Me Vaka sa Sega ni Cudruvi Kemudou na Karisito, Mo Dou Vaka Talega Kina
Mai vei Elder Larry J. Echo Hawk.
Ena Vitusagavulu
Ena rawa ni da ciqoma taucoko na vakacegu tawatukunirawa kei na duavata kei na iVakabula ni da vulica meda vosoti ira era caka cala vei keda.
“Ia e nai matai ni siga ni macawa, ena mataka caca sara, eratou sa lako mai ki nai bulubulu, a ratou sa kauta mai na veika boivinaka eratou a vakarautaka, ka so tale eratou lako vata mai kei iratou.
A ratou sa kunea ni sa vaqiqici tani na vatu mai nai bulubulu.
“Ia ni ratou sa curu yani iloma, eratou sa sega ni kunea na yago ni Turaga ko Jisu.
“A sa yaco ni ratou sa kurabui vakalevu kina, raica, e lewe rua na tamata sa tu voleka vei iratou e nai sulu lumilumisa:
“Ia ni ratou sa rere, ka vakacuva sobu na matadratou ki na qele, erau sa kaya vei iratou, Ena cava dou sa mai vakasaqarai koya sa bula ena kedra maliwa na mate?
“Sa sega eke ko koya, sa tucake tale.”1
Ni mataka, na Sigatabu ni Siga ni Mate, eda na vakananuma kina vakatabakidua na ka esa cakava vei keda o Jisu Karisito: “Ni sa lomani ira na kai vuravura vakaoqo na Kalou, me solia kina na Luvena e dua bauga sa vakatubura, me kakua ni rusa ko ira yadua sa vakabauti koya, me ra rawata ga na bula tawamudu.”2 E muri, eda na vakaturi cake me vakataki Koya, ka bula tawayalani.
Ena cakamana ni Veisorovaki tabu i Jisu Karisito, sa rawa ni da ciqoma talega na isolisoli ni veivosoti ni noda ivalavala ca kei na cakaca, kevaka eda vakadonuya na madigi ka salamuria na veivutuni. Mai na ciqomi ni cakacaka vakalotu veiganiti eso, maroroi ni veiyalayalati, kei na muri ni vunau, eda na rawata na bula tawamudu ka lagilagi.
Nikua, au via taleva na veivosoti, e dua na isolisoli mareqeti ka totoka e sa solia vei keda na noda iVakabula ka Dauveivueti, o Jisu Karisito.
Ena dua na bogi ni Tiseba 1982, au a vakayadrati kei na watiqu o Terry ena talevoni ki na neirau itikotiko e Pocatello, Idaho. Niu sauma yani na talevoni, au sa rogoca ga na mamakeukeu. E muri, a kaya vakadredre mai na ganequ, “Sa leqa o Tommy.”
E dua na draiva ka mateni yabaki 20, ka siviti voli me sivia na 85 na maile (135 na km) dua na aua, a ciciva vakatawadodonu na cinadautataro ena dua na itkotiko e Denver, Colorado. A coqa vakaukauwa na motoka a draivataka tiko na taciqu gone duadua, o Tommy, ka vakamatei koya kei na watina, o Joan. Rau a lesu tiko ki vale vua na luvedrau goneyalewa ni oti e dua na soqo ni Siganisucu.
Au a vuka vakusakusa kei watiqu ki Denver ka gole yani ki na vanua e maroroi ki na yago ni mateKeirau a sokomuni vata kei na noqu itubutubu kei ira na taciqu ka lolositaka na takali ni neimami daulomani o Tommy and Joan. Keitou a vakayali rau ki na dua na itovo sakasaka ka tawadodonu. E kavoro na yaloi keitou, ka sa tekivu bucini e lomaqu na cudru kivua na gone cakacala oya.
A veiqaravi tu vakaloya o Tommy ena Tabana ni Vakatulewa Dodonu e Amerika ka sa kakavaki voli me dua na mata kaukauwa ena taqomaki ni nodra qele kei na yaubula na iTaukei kei Amerika ena veigauna muri mai.
Ni oti e vica na siga, sa vakayacori na veilewai me baleta na cauravou ka kune ni sa baleti koya na vakamate tamata ena lori. Ena luluvu mosimosi dina, ratou a laki rogo veilewai na noqu itubutubu kei na ganequ qase duadua, o Katy. Rau a tiko talega kina na itubutubu ni draiva mateni, ka ni oti na vakatulewa, rau a dadabe voli ka tagi. Ratou a dabe voleka toka na noqu itubutubu kei ganequ ena nodratou saga toka me qarauni na nodratou dui lewa eloma. Oti vakalailai, ratou sa duri cake na noqu itubutubu kei ganequ ka gole yani veiratou na itubutubu ni draiva ka vakacegui rau ena vosa eso kei na veivosoti. Rau a lululu na turaga; ka veitauri liga na marama; sa tarabi vakataucoko na lolosi kei na wainimata ena kena vakilai ni sa sotavi dredre vakalevu na matavuvale ruarua. A veivakaliuci o Na, Ta, kei Katy ena nodratou kaukauwa kei na yaloqaqa malua ka vakaraitaka ki na neitou matavuvale na irairai ni dau veivosoti.
