Au sa Dua Li na Luve ni Kalou?

Mai vei Elder Brian K. Taylor

Ena Vitusagavulu

E rawa vakacava ni da sotava yadua na kaukauwa ni kena kilai na noda ivakatakilakila vakalou? E sa tekivu ena qarai ni kila na Kalou, na Tamada.

Dua na gauna sa oti au a gole ki lotu kei tinaqu lomani e neitou valenilotu e old rock.Au a malele ki na domo ni gone mai na rumu ni Lalai vata ga au a tiko kina ena vica na sagavulu na yabaki sa oti, kau a gole ki muri ka raici ira na iliuliu era vakavulica tiko na itoko ni yabaki oqo: “Au Luve ni Kalou.”¹ Au matadredredre niu nanumi ira na qasenivuli dauvosota ka lomani, ka donuya na neimami gauna ni lagasere eliu, era dau raici au—na tagane lailai vakatuburarawa e dau toka voli ga ena dabedabe emuri—ka vaka me kaya tiko mai, “E sa luve ni Kalou dina beka o koya? Ocei beka sa talai koya mai ke?”²

Au sureti keda yadua meda dolava na lomada ki na Yalo Tabu, ka “sa tukuna mai ki na yaloda, ni da sa luve ni Kalou.”³

Sa matata ka momona na vosa nei Peresitedi Boyd K. Packer: “Ko sa dua na luve ni Kalou. Sai Koya na tama ni yalomu. Ko sa kawa cecere vakayalo, na isolisoli ni Tui ni Lomalagi. Vakadeitaka na dina oya ki na nomu vakasama ka tautauri matua kina. Ia e vica na itabatamata ena nomu kawa vakayago, se vakaevei na mataqali tamata o matataka, na vakasakiti ni yalomu sa rawa ni toqai ena dua na iyatu. Ko sa dua na luve ni Kalou!”⁴

“Ni ko … raica na Tamada,” a vakamacalataka o Brigham Young, “o na raica e dua drau sa veikilai taumada mai vakabalavu, ka na ciqomi iko o Koya ena Ligana, ka na vakarau tu mo tau ki na Nona veikaroni ka reguci Koya.”⁵

Na iValu Levu ena iVakatakilakila Vakalou

A vulica o Mosese na nona itutu vakalou ena veivosaki vata kei na Turaga. Mai na ka e sotavi oya, “a mai veitemaki o Setani,” ena inaki malua, ka voravora me vakaseva, ka vakarusa, na ivakatakilakila i Mosese, “ni kaya: I Mosese, na luve ni tamata, mo qaravi au. Ka … raici Setani yani ko Mosese ka kaya: Ko cei ko iko? Raica, koi au oqo e dua na luve ni Kalou.”⁶

Sa kaukauwa sara na ivalu levu oqo ena ivakatakilakila vakalou, ni sa vakarau tu na iyaragi vakaitamera i Setani me vakarusa na noda vakabauta ka kila tiko na veimaliwai kei na Kalou. Vinaka vakalevu, eda sa vakalougatataki meda kila vakamatata na noda yavu mai na ivakatekivu: “A sa kaya na Kalou, Me datou bulia na tamata mei tovo vata kei kedatou, ka ucui kedatou,”⁷ ka ra sa kaya na parofita, “Oi keda yadudua eda luvena yalewa se tagane lomani vakayalo na noda itubutubu vakalomalagi ka tu na keda ituvaki kei na icavacava vakalou.”⁸

Na kilai deivaki ni veidina oqo⁹ sa vukei keda meda ulabaleta na veivakatovolei, leqa, kei na dredre cava ga eso.¹⁰ Ni tarogi, “Eda rawa ni vukei ira vakacava na sotava voli [e dua na bolebole vakaiira]?” a vakarota e dua na iApositolo ni Turaga, “Vakavulici ira ena nodra ivakatakilakila kei na nodra inaki.”¹¹

“Na Kilaka Kaukauwa Duadua Au Taukena”

Na veikilaka kaukauwa oqo a veisautaki-bula vua na noqu itokani o Jen,¹² ka a vakavuna e dua na coqa ni motoka vakacalaka bibi ni se goneyalewa. Dina ga ni a bibi sara na mosi ni yagona e sotava, a vakila na rarawa levu baleta ni a mate na draiva kadua. “E dua sa yali vua na tinana, ka sa bale vei au,” a kaya o koya. O Jen, ka a duri ga ena vica na siga sa oti ka kaya, “Keimami sa luvena yalewa na Tamada Vakalomalagi, ka lomani keda,”¹³ sa vakataroga, “E rawa vakacava me lomani au o Koya?”

