Elder Ulisses Soares

Kuoramu ni iApositolo Le Tinikarua

Na parofita bula, ka oka kina o Peresitedi Russell M. Nelson, era ivakatakilakila ni loloma ni Kalou vei ira na Luvena, e vakadinadinataka o Elder Ulisses Soares ena imatai ni nona vosa ena koniferedi raraba, vaka lewe ni Kuoramu ni iApositolo Le Tinikarua.

“E sega beka ni veivakalougatataki me tiko na noda parofita, daurairai, ka dauvakatakila e vuravura ena veisiga eda bula kina oqo, ka segata me kila na loma ni Turaga ka muria? E veivakacegui ni da kila ni sega ni da tu duadua e vuravura, dina ni tu na bolebole eda sotava ena bula.”

E dina ni vakila ni sega ni ganiti koya nona kacivi me iApositolo, e kaya o Elder Soares, “na vosa kei na yalomalumalumu” e matai Peresitedi Nelson, “ena nona vakadewataka mai na itavi oqo au vakila kina ni ovigi au na nona loloma na iVakabula.”

Ena nona tokoni ena 31 ni Maji, 2018, sa yaco kina o Elder Soares me imatai ni iApositolo ni Lotu mai Amerika vaka-Latina. Ni bera nona veikacivi, a lewe tu ni Mataveiliutaki ni Vitusagavulu me tekivu mai na 6 ni Janueri, 2013, ka qarava voli e dua na itavilesi digitaki ena vukudratou na Matabisopi Vakatulewa e Salt Lake City.

A kacivi o Elder Soares me Vakaitutu Raraba ena Vitusagavulu ena ika 2 ni Epereli, 2005. Ena veikacivi oqori, a veiqaravi kina vakadaunivakasala ena iWasewase ena Cevaicake kei Aferika kei na Ceva kei Brazil ka Peresitedi ni iWasewase e Brazil.

Sa veiqaravi talega o Elder Soares ena vica tale na veikacivi ena Lotu Sa daukaulotu tudei oti o koya ena Tabana ni Kaulotu na Brazil Rio de Janeiro, peresitedi ni kuoramu ni italatala qase, daunivakasala ena matabisopi, lewe ni matabose e cake, sekeriteri liu ni iteki, itini ni welefea ena yasana, peresitedi ni iteki, ka peresitedi ni Tabana ni Kaulotu na Portugal Porto mai na 2000 ki na 2003.

E dua nona veikacivi bibi duadua a yaco mai ni yabaki 15, ni kerei koya nona bisopi me veivakavulici toka vakawawa ena kalasi ni itabagone ena Wilivola ni Sigatabu. Ena nona vakarautaka e dua na lesoni ena ivakarau me rawati kina e dua na ivakadinadina, a lewa na gonetagane o Ulisses me masulaka na veivakadeitaki me baleta na dina ni kosipeli.

“Niu tekiduru meu taroga na Turaga kevaka e dina na kosipeli,” a nanuma lesu o koya, “a yaco mai e dua na yalo kamica, e dua na domo lailai ka vakadeitaka vei au meu tomana tikoga. E kaukauwa sara ka sega ni rawa meu kaya niu sega ni kila.”

Ena 1985 a rawata e dua na koroi ni bejila ni daunifika kei na cakacaka vakailavo mai na School of Economic Science ena Univesiti na São Paulo Pontifical Catholic. Ni oti nona rawata na diqiri ni masita ni liutaki bisinisi, a cakacaka vakadaunifika ka odita ni veikabani cokovata ni veimatanitu e Brazil ka dairekita ni veika vakayago ena valenivolavola ni iwasewase ni Lotu e São Paulo.

A sucu o Ulisses Soares mai São Paulo, Brazil, ena 2 ni Okotova, 1958. A vakamautaki Rosana Fernandes ena Okotova 1982. Ena nona vosa ni koniferedi raraba, a vakavinavinakataki watina o Elder Soares ena nona loloma kei na veitokoni.

“Sa ivakaraitaki o koya ni yalovinaka, loloma, kei na yalodina vakaoti vua na Turaga kei au kei na noqu matavuvale,” oka kina na luvedrau e tolu kei na makubudrau e tolu, e kaya o koya ena nona vosa ni koniferedi. Au lomani koya mai na veitiki kece sara ni utoqu, kau vakavinavinakataka na nona veivakauqeti vinaka vei keitou.