Na veicuqeni ni veivosoti ena gauna vakaoya sa vakavuna vei au na yalomalua ka dolava e dua na sala ni veivakabulai. Yaco na gauna noqu sa mai vulica na iwalewale ni kena tikori e dua na yalo veivosoti. Mai na veivuke duadua ga ni Tui ni Sautu sa mai tasereki kina na noqu icolacola mosimosi. Na yaloqu ena calati Tommy kei Joan tu ga, ia na veivosoti sa vakatarai au oqo meu vakananumi rau ena reki kei na veivagalalataki. Kau kila ni keitou na tiko vata tale vakamatavuvale.
Au sega ni vakatututaka tiko meda raibaleta na ivalavala tawamurilawa. Eda kila vakamatata tu ni na tauca na nona ivalavala na tamata yadua ena vuku ni basulawa kei na cakacala. Ia, eda kila talega, nida luvena yalewa kei na tagane na Kalou, eda vakamuria na ivakavuvuli i Jisu Karisito. Meda na veivosoti tiko ena gauna sara madaga era sega ni veivosoti tiko kina o ira na tani.
A vakavulica na iVakabula:
“Ia kevaka dou sa sega ni cudruvi ira na tamata sa caka cala, ena sega talega ni cudruvi kemudou na Tamamudou vakalomalagi:
“Ia kevaka dou sa cudruvi ira na tamata sa caka cala, ena cudruvi kemudou talega ena vuku ni nomudou caka cala na Tamamudou.”3
Ena rawa ni da ciqoma taucoko na vakacegu tawatukunirawa kei na duavata kei na iVakabula ni da vulica meda vosoti ira era caka cala vei keda. Na cakacaka vata oqo sa kauta mai na kaukauwa ni iVakabula ki na noda bula enasala e tawacala ka tawaguilecavi.
A vakasalataka na iApositolo o Paula:
“O koya mo dou qai vakaisulu me vaka dou sa nona digitaki na Kalou, … ena yalo dauloloma, ena yalovinaka, ena yalomalumalumu, ena yalomalua, ena dauvosota vakadede;
“Dou veivosoti vakai kemudou, ka kakua ni veicudruvi … : me vaka sa sega ni cudruvi kemudou na Karisito, mo dou vaka talega kina.”4
A cauraka Vakaikoya na Turaga:
“O koya, au sa kaya kina vei kemudou, ni sa dodonu mo dou veivosoti vakataki kemudou; ni na tu me cudruvi mai vua na Turaga ko koya sa sega ni vosota na nona caka cala na wekana, ni sa tu ga vei koya na ivalavala ca e levu cake.
“Koi Au na Turaga, au na vosoti ira ga au via vosota, ia koi kemudou sa gadrevi mo dou vosota na tamata kecega.”5
Sa ra matata tu na ivakavuvuli ni noda iVakabula ka Dauveivueti; sa dodonu me lomasoli na tamata ivalavala ca ni vosoti ira na tani kevaka e sa nuitaka me rawata na veivosoti.6
Kemuni na taciqu kei na ganequ, era sa tu beka na tamata ka vakacacani keda? Eda sa bulataka li na ka vaka na vakacegu levu ni lomada mai na veivakaduiduitaki kei na cudru? Eda vakatara tiko li me tarovi keda na dokadoka mai na veivosoti kei na veisereki? Au sureti keda kece meda veivosoti vakataucoko ka laiva na veivakabulai me vu mai lomada. Kevaka e sega mada ga ni basika mai na veivosoti edaidai, kila tiko ni noda gadreva ka cakacakataka, ena basika mai—me vaka ga a yaco vei au ni oti na leqa i taciqu.
Yalovinaka nanuma talega ni sa dua na tiki veiganiti ni veivosoti e oka kina na noda vosoti keda.
“Raica, ko koya sa veivutunitaka na nona ivalavala ca,” sa kaya na Turaga, “ena vosoti, ia koi Au, na Turaga, au na sega ni nanuma tale na nona ivalavala ca.”7
Au vakamasuti keda kece edaidaiI meda nanuma ka muria na ivakaraitaki i Jisu Karisito. Ena kauveilatai e Kolikoca, ena Nona vutugu, a tukuna o Koya na vosa oqo: “I Tamaqu, kakua ni cudruvi ira; ni ra sa sega ni kila na ka era sa kitaka.”8
Ena taukeni ni dua na yalo veivosoti kei na kena cakacakataki, vakataka na noqu itubutubu kei na ganequ qase duadua, sa rawa ni da kila na yalayala ni iVakabula: “Au sa laiva vei kemudou na vakacegu, au sa solia vei kemudou na noqu vakacegu: au sa sega ni solia vei kemudou me vaka sa solia ko vuravura. Me kakua ni rarawa na yalomudou, se rere.”9
Au vakadinadinataka ni na basika mai ki na noda bula na vakacegu oqo ni da tutaka na ivakavuvuli i Jisu Karisito ka muria na Nona ivakaraitaki ni vosoti ira na tani. Ni da sa veivosoti, au yalataka ni na vaqaqacotaki keda na iVakabula, ka na curuma na noda bula na Nona kaukauwa kei na reki.
Sa lala na ibulubulu. Sa bula na Karisito. Au kilai Koya. Au lomani Koya. Au vakavinavinakataka na Nona loloma soliwale, sai koya na kaukauwa veivaqaqacotaki sa veiganiti me vakabula na ka kecega. Ena yaca tabu i Jisu Karisito, emeni.