“Sa sivi na sotavi ni dredre vakayago,” a kaya o koya, “ia au sega ni vakabauta ni’u na vakabulai mai na mavoa eso ni veika e kilai e loma ka vakayalo talega.”

Me rawa ni bula tiko, a vunitaka vakabibi na lomana o Jen, ka vakayawaki koya tani. Oti e dua na yabaki, ni sa qai rawa vua me talanoataka na coqa, a sureti koya e dua na daunivakasala vakauqeti me vola na malanivosa “Au sa dua na luve ni Kalou” ka cavuta vaka 10 e veisiga.

“Sa rawarawa na volai ni vosa,” kaya o koya, “ia au sega ni rawa ni cavuta. … Sa vakayacora dina oya, kau sega ni vakadinata ni sa vinakati au na Kalou me’u Luvena. Au na vakacoqiqi ka tagi.”

Oti e vica na vula, sa yaco me vakacavara o Jen na tasi ni veisiga. “Au a talaucaka na yaloqu taucoko” e kaya o koya, “ka vakatakekere vua na Kalou. … Sa qai yaco me’u vakadinata na vosa.” Na vakabauta oqo sa vakatara na iVakabula me tekivu semata na mavoa ni yalona. Sa kauta mai na iVola i Momani na yalovakacegu kei na yaloqaqa ena Nona Veisorovaki.¹⁴

E tinia o Jen “Sa vakila o Karisito na noqu mosi, noqu rarawa, noqu cala.” Au a vakila na loloma savasava ni Kalou ka’u se sega mada ni sotava e dua na ka e kaukauwa cake! Na kena kilai ni’u sa dua na luve ni Kalou e sa kila-ka mana duadua au taukena!”

Vakasaqarai me Kila na Kalou, na Tamada

Taciqu kei na ganequ, e rawa vakacava ni da sotava yadua na kaukauwa ni kena kilai na noda ivakatakilakila vakalou? Ena tekivu na kena vakasaqarai meda kila na Kalou, na Tamada.¹⁵ A vakadinadinataka o Peresitedi Russell M. Nelson, “E dua na ka kaukauwa e dau yaco ni segata e dua na luve ni Kalou me kilai Koya vakalevu cake kei na Luvena Daulomani.”¹⁶

Na vulici kei na vakamuri ni iVakabula e sa vukei keda meda kila na Tamada. “Ka sa … irairai kecega i [Tamana],”¹⁷ a kaya o Jisu, “E sega ni rawata vakai koya ga e dua na ka na Luvena, na ka ga sa raica ni kitaka ko Tamana.”¹⁸ Na vosa kei na ivalavala kece i Karisito sa vakatakila na ituvaki dina ni Kalou kei na noda veimaliwai kei Koya.¹⁹ A vakavulica o Elder Jeffrey R. Holland, “Ena basika ni dra ena veiqara kei na tagi ni yaluma mai na tebe ni Gusuna, o Karisito a vaqarai Koya ka dau vakasaqara tu ga—na Tamana. ‘I Tamaqu,’ a tagi o Koya, ‘Tamaqu.’”²⁰

Ni vaqarai Tamana vagumatua o Jisu e Kecisemani, me vakai Josefa Simici gone, ena 1820, a masuta voli na Kalou ena Veikau Tabu. Ni wiliki oti, “Ia kevaka sa lailai na vuku vua e dua vei kemudou, me kerea vua na Kalou,”²¹ sa laki masu o Josefa.

