Veiqaravi Veivakauqeti

Mai vei Peresited Henry B. Eyring

iKarua ni Daunivakasala ena Mataveiliutaki Taumada

Eda ciqoma vakavinavinaka duadua na Yalo Tabu ena gauna eda vakanamata vakatabakidua ena qaravi ira na tani. Oqo na vuna e tiko kina na ilesilesi ni matabete meda qarava na iVakabula.

Kemuni na taciqu lomani, au vakavinavinakataka na madigi meu vosa vei kemuni ena koniferedi raraba vakairogorogo oqo. Eda sa mai tokoni Peresitedi Russell M. Nelson mei ka 17 ni Peresitedi ni Lotu i Jisu Karisito ni Yalododonu Edaidai. Au mai kalougata meu cakacaka vata kei koya ena veisiga, au a vakila na veivakadeitaki ni Yalo ni o Peresitedi Nelson sa kacivi koya na Kalou me liutaka na Lotu dina ni Turaga.

Au sa mai vakadinadinataka talega ni Turaga sa mai kacivi Elder Gerrit W. Gong kei Elder Ulisses Soares me rau veiqaravi vaka-lewe ni Kuoramu ni iApositolo Le Tinikarua. Au lomani rau ka tokoni rau. Ena nodrau veiqaravi vakalotu, sa na kalougata kina na bula ni tamata e vuravura.

E vakairogorogo na koniferedi oqo ena dua tale na kena inaki. Sa mai vakaraitaka o Peresitedi Nelson na ikalawa ki liu e veivakauqeti ena ituvatuva ni Turaga ena Nona Lotu. E oka ena ituvatuva e dua na ivakarau vou ena kuoramu ni matabete ena tabanalevu kei na iteki me rawa ni da vakayacora vakavinaka cake na noda ilesilesi ni matabete. Na ilesilesi oqori sa baleta taucoko tiko na noda veiqaravi vakamatabete vei ira na luvei Tamada.

Na ituvatuva ni Turaga vei ira na Nona Yalododonu mera loloma yani sa mai taura e vuqa vata na kena ituvaki ena veiyabaki. Ni se qai tauyavutaki tiko o Nauvoo, a gadreva na Parofita Josefa Simici e dua na ituvatuva matau ni nodra qaravi e vuqa sara na saumaki mai dravudravua era gole mai ki na siti. A maliwai ira talega e va vei ira na tubuqu vakarua—na Eyring, Bennions, Romneys, kei na Smiths. A tauyavutaka na parofita na nodra qaravi na Yalododonu oqo ena nodra dui itikotiko. Mai Illinois a vakatokai na wasewase ni siti oqori me “tabanalevu.”

Ni ra sa mua yani na Yalododonu ki na buca, a tuvanaki na nodra veiqaravi vakai ira ena “veilawalawa.” Dua vei iratou na tukaqu vakarua (yasana vei tamaqu) a lesu tiko mai ena kaulotu ka sa kilai tu nikua me o Oklahoma a mani sotava kina e dua na ilawalawa e gaunisala.A malumalumu sara ena tauvimate ka rau a davo toka kei nona itokani ena dua na qiqi lailai.

A mani tala yani o iliuliu ni ilawalawa o ya e rua na goneyalewa me vukea o cei ga e tiko ena loma ni qiqi o ya. Dua vei rau, e goneyalewa ka a saumaki mai Switzerland, a raica yani e dua vei rau na daukaulotu ka sa lomana sara. A vakabulai mai na ilawalawa ni Yalododonu o ya. A bulabula cake mai ka taubale yani ena vo ni ilakolako ki na Salt Lake Valley ka toka e yasana o nona dauveivueti goneyalewa. Rau a mani veidomoni ka vakamau sara. A yaco o koya me tukaqu vakarua o Henry Eyring, kei goneyalewa me buqu vakarua o Maria Bommeli Eyring.

Vica na yabaki tarava, era dau tukuna na tamata na dredre levu ni kena takosovi na vanua, a qai kaya, “Oi e sega, a sega ni dredre. Keirau a taubale, ka veitalanoa ena gauna taucoko ni sa dua dina na cakamana na neirau sa mai kunea na kosipeli dina i Jisu Karisito. Sa dua na gauna marautaki au se nanuma tu ga.”

Mai na gauna o ya, sa vakayagataka na Turaga e vica na mataqali sala eso mera vukei na Yalododonu mera veilomani vakai ira. Ia sa mai vakalougatataki keda ka vakakaukauwa taki keda o Koya ena kuoramu duavata ena tabanalevu kei na iteki—na kuoramu era cakacaka veicokonaki kei na mataisoqosoqo taucoko ena tabanalevu.

