Raici ni Cakacaka ni Kaulotu

Ena ono na vula sa oti, sa cavuta na Lotu e vica na ikalawa me raica na cakacaka ni kaulotu.

Taro tudei. Eratou sa virikotora na Mataveiliutaki Taumada eso na taro tudei me ra vakayagataka na bisopi kei na peresitedi ni iteki ni ra veivakatarogi vei ira era vakarau kaulotu tudei. Eratou vakayaloqaqataki ira na iliuliu, itubutubu, kei ira na itabagone me ra vakamatautaki ira ena taro.

Na itagede e vakavotui ena taro ena sega ni veisautaka se vakuria na gagadre ena veiqaravi vakadaukaulotu tudei, ia ni taumuri e veigauna ena rawa kina ni ra vulica na vakarau tiko ki kaulotu kei ira nodra itubutubu na ivakavuvuli ka raica na veivanua ena gadrevi me vakavinakataki se vakuri kina na vakavakarau.

Vakayagataki ni tekinolaji. Na iwiliwili ni kaulotu era vakayagataka tiko na iyaya vakalivaliva veikauyaki sa tubu cake mai na 87 ki na 162, ka vakaisosomitaki na tablet ena talevoni vuku. Ena veivuke na talevoni vei ira na daukaulotu ena vuli, vaqaqara, kei na veivakavulici.

Sa vakayagataki talega na tekinolaji me vakarautaki na lewenivola ena initaneti baleti ira na tamata era vaqara tiko na isau ni taro vakalotu. Sa tekivu vakayagataka tiko na Lotu na vanua ni veivakavulici ena initaneti ena ono na yabaki sa oti ka nikua sa cicivaka tiko e 20 na vanua ni veivakavulici ena initaneti e vuravura taucoko.

Vinaka vakalevu na tekinolaji, o ira na lewenilotu era solia yani na yaca ni nodra itokani vei ira na daukaulotu sa rawa ni ra veitaratara kei ira na daukaulotu era vakavulici ira tiko nodra itokani. E rawa ni ra veivosaki vata kei ira na daukaulotu me baleta na leqa eso ka vakaitavi ena lesoni mai na initaneti. Vaqara me caka vakacava ena lds.org/referrals.

Sotavi na gagadre oqo. Me tekivu ena Julai 2018, sa na veisautaka na Lotu na iyalayala ni 19 na tabana ni kaulotu, ka na tauyavu e 5 na tabana ni kaulotu vovou. Oqo ena veisautaka na iwiliwili ni tabana ni kaulotu mai na 421 ki na 407. Na tabana ni kaulotu vou na Brazil Rio de Janeiro South, Cote d’Ivoire Yamoussoukro, Nigeria Ibadan, Philippines Cabanatuan, kei na Zimbabwe Bulawayo. Na itukutuku matailalai baleta na tabana ni kaulotu cokoti vata ena qai yaco malua mai ena veitaratara mai vei ira na peresitedi ni kaulotu ki vei ira na itubutubu ni daukaulotu ena veitabana ni kaulotu e yaco kina.

Tekivu mai na gauna e kacivaki kina na veisau ena yabaki ni kaulotu ena 2012, sa tauyavutaka na Lotu e 76 na tabana ni kaulotu vovou me sotava na tubu mai na 58,000 ki na 88,000 na daukaulotu. Sa lutu tale na ua ni daukaulotu me tekivu mai na gauna oya, me vaka a namaki, ena gauna oqo e rauta ni 68,000 na daukaulotu era sa veiqaravi tiko. Kena ibalebale ena gauna oqo, sa lailai sobu na tabana ni kaulotu e gadrevi. Ia e kena ibalebale talega na kena digitaki vakamatau na vanua me ra biu kina na daukaulotu ena vanua era gadrevi kina e vuravura.

Koronivuli ni Kaulotu. Erau sa vakalevutaki ka vakatabui ruarua na Koronivuli ni Kaulotu e Provo mai Utah, Amerika, kei na KVK mai na Yatu Filipaini, ka sa vakatabui na koronivuli vou ni kaulotu mai Ghana. Erau na sogo ena Janueri ni 2019 na koronivuli mai Spain kei Chile, o ira na daukaulotu e dodonu me ra dau laki tuberi ena rua na vanua oqori era na laki tuberi ena dua vei ira na 13 na koronivuli ni kaulotu e veiyasai vuravura.