na ivakacavacava vakayalo, na icurucuru, na isau ni cakacaka, kei na isau ni veiqaravi ka semati ki na ivalavala ca, na cala, kei na caka cala. Na tisaipeli dina e totolo ni veivosoti ka totolo ni kerea na veivosoti.
Kemuni na taciqu kei na ganequ, kevaka e dredre tiko nomu kunea na kaukauwa mo veivosoti, kakua ni vakasamataka na veika era cakava vei iko na tani, ia vakasamataka ga na ka sa cakava vei iko na Turaga, o na kunea na vakacegu ena veivakalougatataki veivueti ni Nona Veisorovaki.
Na tisaipeli dina e dau taleitaka me soli ira vua na Turaga ni tu e lomadra na vakacegu. Era yalomalumalumu ka talairawarawa baleta ni ra lomani Koya. E tu vei ira na vakabauta me ra ciqoma taucoko na Lomana, sega walega ena ka e cakava o Koya ia vakakina ena kena icakacaka kei na kena gauna. Era kila na tisaipeli dina ni veivakalougatataki dina e sega ni dau ka era vinakata, ia na ka e vinakata na Turaga ena vukudra.
O ira na tisaipeli dina era lomana vakalevu cake na Turaga mai na vuravura, era tudei tu ka sega ni yavalati rawa ena nodra vakabauta. Era kaukauwa tu ka dei ena vuravura veiveisau ka veilecayaki. O ira na tisaipeli dina era taleitaka me ra rogoca na domo ni Yalo kei ira na parofita ka sega ni veilecayaki ena domo vakavuravura. O ira na tisaipeli dina era taleitaka me ra “tu ena veiyasana tabu”4 ka taleitaka me tabu na vanua era tu kina. Ena veivanua kece ga era lako kina, era kauta mai na loloma ni Turaga kei na vakacegu ki yalodra eso tale. O ira na tisaipeli dina era taleitaka me ra muria na ivakaro ni Turaga, ka ra muria baleta ni ra lomana na Turaga. Ni ra lomana ka rokova nodra veiyalayalati, sa vakavoui na yalodra ka veisau sara ga na nodra bula.
Na loloma savasava sa kedra ivakatakilakila dina na tisaipeli dina i Jisu Karisito.
Au vulica na loloma savasava mai vei tinaqu. E sega ni lewe ni Lotu o koya.
Ena dua na siga ena vuqa na yabaki sa oti, au a sikovi tinaqu, ka tauvi kenisa tiko. Au kila ni na mate ga, ia au leqataka ni kune rarawa tiko. Au sega ni tukuna e dua na ka, ia ni kilai au vinaka tu o koya, e kaya mai, “au raica ni o lomaleqa tiko.”
Au kurabui, ni kerei au mai ena domo malumalumu, “E rawa beka ni o vakavulici au ena ivakarau ni masu? Au vinakata meu masulaki iko. Au kila ni dau tekivu ena noda cavuta ‘Tamai keimami mai Lomalagi,’ ia ni oti oya na cava tale e dodonu meu kaya?”
Niu tekiduru e yasa ni nona idavodavo ka masulaki au okoya, au vakila e dua na loloma se bera vakadua ni bau vakilai. Na loloma rawarawa, dina, ka savasava. E dina ni sega ni kila na ituvatuva ni veivakabulai, e tu e yalona nona ituvatuva ni loloma, na ituvatuva ni loloma ni dua na tina baleta na luvena tagane. A mosi tu, ka dredre mada ga ni kunea na kaukauwa me masu. E voleka niu sega ni rogoca nona masu, ia au vakila vakaidina na nona loloma.
Au nanuma niu a vakasamataka, “E rawa vakacava vua e dua e sotava tu na mosi levu vakaoya me masulaka e dua tale? Sai koya e vakaleqai tu.”
Qai yaco mai vakamatata ki na noqu vakasama na kena isau: loloma savasava. Na levu ni nona lomani au sa guilecavi koya kina. Ena loma ni nona gauna dredre duadua, a lomani au vakalevu cake mai vei koya.
Ia oqo, kemuni na taciqu kei na ganequ, sega beka ni o koya oqo na ka a cakava na Turaga? Io, ena itovo ni rai tawamudu ka rabailevu. Ia, ena loma ni Nona mosi levu duadua, ena were ena bogi oya, sai Koya a gadreva na veivuke, ni vakararawataki tu ena dua na ivakarau eda na sega ni vakasamataka se kila. Ia na kena itinitini, a guilecavi Koya ka masulaki keda me yacova ni sa sauma na kena isau taucoko. A rawata beka vakacava o Koya? Baleta na Nona loloma savasava vei Tamana, ka a talai Koya mai, vakakina vei keda. E lomana na Tamana kei keda vakalevu cake mai vei Koya.
A sauma o Koya na isau ni dua na ka a sega ni cakava. A sauma o Koya na ivalavala ca a sega ni cakava. Na cava na vuna? Loloma savasava. Ni sa colata na kena isau taucoko, sa tuvakarau o Koya me solia vei keda na veivakalougatataki ni veika sa sauma, kevaka eda na veivutuni.Na cava na vuna e solia kina o Koya na ka oqo? Ena veigauna kece, loloma savasava.
Na loloma savasava sa kedra ivakatakilakila dina na tisaipeli dina i Jisu Karisito.
E kaya o Peresitedi Thomas S. Monson: “Me da tekivu oqo, nikua sara ga, me da dau vakaraitaka na loloma vei ira kece na luve ni Kalou, se ra lewe ni noda matavuvale, noda itokani, noda veikilai, se o ira eda sega sara ga ni veikilai. Ni da duri cake ena veimataka yadua, me da lewa me da sotava ena loloma kei na yalovinaka na veika kecega ena yaco mai vei keda.”5
Kemuni na taciqu kei na ganequ, na kosipeli i Jisu Karisito e kosipeli ni loloma. Na ivunau cecere duadua e baleta na loloma. Vei au, e baleta kece na loloma.Na loloma nei Tamana, ka sorovaka na Luvena ena vukuda. Na loloma ni iVakabula, ka sorovaka na ka taucoko ena vukuda. Na loloma ni dua na tina se dua na tama ka na solia na ka kecega ena vukudra na luvena. Na nodra loloma o ira era veiqaravi galugalu ka ra sega ni kilai vua e vuqa vei keda ia e kilai ira vinaka na Turaga. Na nodra loloma o ira era vosota na ka kecega ena gauna kecega. Na nodra loloma o ira era solia e levu cake mai na ka era ciqoma.
Au lomana na Tamada Vakalomalagi. Au lomana na noqu iVakabula. Au lomana na kosipeli. Au lomana na Lotu. Au lomana na noqu matavuvale. Au lomana na bula vakasakiti oqo. Vei au, e baleta kece na loloma.
Me siga ni vakavoui vakayalo vei keda kece na siga ivakananumi oqo ni nona Tucaketale na iVakabula. Me itekivu ni dua na bula vakasinaiti ena loloma na siga oqo, “na yavuvatu ni noda bula e veisiga.”
Me vakasinaiti na yaloda ena loloma savasava i Karisito, na ivakatakilakila dina ni tisaipeli dina kece sara i Jisu Karisito. Oqo na noqu masu ena yaca i Jisu Karisito, emeni.