O ira na tabanalevu ena vanua, ilawalawa, kei na kuoramu qaqaco era sa gadreva kece e rua na ka mera rawata kina na inaki ni Turaga mera na dauveilomani na Nona Yalododonu ena ivakarau e daulomani ira kina. Era gugumatua ni ra vakila na Yalododonu na loloma i Karisito e na nodra vei maliwai ka sega e nanumi ira ga vakataki ira. E vakatoka na ivolanikalou na “loloma uasivi … na loloma taucoko i Karisito” (Moronai 7:47). Era na qaqa, ni veidusimaki na Yalo Tabu vei koya sa dauloloma me kila ni ka e kila na Turaga sa vinaka duadua vua na tamata e saga tiko me na vukea.

A vakavuqa ena veimacawa sa oti, era cakacaka na lewe ni Lotu niu tu e kea me vaka ni ra sa marautaka na ka ena vakarau cakava na Turaga, me vaka sa kacivaki eke nikua. Meu vakaraitaka mada e rua ga na ivakaraitaki. Dua, o ya na vosa ena soqoni ni sakaramede maivei ivakavuvuli yabaki 14 ena Matabete i Eroni e kila vinaka tu na veika era rawa ni rawata na lewe ni matabete ena veiqaravi vua na Turaga. iKarua, a vakauqeti e dua na lewe ni Matabete i Melikiseteki, me qarava e dua na matavuvale ena vuku ni loloma i Karisito.

iMatai, meu tukuna mada vei kemuni na vosa nei cauravou ena soqo ni sakaramede ni tabanalevu.Au a tiko ekea. Tovolea mo vakasamataka mada na gauna o a se yabaki 14 kina ko a rogoci koya ni a kaya vakalevu cake ni vakatauvatani ki na dua na cauravou e rawa me kila sara.

“Au taleitaka dina niu mai lewena na kuoramu ni ivakavuvuli ena neitou tabanalevu vakatekivu noqu sa yabaki 14 ena yabaki sa oti. E tu ga vua e dua na ivakavuvuli na ilesilesi taucoko ni dua na dikoni vata kei na kena ka vou.

“Me vaka ni so vei keimami e ivakavuvuli, eso era na vakakina mai muri, ka ra na kalougata na tamata yadua ena Lotu ena matabete, ka sa bibi vei keda kece meda kila vakalevu na ilesilesi ni ivakavuvuli.

“iMatai, e kaya na Vunau kei na Veiyalayalati 20:53, ‘Sa itavi ni ivakavuvuli me dau vakatawai ira na lewe ni lotu ena veigauna kece sara, dauvukei ira ka vakaukauwataki ira.’

“Tarava, e kaya na Vunau kei na Veiyalayalati 20:54–55:

“‘Ka raica me kakua na caka ca ena lotu, me kua na veicudruvi vakataki ira, kua na lasu, veikaseti vuni, se vosa vakacacataki ira na tani;

Ka raica me ra dausoqoni wasoma na lewe ni lotu, ka raica tale ga me ra vakayacora vakavinaka na nodra itavi na lewenilotu.’”

A tomana tale o cauravou:

“Na Turaga sa tukuna tiko ni sega ni noda ilesilesi walega meda lomana na Lotu ia mera lomani talega na tamata ena loma ni Lotu me vaka e cakava na Karisito baleta oqo e Nona Lotu. Kevaka eda saga meda maroroya na ivakaro, meda veilomani vakai keda, meda tamata dina, itokani vinaka, ka veimarautaki tiko, sa na qai tiko kei keda na Yalo ka kila na veika e vinakata na Tamada Vakalomalagi meda cakava. Ke sega, eda na sega ni cakava rawa na noda veikacivi.”

A tomana ka kaya:

“Ni sa digitaka e dua na ivakavuvuli me ivakaraitaki vinaka ni sa dauveituberi vinaka ni vuvale, kidavaki ira na lewenilotu e valenilotu, vakarautaka na sakaramede, veivuke e vale, ka dauveisaututaki, sa digitaka tiko me rokova na nona matabete ka vakayacora na nona veikacivi.

“Ni ko ivakavuvuli vinaka e sega ni kena ibalebale mo veiqaravi walega ena gauna ni lotu se ena itaviqaravi ni Lotu. E vakavulica o iApositolo Paula, mo yaco mo nodra ivakarau era sa vakabauta, ena vosa, ena ivalavala, ena loloma, ena lomadina, ena yalosavasava’ (1 Timoci 4:12).”

A qai kaya o cauravou:

“Se evei na vanua eda tiko kina se cava na ka eda cakava tiko, sa rawa tikoga meda ivakaraitaki vinaka ni ivalavala dodonu ena veigauna kei na veivanua kecega.

