Elder Matthew L. Carpenter
Vakaitutu Raraba ena Vitusagavulu
E nanuma o Elder Matthew L. Carpenter na imatai ni gauna a vakila kina na Yalo Tabu. Se gonetagane gone kina, rauta ni yabaki vitu, dabe toka ena Paraimiri e ra. A curuma tiko yani na rumu e dua na rarama, ka vakila e dua na raragi se bera vakadua ni bau vakila.
“Au vakila na yavala ni utoqu—ia sega ni baleta niu katakata,” e kaya o koya. “Au kila ni tiko dina na Kalou; au vakila.”
Ni yabaki 11 okoya, a lakova vata kei tamana e dua na soqoni ni koniferedi raraba ena Valecavu e Salt Lake. Oqo na imatai ni gauna a tiko kina ena dua na rumu kei na dua na parofita, o Peresitedi Joseph Fielding Smith.
“Niu raici koya,” e kaya o koya, “a vakadinadinataka vei au na Yalo ni o koya na parofita.”
Na veivakadeitaki vakayalo rawarawa oqo ena gauna ni gone a vukei koya me dau raica na Yalo me dauveidusimaki ena nona bula taucoko.
“Na noqu ivakadinadina e sega ni dua ga na gauna sotavi vakaagilosi,” e kaya na Vitusagavulu Vakaitutu Raraba, ka a tokoni ena 31 ni Maji, 2018, “ia sa torocake ka tubu ni toso na gauna.”
A sucu o Matthew Leslie Carpenter e Salt Lake City, Utah, Amerika, ena 21 ni Okotova, 1959, vei rau o Leone Erekson kei Robert Allred Carpenter. O koya e gone duadua vei iratou na le walu na luvedrau na veiwatini, ka tubu cake o koya ena dua na matavuvale kei iratou e lima na ganena qase.
Ena iotioti ni nona vula ena vuli torocake, erau sota kina kei Michelle “Shelly” Brown. Sa tekivu na veigadivi ia rau mani biuta toka vakawawa nodrau veimusumusuki ni lako o koya me laki veiqaravi ena Tabana ni Kaulotu na Swiss Geneva mai na 1979 ki na 1981. Ni lesu mai, rau mani vakamau na lewerua ena Valetabu e Salt Lake City ena ika 9 ni Julai , 1982. Erau nodratou itubutubu e lima na gone.
A rawata o Elder Carpenter e dua na diqiri ni bejila baleta na ilavo mai na Brigham Young University kei na masita ni veiliutaki vakabisinisi mai na Univesiti na Havard. Na iotioti ni nona cakacaka a manidia dairekita ni Foundation Specialty Financing Fund.
Sa veiqaravi oti o Elder Carpenter vaka: bisopi, daunivakasala ena matabisopi, peresitedi ni Cauravou ena iteki, lewe ni matabose e cake, peresitedi ni iteki, ka Vitusagavulu ni iWasewase.