“Au qai tekiduru sobu,” e vola o koya, “ka tekivu me’u cabora cake na gagadre ni yaloqu vua na Kalou. …

“… au sa raica e dua na duru bukawaqa ka donumaka sara tu ga na uluqu. …

“… au sa qai raica e rua na Tamata, ka sega ni vakamacalataki rawa na kedrau iserau kei na lagilagi, e rau tucake tu e macawa donumaki au. A vosa mai vei au e dua vei rau, e kaciva na yacaqu ka kaya, ni dusi koya na kena ikarua—[Josefa,] Oqo na Luvequ Lomani. Mo Rogoci Koya!”²²

Ni da vakamuria na ivakaraitaki ni iVakabula kei na Parofita o Josefa ena vakasaqaqara matua ni Kalou, eda na mai kila vakaidina sara, me vakataki Jen, ni sa kilai keda na Tamada ena yacada, ni da sa Luvena.

Kivei kemuni na tina goneyalewa, ka vaka me luvuci ka tawakilai tu ena sasagataki me susugi e dua na “kawatamata leve-ivalavala ca,”²³ kakua ni vakawalena na nomu itutu mareqeti ena ituvatuva ni Kalou. Ena veigauna ni lomaocaoca—o rairai cicimuri ira voli tiko na luvemu lalai ka vakatakila vei iko na iboi qesa mai valenikuro ni sa isoro kama tu oqo na vakayakavi vakarautaki ena loloma—mo kila tiko ni sa vakatabuya na nomu veisiga dredre na Kalou.²⁴ “Kakua ni ko rere; niu sa tiko vata kei iko,”²⁵ sa veivakacegui kina o Koya. Keimami dokai kemuni ena vakacavari ni inuinui nei Sisita Joy D. Jones, ka a kaya, “Sa ganita me ra kila na luveda na nodra ivakatakilakila vakalou.”²⁶

Au sureti keda yadua me da vakasaqara na Kalou kei na Luvena Daulomani. “E sega na vanua,” a kaya o Peresitedi Nelson, “e vakavulici kina vakamatata ena qaqa na dina eso oqori me vaka na iVola i Momani.”²⁷ Cega na drauna ka vulica ni Kalou sa cakava “tiko na veika kece sara me baleta na [noda] tiko vinaka kei na marau”;²⁸ ni o Koya sa “dauvosota ka dauloloma, berabera ni cudru, vosota vakadede ka sinai ena yalovinaka”;²⁹ ka sa “tautauvata na tamata kecega ki [Vua].”³⁰ Ni mavoa na yalomu, yali, rere, lomaleqa, rarawa, viakana, se kaliraki tani ena itagede cecere ni bula³¹ dolava na iVola i Momani, ka kila kina ni “[Kalou] ena sega vakadua ni biuti keda. Se bera vakadua, ka na sega vakadua. E sega ni rawa Vua. E sega ni Nona itovo ni bula [me cakava vakakina].”³²

Na kilai ni Tamada sa veisautaka na ka kecega, vakauasivi na lomada, ni vakadeitaka na Yalona malua na keda ivakatakilakila dina kei na yaga levu e Matana.³³ Sa lako vata kei keda na Kalou ena sala ni veiyalayalati ni da qarai Koya ena vakamamasu, wili ivolanikalou, kei na bula ni talairawarawa.

Na Cecere ni iTovo ni Bula ni Kalou—Noqu iVakadinadina

Au lomana na nodra Kalou na tamaqu,³⁴ “sai Au na Turaga na Kalou Kaukauwa,”³⁵ ka tagi vata kei keda ni da rarawa, veivakadodonutaki ena vosota na noda tawadodonu, ka marautaka ni da vakasaqara me da “veivutunitaka na [noda] ivalavala ca kecega [me da] kilai [Koya].”³⁶ Au sokalou Vua, ka sa “tamadra tu na luveniyali,”³⁷ ka itokani vei ira ka sega na nodra itokani. Au vakavinavinaka, me vakadinadinataka niu sa mai kila na Kalou, na Tamaqu, ka vakadinadinataka na vinaka vakaoti, ivakarau tudei, kei na “cecere ni Nona itovo ni bula.”³⁸

Me da sa kila ka tugana vakaidina taucoko na noda “dodonu ni sucu vakaturaga”³⁹ vaka na luve ni Kalou ena noda mai kilai Koya, “na Kalou dina duadua ga, kei Jisu Karisito, ka tala mai o [Koya]”⁴⁰ sa noqu masu cecekia ena yaca i Jisu Karisito, emeni.