“Oi au kei tamaqu keirau dauveituberi ni vuvale vei iratou na Brown.¹ Ena veigauna keirau dau gole e kea, sa dua na gauna talei vei au ni veisiko kei na kilai iratou. Dua na ka au taleitaka vei iratou na Brown o ya ni keirau yaco yani, eratou dau vakarorogo taucoko ka dau tu nai talanoa vinaka ratou dau wasea.

“Ni da sa kilai ira vinaka ena tabanalevu ena vuku ni veituberi ena vuvale, ena vakarawarawataka na itavi e tarava nei ivakavuvuli, o ya na nodra kidavaki na lewenilotu e valenilotu. Ni ra vakila na tamata ni ra taleitaki ka okati ena lotu era na vakila na lewenilotu kece ena tabanalevu ni ra lomani ka vakarautaki mera taura na sakaramede.

“Ni ra sa kidavaki oti na lewenilotu ena lotu, era na veivuke na ivakavuvuli ena Siga Tabu yadua ena vakarautaki na sakaramede. Au dau taleitaka dina na vota ka vakarautaka na sakaramede ena tabanalevu oqo baleta ni ra dau vakarokoroko. Au dau vakila na Yalo niu dau vakarautaka ka vota na sakaramede. Au kalougata dina niu rawa ni cakava oqo ena vei Siga Tabu.

“Eso na veiqaravi me vakataka na votai ni sakaramede era raica na tamata ka ra vakavinavinaka ni keimami cakava, ia na veiqaravi ni vakarautaki ni sakaramede e dau caka ka sega ni dau laurai. E sega ni bibi ke ra raica na neimami veiqaravi; na ka e bibi o ya ni kila na Turaga ni da qaravi Koya tiko.

“Ni da sa ivakavuvuli, meda saga na vaqaqacotaki ni Lotu, noda itokani, kei na noda matavuvale ni da cakava na noda ilesilesi ni vakamatabete. E sega ni dau rawarawa, ia na Turaga e sega ni soli ivakaro vei keda ‘vakavo kevaka e sa vakarautaka rawa mada na sala [meda] rawata kina na ka sa vakarota vei ira ko koya’ (1 Nifai 3:7).”

Ni sa tinia o cauravou oqo, au a kurabuitaka tikoga na nona yalomatua kei na vuku.A tinia ena nona kaya, “Au kila ni da na vinaka cake keda digitaka meda muri [Jisu Karisito].”

Dua tale na italanoa ni veiqaravi ni matabete a tukuni ena vula sa oti ena dua na soqoni ni sakaramede. Au a tiko tale ekea. Ena veika oqo, a sega ni kila na turaga e taura tu na Matabete i Melikiseteki, ni sa tukuna tiko na ka sara ga e gadreva na Turaga me yaco ena kena vaqaqacotaki na kuoramu ni matabete. Oqo na nona itukutuku ni ka a yaco:

Rau a lesi kei nona itokani dauveituberi ni vuvale me rau qarava e vitu na vuvale.Voleka ni ra sega taucoko ni vinakata mera sikovi. Ni ra gole yani na dauveituberi ni vuvale ki na nodra itikotiko, era sega ni dolava na katuba.Ni rau qiri ira ena talevoni, e sega ni dua e sauma mai. Ni ra biuta e dua na itukutuku, a sega ni saumi lesu mai. Sa qai cakava o itokani iliuliu me sa dua na veiqaravi ni veivolavolai. A tekivu vakayagataka na waqanivola dromodromo serau ka nuitaka mena saumi lesu mai.

Dua vei ira na vitu na vuvale oqo e dua na sisita luluqa vakalotu sega ni vakamau a tadu mai Iurope. A rua tiko na luvena lailai.

Ni oti e vica vata na sasaga me rau veitaratara, a ciqoma o itokani e dua na itukutuku ka vakau mai ena talevoni. A tukuna doudou vua ni osooso sara me sotavi ira na dauveituberi ni vuvale. A rua tiko na nona cakacaka ka tiko talega ena mataivalu. E nona cakacaka taumada na ovisa, ka sa lalawataka tiko me dua na ovisa vakalecaleca ka lesu ki na nona vanua ka tomana nona cakacaka e kea.

A sega ni rawa kina vei dauveituberi ni vuvale me sikovi koya e nona vale. Sa qai dau teks tiko vua o koya. Ena veivula sa dau volavola tiko vua, tokoni ena kadi ni olodei vei rau yadua na gone.

A sega ni saumi mai vua. Ia sa kila tu o koya o cei e nona dauveituberi ni vuvale, me tarai rau vakacava, ka rau na guta tikoga na veiqaravi oqo ni matabete.

Dua na siga a taura o dauveituberi na nona teks mai vua. Sa gadreva dina me na vukei. A sega tu ni kila o cei e bisopi ia e kilai rau na nona dauveituberi ni vuvale.

Ena vica na siga mai oqo, ena biuta tiko na vanua me laki vuli vuladua vakamataivalu. Sa na sega ni rawa me kauti rau na luvena lalai. Na tinana, a dodonu me laki qaravi rau na luvena, sa vuka ena waqavuka ki Iurope me laki qaravi watina, a tauvimate bibi e valenibula.

Na sisita luluqa vakalotu oqo e so toka na nona ilavo me sauma e dua na tikite ni waqavuka ki Iurope nei luvena lailai ia e sega ni rawa vei luvena tagane yabaki 12 o Eric.² A kerei nona dauveituberi ni vuvale ke rawa me raica e dua na matavuvale YDE vinaka me tiko kina o Eric me 30 na siga!

A teks lesu o dauveituberi ni vuvale ni na saga na nona igu taucoko. A qai veitaratara vei iratou na nona iliuliu ni matabete. E solia vua na veivakadonui, o bisopi, o koya ka vakatulewa ena bete levu, me veivosaki kei ira na lewe ni matabose ni tabanalevu, oka kina o Peresitedi ni iSoqosoqo ni Veivukei.

Araica totolo o Peresitedi ni iSoqosoqo ni Veivukei e va na matavuvale vinaka ni YDE, era vakagone ena yabaki nei Eric, mera kauti koya i nodra vale ka mera yadua na macawa. Ena vula e tarava, era a vakani Eric na vuvale oqo, solia e dua na rumu vua ena nodra itikotiko se vale lalai osooso, okati koya ena nodra ituvatuva taumada ni itaviqaravi ni vulaikatakata, kauti koya mai ki lotu, okati koya ena lotu vakamatavuvale, kei na kena kece vaka o ya.

Na matavuvale era vakacauravou lailai vakataki Eric, era a okati koya ena nodra soqoni ni kuoramu ni dikoni kei na itaviqaravi. Ena loma ni 30 na siga oqo, a tiko ena lotu o Eric ena vei Siga Tabu, ka qai matai ni gauna me vakakina ena nona bula.

Ni sa suka mai o tinana mai na nona vuli, sa laki lotu tikoga o Eric, vata kei na dua na matavuvale volodia oqo ni YDE kei na so tale era sa mai nona itokani, oka kina oi rau na qasenivuli dauveisiko nei tinana. Toso na gauna, sa tabaki o koya me dikoni ka sa tekivu vota na sakaramede.

Ia, meda raica mada na veimataka nei Eric. Eda na sega ni kurabui ni na yaco me iliuliu ni Lotu ena vanua nei tinana ni ratou sa lesu tale e kea na nona matavuvale—ena vukudra ga na Yalododonu era a cakacaka duavata me ra veiqaravi ena veidusimaki ni Yalo Tabu kei na loloma sa tu e lomadra.

Eda kila ni loloma sa ka bibi vei keda me da na vakabulai rawa ki na matanitu ni Kalou. A vola o Moronai, “Ia kevaka sa sega vei kemudou na loloma uasivi, dou na sega ni rawa ni vakabulai ena matanitu ni Kalou” (Moronai 10:21; raica talega na Ica 12:34).

Eda sa kila talega ni loloma sa isolisoli e vakatikori vei keda ni oti na veika eda cakava rawa. E dodonu meda “masuta na Tamada e yalo[da] taucoko me vakasinaiti ke[da] ena loloma oqo; io na loloma sa solia vei ira era sa muria na Luvena ko Jisu Karisito ena yalodina.” (Moronai 7:48).

E vaka vei au ni gauna vinaka duadua ni noda ciqoma na Yalo Tabu ni da qaravi ira vagumatua na tamata. Oqo na vuna e tiko kina na ilesilesi ni matabete meda qarava na iVakabula. Ni da sa qaravi ira na tamata, eda na sega soti ni vakasamataki keda tiko, ka rawarawa vua na Yalo Tabu me lako mai ka vukei keda ena sasaga ni bula taucoko me vakatikori vei keda na isolisoli ni dauloloma.

Sa noqu ivakadinadina ni sa tekivutaka oti na Turaga e dua na ikalawa cecere ki liu ni Nona ituvatuva baleti keda meda vakauqeti vakalevu cake ka dauloloma ena noda veiqaravi ni matabete. Au sa vakavinavinakataka na Nona loloma, sa solia vei keda ena loloma. Au vakadinadinataka, ena yaca i Jisu Karisito, emeni.